ಬೆಂಗಳೂರು, ಏ.02 www.bengaluruwire.com: ಸಿಲಿಕಾನ್ ಸಿಟಿಯ ಮನೆ ಮತ್ತು ವಾಣಿಜ್ಯ ಕಟ್ಟಡ ಮಾಲೀಕರಿಗೆ ರಾಜ್ಯ ಸರ್ಕಾರ ಮತ್ತು ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ಸಿಹಿ ಸುದ್ದಿಯೊಂದನ್ನು ನೀಡಿದೆ.
ಬೆಂಗಳೂರು ನಗರ ಪಾಲಿಕೆಗಳ ಕಟ್ಟಡ ಉಪವಿಧಿ 2026ರ ಕರಡು ತಿದ್ದುಪಡಿಯನ್ನು ಬಿಡುಗಡೆ ಮಾಡಲಾಗಿದ್ದು, ಕಟ್ಟಡ ನಿರ್ಮಾಣದ ವೇಳೆ ಆಗುವ ಸಣ್ಣಪುಟ್ಟ ನಿಯಮ ಉಲ್ಲಂಘನೆಗಳನ್ನು ಸಕ್ರಮಗೊಳಿಸಲು ದಾರಿ ಮಾಡಿಕೊಡಲಾಗಿದೆ.
ವಿಶೇಷವಾಗಿ, ಈ ಹಿಂದೆ ಇದ್ದ ನಿಯಮಗಳಿಗಿಂತ ಹೆಚ್ಚಿನ ರಿಯಾಯಿತಿ ನೀಡಲಾಗಿದ್ದು, ಮಂಜೂರಾದ ನಕ್ಷೆಗಿಂತ ಶೇ. 15 ರಷ್ಟು ಹೆಚ್ಚಿನ ವ್ಯತ್ಯಾಸವಿದ್ದರೂ ಸಹ ದಂಡ ಪಾವತಿಸಿ ಸಕ್ರಮ ಮಾಡಿಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ.
ಕರಡು ಅಧಿಸೂಚನೆಯ ಮುಖ್ಯಾಂಶಗಳು:
* ವ್ಯಾಪ್ತಿ: ಬೆಂಗಳೂರು ಪಶ್ಚಿಮ, ಉತ್ತರ, ದಕ್ಷಿಣ, ಪೂರ್ವ ಹಾಗೂ ಕೇಂದ್ರ ನಗರ ಪಾಲಿಕೆಗಳ ವ್ಯಾಪ್ತಿಗೆ ಈ ಹೊಸ ನಿಯಮ ಅನ್ವಯಿಸಲಿದೆ.
* ಸಕ್ರಮದ ಮಿತಿ: 500 ಚದರ ಮೀಟರ್ವರೆಗಿನ ನಿವೇಶನಗಳಲ್ಲಿ ನಿರ್ಮಿಸಲಾದ ಕಟ್ಟಡಗಳ ಸೆಟ್ಬ್ಯಾಕ್ ಮತ್ತು ಎಫ್ಎಆರ್ (FAR) ನಲ್ಲಿ ಶೇ. 15 ರಷ್ಟು ವ್ಯತ್ಯಾಸವಿದ್ದರೆ ಅದನ್ನು ಸಕ್ರಮಗೊಳಿಸಬಹುದು.
* ಎತ್ತರದ ಕಟ್ಟಡಗಳು: 15 ಮೀಟರ್ಗಿಂತ ಹೆಚ್ಚಿನ ಎತ್ತರದ ಕಟ್ಟಡಗಳಿಗೂ ಸಹ ಶೇ. 7.5 ರಷ್ಟು ಎತ್ತರದ ವ್ಯತ್ಯಾಸವಿದ್ದಲ್ಲಿ ಸಕ್ರಮಕ್ಕೆ ಅವಕಾಶವಿದೆ.
* ದಂಡ ಶುಲ್ಕ (Compounding Fee): ವಸತಿ ಕಟ್ಟಡಗಳಿಗೆ ಮಾರ್ಗಸೂಚಿ ದರ (Guidance Value) ಮೇಲೆ ಶೇ. 3 ರಿಂದ ಶೇ. 10 ರಷ್ಟು ಹಾಗೂ ವಾಣಿಜ್ಯ ಕಟ್ಟಡಗಳಿಗೆ ಶೇ. 6 ರಿಂದ ಶೇ. 12 ರಷ್ಟು ದಂಡ ವಿಧಿಸಲು ನಿರ್ಧರಿಸಲಾಗಿದೆ.
