ಬೆಂಗಳೂರು, ಫೆ.13 www.bengaluruwire.com : ರಾಜಧಾನಿಯ ಬಿಡಿಎ ನಿವೇಶನದಾರರಿಗೆ ಪ್ರಾಧಿಕಾರವು ಸಿಹಿ ಸುದ್ದಿ ನೀಡಿದೆ. ನಿವೇಶನ ಹಂಚಿಕೆಯಾಗಿ ವರ್ಷಗಳಾದರೂ ಮನೆ ಕಟ್ಟದ ಮಾಲೀಕರಿಗೆ ವಿಧಿಸುತ್ತಿದ್ದ ಭಾರಿ ಮೊತ್ತದ ‘ಖಾಲಿ ನಿವೇಶನ ದಂಡ’ವನ್ನು (Empty Site Penalty) ಬಿಡಿಎ ಕಡಿತಗೊಳಿಸಿದೆ.
ಸಾರ್ವಜನಿಕರ ಹಿತದೃಷ್ಟಿಯಿಂದ ನಿರ್ಧಾರ:
ಈ ಹಿಂದೆ ಖಾಲಿ ನಿವೇಶನಗಳಿಗೆ ಮಾರ್ಗಸೂಚಿ ದರದ ಶೇ. 10 ರಷ್ಟು ಏಕರೂಪದ ದಂಡ ವಿಧಿಸುವ ಪ್ರಕ್ರಿಯೆ ಜಾರಿಯಲ್ಲಿತ್ತು. ಇದು ಸಣ್ಣ ನಿವೇಶನದಾರರಿಗೆ ಹೊರೆಯಾಗುತ್ತಿತ್ತು. ಇದನ್ನು ಮನಗಂಡ ಬಿಡಿಎ ಆಯುಕ್ತರಾದ ಪಿ. ಮಣಿವಣ್ಣನ್ ಅವರು, ನಿವೇಶನದ ಅಳತೆಗೆ ಅನುಗುಣವಾಗಿ ದಂಡದ ಪ್ರಮಾಣವನ್ನು ಶೇ. 2.5 ರಿಂದ ಶೇ. 10 ರವರೆಗೆ ವರ್ಗೀಕರಿಸಿ ಆದೇಶ ಹೊರಡಿಸಿದ್ದಾರೆ.
ಯಾರಿಗೆ ಅನ್ವಯ?
ಈ ಪರಿಷ್ಕೃತ ದರಗಳು 2024 ರ ಸೆ.23 ರಿಂದಲೇ ಪೂರ್ವಾನ್ವಯವಾಗಿ ಜಾರಿಗೆ ಬರುತ್ತದೆ. ಆದರೆ, ನಾಡಪ್ರಭು ಕೆಂಪೇಗೌಡ ಲೇಔಟ್ ಹಾಗೂ ಅರ್ಕಾವತಿ ಲೇಔಟ್ ನಿವೇಶನದಾರರಿಗೆ ಈ ವಿನಾಯಿತಿ ಅನ್ವಯಿಸುವುದಿಲ್ಲ. ಇನ್ನು ಈಗಾಗಲೇ ದಂಡ ಪಾವತಿಸಿರುವವರಿಗೆ ಹಣ ಮರುಪಾವತಿ ಮಾಡಲಾಗುವುದಿಲ್ಲ ಎಂದು ಬಿಡಿಎ ಸ್ಪಷ್ಟಪಡಿಸಿದೆ.
ವಿಳಂಬ ಮಾಡಿದರೆ ದಂಡದ ಮೇಲೆ ಬಡ್ಡಿ:
ದಂಡ ಪಾವತಿಸುವಂತೆ ನೋಟಿಸ್ ನೀಡಿದ 90 ದಿನಗಳೊಳಗೆ ಹಣ ಪಾವತಿಸದಿದ್ದರೆ, ಎಸ್ಬಿಐ ಎಂಸಿಎಲ್ಆರ್ (MCLR) ದರದೊಂದಿಗೆ ಶೇ. 2 ರಷ್ಟು ಬಡ್ಡಿ ವಿಧಿಸಲಾಗುತ್ತದೆ. ಒಂದು ವೇಳೆ ಅಧಿಕಾರಿಗಳ ವಿಳಂಬದಿಂದ ದಂಡದ ಪ್ರಕ್ರಿಯೆ ತಡವಾದರೆ, ಅಂತಹ ಅಧಿಕಾರಿಗಳ ಸಂಬಳದಿಂದಲೇ ಬಡ್ಡಿ ಮೊತ್ತವನ್ನು ವಸೂಲಿ ಮಾಡಲು ಆಯುಕ್ತರು ಕಟ್ಟುನಿಟ್ಟಿನ ಸೂಚನೆ ನೀಡಿದ್ದಾರೆ.
ಬಿಡಿಎ ಖಾಲಿ ನಿವೇಶನ ದಂಡದ ಪರಿಷ್ಕೃತ ದರ ಪಟ್ಟಿ:
ಬಿಡಿಎ ನಿಯಮದ ಪ್ರಕಾರ ನಿಗದಿತ ಅವಧಿಯಲ್ಲಿ ಮನೆ ನಿರ್ಮಿಸದ ನಿವೇಶನದಾರರಿಗೆ ಈ ಕೆಳಗಿನಂತೆ ದಂಡ ವಿಧಿಸಲಾಗುತ್ತದೆ (ಮಾರ್ಗಸೂಚಿ ದರದ ಶೇಕಡಾವಾರು ಪ್ರಮಾಣದಲ್ಲಿ):
* 600 ಚದರ ಅಡಿವರೆಗಿನ ನಿವೇಶನಗಳಿಗೆ: ಮಾರ್ಗಸೂಚಿ ದರದ ಶೇ. 2.5 ರಷ್ಟು ದಂಡ.
* 601 ರಿಂದ 1200 ಚದರ ಅಡಿವರೆಗಿನ ನಿವೇಶನಗಳಿಗೆ: ಮಾರ್ಗಸೂಚಿ ದರದ ಶೇ. 5 ರಷ್ಟು ದಂಡ.
* 1201 ರಿಂದ 2400 ಚದರ ಅಡಿವರೆಗಿನ ನಿವೇಶನಗಳಿಗೆ: ಮಾರ್ಗಸೂಚಿ ದರದ ಶೇ. 7.5 ರಷ್ಟು ದಂಡ.
* 2401 ಚದರ ಅಡಿ ಮತ್ತು ಅದಕ್ಕಿಂತ ಹೆಚ್ಚಿನ ನಿವೇಶನಗಳಿಗೆ: ಮಾರ್ಗಸೂಚಿ ದರದ ಶೇ. 10 ರಷ್ಟು ದಂಡ.
(ಗಮನಿಸಿ: ನಾಡಪ್ರಭು ಕೆಂಪೇಗೌಡ ಬಡಾವಣೆ ಮತ್ತು ಅರ್ಕಾವತಿ ಬಡಾವಣೆಗಳನ್ನು ಈ ಪರಿಷ್ಕರಣೆಯಿಂದ ಹೊರತುಪಡಿಸಲಾಗಿದೆ.)
Join our WhatsApp Channel
