ಬೆಂಗಳೂರು, ಮೇ.14 www.bengaluruwire.com: ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (BDA) 2000ನೇ ಇಸವಿಯಲ್ಲಿ ನಡೆಸಿದ್ದ ವಾಣಿಜ್ಯ ನಿವೇಶನ ಹರಾಜಿಗೆ ಸಂಬಂಧಿಸಿದಂತೆ ಸುಪ್ರೀಂ ಕೋರ್ಟ್ ಮಹತ್ವದ ತೀರ್ಪು ನೀಡಿದೆ.
ಬನಶಂಕರಿ 2ನೇ ಹಂತದಲ್ಲಿರುವ 50*80 ಅಳತೆಯ ವಾಣಿಜ್ಯ ನಿವೇಶನ ಸಂಖ್ಯೆ 4114ಕ್ಕೆ ಸಂಬಂಧಿಸಿದ ವಿವಾದದಲ್ಲಿ, ಅರ್ಜಿದಾರರಾದ ಮಿರ್ ನಾವೀದ್ ಅಹ್ಮದ್ ಅವರಿಗೆ ಸುಮಾರು ₹1.79 ಕೋಟಿ ಬಡ್ಡಿ ಪಾವತಿಸುವಂತೆ ನ್ಯಾಯಾಲಯ ಸೂಚಿಸಿದೆ.
ಪ್ರಕರಣದ ಹಿನ್ನೆಲೆ:
2000ನೇ ಇಸವಿಯಲ್ಲಿ ನಡೆದ ಹರಾಜಿನಲ್ಲಿ ಮಿರ್ ನಾವೀದ್ ಅವರು ₹48,32,100 ಮೊತ್ತಕ್ಕೆ ಅತಿ ಹೆಚ್ಚು ಬಿಡ್ ಮಾಡಿದ್ದರು. ಆಗ ಅವರು ಒಟ್ಟು ಮೊತ್ತದ ಶೇ. 25ರಷ್ಟು ಅಂದರೆ ₹12,08,100 ಪಾವತಿಸಿದ್ದರು. ಆದರೆ, ಆ ಸಮಯದಲ್ಲಿ ಕಾನೂನು ವಿವಾದ ಉಂಟಾದ ಕಾರಣ ಹರಾಜು ಪ್ರಕ್ರಿಯೆ ಸ್ಥಗಿತಗೊಂಡಿತ್ತು. ಬಿಡಿಎ ಹಣವನ್ನು ಹಿಂತಿರುಗಿಸಲು ಮುಂದಾದರೂ, ಅರ್ಜಿದಾರರು ಕೋರ್ಟ್ ಕೇಸ್ ಮುಗಿಯುವವರೆಗೆ ಕಾಯುವುದಾಗಿ ತಿಳಿಸಿದ್ದರು.
2016ರಲ್ಲಿ ಮುಗಿದ ಕಾನೂನು ಹೋರಾಟ:
ಸುದೀರ್ಘ 16 ವರ್ಷಗಳ ನಂತರ, ಅಂದರೆ 2016ರಲ್ಲಿ ಈ ನಿವೇಶನದ ಮೇಲಿದ್ದ ಕಾನೂನು ತೊಡಕು ನಿವಾರಣೆಯಾಯಿತು. ಆದರೂ ಬಿಡಿಎ ನಿವೇಶನ ಹಸ್ತಾಂತರಿಸಲು ವಿಳಂಬ ಮಾಡಿತ್ತು. ನಂತರ 2024ರಲ್ಲಿ ಬಿಡಿಎ ಶೇ. 18 ರಿಂದ 21ರಷ್ಟು ಬಡ್ಡಿಯೊಂದಿಗೆ ಬಾಕಿ ಹಣ ಪಾವತಿಸುವಂತೆ ನೋಟಿಸ್ ನೀಡಿತ್ತು. ಇದನ್ನು ಪ್ರಶ್ನಿಸಿ ಅರ್ಜಿದಾರರು ಹೈಕೋರ್ಟ್ ಮೆಟ್ಟಿಲೇರಿದ್ದರು. ಹೈಕೋರ್ಟ್ ಬಡ್ಡಿ ಇಲ್ಲದೆ ಹಣ ಪಡೆಯುವಂತೆ ಸೂಚಿಸಿತ್ತು. ಇದನ್ನು ಪ್ರಶ್ನಿಸಿ ಬಿಡಿಎ ಸುಪ್ರೀಂ ಕೋರ್ಟ್ ಮೊರೆ ಹೋಗಿತ್ತು.
