ಮೊದಲ ಬಾರಿಗೆ 12 ಅಣ್ವಸ್ತ್ರಗಳನ್ನು ಕಾರ್ಯಾಚರಣೆಗೆ ನಿಯೋಜಿಸಿದ ಭಾರತ: ನೆರೆ ರಾಷ್ಟ್ರಗಳ ಎದೆಯಲ್ಲಿ ನಡುಕ ಹುಟ್ಟಿಸಿದ 'ಸಿಪ್ರಿ' ವರದಿ

ನವದೆಹಲಿ, ಜೂ.10 www.bengaluruwire.com: ಜಾಗತಿಕ ಮಟ್ಟದಲ್ಲಿ ಭೌಗೋಳಿಕ-ರಾಜಕೀಯ ಉದ್ವಿಗ್ನತೆ (Geopolitical Tensions) ಹೆಚ್ಚುತ್ತಿರುವ ಬೆನ್ನಲ್ಲೇ, ಭಾರತವು ತನ್ನ ರಕ್ಷಣಾ ವ್ಯವಸ್ಥೆಯಲ್ಲಿ ಅತ್ಯಂತ ಮಹತ್ವದ ಮತ್ತು ದಿಟ್ಟ ಹೆಜ್ಜೆಯನ್ನಿಟ್ಟಿದೆ.

ಇತಿಹಾಸದಲ್ಲೇ ಮೊದಲ ಬಾರಿಗೆ ಭಾರತವು 12 ಅಣ್ವಸ್ತ್ರಗಳನ್ನು (Nuclear Warheads) ‘ಕಾರ್ಯಾಚರಣೆಗೆ ಸಿದ್ಧವಾಗಿರುವ’ (Operationally Deployed) ಸ್ಥಿತಿಯಲ್ಲಿ ನಿಯೋಜಿಸಿದೆ ಎಂದು ಸ್ವೀಡನ್ ಮೂಲದ ‘ಸ್ಟಾಕ್‌ಹೋಮ್ ಇಂಟರ್‌ನ್ಯಾಷನಲ್ ಪೀಸ್ ರಿಸರ್ಚ್ ಇನ್‌ಸ್ಟಿಟ್ಯೂಟ್’ (SIPRI) ತನ್ನ 2026ರ ವರದಿಯಲ್ಲಿ ಬಹಿರಂಗಪಡಿಸಿದೆ. ಇದು ಸದಾ ಕ್ಯಾತೆ ತೆಗೆಯುವ ನೆರೆಯ ಚೀನಾ ಹಾಗೂ ಪಾಕಿಸ್ತಾನಕ್ಕೆ ಸ್ಪಷ್ಟ ಹಾಗೂ ಖಡಕ್ ಎಚ್ಚರಿಕೆಯ ಸಂದೇಶ ರವಾನಿಸಿದೆ.

ಸಿಪ್ರಿ (SIPRI) ವರದಿಯ ಪ್ರಮುಖ ಅಂಶಗಳೇನು?

ಅಣ್ವಸ್ತ್ರಗಳ ಸಂಖ್ಯೆಯಲ್ಲಿ ಹೆಚ್ಚಳ: ಕಳೆದ ವರ್ಷ 180 ರಷ್ಟಿದ್ದ ಭಾರತದ ಅಣ್ವಸ್ತ್ರಗಳ ಒಟ್ಟು ದಾಸ್ತಾನು ಇದೀಗ 190ಕ್ಕೆ ಏರಿಕೆಯಾಗಿದೆ.

ಪಾಕಿಸ್ತಾನಕ್ಕಿಂತ ಭಾರತವೇ ಮುಂದು: ಅಣ್ವಸ್ತ್ರಗಳ ದಾಸ್ತಾನಿನಲ್ಲಿ ಇದೇ ಮೊದಲ ಬಾರಿಗೆ ಪಾಕಿಸ್ತಾನವನ್ನು (170 ಅಣ್ವಸ್ತ್ರಗಳು) ಭಾರತ ಹಿಂದಿಕ್ಕಿದೆ.

