ದಿತ್ವಾ ಚಂಡಮಾರುತದ ಅಬ್ಬರಕ್ಕೆ ತತ್ತರಿಸಿದ ಶ್ರೀಲಂಕಾಕ್ಕೆ ಭಾರತದ ನೆರವು : ತಮಿಳುನಾಡಲ್ಲಿ ಭೀತಿ, ಬೆಂಗಳೂರಲ್ಲಿ ಚಳಿ- ತುಂತುರು‌ ಮಳೆ

ಬೆಂಗಳೂರು/ಚೆನ್ನೈ, ನ.30 www.bengaluruwire.com : ಬಂಗಾಳಕೊಲ್ಲಿಯಲ್ಲಿ ಉಂಟಾಗಿರುವ ‘ದಿತ್ವಾ’ ಚಂಡಮಾರುತ ತೀವ್ರ ಸ್ವರೂಪ ಪಡೆದುಕೊಂಡಿದ್ದು, ಶ್ರೀಲಂಕಾದಲ್ಲಿ ಅಪಾರ ಹಾನಿಯುಂಟುಮಾಡಿದೆ. ನೆರೆಯ ರಾಷ್ಟ್ರದ ಸಂಕಷ್ಟಕ್ಕೆ ಸ್ಪಂದಿಸಿರುವ ಭಾರತ, ‘ಆಪರೇಷನ್ ಸಾಗರ್ ಬಂಧು’ ಮೂಲಕ ತುರ್ತು ನೆರವು ರವಾನಿಸಿದೆ.

ಶ್ರೀಲಂಕಾಕ್ಕೆ ‘ಸಾಗರ್ ಬಂಧು’ ನೆರವು: 159ಕ್ಕೆ ಏರಿದ ಸಾವಿನ ಸಂಖ್ಯೆ :

ದಿತ್ವಾ ಚಂಡಮಾರುತದ ಆರ್ಭಟಕ್ಕೆ ಶ್ರೀಲಂಕಾ ನಲುಗಿಹೋಗಿದ್ದು, ಮೃತರ ಸಂಖ್ಯೆ 159ಕ್ಕೆ ಏರಿಕೆಯಾಗಿದೆ. 191ಕ್ಕೂ ಹೆಚ್ಚು ಮಂದಿ ನಾಪತ್ತೆಯಾಗಿದ್ದು, ಸುಮಾರು 7.8 ಲಕ್ಷ ಜನರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಈ ಹಿನ್ನೆಲೆಯಲ್ಲಿ ಭಾರತವು ‘ನೇಬರ್‌ಹುಡ್ ಫಸ್ಟ್’ (ನೆರೆಹೊರೆಯವರೇ ಮೊದಲು) ನೀತಿಯಡಿ ರಕ್ಷಣಾ ಕಾರ್ಯಚರಣೆ ಚುರುಕುಗೊಳಿಸಿದೆ.

ಶ್ರೀಲಂಕಾದಲ್ಲಿನ ಪ್ರವಾಹ ಪರಿಸ್ಥಿತಿ. (ಚಿತ್ರಕೃಪೆ : ಸ್ಟಾರ್ ಲಿಂಕ್)

ನೌಕಾಪಡೆ ನೆರವಿನ ಹಸ್ತ: ಭಾರತೀಯ ನೌಕಾಪಡೆಯ ಐಎನ್‌ಎಸ್ ವಿಕ್ರಾಂತ್ (INS Vikrant) ಮತ್ತು ಐಎನ್‌ಎಸ್ ಉದಯಗಿರಿ (INS Udaygiri) ಯುದ್ಧನೌಕೆಗಳು ಈಗಾಗಲೇ ಕೊಲಂಬೋ ತಲುಪಿದ್ದು, ಅಗತ್ಯ ಆಹಾರ ಹಾಗೂ ವೈದ್ಯಕೀಯ ಸಾಮಗ್ರಿಗಳನ್ನು ಪೂರೈಸಿವೆ. ಇವುಗಳ ಜೊತೆಗೆ ಐಎನ್‌ಎಸ್ ಸುಕನ್ಯಾ ನೌಕೆಯೂ ಪರಿಹಾರ ಕಾರ್ಯದಲ್ಲಿ ಕೈಜೋಡಿಸಿದೆ.

ವಾಯುಪಡೆ ಏರ್‌ಲಿಫ್ಟ್: ಭಾರತೀಯ ವಾಯುಪಡೆಯ ಸಿ-130ಜೆ (C-130J) ಮತ್ತು ಐಎಲ್-76 (IL-76) ವಿಮಾನಗಳ ಮೂಲಕ ಹಿಂಡನ್ ವಾಯುನೆಲೆಯಿಂದ 21 ಟನ್‌ಗೂ ಹೆಚ್ಚು ಪರಿಹಾರ ಸಾಮಗ್ರಿಗಳನ್ನು ಮತ್ತು ಎನ್‌ಡಿಆರ್‌ಎಫ್ (NDRF) ತಂಡಗಳನ್ನು ಶ್ರೀಲಂಕಾಕ್ಕೆ ರವಾನಿಸಲಾಗಿದೆ.

