ಬೆಂಗಳೂರು, ಜ.01 www.bengaluruwire.com: ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು (KSRTC) ಅಭಿವೃದ್ಧಿಪಡಿಸಿರುವ ಸುಧಾರಿತ ಆವೃತ್ತಿಯ ‘ಸಾರಿಗೆ ಮಿತ್ರ’ HRMS ಮೊಬೈಲ್ ಆಪ್ (ಆವೃತ್ತಿ 2.0.0) ಅನ್ನು ಸಾರಿಗೆ ಹಾಗೂ ಮುಜರಾಯಿ ಸಚಿವರಾದ ರಾಮಲಿಂಗಾ ರೆಡ್ಡಿ ಅವರು ಅಧಿಕೃತವಾಗಿ ಬಿಡುಗಡೆಗೊಳಿಸಿದರು.
ಡಿಜಿಟಲ್ ಕ್ರಾಂತಿಯತ್ತ ನಿಗಮ:
ಈ ಮೊಬೈಲ್ ಆಪ್ ಬಿಡುಗಡೆಯು ಕೇವಲ ತಾಂತ್ರಿಕ ಸೇರ್ಪಡೆಯಲ್ಲ, ಬದಲಾಗಿ ನಿಗಮದ ಡಿಜಿಟಲ್ ಪರಿವರ್ತನೆಯ ಸಂಕೇತವಾಗಿದೆ. ನೌಕರರ ಕಾರ್ಯಕ್ಷಮತೆಯನ್ನು ಹೆಚ್ಚಿಸುವುದು ಮತ್ತು ಆಡಳಿತದಲ್ಲಿ ಪಾರದರ್ಶಕತೆಯನ್ನು ಕಾಯ್ದುಕೊಳ್ಳುವುದು ಇದರ ಪ್ರಮುಖ ಉದ್ದೇಶವಾಗಿದೆ.
ಮಾನವ ಸಂಪನ್ಮೂಲ ಸೇವೆಗಳನ್ನು (HR Services) ನೌಕರರಿಗೆ ತ್ವರಿತವಾಗಿ ಮತ್ತು ಸುಲಭವಾಗಿ ಸ್ಮಾರ್ಟ್ ಫೋನ್ ಮೂಲಕ ಒದಗಿಸಲು ಈ ಆಪ್ ಸಹಕಾರಿಯಾಗಲಿದೆ ಎಂದು ಕೆಎಸ್ ಆರ್ ಟಿಸಿ ನಿಗಮ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದೆ.
‘ಸಾರಿಗೆ ಮಿತ್ರ’ ಆಪ್ 2.0.0ರ ಪ್ರಮುಖ ವೈಶಿಷ್ಟ್ಯಗಳೇನು?
ನೂತನ ಆಪ್ ಮೂಲಕ ನೌಕರರು ಕಚೇರಿಗೆ ಅಲೆದಾಡುವ ಬದಲು, ತಮ್ಮ ಮೊಬೈಲ್ ಮೂಲಕವೇ ಹಲವು ಸೇವೆಗಳನ್ನು ಪಡೆಯಬಹುದಾಗಿದೆ:
ಜಿಯೋ–ಫೆನ್ಸಿಂಗ್ ಹಾಜರಾತಿ: ಅತ್ಯಾಧುನಿಕ ತಂತ್ರಜ್ಞಾನವಾದ ಜಿಯೋ-ಫೆನ್ಸಿಂಗ್ ಆಧಾರಿತ ಹಾಜರಾತಿ ವ್ಯವಸ್ಥೆಯನ್ನು ಅಳವಡಿಸಲಾಗಿದೆ.
ವೇತನ ಪಟ್ಟಿ (Pay Slip): ನೌಕರರು ತಮ್ಮ ಮಾಸಿಕ ವೇತನದ ವಿವರಗಳನ್ನು ಒಂದೇ ಕ್ಲಿಕ್ ಮೂಲಕ ಡೌನ್ಲೋಡ್ ಮಾಡಿಕೊಳ್ಳಬಹುದು.
ರಜೆ ನಿರ್ವಹಣೆ: ತಮ್ಮ ಖಾತೆಯಲ್ಲಿರುವ ರಜೆಗಳ ವಿವರವನ್ನು ಪರಿಶೀಲಿಸಲು ಮತ್ತು ರಜೆ ನಿರ್ವಹಣೆಗೆ ಇದು ಸಹಕಾರಿ.
ಸೇವಾ ವಿವರಗಳು: ವೈಯಕ್ತಿಕ ಮಾಹಿತಿ, ಸರ್ವಿಸ್ ರಿಜಿಸ್ಟರ್ (SR) ವಿವರಗಳು, ಕುಟುಂಬದ ಸದಸ್ಯರ ಮಾಹಿತಿ ಹಾಗೂ ನಾಮಿನಿ ವಿವರಗಳನ್ನು ಸುಲಭವಾಗಿ ವೀಕ್ಷಿಸಬಹುದು.
ಮಾಸಿಕ ಹಾಜರಾತಿ: ತಿಂಗಳ ಹಾಜರಾತಿ ವಿವರಗಳನ್ನು ನೌಕರರು ತಾವಿದ್ದಲ್ಲಿಯೇ ನೋಡಬಹುದು.
ಸುತ್ತೋಲೆಗಳ ಲಭ್ಯತೆ: ನಿಗಮದ ವಿವಿಧ ವಿಭಾಗಗಳಿಂದ ಹೊರಡಿಸಲಾಗುವ ಪ್ರಮುಖ ಸುತ್ತೋಲೆಗಳು ಮತ್ತು ಆಂತರಿಕ ಸಂವಹನ ಮಾಹಿತಿಗಳು ಆಪ್ನಲ್ಲಿ ಲಭ್ಯವಿರುತ್ತವೆ.
ಈ ಸಂದರ್ಭದಲ್ಲಿ ಮಾತನಾಡಿದ ಸಚಿವರು, “ನೌಕರರ ಶ್ರೇಯೋಭಿವೃದ್ಧಿ ನಮ್ಮ ಆದ್ಯತೆಯಾಗಿದ್ದು, ಈ ಆಪ್ ಮೂಲಕ ನೌಕರರಿಗೆ ಅಗತ್ಯ ಮಾಹಿತಿ ಬೆರಳಂಚಿನಲ್ಲಿ ಸಿಗಲಿದೆ,” ಎಂದು ತಿಳಿಸಿದರು.
ಕಾರ್ಯಕ್ರಮದಲ್ಲಿ ಕೆಎಸ್ಆರ್ಟಿಸಿ ವ್ಯವಸ್ಥಾಪಕ ನಿರ್ದೇಶಕರಾದ ಶ್ರೀ ಅಕ್ರಂಪಾಷ (ಭಾಆಸೇ), ನಿರ್ದೇಶಕರು (ಸಿ ಮತ್ತು ಪ) ಡಾ. ನಂದಿನಿ ದೇವಿ (ಭಾಆಸೇ) ಹಾಗೂ ನಿಗಮದ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು. ಒಟ್ಟಾರೆಯಾಗಿ, ಈ ನೂತನ ವ್ಯವಸ್ಥೆಯು ಕೆಎಸ್ಆರ್ಟಿಸಿ ನೌಕರರ ದೈನಂದಿನ ಕಾರ್ಯಚಟುವಟಿಕೆಗಳನ್ನು ಸರಳಗೊಳಿಸಲಿದೆ ಎಂದರೆ ತಪ್ಪಾಗಲಾರದು.
Join our WhatsApp Channel
