ಬೆಂಗಳೂರು, ಜ.07 www.bengaluruwire.com : ಸಣ್ಣ ನಿವೇಶನ ಹೊಂದಿರುವ ಮಾಲೀಕರಿಗೆ ರಾಜ್ಯ ಸರ್ಕಾರ ಸಿಹಿ ಸುದ್ದಿಯೊಂದನ್ನು ನೀಡಿದೆ. ಹಾಗೂ ಮನೆ ನಿರ್ಮಾಣದ ವೇಳೆ ಅತೀ ದೊಡ್ಡ ತಲೆನೊೀವಾಗಿದ್ದ ‘ಸೆಟ್‌ಬ್ಯಾಕ್’ (Setback) ಅಥವಾ ಕಟ್ಟಡದ ಸುತ್ತ ಜಾಗ ಬಿಡುವ ನಿಯಮಗಳಲ್ಲಿ ನಗರಾಭಿವೃದ್ಧಿ ಇಲಾಖೆ ಮಹತ್ವದ ಬದಲಾವಣೆ ಮಾಡಿ ಅಂತಿಮ ಅಧಿಸೂಚನೆ ಹೊರಡಿಸಿದೆ.
ವಿಶೇಷವೆಂದರೆ, ಈ ಹೊಸ ನಿಯಮಗಳು ಕೇವಲ ಹೊಸದಾಗಿ ನಿರ್ಮಾಣವಾಗುವ ಮನೆಗಳಿಗೆ ಮಾತ್ರವಲ್ಲದೆ, ಈಗಾಗಲೇ ನಿರ್ಮಾಣವಾಗಿರುವ ಕಟ್ಟಡಗಳಿಗೂ ಅನ್ವಯವಾಗಲಿದೆ ಎಂದು ಇಲಾಖೆ ಸ್ಪಷ್ಟಪಡಿಸಿದೆ.
ಏನಿದು ಹೊಸ ಬದಲಾವಣೆ? :
ಈ ಹಿಂದೆ 20×30 ಅಡಿ ಅಳತೆಯ ಸಣ್ಣ ನಿವೇಶನಗಳಲ್ಲಿ ಮನೆ ಕಟ್ಟುವಾಗಲೂ ಕಡ್ಡಾಯವಾಗಿ ಸುತ್ತಲೂ 1 ಮೀಟರ್ ಜಾಗವನ್ನು (ಸೆಟ್‌ಬ್ಯಾಕ್) ಬಿಡಬೇಕೆಂಬ ನಿಯಮವಿತ್ತು. ಇದರಿಂದಾಗಿ ಸಣ್ಣ ನಿವೇಶನಗಳಲ್ಲಿ ಮನೆ ಕಟ್ಟಲು ಜಾಗದ ಕೊರತೆ ಎದುರಾಗುತ್ತಿತ್ತು. ಇದೀಗ ಪರಿಷ್ಕೃತ ನಿಯಮದ ಅನ್ವಯ, 60 ಚದರ ಮೀಟರ್‌ವರೆಗಿನ (ಸುಮಾರು 645 ಚದರ ಅಡಿ) ನಿವೇಶನಗಳಿಗೆ ಹಿಂಭಾಗದಲ್ಲಿ ಯಾವುದೇ ಜಾಗ ಬಿಡುವಂತಿಲ್ಲ. ಅಂದರೆ ‘ಶೂನ್ಯ ಸೆಟ್‌ಬ್ಯಾಕ್’ (Zero Setback) ಸೌಲಭ್ಯ ಕಲ್ಪಿಸಲಾಗಿದೆ.
ಯಾವ ಅಳತೆಯ ಸೈಟ್‌ಗೆ ಎಷ್ಟು ಜಾಗ ಬಿಡಬೇಕು? (ಪರಿಷ್ಕೃತ ನಿಯಮ):
ನಗರಾಭಿವೃದ್ಧಿ ಇಲಾಖೆ ಬಿಡುಗಡೆ ಮಾಡಿರುವ ಪಟ್ಟಿಯ ಪ್ರಕಾರ:
60 ಚದರ ಮೀಟರ್‌ವರೆಗೆ (ಅಂದಾಜು 20×30 ಅಡಿ): ಮುಂಭಾಗ 0.75 ಮೀಟರ್ ಜಾಗ ಬಿಡಬೇಕು. ಹಿಂಭಾಗ ಜಾಗ ಬಿಡುವ ಅವಶ್ಯಕತೆ ಇಲ್ಲ. ಎಡ ಅಥವಾ ಬಲ ಭಾಗದಲ್ಲಿ ಯಾವುದಾದರೂ ಒಂದು ಬದಿ 0.60 ಮೀಟರ್ ಜಾಗ ಬಿಟ್ಟರೆ ಸಾಕು.
