ಬೆಂಗಳೂರು, ಏ.02 www.bengaluruwire.com : ನಗರದ ಪಾಲಿಕೆ ವ್ಯಾಪ್ತಿಯಲ್ಲಿ ವಸತಿ ಕಟ್ಟಡ ಅಥವಾ ವಾಣಿಜ್ಯ ಕಟ್ಟಡದ ವಾಹನ ನಿಲ್ದಾಣ (Parking)ಕ್ಕೆ ಅನ್ವಯಿಸುವ ತೆರಿಗೆಯನ್ನು ಪ್ರದೇಶವಾರು ಯೂನಿಟ್ ದರದಲ್ಲಿ ನಿರ್ಧರಿಸಲು ಬಿಬಿಎಂಪಿ ಮಾ.29ರಂದು ಕರಡು ಅಧಿಸೂಚನೆಯನ್ನು ಹೊರಡಿಸಿದೆ. ಇದರಿಂದ ಪಾರ್ಕಿಂಗ್ ಇರುವ ಮನೆಗಳಿಗೆ ತೆರಿಗೆ ಬರೆ ಹಾಗೂ ದೊಡ್ಡ ದೊಡ್ಡ ವಾಣಿಜ್ಯ ಕಟ್ಟಡಗಳಿಗೆ ಅನುಕೂಲ ಮಾಡಿಕೊಡಲು ಹೊರಟಿದೆ.
ಟೆಕ್ ಪಾರ್ಕ್, ಮಾಲ್, ಆಸ್ಪತ್ರೆ, ಬಹುಮಹಡಿ ಕಟ್ಟಡಗಳಿಗೆ ಹಾಗೂ ಬಹುಮಹಡಿ ವಾಹನ ನಿಲ್ದಾಣದ ಕಟ್ಟಡಗಳಿಗೆ 21-10-2024 ರ ನಗರಾಭಿವೃದ್ಧಿ ಇಲಾಖೆಯ ಆದೇಶ ಹಾಗೂ 29-03-2025 ಬಿಬಿಎಂಪಿ ಕರಡು ಅಧಿಸೂಚನೆಯ (ದಿನಾಂಕ ಹಾಕುವ ಕಡೆ 2025ರ ಇಸವಿಯ ಬದಲಿಗೆ ಕಣ್ತಪ್ಪಿನಿಂದ 2024ನೇ ಇಸವಿ ಎಂದು ಪ್ರಕಟಿಸಿದೆ) ಪ್ರಕಾರ ಅನುಕೂಲ ಕಲ್ಪಿಸಲಿದೆ. ಹಾಲಿ ಆಸ್ತಿ ತೆರಿಗೆಯೊಂದಿಗೆ ಕಟ್ಟುವ ವಾಹನ ನಿಲ್ದಾಣ ತೆರಿಗೆ ನಿಯಮಾವಳಿ ಪ್ರಕಾರ ಸ್ವತ್ತಿನ ಪಾರ್ಕಿಂಗ್ ಮೀಸಲಿಟ್ಟ ಒಟ್ಟಾರೆ ಸ್ಥಳಕ್ಕೆ ಲೆಕ್ಕಾಚಾರ ಮಾಡಲಾಗುತ್ತಿತ್ತು.
ಆದರೆ ಈಗಿನ ಹೊಸ ಕರಡು ಅಧಿಸೂಚನೆ ಪ್ರಕಾರ ಪಾರ್ಕಿಂಗ್ ಸ್ಲಾಟ್ ಗೆ ಮಾತ್ರ ಪಾರ್ಕಿಂಗ್ ತೆರಿಗೆ ಅನ್ವಯವಾಗುತ್ತದೆ. ಇದರಿಂದ ದೊಡ್ಡ ದೊಡ್ಡ ವಾಣಿಜ್ಯ ಕಟ್ಟಡ, ಮಾಲ್, ಟೆಕ್ ಪಾರ್ಕ್ ಗಳಿಗೆ ಮಾತ್ರ ಬೃಹತ್ ಪ್ರಮಾಣದಲ್ಲಿ ಅನುಕೂಲವಾಗಲಿದೆ. ಇದರಿಂದ ಪಾಲಿಕೆಗೆ ಒಟ್ಟಾರೆ ಆಸ್ತಿ ತೆರಿಗೆಯಲ್ಲಿ ವಾಹನ ನಿಲ್ದಾಣಕ್ಕೆ ಅನ್ವಯಿಸುವ ಸ್ಥಳದ ಆದಾಯ ಕನಿಷ್ಠ 50 ರಿಂದ 100 ಕೋಟಿ ರೂ. ಕಡಿಮೆಯಾಗಲಿದೆ ಎನ್ನಲಾಗಿದೆ.
