ದೇವಸ್ಥಾನಗಳ ಚಿನ್ನದ ಮೇಲೆ ಸರ್ಕಾರದ ಕಣ್ಣು? ಸಾಮಾಜಿಕ ಜಾಲತಾಣಗಳ ಸುದ್ದಿ ಸಂಪೂರ್ಣ ಸುಳ್ಳು ಎಂದ ಪಿಐಬಿ

ನವದೆಹಲಿ, ಮೇ.19 www.bengaluruwire.com: ದೇಶದ ವಿವಿಧ ಪ್ರಸಿದ್ಧ ದೇವಸ್ಥಾನಗಳಲ್ಲಿರುವ ಚಿನ್ನದ ಮೀಸಲು ಸಂಗ್ರಹವನ್ನು (Temple Gold Reserves) ಕೇಂದ್ರ ಸರ್ಕಾರವು ತನ್ನ ಸುಪರ್ದಿಗೆ ಪಡೆದು, ಅದಕ್ಕೆ ಪ್ರತಿಯಾಗಿ ದೇವಸ್ಥಾನದ ಟ್ರಸ್ಟ್‌ಗಳಿಗೆ ಗೋಲ್ಡ್ ಬಾಂಡ್ ನೀಡಲು ಮುಂದಾಗಿದೆ ಎನ್ನುವ ಸುದ್ದಿ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನ ಮೂಡಿಸಿತ್ತು.

ಆದರೆ, ಈ ವೈರಲ್ ಸುದ್ದಿ ಸಂಪೂರ್ಣವಾಗಿ ಸುಳ್ಳು ಮತ್ತು ಜನರನ್ನು ದಾರಿ ತಪ್ಪಿಸುವ ಪ್ರಯತ್ನ ಎಂದು ಪ್ರೆಸ್ ಇನ್ಫರ್ಮೇಷನ್ ಬ್ಯೂರೋ (PIB Fact Check) ಹಾಗೂ ಕೇಂದ್ರ ಹಣಕಾಸು ಸಚಿವಾಲಯ ಅಧಿಕೃತವಾಗಿ ಸ್ಪಷ್ಟಪಡಿಸಿದೆ.

ವೈರಲ್ ಆಗಿದ್ದ ಸುದ್ದಿಯಲ್ಲೇನಿತ್ತು?

ಸಾಮಾಜಿಕ ಜಾಲತಾಣವಾದ ಎಕ್ಸ್ (X)ನಲ್ಲಿ ಪ್ರಶಾಂತ್ ಕಿನಿ ಎಂಬುವವರ ಖಾತೆಯಿಂದ ಪೋಸ್ಟ್‌ ಒಂದನ್ನು ಹಂಚಿಕೊಳ್ಳಲಾಗಿತ್ತು. ಅದರಲ್ಲಿ, “ಭಾರತ ಸರ್ಕಾರವು ದೇವಸ್ಥಾನಗಳ ಚಿನ್ನದ ಮೀಸಲು ಸಂಗ್ರಹಕ್ಕೆ ಪ್ರತಿಯಾಗಿ ಗೋಲ್ಡ್ ಬಾಂಡ್‌ಗಳನ್ನು ವಿತರಿಸಲಿದೆ. ಅಷ್ಟೇ ಅಲ್ಲದೆ, ದೇವಸ್ಥಾನದ ಗೋಪುರಗಳು, ಗರ್ಭಗುಡಿ ಹಾಗೂ ಬಾಗಿಲುಗಳಿಗೆ ಅಳವಡಿಸಲಾಗಿರುವ ಚಿನ್ನದ ತಗಡುಗಳನ್ನು (Gold Plates) ಭಾರತದ ಆಯಕಟ್ಟಿನ ಚಿನ್ನದ ಮೀಸಲು (Strategic Gold Reserves of India) ಎಂದು ಪರಿಗಣಿಸಲಾಗುವುದು” ಎಂದು ಬರೆಯಲಾಗಿತ್ತು. ಈ ಪೋಸ್ಟ್ ಇಂಟರ್ನೆಟ್‌ನಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿತ್ತು.

ಕೇಂದ್ರ ಸರ್ಕಾರ ಮತ್ತು ಪಿಐಬಿ ನೀಡಿದ ಸ್ಪಷ್ಟನೆ:

ಈ ವಿಚಾರ ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿದ್ದಂತೆ ಎಚ್ಚೆತ್ತ ಕೇಂದ್ರ ಹಣಕಾಸು ಸಚಿವಾಲಯ ಹಾಗೂ ಪಿಐಬಿ ಫ್ಯಾಕ್ಟ್ ಚೆಕ್ ತಂಡವು ಸತ್ಯಾಸತ್ಯತೆಯನ್ನು ಹೊರಹಾಕಿದೆ.

ಯಾವುದೇ ಪ್ರಸ್ತಾವನೆ ಇಲ್ಲ: ಧಾರ್ಮಿಕ ಸಂಸ್ಥೆಗಳು ಅಥವಾ ದೇವಸ್ಥಾನಗಳ ಚಿನ್ನವನ್ನು ನಗದೀಕರಣಗೊಳಿಸುವ (Monetisation) ಯಾವುದೇ ಯೋಜನೆ ಅಥವಾ ಪ್ರಸ್ತಾವನೆ ಸರ್ಕಾರದ ಮುಂದೆ ಇಲ್ಲ.

ವದಂತಿಗಳನ್ನು ನಂಬಬೇಡಿ: ದೇವಸ್ಥಾನದ ಗೋಪುರ ಅಥವಾ ಕಳಶದ ಚಿನ್ನವನ್ನು ದೇಶದ ಆಯಕಟ್ಟಿನ ಮೀಸಲು ಸಂಗ್ರಹ ಎಂದು ಪರಿಗಣಿಸುವ ವರದಿಗಳು ಸಂಪೂರ್ಣ ಆಧಾರರಹಿತ ಮತ್ತು ಕಲ್ಪಿತ ಕಥೆಗಳಾಗಿವೆ.

ಅಧಿಕೃತ ಮೂಲಗಳನ್ನೇ ಆಶ್ರಯಿಸಿ: ಸಾರ್ವಜನಿಕರು ಇಂತಹ ಯಾವುದೇ ಅಪ್ರಮಾಣಿತ ಮತ್ತು ಸುಳ್ಳು ಸುದ್ದಿಗಳನ್ನು ಶೇರ್ ಮಾಡಬಾರದು ಹಾಗೂ ಸರ್ಕಾರದ ಅಧಿಕೃತ ವೆಬ್‌ಸೈಟ್‌ಗಳ ಮೂಲಕವೇ ಮಾಹಿತಿ ಪಡೆದುಕೊಳ್ಳಬೇಕು ಎಂದು ಸರ್ಕಾರ ಮನವಿ ಮಾಡಿದೆ.

ಯಾವುದೇ ಅಧಿಕೃತ ಆದೇಶ ಅಥವಾ ತೀರ್ಮಾನ ಕೈಗೊಳ್ಳುವ ಮುನ್ನ ಹರಡುವ ಇಂತಹ ವದಂತಿಗಳು ಸಾರ್ವಜನಿಕರಲ್ಲಿ ಗೊಂದಲ ಮೂಡಿಸುವ ಉದ್ದೇಶ ಹೊಂದಿರುತ್ತವೆ. ಆದ್ದರಿಂದ ಇಂತಹ ಫೇಕ್ ನ್ಯೂಸ್‌ಗಳಿಂದ ದೂರವಿರಿ ಎಂದು ತಜ್ಞರು ಎಚ್ಚರಿಸಿದ್ದಾರೆ.