* 60 ರಿಂದ 150 ಚದರ ಮೀಟರ್‌ವರೆಗೆ: ಮುಂಭಾಗ 0.90 ಮೀ., ಹಿಂಭಾಗ 0.70 ಮೀ. ಹಾಗೂ ಯಾವುದಾದರೂ ಒಂದು ಬದಿಯಲ್ಲಿ 0.70 ಮೀಟರ್ ಜಾಗ ಬಿಡಬೇಕು.
* 150 ರಿಂದ 250 ಚದರ ಮೀಟರ್‌ವರೆಗೆ: ಮುಂಭಾಗ 1 ಮೀ., ಹಿಂಭಾಗ 0.80 ಮೀ. ಹಾಗೂ ಅಕ್ಕಪಕ್ಕದ ಎರಡೂ ಬದಿಗಳಲ್ಲಿ 0.80 ಮೀಟರ್ ಜಾಗ ಬಿಡಬೇಕು.
ಇದಕ್ಕೂ ಮೀರಿದ ದೊಡ್ಡ ನಿವೇಶನಗಳಿಗೆ (250 ರಿಂದ 400) ಚ.ಮೀ) ನಿವೇಶನದ ಉದ್ದ ಮತ್ತು ಅಗಲದ ಶೇಕಡಾವಾರು ಆಧಾರದ ಮೇಲೆ (ಶೇ. 8ರಿಂದ ಶೇ. 12 ರಷ್ಟು) ಸೆಟ್‌ಬ್ಯಾಕ್ ಬಿಡಬೇಕಾಗುತ್ತದೆ.
ಕೈಗಾರಿಕೆಗಳಿಗೂ ರಿಯಾಯಿತಿ:
ಕೇವಲ ವಸತಿ ನಿವೇಶನಗಳಲ್ಲದೆ, ಸಣ್ಣ ಕೈಗಾರಿಕೆಗಳಿಗೂ ಇಲಾಖೆ ರಿಯಾಯಿತಿ ನೀಡಿದೆ. 500 ಚದರ ಮೀಟರ್‌ವರೆಗಿನ ನಿವೇಶನದಲ್ಲಿ ನಿರ್ಮಿಸುವ ಕೈಗಾರಿಕಾ ಕಟ್ಟಡಗಳಿಗೆ ಹಿಂದೆ ಇದ್ದ ಸುತ್ತಲೂ 4.5 ಮೀಟರ್ ಜಾಗ ಬಿಡುವ ನಿಯಮವನ್ನು ಸಡಿಲಿಕೆ ಮಾಡಲಾಗಿದೆ.
ಈ ನಿರ್ಧಾರದಿಂದಾಗಿ ಬೆಂಗಳೂರು ಸೇರಿದಂತೆ ರಾಜ್ಯದಾದ್ಯಂತ ಸಣ್ಣ ನಿವೇಶನಗಳಲ್ಲಿ ಮನೆ ಕಟ್ಟುವವರಿಗೆ ಹೆಚ್ಚಿನ ಅನುಕೂಲವಾಗಲಿದ್ದು, ರಿಯಲ್ ಎಸ್ಟೇಟ್ ಮತ್ತು ಕಟ್ಟಡ ನಿರ್ಮಾಣ ವಲಯದಲ್ಲಿ ಚಟುವಟಿಕೆಗಳು ಗರಿಗೆದರುವ ನಿರೀಕ್ಷೆಯಿದೆ.
ನಗರಾಭಿವೃದ್ಧಿ ಇಲಾಖೆಯು ಕಟ್ಟಡ ಸುತ್ತಮುತ್ತಲ ಜಾಗ ಬಿಟ್ಟು ನಿರ್ಮಾಣ ಮಾಡುವ ಸಂಬಂಧ 05-01-2026ರಂದು ಹೊರಡಿಸಿರುವ ಅಧಿಸೂಚನೆ ದಾಖಲೆ.
Join our WhatsApp Channel