ವಸತಿ ಮತ್ತು ವಸತಿಯೇತರ ವಾಹನ ಪಾರ್ಕಿಂಗ್ ಬಗ್ಗೆ ನಗರಾಭಿವೃದ್ಧಿ ಇಲಾಖೆಯು 21-10-2024 ರಲ್ಲಿ ಮುಖ್ಯ ಆಯುಕ್ತರಿಗೆ ನೀಡಿದ ಆದೇಶದ ಪ್ರಕಾರ ಈ ನಿರ್ಧಾರದಿಂದ ಹೆಚ್ಚಿನ ಉಪಯೋಗ ಬೃಹತ್ ವಸತಿ/ವಸತಿಯೇತರ ಸಮುಚ್ಛಯಗಳಿಗೆ ಅನ್ವಯಿಸುವ ಆಸ್ತಿತೆರಿಗೆಯಲ್ಲಿ ಅಂದರೆ ದೊಡ್ಡ ದೊಡ್ಡ ಬಿಲ್ಡರ್ ಗಳಿಗೆ, ದೊಡ್ಡ ಮಾಲ್ ಗಳಿಗೆ ಭಾರಿ ಉಳಿತಾಯವಾಗುತ್ತದೆ.
ಮುಂದುವರೆದು, ಆದೇಶದಲ್ಲಿರುವಂತೆ ಕೇವಲ ವಾಹನ ನಿಲ್ದಾಣಕ್ಕೆ ಬಳಸಲಾಗುವ ಅಳತೆಗಷ್ಟೇ ಆಸ್ತಿತೆರಿಗೆ ಅನ್ವಯಿಸುತ್ತದೆ. ಇನ್ನುಳಿದ ಪ್ರದೇಶಗಳಾದ ಇಳಿಜಾರು (Ramp), ವಾಹನಮಾರ್ಗ (Driveway) ಪ್ರದೇಶಗಳಿಗೆ ಆಸ್ತಿತೆರಿಗೆ ವಿಧಿಸುವಂತಿಲ್ಲ. ಇದರಿಂದಾಗಿ, ಪಾಲಿಕೆಗೆ ಬರಬೇಕಾದ ಆಸ್ತಿತೆರಿಗೆ ಮೊತ್ತದಲ್ಲಿ ಭಾರಿ ಇಳಿಕೆಯಾಗುತ್ತದೆ ಎಂದು ಹೆಸರು ಬಹಿರಂಗಪಡಿಸಲು ಇಚ್ಛಿಸದ ಅಧಿಕಾರಿಯೊಬ್ಬರು ಬೆಂಗಳೂರು ವೈರ್ ಗೆ ತಿಳಿಸಿದ್ದಾರೆ.
ಉದಾಹರಣೆಗೆ, ಪಾಲಿಕೆ ವ್ಯಾಪ್ತಿಯಲ್ಲಿನ ಒಂದು ಬಹುಮಹಡಿ ವಾಹನ ನಿಲ್ದಾಣದ ಕಟ್ಟಡ (Multi Level Car Parking building)ದಲ್ಲಿ ಒಟ್ಟು 1614 ವಾಹನ ನಿಲ್ದಾಣಗಳಿಗೆ ಸ್ವಾಧೀನಾನುಭವ ಪತ್ರದಲ್ಲಿ ಅನುಮತಿ ನೀಡಲಾಗಿರುತ್ತದೆ. ಕಟ್ಟಡದ ಒಟ್ಟು ಅಳತೆ 9.5 ಲಕ್ಷ ಚದರ ಅಡಿಗಳಿದ್ದರೂ ವಾಹನ ನಿಲ್ದಾಣಕ್ಕೆ ಬಳಸುವ ಅಳತೆಯು ಕಟ್ಟಡ ನಿರ್ಮಾಣ ಉಪವಿಧಿಗಳನ್ವಯ ಅಂದಾಜು 150 ಅಡಿಗಳಷ್ಟು ಎಂದಾದರೆ ಈ ಆದೇಶದಂತೆ ಒಟ್ಟು ವಾಹನ ನಿಲ್ದಾಣಕ್ಕೆ ಆಸ್ತಿತೆರಿಗೆ ಒಳಪಡುವ ಅಳತೆಯು 2.42 ಲಕ್ಷ ಚದರ ಅಡಿಗಳಾಗುತ್ತದೆ. ಇದು ಕೇವಲ ಒಂದು ಕಟ್ಟಡದ ಅಂಕಿ ಸಂಖ್ಯೆಯಾದರೆ ಪಾಲಿಕೆ ವ್ಯಾಪ್ತಿಯ ಎಲ್ಲಾ ಕಟ್ಟಡಗಳಲ್ಲಿ ಪಾಲಿಕೆಗೆ ಪಾವತಿಸಬೇಕಾದ ಆಸ್ತಿತೆರಿಗೆಯಲ್ಲಿ ಭಾತಿ ವ್ಯತ್ಯಾಸವಾಗುತ್ತದೆ.