ಚೀನಾ ಬಳಿ 620 ಅಣ್ವಸ್ತ್ರ: ಏಷ್ಯಾದಲ್ಲಿ ತನ್ನ ಪ್ರಾಬಲ್ಯ ಮೆರೆಯಲು ಹವಣಿಸುತ್ತಿರುವ ಚೀನಾ, ತನ್ನ ಅಣ್ವಸ್ತ್ರಗಳ ಸಂಖ್ಯೆಯನ್ನು ಭಾರಿ ಪ್ರಮಾಣದಲ್ಲಿ ಅಂದರೆ 620ಕ್ಕೆ ಹೆಚ್ಚಿಸಿಕೊಂಡಿದ್ದು, ಅದರಲ್ಲಿ 34 ಅನ್ನು ಈಗಾಗಲೇ ಕಾರ್ಯಾಚರಣೆಗೆ ನಿಯೋಜಿಸಿದೆ.

12 ಅಣ್ವಸ್ತ್ರಗಳ ನಿಯೋಜನೆ: ಭಾರತವು ಶಾಂತಿಕಾಲದಲ್ಲಿ (Peacetime) ಎಂದಿಗೂ ಅಣ್ವಸ್ತ್ರ ಮತ್ತು ಅದನ್ನು ಉಡಾವಣೆ ಮಾಡುವ ಕ್ಷಿಪಣಿಗಳನ್ನು ಪ್ರತ್ಯೇಕವಾಗಿ ಇರಿಸುತ್ತಿತ್ತು. ಆದರೆ ಇದೇ ಮೊದಲ ಬಾರಿಗೆ ತನ್ನ ರಕ್ಷಣಾ ನೀತಿಯಲ್ಲಿ ಮಹತ್ವದ ಬದಲಾವಣೆ ತಂದಿದ್ದು, 12 ಅಣ್ವಸ್ತ್ರಗಳನ್ನು ಕ್ಷಿಪಣಿಗಳಿಗೆ ಅಥವಾ ಜಲಾಂತರ್ಗಾಮಿಗಳಿಗೆ ಅಳವಡಿಸಿ ದಾಳಿಗೆ ಸಿದ್ಧ ಸ್ಥಿತಿಯಲ್ಲಿಟ್ಟಿದೆ.

ರಕ್ಷಣಾ ತಂತ್ರದಲ್ಲಿ ದಿಢೀರ್ ಬದಲಾವಣೆ ಯಾಕೆ?:

ಭಾರತದ ಈ ದಿಟ್ಟ ನಡೆ ಜಾಗತಿಕ ಮಟ್ಟದಲ್ಲಿ ತೀವ್ರ ಸಂಚಲನ ಮೂಡಿಸಿದೆ. ಇದುವರೆಗೂ ತನ್ನ ಅಣ್ವಸ್ತ್ರಗಳನ್ನು ಕೇವಲ ‘ದಾಸ್ತಾನು’ (Stockpile) ಮಾಡಿರುತ್ತಿದ್ದ ಭಾರತ, ಈಗ ದಿಢೀರನೆ ಆಕ್ರಮಣಕಾರಿ ರಕ್ಷಣಾ ನೀತಿಯತ್ತ (Aggressive Defense Posture) ವಾಲಿದಂತೆ ಕಾಣುತ್ತಿದೆ. ಗಡಿಯಲ್ಲಿ ಚೀನಾದ ನಿರಂತರ ಕ್ಯಾತೆ, ಸೈನ್ಯ ವಿಸ್ತರಣೆ ಹಾಗೂ ಪಾಕಿಸ್ತಾನದ ಗಡಿಪಾರು ಭಯೋತ್ಪಾದನೆಗೆ ಶಾಶ್ವತ ಕಡಿವಾಣ ಹಾಕಲು ಈ ನಿರ್ಧಾರ ಅತ್ಯಂತ ಸೂಕ್ತವಾಗಿದೆ ಎಂದು ರಕ್ಷಣಾ ತಜ್ಞರು ವಿಶ್ಲೇಷಿಸಿದ್ದಾರೆ.

