ಹುಬ್ಬಳ್ಳಿ, ಮಾ.31 www.bengaluruwire.com: ವಾಣಿಜ್ಯ ನಗರಿ ಹುಬ್ಬಳ್ಳಿ ಮತ್ತು ಸುತ್ತಮುತ್ತಲಿನ ಜಿಲ್ಲೆಗಳ ಜನರಿಗೆ ದಕ್ಷಿಣ ಭಾರತದ ಪ್ರಮುಖ ನಗರಗಳ ಸಂಪರ್ಕ ಇನ್ನು ಸುಲಭವಾಗಲಿದೆ.
ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ ಅವರ ನಿರಂತರ ಮನವಿಗೆ ಸ್ಪಂದಿಸಿರುವ ‘ಫ್ಲೈ91’ (Fly91) ವಿಮಾನಯಾನ ಸಂಸ್ಥೆಯು ಹುಬ್ಬಳ್ಳಿ-ಬೆಂಗಳೂರು-ಹೈದರಾಬಾದ್ ಮಾರ್ಗದಲ್ಲಿ ವಿಮಾನ ಸೇವೆಯನ್ನು ಆರಂಭಿಸಲು ಅಧಿಕೃತವಾಗಿ ಸಜ್ಜಾಗಿದೆ.
ಏಪ್ರಿಲ್ ಎರಡನೇ ವಾರದಿಂದ ಚಾಲನೆ:
ನವದೆಹಲಿಯಲ್ಲಿ ದೊರೆತ ಮಾಹಿತಿಯಂತೆ, ಏಪ್ರಿಲ್ ಎರಡನೇ ವಾರದಿಂದ ಈ ಹೊಸ ಸೇವೆ ಸಾರ್ವಜನಿಕರಿಗೆ ಲಭ್ಯವಾಗಲಿದೆ. ಈಗಾಗಲೇ ಹುಬ್ಬಳ್ಳಿ ವಿಮಾನ ನಿಲ್ದಾಣದಲ್ಲಿ ಸಂಸ್ಥೆಯ ಕಾರ್ಯಾಚರಣೆಗೆ ಅಗತ್ಯವಿರುವ ಸ್ಥಳಾವಕಾಶವನ್ನು ಕಲ್ಪಿಸಲಾಗಿದ್ದು, ಫ್ಲೈ91 ಸಿಬ್ಬಂದಿ ಪೂರ್ವಸಿದ್ಧತಾ ಕಾರ್ಯಗಳಲ್ಲಿ ತೊಡಗಿದ್ದಾರೆ.
ಸಚಿವ ಜೋಶಿ ಅವರ ವಿಶೇಷ ಆಸಕ್ತಿ:
ಉತ್ತರ ಕರ್ನಾಟಕದ ನಾಗರಿಕರಿಗೆ ಬೆಂಗಳೂರು ಮತ್ತು ಹೈದರಾಬಾದ್ಗೆ ತ್ವರಿತವಾಗಿ ಸಂಚರಿಸಲು ಅನುಕೂಲವಾಗುವಂತೆ ಹೆಚ್ಚುವರಿ ವಿಮಾನಗಳ ಅಗತ್ಯವಿತ್ತು. ಇದನ್ನು ಮನಗಂಡ ಸಚಿವ ಪ್ರಲ್ಹಾದ ಜೋಶಿ ಅವರು ಈ ಹಿಂದೆ ವಿಮಾನಯಾನ ಸಂಸ್ಥೆಯ ಉನ್ನತ ಅಧಿಕಾರಿಗಳೊಂದಿಗೆ ಚರ್ಚೆ ನಡೆಸಿದ್ದರು. ಸಚಿವರ ಈ ಮನವಿಯನ್ನು ಪುರಸ್ಕರಿಸಿದ ಸಂಸ್ಥೆ ಇದೀಗ ವೇಳಾಪಟ್ಟಿಯನ್ನು ಸಹ ಪ್ರಕಟಿಸಿದೆ.
ವಿಮಾನ ಹಾರಾಟದ ವೇಳಾಪಟ್ಟಿ ಹೀಗಿದೆ:
| ಮಾರ್ಗ | ವಿಮಾನ ಸಂಖ್ಯೆ | ಸಮಯ (ಹೊರಡುವುದು – ತಲುಪುವುದು) |
| ಹೈದರಾಬಾದ್ – ಹುಬ್ಬಳ್ಳಿ | IC3401 | ಮಧ್ಯಾಹ್ನ 3:00 – ಸಂಜೆ 4:30 |
| ಹುಬ್ಬಳ್ಳಿ – ಬೆಂಗಳೂರು | IC3411 | ಸಂಜೆ 4:55 – ಸಂಜೆ 6:15 |
| ಬೆಂಗಳೂರು – ಹುಬ್ಬಳ್ಳಿ | IC3412 | ಸಂಜೆ 6:45 – ರಾತ್ರಿ 8:15 |
| ಹುಬ್ಬಳ್ಳಿ – ಹೈದರಾಬಾದ್ | IC3402 | ರಾತ್ರಿ 8:35 – ರಾತ್ರಿ 9:55 |
ಈ ನೂತನ ವಿಮಾನ ಸೇವೆಯಿಂದಾಗಿ ವ್ಯಾಪಾರಸ್ಥರು, ಉದ್ಯೋಗಿಗಳು ಮತ್ತು ಪ್ರವಾಸಿಗರಿಗೆ ಹೆಚ್ಚಿನ ಅನುಕೂಲವಾಗಲಿದೆ. ತಮ್ಮ ಮನವಿಗೆ ಸ್ಪಂದಿಸಿ ಸೇವೆ ಆರಂಭಿಸುತ್ತಿರುವ ಫ್ಲೈ91 ಆಡಳಿತ ಮಂಡಳಿಗೆ ಸಚಿವ ಪ್ರಲ್ಹಾದ ಜೋಶಿ ಅವರು ಅಭಿನಂದನೆ ಸಲ್ಲಿಸಿದ್ದಾರೆ.
Join our WhatsApp Channel