* ಅಂತಿಮ ದಿನಾಂಕ: ಈ ಕರಡು ತಿದ್ದುಪಡಿ ಬಗ್ಗೆ ಸಾರ್ವಜನಿಕರು ತಮ್ಮ ಆಕ್ಷೇಪಣೆ ಅಥವಾ ಸಲಹೆಗಳನ್ನು ಸಲ್ಲಿಸಲು ಏಪ್ರಿಲ್ 30 ರವರೆಗೆ ಸಮಯಾವಕಾಶ ನೀಡಲಾಗಿದೆ.
ಆಕ್ಷೇಪಣೆ ಸಲ್ಲಿಸುವುದು ಎಲ್ಲಿ?:
ಸಾರ್ವಜನಿಕರು ತಮ್ಮ ಲಿಖಿತ ಆಕ್ಷೇಪಣೆ, ಸಲಹೆಗಳನ್ನು ಈ ಕೆಳಗಿನ ಐದು ನಗರ ಪಾಲಿಕೆಗಳಲ್ಲಿ ಸಲ್ಲಿಸಬಹುದಾಗಿದೆ:
ಬೆಂಗಳೂರು ಉತ್ತರ ಮಹಾನಗರ ಪಾಲಿಕೆ – ಆಯುಕ್ತರ ಕಚೇರಿ, ಅಮೃತಹಳ್ಳಿ ಮುಖ್ಯ ರಸ್ತೆ, ಬ್ಯಾಟರಾಯನಪುರ, ಬೆಂಗಳೂರು – 560092.
ಬೆಂಗಳೂರು ಉತ್ತರ ಮಹಾನಗರ ಪಾಲಿಕೆ – ಆಯುಕ್ತರ ಕಚೇರಿ, ಅಮೃತಹಳ್ಳಿ ಮುಖ್ಯ ರಸ್ತೆ, ಬ್ಯಾಟರಾಯನಪುರ, ಬೆಂಗಳೂರು – 560092.
ಬೆಂಗಳೂರು ಕೇಂದ್ರ ಮಹಾನಗರ ಪಾಲಿಕೆ – ಆಯುಕ್ತರ ಕಚೇರಿ, 10 ನೇ ಮಹಡಿ, ಸಾರ್ವಜನಿಕ ಉಪಯುಕ್ತತಾ ಕಟ್ಟಡ (ಪಬ್ಲಿಕ್ ಯುಟಿಲಿಟಿ ಬಿಲ್ಡಿಂಗ್), ಎಂಜಿ ರಸ್ತೆ, ಬೆಂಗಳೂರು – 560001.
ಬೆಂಗಳೂರು ಪೂರ್ವ ಮಹಾನಗರ ಪಾಲಿಕೆ – ಆಯುಕ್ತರ ಕಚೇರಿ, ಆರ್ಎಚ್ಬಿ ಕಾಲೋನಿ, ಫೀನಿಕ್ಸ್ ಮಾಲ್ ಎದುರು, ಬೆಂಗಳೂರು – 560048.
ಬೆಂಗಳೂರು ದಕ್ಷಿಣ ಮಹಾನಗರ ಪಾಲಿಕೆ – ಆಯುಕ್ತರ ಕಚೇರಿ, ಪಾಲಿಕೆ ವಾಣಿಜ್ಯ ಸಂಕೀರ್ಣ, 9 ನೇ ಮುಖ್ಯ ರಸ್ತೆ, 9 ನೇ ಕ್ರಾಸ್, ಜಯನಗರ 2 ನೇ ಬ್ಲಾಕ್, ಬೆಂಗಳೂರು – 560001.
“ಬೆಂಗಳೂರು ಪಶ್ಚಿಮ ನಗರ ಪಾಲಿಕೆ, ಆಯುಕ್ತರ ಕಚೇರಿ, 16ನೇ ಕ್ರಾಸ್ ರಸ್ತೆ, ಐಪಿಪಿ ಕಚೇರಿ, ಮಲ್ಲೇಶ್ವರಂ, ಬೆಂಗಳೂರು – 560 003” ಈ ವಿಳಾಸಕ್ಕೆ ಸಲ್ಲಿಸಬಹುದಾಗಿದೆ.
Join our WhatsApp Channel