ಜಲ, ಭೂಮಿ, ಆಕಾಶ.. ಎಲ್ಲೆಡೆಯಿಂದಲೂ ದಾಳಿಗೆ ಸಿದ್ಧ:

ಭಾರತವು ಈಗ ‘ನ್ಯೂಕ್ಲಿಯರ್ ಟ್ರೈಯಾಡ್’ (Nuclear Triad – ಭೂಮಿ, ಆಕಾಶ ಮತ್ತು ಸಮುದ್ರದ ಮೂಲಕ ಅಣ್ವಸ್ತ್ರ ದಾಳಿ ಮಾಡುವ ಸಾಮರ್ಥ್ಯ) ಅನ್ನು ಮತ್ತಷ್ಟು ಬಲಪಡಿಸಿದೆ. ಇತ್ತೀಚೆಗಷ್ಟೇ ಕಾರ್ಯಾಚರಣೆ ಆರಂಭಿಸಿರುವ ಐಎನ್‌ಎಸ್ ಅರಿಘಾತ್ (INS Arighaat) ಮತ್ತು ಐಎನ್‌ಎಸ್ ಅರಿದಮನ್ (INS Aridaman) ಅಣ್ವಸ್ತ್ರ-ಚಾಲಿತ ಜಲಾಂತರ್ಗಾಮಿಗಳ ಮೂಲಕ ಸಮುದ್ರದ ಆಳದಿಂದಲೂ ಶತ್ರುಗಳ ಮೇಲೆರಗಲು ಭಾರತ ಸಜ್ಜಾಗಿದೆ. ಜೊತೆಗೆ ಕ್ಯಾನಿಸ್ಟರ್-ಆಧಾರಿತ ಅಗ್ನಿ ಕ್ಷಿಪಣಿಗಳ ಮೂಲಕವೂ ತ್ವರಿತ ದಾಳಿಗೆ ಸಿದ್ಧತೆ ಮಾಡಿಕೊಳ್ಳಲಾಗಿದೆ.

’ಮೊದಲು ದಾಳಿ ಮಾಡುವುದಿಲ್ಲ’ ನೀತಿಗೆ ಬದ್ಧ:

ಇಷ್ಟೆಲ್ಲಾ ಸಿದ್ಧತೆಗಳ ನಡುವೆಯೂ, ಭಾರತ ತನ್ನ ‘ನೋ ಫಸ್ಟ್ ಯೂಸ್’ (No First Use – ಮೊದಲು ದಾಳಿ ಮಾಡುವುದಿಲ್ಲ) ನೀತಿಗೆ ಕಟ್ಟುನಿಟ್ಟಾಗಿ ಬದ್ಧವಾಗಿದೆ. ಆದರೆ, ಯಾರಾದರೂ ಭಾರತದ ತಂಟೆಗೆ ಬಂದರೆ ಅಥವಾ ಅಣ್ವಸ್ತ್ರ ಬೆದರಿಕೆ ಹಾಕಿದರೆ, ಕೇವಲ ಕೆಲವೇ ನಿಮಿಷಗಳಲ್ಲಿ ಶತ್ರು ರಾಷ್ಟ್ರವನ್ನು ಬೂದಿ ಮಾಡುವ ಸಾಮರ್ಥ್ಯವನ್ನು ಈ 12 ಸಿದ್ಧ-ಸ್ಥಿತಿಯಲ್ಲಿರುವ ಅಣ್ವಸ್ತ್ರಗಳು ಖಚಿತಪಡಿಸಿವೆ. (Main Image Courtesy: PTI)