ಬೆಂಗಳೂರು, ಮಾ.24 www.bengaluruwire.com: ಸಿಲಿಕಾನ್ ಸಿಟಿಯ ಆಡಳಿತ ವ್ಯವಸ್ಥೆಯಲ್ಲಿ ಮಹತ್ವದ ಬದಲಾವಣೆ ತಂದಿರುವ ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ (GBA) ವ್ಯಾಪ್ತಿಯಲ್ಲಿನ ಐದು ನಗರ ಪಾಲಿಕೆಗಳು ಇದೇ ಮೊದಲ ಬಾರಿಗೆ ಸ್ವತಂತ್ರವಾಗಿ ಆಯವ್ಯಯ ಮಂಡಿಸಲು ಸಜ್ಜಾಗಿವೆ.
ಮಾರ್ಚ್ 27 ಮತ್ತು 28ರಂದು 2026-27ನೇ ಸಾಲಿನ ಬಜೆಟ್ ಮಂಡನೆಯಾಗಲಿದ್ದು, ಪ್ರತಿ ಪಾಲಿಕೆಯ ಬಜೆಟ್ ಗಾತ್ರವು ಸರಿಸುಮಾರು 3 ರಿಂದ 4 ಸಾವಿರ ಕೋಟಿ ರೂಪಾಯಿಗಳ ಮಿತಿಯಲ್ಲಿರಲಿದೆ ಎಂದು ಅಂದಾಜಿಸಲಾಗಿದೆ.
ಪೂರ್ವ ಪಾಲಿಕೆಯೇ ಪ್ರಬಲ:
ಐದು ಪಾಲಿಕೆಗಳ ಪೈಕಿ ಆರ್ಥಿಕವಾಗಿ ಪೂರ್ವ ನಗರ ಪಾಲಿಕೆಯು ಅತ್ಯಂತ ಸದೃಢವಾಗಿದ್ದು, ಇಲ್ಲಿನ ಬಜೆಟ್ ಗಾತ್ರ ₹3,500 ರಿಂದ ₹4,500 ಕೋಟಿ ತಲುಪುವ ಸಾಧ್ಯತೆಯಿದೆ. ಕಳೆದ ವರ್ಷ (2025-26) ಬಿಬಿಎಂಪಿ ಬಜೆಟ್ ಗಾತ್ರ ₹19,930 ಕೋಟಿಯಾಗಿದ್ದರೂ, ಜಿಬಿಎ ರಚನೆಯ ಗೊಂದಲ ಹಾಗೂ ಆಯವ್ಯಯ ಅನುಷ್ಠಾನದಲ್ಲಿನ ಕೊರತೆಯಿಂದಾಗಿ ಕೇವಲ ಶೇ.15 ರಿಂದ 20 ರಷ್ಟು ಮಾತ್ರ ಪ್ರಗತಿಯಾಗಿದೆ.
ಈ ಬಾರಿ ರಾಜ್ಯ ಸರ್ಕಾರದಿಂದ ಐದು ನಗರ ಪಾಲಿಕೆಗಳಿಗೆ ನೇರವಾಗಿ ಅನುದಾನ ಮೀಸಲಿಟ್ಟಿಲ್ಲ. ಕೇವಲ ಸ್ವಂತ ಸಂಪನ್ಮೂಲ, ಕೇಂದ್ರ ಸರ್ಕಾರ ಅನುದಾನ, ಬಿಸ್ಮೈಲ್ ಗೆ ರಾಜ್ಯ ಸರ್ಕಾರ ಅನಿದಾನ ಮೀಸಲಿಟ್ಟಿರುವುದರಿಂದ ಒಟ್ಟು ಬಜೆಟ್ ಗಾತ್ರ ₹20,000 ಕೋಟಿ ಆಸುಪಾಸಿನಲ್ಲಿರಲಿದೆ.