ಸುಪ್ರೀಂ ಕೋರ್ಟ್ ತೀರ್ಪು:
ನ್ಯಾಯಮೂರ್ತಿಗಳಾದ ಸಂಜಯ್ ಕುಮಾರ್ ಮತ್ತು ಕೆ. ವಿನೋದ್ ಚಂದ್ರನ್ ಅವರಿದ್ದ ಪೀಠವು, “ತಪ್ಪು ಎರಡೂ ಕಡೆಯಿಂದ ನಡೆದಿದೆ” ಎಂದು ಅಭಿಪ್ರಾಯಪಟ್ಟಿದೆ. ಬಿಡಿಎ ಬಾಕಿ ಹಣವನ್ನು ಮೊದಲೇ ಕೇಳಬೇಕಿತ್ತು, ಹಾಗೆಯೇ ಅರ್ಜಿದಾರರು ಇಷ್ಟು ವರ್ಷಗಳ ಕಾಲ ಶೇ. 75ರಷ್ಟು ಹಣವನ್ನು ತಮ್ಮಲ್ಲೇ ಉಳಿಸಿಕೊಂಡು ಬಡ್ಡಿ ರಹಿತವಾಗಿ ಸೈಟ್ ಪಡೆಯುವುದು ನ್ಯಾಯವಲ್ಲ ಎಂದು ತಿಳಿಸಿದೆ.
ಅಂತಿಮ ಆದೇಶ:
ಅರ್ಜಿದಾರರು ₹1,79,65,012 ಬಡ್ಡಿ ಮೊತ್ತವನ್ನು 4 ವಾರಗಳೊಳಗೆ ಪಾವತಿಸಬೇಕು.
ಈ ಮೊತ್ತ ಪಾವತಿಯಾದ ನಂತರ ಬಿಡಿಎ ಅಧಿಕೃತವಾಗಿ ಸೇಲ್ ಡೀಡ್ (ಖಾತೆ ಬದಲಾವಣೆ) ಮಾಡಿಕೊಡಬೇಕು.
ಬಾಕಿ ಉಳಿದಿದ್ದ ಅಸಲು ಹಣ ₹36,24,000 ವನ್ನು ಈಗಾಗಲೇ 2024ರಲ್ಲಿ ಪಾವತಿಸಲಾಗಿದ್ದು, ಅದನ್ನು ಪರಿಗಣಿಸಲಾಗಿದೆ ಎಂದು ಸುಪ್ರೀಂಕೋರ್ಟ್ ತನ್ನ ಆದೇಶದಲ್ಲಿ ತಿಳಿಸಿ ಅರ್ಜಿಯನ್ನು ಇತ್ಯರ್ಥಪಡಿಸಿದೆ.
ಪ್ರಸ್ತುತ ಮಾರುಕಟ್ಟೆಯಲ್ಲಿ ಈ ನಿವೇಶನದ ಬೆಲೆ ₹30 ಕೋಟಿಗಿಂತ ಹೆಚ್ಚಿದೆ ಎಂದು ಅಂದಾಜಿಸಲಾಗಿದೆ. ಈ ತೀರ್ಪಿನ ಮೂಲಕ ದಶಕಗಳ ಕಾಲದ ಆಸ್ತಿ ವಿವಾದಕ್ಕೆ ತೆರೆ ಬಿದ್ದಂತಾಗಿದೆ.
Join our WhatsApp Channel
