ಬೆಂಗಳೂರು, ಮೇ.30 www.bengaluruwire.com: ಭಾರತೀಯ ಸೇನೆಯ ಪ್ರತಿಷ್ಠಿತ ವಿಭಾಗವಾದ ಕರ್ನಾಟಕ ಮತ್ತು ಕೇರಳ (ಕೆ&ಕೆ) ಸಬ್‌ ಏರಿಯಾದ ನೂತನ ಜನರಲ್ ಆಫೀಸರ್ ಕಮಾಂಡಿಂಗ್ (ಜಿಒಸಿ) ಆಗಿ ಮೇಜರ್ ಜನರಲ್ ಭರತ್ ಮೆಹತಾನಿ ಅವರು ಶನಿವಾರ (ಮೇ 30) ಅಧಿಕಾರ ವಹಿಸಿಕೊಂಡಿದ್ದಾರೆ.
ಮೂರು ದಶಕಗಳಿಗೂ ಹೆಚ್ಚು ಕಾಲದ ಸುದೀರ್ಘ ಸೇವಾ ಅನುಭವ ಹೊಂದಿರುವ ಮೇಜರ್ ಜನರಲ್ ಭರತ್ ಮೆಹತಾನಿ ಅವರು, ಭಾರತೀಯ ಸೇನೆಯ ವಿವಿಧ ಭೌಗೋಳಿಕ ಪ್ರದೇಶಗಳು ಮತ್ತು ಕಾರ್ಯಾಚರಣೆಗಳಲ್ಲಿ ಸೇವೆ ಸಲ್ಲಿಸಿದ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಅಧಿಕಾರ ಸ್ವೀಕರಿಸಿದ ಕೂಡಲೇ ಅವರು ದೇಶಕ್ಕಾಗಿ ಪ್ರಾಣತೆತ್ತ ಹುತಾತ್ಮ ಯೋಧರಿಗೆ ಗೌರವ ನಮನ ಸಲ್ಲಿಸಿದರು. ಬಳಿಕ ಅಧಿಕಾರಿಗಳನ್ನು ಉದ್ದೇಶಿಸಿ ಮಾತನಾಡಿದ ಅವರು, ಸೇನೆಯ ಎಲ್ಲಾ ಕಾರ್ಯಾಚರಣೆಗಳಲ್ಲೂ ಅತ್ಯುತ್ತಮ ಸಾಧನೆ ತೋರುವಂತೆ ಹಾಗೂ ಕರ್ತವ್ಯ ನಿಷ್ಠೆ ಮೆರೆಯುವಂತೆ ಕರೆ ನೀಡಿದರು.
2,181 ಅಗ್ನಿವೀರರ ನಿರ್ಗಮನ ಪಥಸಂಚಲನ (POP):
ನಗರದ ಮದ್ರಾಸ್ ಎಂಜಿನಿಯರಿಂಗ್ ಗ್ರೂಪ್ ಮತ್ತು ಸೆಂಟರ್ (ಎಂಇಜಿ) ಪರೇಡ್ ಮೈದಾನ ಶನಿವಾರ ಮಿಲಿಟರಿ ಶಿಸ್ತು ಮತ್ತು ಹೆಮ್ಮೆಯ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾಯಿತು. ಕಠಿಣ ಮಿಲಿಟರಿ ತರಬೇತಿಯನ್ನು ಯಶಸ್ವಿಯಾಗಿ ಪೂರೈಸಿದ ಬರೋಬ್ಬರಿ 2,181 ಅಗ್ನಿವೀರರ ನಿರ್ಗಮನ ಪಥಸಂಚಲನ (Passing Out Parade) ಅತ್ಯಂತ ಅದ್ಧೂರಿಯಾಗಿ ಜರುಗಿತು.
ಗೋವಿಂದಸ್ವಾಮಿ ಡ್ರಿಲ್ ಸ್ಕ್ವೇರ್‌ನಲ್ಲಿ ನಡೆದ ಈ ಪಥಸಂಚಲನದಲ್ಲಿ ಸೇನಾ ಬ್ಯಾಂಡ್‌ನ ಸುಮಧುರ ತಾಳಕ್ಕೆ ತಕ್ಕಂತೆ ಹೆಜ್ಜೆ ಹಾಕಿದ ಅಗ್ನಿವೀರರು, ತಮ್ಮ ಶಿಸ್ತು ಮತ್ತು ಸಮರ್ಪಣಾ ಭಾವವನ್ನು ಪ್ರದರ್ಶಿಸಿದರು. ಇದು ಮದ್ರಾಸ್ ಸ್ಯಾಪರ್ಸ್‌ನ ಉನ್ನತ ಮಟ್ಟದ ತರಬೇತಿ ಹಾಗೂ ಪರಂಪರೆಯನ್ನು ಎತ್ತಿಹಿಡಿಯಿತು.
ಪೋಷಕರಿಗೆ ‘ಗೌರವ್ ಪದಕ್’ ಗೌರವ:
ಎಂಇಜಿ ಕೇಂದ್ರದ ಕಮಾಂಡೆಂಟ್ ಬ್ರಿಗೇಡಿಯರ್ ಅಜಯ್ ಸಿಂಗ್ ಠಾಕೂರ್ ಅವರು ಪರೇಡ್‌ನ ಗೌರವ ವಂದನೆ ಸ್ವೀಕರಿಸಿದರು. ತರಬೇತಿ ಪೂರ್ಣಗೊಳಿಸಿದ ಯೋಧರನ್ನು ಅಭಿನಂದಿಸಿದ ಅವರು, “ಸೇನಾ ಜೀವನದಲ್ಲಿ ಶಿಸ್ತು, ಪ್ರಾಮಾಣಿಕತೆ ಮತ್ತು ಧೈರ್ಯ ಅತ್ಯಂತ ಮಹತ್ವದ್ದಾಗಿದೆ. ಭಾರತೀಯ ಸೇನೆಯ ಮೌಲ್ಯಗಳು ಮತ್ತು ಸಂಪ್ರದಾಯಗಳನ್ನು ಯುವ ಯೋಧರು ಸದಾ ಎತ್ತಿಹಿಡಿಯಬೇಕು,” ಎಂದು ಕಿವಿಮಾತು ಹೇಳಿದರು.
ಯೋಧರ ಸಾಧನೆಯ ಹಿಂದೆ ಬೆನ್ನೆಲುಬಾಗಿ ನಿಂತಿರುವ ಪೋಷಕರನ್ನು ಗೌರವಿಸಲು ಇದೇ ವೇಳೆ ‘ಗೌರವ್ ಪದಕ್’ ಪ್ರದಾನ ಮಾಡಲಾಯಿತು. ಪೋಷಕರು ತಮ್ಮ ಮಕ್ಕಳ ಸಮವಸ್ತ್ರಕ್ಕೆ ‘ತಂಬಿ ಸ್ಯಾಪರ್’ (Thambi Sapper) ಶ್ರೇಣಿಯ ಲಾಂಛನವನ್ನು ತೊಡಿಸುವ ಮೂಲಕ, ತರಬೇತಿದಾರರಿಂದ ಭಾರತೀಯ ಸೇನೆಯ ಯೋಧರಾಗಿ ಪರಿವರ್ತನೆಗೊಂಡ ಹೆಮ್ಮೆಯ ಕ್ಷಣಕ್ಕೆ ಸಾಕ್ಷಿಯಾದರು.
Join our WhatsApp Channel