ವಸತಿ ಮತ್ತು ವಸತಿಯೇತರ ಪ್ರದೇಶಗಳ ಪಾರ್ಕಿಂಗ್ ಸ್ಥಳಗಳ ಆಸ್ತಿ ತೆರಿಗೆ ಪರಿಷ್ಕರಿಸಲು ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ಮಾ.29ರಂದು ಕರಡು ಅಧಿಸೂಚನೆ ಹೊರಡಿಸಿದೆ ಮತ್ತು ಈ ಅಧಿಸೂಚನೆ ಪ್ರಕಟವಾದ ಏಳು ದಿನಗಳಲ್ಲಿ ಆಕ್ಷೇಪಣೆ ಸಲ್ಲಿಸಲು ಅವಕಾಶ ನೀಡಿದೆ.
ಅಧಿಸೂಚನೆಯ ಪ್ರಕಾರ, ವಸತಿ ಉದ್ದೇಶದ ಕನಿಷ್ಠ 150 ಚದರ ಅಡಿ ಪಾರ್ಕಿಂಗ್ ಸ್ಥಳಕ್ಕೆ ವಾರ್ಷಿಕ 600 ರೂಪಾಯಿ ವಾಹನ ನಿಲ್ದಾಣ ತೆರಿಗೆ(ಆರಂಭಿಕ ದರ) ಚದರ ಅಡಿಗೆ 2 ರೂ. ವಿಧಿಸಲು ನಿರ್ಧರಿಸಲಾಗಿದೆ. ವಾಣಿಜ್ಯ ಅಥವಾ ವಸತಿಯೇತರ ಉದ್ದೇಶದ ಕನಿಷ್ಠ 150 ಚದರ ಅಡಿ ಪಾರ್ಕಿಂಗ್ ಸ್ಥಳಕ್ಕೆ ವಾರ್ಷಿಕ 1,125 ರೂ. ಪಾರ್ಕಿಂಗ್ ತೆರಿಗೆ(ಆರಂಭಿಕ ದರ) ಚದರ ಅಡಿಗೆ 3 ರೂ. ಸಂಗ್ರಹಿಸಲು ಬಿಬಿಎಂಪಿ ನಿರ್ಧರಿಸಿದೆ.
ಈ ಹಿಂದೆ ಪಾರ್ಕಿಂಗ್ ಪ್ರದೇಶಗಳ ತೆರಿಗೆ ದರಗಳು ವಲಯವಾರು ಲೆಕ್ಕಾಚಾರವನ್ನು ಆಧರಿಸಿದ್ದವು ಮತ್ತು ಇದು ಅಸಮಾನತೆಗೆ ಕಾರಣವಾಗಿ ಪಾರ್ಕಿಂಗ್ ಸ್ಥಳಗಳ ಮೇಲೆ ಸುಮಾರು ಶೇ. 50 ರಷ್ಟು ತೆರಿಗೆ ಪಾವತಿಸಬೇಕಾಗಿತ್ತು. ಈಗ ಏಕರೂಪ ಮತ್ತು ಪ್ರಮಾಣೀಕೃತ ವ್ಯವಸ್ಥೆಯನ್ನು ತರಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಪ್ರಸ್ತುತ ನಿಯಮದ ಪ್ರಕಾರ, ವಲಯಗಳ ಆಧಾರದ ಮೇಲೆ ವಾಹನ ಪಾರ್ಕಿಂಗ್ ಸ್ಥಳಕ್ಕೆ ತೆರಿಗೆ ವಿಧಿಸಲಾಗುತ್ತಿದ್ದು, ವಲಯ ಎ ಯಲ್ಲಿ ವಾರ್ಷಿಕವಾಗಿ 1,875 ರೂಪಾಯಿ ತೆರಿಗೆ ಇದ್ದರೆ, ವಲಯ ಎಫ್ನಲ್ಲಿ 