ಆದ್ಯತಾ ವಲಯಗಳು:
ಈ ಬಾರಿಯ ಬಜೆಟ್‌ನಲ್ಲಿ ರಸ್ತೆ ಗುಂಡಿ ಮುಕ್ತಗೊಳಿಸುವುದು, ಘನತ್ಯಾಜ್ಯ ನಿರ್ವಹಣೆ, ಬೃಹತ್ ನೀರುಗಾಲುವೆ (ರಾಜಕಾಲುವೆ) ಅಭಿವೃದ್ಧಿ, ನಮ್ಮ ಕ್ಲಿನಿಕ್ ಮತ್ತು ಪಾಲಿಕೆ ಆಸ್ಪತ್ರೆಗಳ ಸುಧಾರಣೆಗೆ ಹೆಚ್ಚಿನ ಒತ್ತು, ಪ್ರಮುಖ ಜಂಕ್ಷನ್ ಗಳ ಅಭಿವೃದ್ಧಿಗೆ ಗಮನ ನೀಡಲಾಗುತ್ತದೆ. ವಾರ್ಡ್ ಮಟ್ಟದಲ್ಲಿ ಮಳೆ ನೀರು ಮೋರಿ ಸ್ವಚ್ಛತೆ, ಪಾದಚಾರಿ ಮಾರ್ಗಗಳು, ಬೀದಿ ವ್ಯಾಪಾರಿಗಳಿಗೆ ವ್ಯಾಪಾರ ನಡೆಸಲು ವಾಹನ ನೀಡಿಕೆ, ಕೆರೆ- ಉದ್ಯಾನವನ, ಎಲ್ ಇಡಿ ಬೀದಿ ದೀಪಗಳ ಅಳವಡಿಕೆ, ನಗರದಲ್ಲಿರುವ ಇಂದಿರಾ ಕ್ಯಾಂಟಿನ್ ಗಳಿಗೆ ಬಲ ತುಂಬುವ ಕೆಲಸ, ಸಾರ್ವಜನಿಕ ಶೌಚಾಲಯಗಳ ನಿರ್ವಹಣೆಗೆ ಆದ್ಯತೆ ನೀಡಲಾಗುತ್ತದೆ.
ಪಾಲಿಕೆಗಳಿಗೆ ಈ ಆರ್ಥಿಕ ಸಂಪನ್ಮೂಲಗಳೇ ಆಧಾರ:
ಆಸ್ತಿ ತೆರಿಗೆ, ಜಾಹೀರಾತು ಪರವಾನಗಿಯಿಂದ ಬರುವ ಆದಾಯ, ನಗರ ಯೋಜನಾ ವಿಭಾಗದಿಂದ ಸಂಗ್ರಹವಾಗುವ ಶುಲ್ಕ, ಒಎಫ್ ಸಿ ಶುಲ್ಕ ವಿಶ್ವಬ್ಯಾಂಕ್ ನೆರವು, ಕೇಂದ್ರ ಸರ್ಕಾರದ 16ನೇ ಹಣಕಾಸು ಆಯೋಗ, ಸ್ವಚ್ಛ ಭಾರತ್ ಯೋಜನೆಯ ಅನುದಾನಗಳು ಪಾಲಿಕೆಗಳ ಮುಖ್ಯ ಆರ್ಥಿಕ ಮೂಲಗಳಾಗಿವೆ.
ಬಜೆಟ್ ಮಂಡನೆಯ ವೇಳಾಪಟ್ಟಿ:
ದಿನಾಂಕ: 27-03-2026, ಶುಕ್ರವಾರ
* ಪೂರ್ವ ನಗರ ಪಾಲಿಕೆ: ಬೆಳಿಗ್ಗೆ 09:30ಕ್ಕೆ, ಆರ್‌ಎಚ್‌ಬಿ ಕಾಲೋನಿ, ಮಹದೇವಪುರ ನಗರ ಪಾಲಿಕೆ ಕಚೇರಿಯಲ್ಲಿ ಮಂಡನೆ.
* ಕೇಂದ್ರ ನಗರ ಪಾಲಿಕೆ: ಮಧ್ಯಾಹ್ನ 12:30ಕ್ಕೆ, ಎಂ.ಜಿ. ರಸ್ತೆಯ ಮಯೋ ಹಾಲ್‌ನಲ್ಲಿ ಮಂಡನೆ.
ದಿನಾಂಕ: 28-03-2026, ಶನಿವಾರ:
* ಉತ್ತರ ನಗರ ಪಾಲಿಕೆ: ಬೆಳಿಗ್ಗೆ 09:30ಕ್ಕೆ, ಯಲಹಂಕ ನ್ಯೂ ಟೌನ್‌ನ ಅಂಬೇಡ್ಕರ್ ಭವನದಲ್ಲಿ ಮಂಡನೆ.
* ಪಶ್ಚಿಮ ನಗರ ಪಾಲಿಕೆ: ಮಧ್ಯಾಹ್ನ 12:30ಕ್ಕೆ, ಮಲ್ಲೇಶ್ವರಂನ ಐಪಿಪಿ ಸೆಂಟರ್‌ನಲ್ಲಿ ಮಂಡನೆ.
* ದಕ್ಷಿಣ ನಗರ ಪಾಲಿಕೆ: ಮಧ್ಯಾಹ್ನ 02:30ಕ್ಕೆ, ಜಯನಗರ 2ನೇ ಹಂತದ ನಗರ ಪಾಲಿಕೆ ಕಚೇರಿಯಲ್ಲಿ ಮಂಡನೆ.
Join our WhatsApp Channel
