ಬೆಂಗಳೂರು, ಏ.02 www.bengaluruwire.com: ಸಿಲಿಕಾನ್ ಸಿಟಿಯ ಟ್ರಾಫಿಕ್ ಕಗ್ಗಂಟನ್ನು ಬಿಡಿಸಲು ಬೆಂಗಳೂರು ಸಂಚಾರ ಪೊಲೀಸ್ ಇಲಾಖೆ ಈಗ ‘ವೈಜ್ಞಾನಿಕ’ ಹಾದಿ ಹಿಡಿದಿದೆ. ನಗರದ ವಾಹನ ದಟ್ಟಣೆ ತಗ್ಗಿಸಲು ಮತ್ತು ರಸ್ತೆ ಸುರಕ್ಷತೆ ಹೆಚ್ಚಿಸಲು ಸಂಚಾರ ಪೊಲೀಸ್ ಇಲಾಖೆ, ರಸ್ತೆ ಸಂಚಾರ ಶಿಕ್ಷಣ ಸಂಸ್ಥೆ (IRTE) ಹಾಗೂ ಡಿಯಾಜಿಯೋ ಇಂಡಿಯಾ ಜಂಟಿಯಾಗಿ ವಿಶೇಷ ಅಧ್ಯಯನ ನಡೆಸಿವೆ.
ಪ್ರಾಯೋಗಿಕವಾಗಿ ಮೂರು ಜಂಕ್ಷನ್ಗಳ ಆಯ್ಕೆ:
ಈ ಮಹತ್ವದ ಅಧ್ಯಯನಕ್ಕಾಗಿ ನಗರದ ಅತಿ ಹೆಚ್ಚು ದಟ್ಟಣೆ ಇರುವ ಚಾಲುಕ್ಯ ಸರ್ಕಲ್, ಕಂಟೋನ್ಮೆಂಟ್ ರೈಲು ನಿಲ್ದಾಣ ಜಂಕ್ಷನ್ ಹಾಗೂ ಎಚ್. ಸಿದ್ದಯ್ಯ ವೃತ್ತಗಳನ್ನು ಆಯ್ಕೆ ಮಾಡಿಕೊಳ್ಳಲಾಗಿದೆ. ಇಲ್ಲಿನ ರಸ್ತೆ ಬಳಕೆದಾರರ ವರ್ತನೆ, ವಾಹನಗಳ ಚಲನವಲನ ಮತ್ತು ಅಪಘಾತ ವಲಯಗಳನ್ನು ವೈಜ್ಞಾನಿಕವಾಗಿ ವಿಶ್ಲೇಷಿಸಲಾಗಿದೆ.
ಅಧ್ಯಯನದ ಪ್ರಮುಖ ಅಂಶಗಳು:
ಕಡಿಮೆ ವೆಚ್ಚದ ಪರಿಹಾರ: ರಸ್ತೆ ವಿನ್ಯಾಸದಲ್ಲಿ ಸಣ್ಣ ಬದಲಾವಣೆ, ಸೂಚನಾ ಫಲಕಗಳ ಅಳವಡಿಕೆ.
ಪಾದಚಾರಿ ಸುರಕ್ಷತೆ: ಪಾದಚಾರಿಗಳಿಗಾಗಿ ಸುರಕ್ಷಿತ ರಸ್ತೆ ದ್ವೀಪಗಳ (Pedestrian Islands) ನಿರ್ಮಾಣ.
ಸಿಗ್ನಲ್ ಸುಧಾರಣೆ: ವಾಹನ ಸಂಚಾರಕ್ಕೆ ಅನುಗುಣವಾಗಿ ಸಿಗ್ನಲ್ ವ್ಯವಸ್ಥೆ ಮಾರ್ಪಾಡು.
ಪೊಲೀಸರಿಗೆ ತರಬೇತಿ: ಸಂಚಾರ ಅಭಿಯಂತ್ರಣ ಮತ್ತು ನಿಯಮಗಳ ಜಾರಿ ಕುರಿತು ಅಧಿಕಾರಿಗಳಿಗೆ 2 ದಿನಗಳ ತರಬೇತಿ.
“ಟ್ರಾಫಿಕ್ ನಿರ್ವಹಣೆಗೆ ಕೇವಲ ದಂಡ ಹಾಕುವುದೊಂದೇ ಪರಿಹಾರವಲ್ಲ, ರಸ್ತೆ ವಿನ್ಯಾಸದ ವಾಸ್ತವತೆ ಅರಿಯುವುದು ಮುಖ್ಯ” ಎಂದು ಜಂಟಿ ಪೊಲೀಸ್ ಆಯುಕ್ತ ಕಾರ್ತಿಕ್ ರೆಡ್ಡಿ ತಿಳಿಸಿದ್ದಾರೆ. ಐಆರ್ಟಿಇ ಅಧ್ಯಕ್ಷ ರೋಹಿತ್ ಬಲೂಜಾ ಮಾತನಾಡಿ, ಸಂಚಾರ ನಿಯಂತ್ರಣದ ಮೂಲಕ ಮಾತ್ರ ದೀರ್ಘಕಾಲಿಕ ಸುಧಾರಣೆ ಸಾಧ್ಯ ಎಂದಿದ್ದಾರೆ. ಮುಂದಿನ ದಿನಗಳಲ್ಲಿ ಈ ಮಾದರಿಯನ್ನು ನಗರದ ಇತರೆ ಜಂಕ್ಷನ್ಗಳಿಗೂ ವಿಸ್ತರಿಸಲು ಇಲಾಖೆ ಯೋಜಿಸಿದೆ.
Join our WhatsApp Channel