ಶ್ರೀಲಂಕಾದಲ್ಲಿ ಪರಿಹಾರ ಕಾರ್ಯಾಚರಣೆಗೆ ತೆರಳಿರುವ ಭಾರತೀಯ ವಾಯುಪಡೆ ವಿಮಾನ.

ತಮಿಳುನಾಡು ಕರಾವಳಿಯಲ್ಲಿ ಹೈ ಅಲರ್ಟ್: ದಿಕ್ಕು ಬದಲಿಸಿದ ಚಂಡಮಾರುತ :

ಹವಾಮಾನ ಇಲಾಖೆಯ (IMD) ಇತ್ತೀಚಿನ ವರದಿಯ ಪ್ರಕಾರ, ದಿತ್ವಾ ಚಂಡಮಾರುತವು ತಮಿಳುನಾಡು-ಪುದುಚೇರಿ ಕರಾವಳಿಗೆ ನೇರವಾಗಿ ಅಪ್ಪಳಿಸುವ (Landfall) ಸಾಧ್ಯತೆ ಕಡಿಮೆಯಿದ್ದು, ಕರಾವಳಿಗೆ ಸಮಾನಾಂತರವಾಗಿ (Moving Parallel) ಉತ್ತರ ದಿಸೆಯಲ್ಲಿ ಚಲಿಸುತ್ತಿದೆ. ಆದರೂ, ಚೆನ್ನೈ ಸೇರಿದಂತೆ ಕರಾವಳಿ ಜಿಲ್ಲೆಗಳಲ್ಲಿ ಭಾರೀ ಗಾಳಿ ಮಳೆಯಾಗುತ್ತಿದ್ದು, ರೆಡ್ ಅಲರ್ಟ್ ಘೋಷಿಸಲಾಗಿದೆ. ಮೀನುಗಾರರಿಗೆ ಸಮುದ್ರಕ್ಕಿಳಿಯದಂತೆ ಎಚ್ಚರಿಕೆ ನೀಡಲಾಗಿದ್ದು, ಮುಂಜಾಗ್ರತಾ ಕ್ರಮವಾಗಿ ವಿಮಾನ ಮತ್ತು ರೈಲು ಸಂಚಾರದಲ್ಲಿ ವ್ಯತ್ಯಯ ಉಂಟಾಗಿದೆ.

ತಮಿಳುನಾಡಿನ ಸಮುದ್ರ ತೀರವೊಂದರ ಪರಿಸ್ಥಿತಿ (ಚಿತ್ರಕೃಪೆ : X ಜಾಲತಾಣ)

ಬೆಂಗಳೂರಿನಲ್ಲಿ ‘ದಿತ್ವಾ’ ಎಫೆಕ್ಟ್: ಹೆಚ್ಚಿದ ಚಳಿ, ಮಳೆ ಸಾಧ್ಯತೆ

ಚಂಡಮಾರುತದ ಪರೋಕ್ಷ ಪರಿಣಾಮ ಸಿಲಿಕಾನ್ ಸಿಟಿ ಬೆಂಗಳೂರಿನ ಮೇಲೂ ಬೀರಿದೆ. ನಗರದಲ್ಲಿ ಮೋಡ ಕವಿದ ವಾತಾವರಣವಿದ್ದು, ಕನಿಷ್ಠ ತಾಪಮಾನ 16 ಡಿಗ್ರಿ ಸೆಲ್ಸಿಯಸ್‌ಗೆ ಕುಸಿದಿದೆ.

ಯೆಲ್ಲೋ ಅಲರ್ಟ್: ಹವಾಮಾನ ಇಲಾಖೆ ಬೆಂಗಳೂರಿಗೆ ಯೆಲ್ಲೋ ಅಲರ್ಟ್ ಘೋಷಿಸಿದ್ದು, ನವೆಂಬರ್ 30 ರಂದು ಸಾಧಾರಣದಿಂದ ಕೂಡಿದ ಮಳೆಯಾಗುವ ಸಾಧ್ಯತೆಯಿದೆ.

ಹವಾಮಾನ ವರದಿ: ಗರಿಷ್ಠ ತಾಪಮಾನ 25 ಡಿಗ್ರಿ ಸೆಲ್ಸಿಯಸ್ ಆಸುಪಾಸಿನಲ್ಲಿರಲಿದ್ದು, ಶೀತಗಾಳಿ ಬೀಸುವ ಸಾಧ್ಯತೆಯಿದೆ. ದಕ್ಷಿಣ ಒಳನಾಡಿನ ಜಿಲ್ಲೆಗಳಲ್ಲೂ ಮಳೆಯಾಗಲಿದ್ದು, ಇದು ಹಿಂಗಾರು ಮಳೆಯ ಕೊರತೆಯನ್ನು ನೀಗಿಸಲಿದೆ ಎಂದು ಹವಾಮಾನ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. (ಉಪಗ್ರಹ ಚಿತ್ರ ಕೃಪೆ : ಐಎಂಡಿ)