ಮಾಲಿನ್ಯಕ್ಕೆ ಬ್ರೇಕ್: ದೆಹಲಿಯಲ್ಲಿ ಇನ್ನು ಮುಂದೆ ಇ-ಆಟೋಗಳದ್ದೇ ಪಾರುಪತ್ಯ

ನವದೆಹಲಿ, ಮೇ.16 www.bengaluruwire.com: ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ದಿನೇ ದಿನೇ ಹೆಚ್ಚುತ್ತಿರುವ ವಾಯು ಮಾಲಿನ್ಯಕ್ಕೆ ಇತಿಶ್ರೀ ಹಾಡಲು ಕೇಂದ್ರ ವಾಯು ಗುಣಮಟ್ಟ ನಿರ್ವಹಣಾ ಆಯೋಗ (CAQM) ಅತ್ಯಂತ ಕಟ್ಟುನಿಟ್ಟಾದ ಮತ್ತು ಪ್ರಮುಖ ನಿರ್ಧಾರವೊಂದನ್ನು ಕೈಗೊಂಡಿದೆ.

2027ರ ಜನವರಿ 1ರಿಂದ ದೆಹಲಿಯಲ್ಲಿ ಕೇವಲ ಎಲೆಕ್ಟ್ರಿಕ್ ಮೂರು ಚಕ್ರಗಳ ವಾಹನಗಳ (Electric Three-Wheelers) ನೋಂದಣಿಗೆ ಮಾತ್ರ ಅವಕಾಶ ನೀಡಲಾಗುವುದು ಎಂದು ಆಯೋಗ ಶುಕ್ರವಾರ ಪ್ರಕಟಿಸಿದೆ.

ಹಂತ ಹಂತವಾಗಿ ವಿಸ್ತರಣೆ:

ಮಾಲಿನ್ಯ ರಹಿತ ಸಾರಿಗೆ ವ್ಯವಸ್ಥೆಯನ್ನು ಉತ್ತೇಜಿಸುವ ಉದ್ದೇಶದಿಂದ ಜಾರಿಗೆ ತರಲಾಗುತ್ತಿರುವ ಈ ಹೊಸ ನಿಯಮದ ಪ್ರಕಾರ, ದೆಹಲಿಯಲ್ಲಿ ನೋಂದಣಿಯಾಗುವ ಎಲ್ಲಾ ಹೊಸ ಆಟೋ ರಿಕ್ಷಾಗಳು ಹಾಗೂ ಸರಕು ಸಾಗಣೆ ಮಾಡುವ ಮೂರು ಚಕ್ರದ ವಾಹನಗಳು ಕಡ್ಡಾಯವಾಗಿ ಬ್ಯಾಟರಿ ಚಾಲಿತವಾಗಿರಬೇಕು. ಕೇವಲ ದೆಹಲಿ ಮಾತ್ರವಲ್ಲದೆ, ಈ ನಿಯಮವನ್ನು 2028ರ ವೇಳೆಗೆ ಗುರುಗ್ರಾಮ, ಫರಿದಾಬಾದ್, ಗಾಜಿಯಾಬಾದ್ ಮತ್ತು ನೋಯ್ಡಾದಂತಹ ರಾಷ್ಟ್ರೀಯ ರಾಜಧಾನಿ ವಲಯದ (NCR) ಇತರೆ ಹತ್ತಿರದ ನಗರಗಳಿಗೂ ವಿಸ್ತರಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಹಳೆಯ ವಾಹನಗಳಿಗೆ ಸದ್ಯಕ್ಕಿಲ್ಲ ಆತಂಕ:

ಪ್ರಸ್ತುತ ರಸ್ತೆಯಲ್ಲಿ ಸಂಚರಿಸುತ್ತಿರುವ ಪೆಟ್ರೋಲ್, ಡೀಸೆಲ್ ಮತ್ತು ಸಿಎನ್‌ಜಿ ಚಾಲಿತ ಮೂರು ಚಕ್ರದ ವಾಹನಗಳ ಮೇಲೆ ತಕ್ಷಣಕ್ಕೆ ಯಾವುದೇ ನಿಷೇಧ ಹೇರುತ್ತಿಲ್ಲ. ಆದರೆ, ಹಳೆಯ ಮತ್ತು ಹೆಚ್ಚು ಮಾಲಿನ್ಯಕಾರಕ ವಾಹನಗಳನ್ನು ಹಂತ ಹಂತವಾಗಿ ರಸ್ತೆಯಿಂದ ಮುಕ್ತಗೊಳಿಸಲು ಭವಿಷ್ಯದಲ್ಲಿ ಕಠಿಣ ಮಾರ್ಗಸೂಚಿ ಹಾಗೂ ಗಡುವುಗಳನ್ನು ನಿಗದಿಪಡಿಸುವುದಾಗಿ CAQM ಸೂಚನೆ ನೀಡಿದೆ.

ನಗರ ಪ್ರದೇಶಗಳಲ್ಲಿ ಸಣ್ಣ ವಾಣಿಜ್ಯ ಮತ್ತು ಪ್ರಯಾಣಿಕರ ಮೂರು ಚಕ್ರದ ವಾಹನಗಳ ಸಂಖ್ಯೆ ಹೆಚ್ಚಿರುವುದರಿಂದ, ಅವುಗಳ ವಿದ್ಯುದ್ದೀಕರಣದಿಂದ ವಾಯು ಮಾಲಿನ್ಯವನ್ನು ಅತ್ಯಂತ ವೇಗವಾಗಿ ನಿಯಂತ್ರಿಸಬಹುದು ಎಂದು ತಜ್ಞರ ಸಮಿತಿ ವರದಿ ನೀಡಿದೆ.

ಪರಿಸರ ತಜ್ಞರ ಸ್ವಾಗತ – ಮೂಲಸೌಕರ್ಯಕ್ಕೆ ಆಗ್ರಹ:

ಸಮುದಾಯ ಹಾಗೂ ಪರಿಸರ ಪ್ರೇಮಿಗಳು ಸರ್ಕಾರದ ಈ ನಿರ್ಧಾರವನ್ನು ಮುಕ್ತಕಂಠದಿಂದ ಸ್ವಾಗತಿಸಿದ್ದಾರೆ. ಆದರೆ, ಇದರೊಂದಿಗೆ ನಗರದಾದ್ಯಂತ ಸಮರ್ಪಕ ಚಾರ್ಜಿಂಗ್ ಸ್ಟೇಷನ್‌ಗಳ ಸ್ಥಾಪನೆ, ಬ್ಯಾಟರಿ ಸುರಕ್ಷತೆಯ ನಿಯಮಗಳು ಮತ್ತು ಆಟೋ ಚಾಲಕರಿಗೆ ಇವಿ ವಾಹನ ಖರೀದಿಸಲು ಸೂಕ್ತ ಆರ್ಥಿಕ ನೆರವು ಅಥವಾ ಸಬ್ಸಿಡಿಗಳನ್ನು ನೀಡಬೇಕು ಎಂದು ತಜ್ಞರು ಮತ್ತು ಗ್ರಾಹಕ ವೇದಿಕೆಗಳು ಸರ್ಕಾರವನ್ನು ಆಗ್ರಹಿಸಿವೆ.