ಶತಾವಧಾನಿ ಡಾ. ಆರ್. ಗಣೇಶ್ ಅವರಿಗೆ ಪ್ರತಿಷ್ಠಿತ 'ಪದ್ಮಭೂಷಣ' ಪ್ರಶಸ್ತಿ ನಾಮನಿರ್ದೇಶನ: ಅವರ ಕುರಿತಂತೆ ವಿಶೇಷ ಲೇಖನ

ಭಾರತೀಯ ಸಾಹಿತ್ಯ ಮತ್ತು ಪ್ರದರ್ಶನ ಕಲೆಗೆ ನೀಡಿದ ಅಸಾಧಾರಣ ಕೊಡುಗೆಯನ್ನು ಪರಿಗಣಿಸಿ, ಅಪರೂಪದ ಹಾಗೂ ಪ್ರಾಚೀನ ಕಲೆಯಾದ ‘ಅವಧಾನ’ವನ್ನು ಮರುಜೀವಗೊಳಿಸಿದ ಅಪ್ರತಿಮ ಸಾಧಕ ಶತಾವಧಾನಿ ಡಾ. ಆರ್. ಗಣೇಶ್ ಅವರು 2026ನೇ ಸಾಲಿನ ಪ್ರತಿಷ್ಠಿತ ‘ಪದ್ಮಭೂಷಣ’ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಈ ಸಂದರ್ಭದಲ್ಲಿ ಅವರ ಸಾಧನೆ ಹಾಗೂ ಅವಧಾನ ಕ್ಷೇತ್ರಕ್ಕೆ ಅವರ ಕೊಡುಗೆ ಕುರಿತಂತೆ ತಿಳಿಯೋಣ.

ಅವಧಾನ ಕಲೆಯ ಮೂಲಕ ಏಕಕಾಲದಲ್ಲಿ 100 ಬೌದ್ಧಿಕ ಸವಾಲುಗಳಿಗೆ (ಶತಾವಧಾನ) ಆಶು ಕಾವ್ಯದ (Extempore) ಮೂಲಕ ನಿರರ್ಗಳವಾಗಿ ಉತ್ತರಿಸಬಲ್ಲ ಇವರ ಸ್ಮರಣಶಕ್ತಿ, ಸೃಜನಶೀಲತೆ ಮತ್ತು ಮಾನಸಿಕ ಚುರುಕುತನ ಕಲಾಭಿಮಾನಿಗಳಲ್ಲಿ ಬೆರಗು ಮೂಡಿಸುವಂತಹುದು.

ಬಾಲ್ಯ ಮತ್ತು ಸಾಧನೆಯ ಹಾದಿ:

1962ರ ಡಿಸೆಂಬರ್ 4ರಂದು ಕೋಲಾರದಲ್ಲಿ ಜನಿಸಿದ ಇವರು, ತಮ್ಮ 19ನೇ ವಯಸ್ಸಿನಲ್ಲಿಯೇ ಭಾರತೀಯ ಪ್ರಾಚೀನ ಕಲೆ ಮತ್ತು ಸಾಹಿತ್ಯದತ್ತ ಒಲವು ತೋರಿದರು. ಸತತ ಅಧ್ಯಯನ ಮತ್ತು ಪ್ರದರ್ಶನಗಳ ಮೂಲಕ ಅವಧಾನ ಕಲೆಗೆ ಹೊಸ ಆಯಾಮ ನೀಡಿದ ಡಾ. ಗಣೇಶ್ ಅವರು, ಇದೇ ವಿಷಯದ ಮೇಲೆ ಆಳವಾದ ಸಂಶೋಧನೆ ನಡೆಸಿ ಡಾಕ್ಟರೇಟ್ ಪದವಿಯನ್ನೂ ಪಡೆದಿದ್ದಾರೆ.

ಕನ್ನಡದಲ್ಲಿ ಡಿ.ಲಿಟ್. ಪದವಿ ಪಡೆದಿರುವ ಇವರು ಸಂಸ್ಕೃತ, ಪ್ರಾಕೃತ, ಪಾಳಿ, ಗ್ರೀಕ್, ಲ್ಯಾಟಿನ್ ಮತ್ತು ಇಟಾಲಿಯನ್ ಸೇರಿದಂತೆ ಹತ್ತು ಭಾಷೆಗಳಲ್ಲಿ ನಿರರ್ಗಳವಾಗಿ ವ್ಯವಹರಿಸಬಲ್ಲ ಬಹುಭಾಷಾ ಪಂಡಿತರು. ತಮ್ಮ ಜೀವಿತಾವಧಿಯಲ್ಲಿ ಈವರೆಗೆ 1,300ಕ್ಕೂ ಹೆಚ್ಚು ಅಷ್ಟಾವಧಾನಗಳು ಹಾಗೂ 5 ಶತಾವಧಾನಗಳನ್ನು ಯಶಸ್ವಿಯಾಗಿ ಪೂರೈಸಿದ್ದಾರೆ.

ಹೊಸ ಕಲಾ ಪ್ರಕಾರಗಳ ಸೃಷ್ಟಿಕರ್ತ:

ಕೇವಲ ಅವಧಾನಿಯಾಗಿ ಮಾತ್ರವಲ್ಲದೆ ‘ಕಾವ್ಯ-ಚಿತ್ರ-ಗೀತ-ನೃತ್ಯ’ ಮತ್ತು ‘ಏಕವ್ಯಕ್ತಿ ಯಕ್ಷಗಾನ’ದಂತಹ ವಿನೂತನ ಹಾಗೂ ವಿಶಿಷ್ಟ ಕಲಾ ಪ್ರಕಾರಗಳನ್ನು ಹುಟ್ಟುಹಾಕಿದ ಕೀರ್ತಿ ಇವರದ್ದು. 70ಕ್ಕೂ ಹೆಚ್ಚು ಮೌಲಿಕ ಪುಸ್ತಕಗಳನ್ನು ರಚಿಸಿರುವ ಡಾ. ಗಣೇಶ್, ಭಾರತೀಯ ಸಾಂಸ್ಕೃತಿಕ ಪರಂಪರೆಯ ಕುರಿತು 15,000 ಗಂಟೆಗಳಿಗೂ ಹೆಚ್ಚು ಕಾಲ ಆನ್‌ಲೈನ್ ಉಪನ್ಯಾಸಗಳನ್ನು ನೀಡುವ ಮೂಲಕ ಜ್ಞಾನ ಪಸರಿಸುವ ಕಾಯಕದಲ್ಲಿ ನಿರತರಾಗಿದ್ದಾರೆ.

ಈ ಹಿಂದೆಯೇ ಇವರ ಸಾಧನೆಯನ್ನು ಗುರುತಿಸಿರುವ ಕರ್ನಾಟಕ ಸರ್ಕಾರ ಪ್ರತಿಷ್ಠಿತ ‘ರಾಜ್ಯೋತ್ಸವ ಪ್ರಶಸ್ತಿ’ ನೀಡಿ ಗೌರವಿಸಿದೆ. ಇದೀಗ ರಾಷ್ಟ್ರದ ಅತ್ಯುನ್ನತ ನಾಗರಿಕ ಪ್ರಶಸ್ತಿಗಳಲ್ಲಿ ಒಂದಾದ ಪದ್ಮಭೂಷಣ ಒಲಿದು ಬಂದಿರುವುದು ಕರುನಾಡಿನ ಹರ್ಷವನ್ನು ಇಮ್ಮಡಿಗೊಳಿಸಿದೆ.