ಶ್ರೀಹರಿಕೋಟಾ, ಜ.12 www.bengaluruwire.com : ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ISRO) 2026ರ ಮೊದಲ ಉಡಾವಣೆಯಲ್ಲೇ ಹಿನ್ನಡೆ ಅನುಭವಿಸಿದೆ.
ಸೋಮವಾರ (ಜ.12) ಬೆಳಗ್ಗೆ ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಉಡಾವಣೆಗೊಂಡ ಪಿಎಸ್ಎಲ್ವಿ-ಸಿ62 (PSLV-C62) ರಾಕೆಟ್, ಮೂರನೇ ಹಂತದಲ್ಲಿ ತಾಂತ್ರಿಕ ದೋಷ ಎದುರಿಸಿದ್ದು, ನಿಗದಿತ ಪಥದಿಂದ ದಾರಿ ತಪ್ಪಿದೆ. ಇದರಿಂದಾಗಿ ಡಿಆರ್ಡಿಒದ ಪ್ರಮುಖ ಭೂ ವೀಕ್ಷಣಾ ಉಪಗ್ರಹ ಸೇರಿದಂತೆ ಒಟ್ಟು 16 ಉಪಗ್ರಹಗಳ ಭವಿಷ್ಯ ಅತಂತ್ರವಾಗಿದೆ.
ಬೆಳಗ್ಗೆ 10:18ಕ್ಕೆ ಸರಿಯಾಗಿ ಉಡಾವಣೆಗೊಂಡ 44.4 ಮೀಟರ್ ಎತ್ತರದ ಪಿಎಸ್ಎಲ್ವಿ-ಡಿಎಲ್ (PSLV-DL) ರಾಕೆಟ್, ಮೊದಲ ಎರಡು ಹಂತಗಳಲ್ಲಿ (ಘನ ಮತ್ತು ದ್ರವ ಇಂಧನ ಹಂತಗಳು) ಅತ್ಯಂತ ಯಶಸ್ವಿಯಾಗಿ ಕಾರ್ಯನಿರ್ವಹಿಸಿತು. ಆದರೆ, ಮೂರನೇ ಹಂತದ (PS3) ದಹನ ಕ್ರಿಯೆಯ ಕೊನೆಯಲ್ಲಿ ರಾಕೆಟ್ನ ಚಲನೆಯಲ್ಲಿ ವ್ಯತ್ಯಯ (Roll rate disturbance) ಕಂಡುಬಂದಿದೆ. ಇದು ರಾಕೆಟ್ ತನ್ನ ನಿಗದಿತ ಪಥದಿಂದ ವಿಮುಖವಾಗಲು ಕಾರಣವಾಯಿತು ಎಂದು ಇಸ್ರೋ ತಿಳಿಸಿದೆ.
ತಾಂತ್ರಿಕ ದೋಷದ ಬಗ್ಗೆ ಇಸ್ರೋ ಸ್ಪಷ್ಟನೆ:
ಈ ಕುರಿತು ಮಾಹಿತಿ ನೀಡಿರುವ ಇಸ್ರೋ ಅಧ್ಯಕ್ಷ ವಿ.ನಾರಾಯಣನ್, “ಪಿಎಸ್ಎಲ್ವಿ-ಸಿ62 ಮಿಷನ್ನ ಮೂರನೇ ಹಂತದ ಕೊನೆಯಲ್ಲಿ ಅನಿರೀಕ್ಷಿತ ಅಡಚಣೆ ಎದುರಾಗಿದೆ. ರೋಲ್ ರೇಟ್ನಲ್ಲಿ ಹೆಚ್ಚಳ ಕಂಡುಬಂದಿದ್ದರಿಂದ ವಾಹನವು ತನ್ನ ಪಥವನ್ನು ಬದಲಿಸಿದೆ. ಈ ಹಿನ್ನೆಲೆಯಲ್ಲಿ ಉಪಗ್ರಹಗಳನ್ನು ನಿಗದಿತ ಕಕ್ಷೆಗೆ ಸೇರಿಸಲು ಸಾಧ್ಯವಾಗಿಲ್ಲ. ಘಟನೆಯ ಬಗ್ಗೆ ಸಮಗ್ರ ತನಿಖೆ ಮತ್ತು ದತ್ತಾಂಶ ವಿಶ್ಲೇಷಣೆ ಆರಂಭಿಸಲಾಗಿದೆ,” ಎಂದು ತಿಳಿಸಿದ್ದಾರೆ.
ಕೈತಪ್ಪಿದ ಪ್ರಮುಖ ಉಪಗ್ರಹಗಳು:
ಈ ಉಡಾವಣೆಯು ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆಯ (DRDO) ಅತ್ಯಾಧುನಿಕ ‘ಇಒಎಸ್-ಎನ್1’ (ಅನ್ವೇಷಾ) ಹೈಪರ್ಸ್ಪೆಕ್ಟ್ರಲ್ ಅರ್ಥ್ ಅಬ್ಸರ್ವೇಶನ್ ಉಪಗ್ರಹವನ್ನು ಹೊತ್ತೊಯ್ಯುತ್ತಿತ್ತು. ಇದರೊಂದಿಗೆ ಧ್ರುವ ಸ್ಪೇಸ್ನ ‘ಥೈಬೋಲ್ಟ್-3’, ಆರ್ಬಿಟ್ಏಡ್ನ ‘ಆಯುಲ್ಸ್ಯಾಟ್’ ಸೇರಿದಂತೆ ಸ್ಪೇನ್ನ ಸ್ಟಾರ್ಟಪ್ ಒಂದರ ‘ಕಿಡ್’ (KID) ಕ್ಯಾಪ್ಸುಲ್ ಕೂಡ ರಾಕೆಟ್ನಲ್ಲಿತ್ತು. ನ್ಯೂಸ್ಪೇಸ್ ಇಂಡಿಯಾ ಲಿಮಿಟೆಡ್ (NSIL) ಅಡಿಯಲ್ಲಿ ವಾಣಿಜ್ಯ ಒಪ್ಪಂದದ ಮೂಲಕ ಉಡಾವಣೆಗೊಂಡಿದ್ದ ಈ ಎಲ್ಲಾ 16 ಉಪಗ್ರಹಗಳು ಈಗ ಕಳೆದುಹೋಗುವ ಭೀತಿಯಲ್ಲಿವೆ.
2025ರಲ್ಲಿ ಪಿಎಸ್ಎಲ್ವಿ-ಸಿ61 ವೈಫಲ್ಯದ ನಂತರ, ಇಸ್ರೋಗೆ ಎದುರಾದ ಎರಡನೇ ಹಿನ್ನಡೆ ಇದಾಗಿದೆ. ಇಸ್ರೋ ವಿಜ್ಞಾನಿಗಳು ದೋಷಕ್ಕೆ ನಿಖರ ಕಾರಣ ಹುಡುಕಲು ಶ್ರಮಿಸುತ್ತಿದ್ದು, ಮುಂದೆ ತನಿಖಾ ವರದಿಯನ್ನು ನೀಡುವ ಸಾಧ್ಯತೆಯಿದೆ. ಆದಾಗ್ಯೂ, ಈ ಘಟನೆಯು ಗಗನಯಾನದಂತಹ ಮುಂದಿನ ಮಾನವ ಸಹಿತ ಯೋಜನೆಗಳ ಮೇಲೆ ತಕ್ಷಣದ ಪರಿಣಾಮ ಬೀರುವುದಿಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. (Image Credit : ISRO)
Join our WhatsApp Channel