750 ರೂಪಾಯಿ ಇತ್ತು. ಆದರೆ, ಮಾಲ್ಗಳಿಗೆ ಇದು ತುಂಬಾ ಹೆಚ್ಚಿತ್ತು. ಮಾಲ್ಗಳು ಪ್ರತಿ ವಾಹನ ನಿಲುಗಡೆಗೆ 8 ರೂಪಾಯಿ ತೆರಿಗೆ ಕಟ್ಟುತ್ತಿದ್ದವು. ಈಗ ಅದು 3 ರೂಪಾಯಿಗೆ ಇಳಿಯುತ್ತದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಬಿಬಿಎಂಪಿಯ ಉನ್ನತ ಕಂದಾಯ ಅಧಿಕಾರಿಗಳ ಪ್ರಕಾರ, ಪಾರ್ಕಿಂಗ್ ಪ್ರದೇಶಗಳಿಗೆ ಏಕರೂಪ ಮತ್ತು ಪ್ರಮಾಣೀಕೃತ ತೆರಿಗೆ ವ್ಯವಸ್ಥೆ ತರಲಾಗುತ್ತಿದೆ ಎಂದು ಬಿಬಿಎಂಪಿ ಸಮರ್ಥಿಸಿಕೊಂಡಿದೆ. ವಸತಿ ಕಟ್ಟಡಗಳಲ್ಲಿ ಪಾರ್ಕಿಂಗ್ ಸ್ಥಳದ ಪ್ರತಿ ಚದರಡಿಗೆ 2ರೂ. ಹಾಗೂ ವಾಣಿಜ್ಯ ಕಟ್ಟಡದ ಪಾರ್ಕಿಂಗ್ ಸ್ಥಳದ ಪ್ರತಿ ಚದರಡಿಗೆ 3 ರೂ. ದರ ನಿಗದಿ ಹೇಗೆ ವೈಜ್ಞಾನಿಕವಾಗಿ ವಿಧಿಸಲಾಗಿದೆ ಎಂಬ ಬಗ್ಗೆ ಕರಡು ಅಧಿಸೂಚನೆಯಲ್ಲಾಗಲಿ, ನಗರಾಭಿವೃದ್ಧಿ ಇಲಾಖೆ ಈ ಹಿಂದೆ ಬಿಬಿಎಂಪಿ ಮುಖ್ಯ ಆಯುಕ್ತರಿಗೆ ನೀಡಿದ ಆದೇಶದಲ್ಲಿ ಎಲ್ಲಿಯೂ ತಿಳಿಸಿರುವುದಿಲ್ಲ. ಇದರಿಂದಾಗಿ ನಗರಾಭಿವೃದ್ಧಿ ಇಲಾಖೆಯ ಆದೇಶ ಹಾಗೂ ಬಿಬಿಎಂಪಿಯ ಕರಡು ಅಧಿಸೂಚನೆ ಎರಡೂ ಗೊಂದಲಕಾರಿಯಾಗಿದೆ.
ಬಿಬಿಎಂಪಿ ವ್ಯಾಪ್ತಿಯಲ್ಲಿ ಆಸ್ತಿ ತೆರಿಗೆ ಯೂನಿಟ್ ದರ ಲೆಕ್ಕಾಚಾರಕ್ಕೆ ಸರ್ಕಾರದ ಮುದ್ರಾಂಕ ಹಾಗೂ ನೋಂದಣಿ ಇಲಾಖೆಯಿಂದ ಹೊರಡಿಸಲಾಗಿರುವ ಮಾರ್ಗಸೂಚಿ ದರ ಅನ್ವವಾಗುತ್ತದೆ. ಆದರೆ ಪಾಲಿಕೆ ಹೊರಡಿಸಿದ ಪಾರ್ಕಿಂಗ್ ಲೆಕ್ಕಾಚಾರಕ್ಕೆ 2 ಅಥವಾ 3 ರೂ. ಯೂನಿಟ್ ದರ ವಿಧಿಸುವುದಕ್ಕೆ ಯಾವುದೇ ತಳಹದಿ ಎಂಬುದೇ ಇಲ್ಲ.
Join our WhatsApp Channel
