ಬೆಂಗಳೂರು, ಜು.22 www.bengaluruwire.com : ಜಾಗತಿಕ ರಿಯಲ್ ಎಸ್ಟೇಟ್ ವಿಭಾಗದಲ್ಲಿ ದುಬಾರಿ ನಗರಗಳ ಪಟ್ಟಿಯಲ್ಲಿ ಸೇರಿರುವ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಮನೆ ಬಾಡಿಗೆಗೆ ಸಿಗುವ ಆಘಾತಕಾರಿ ಬೆಲೆಗಳು ಇದೀಗ ಮತ್ತೊಮ್ಮೆ ಚರ್ಚೆಗೆ ಗ್ರಾಸವಾಗಿವೆ. ಕೆನಡಾ ಮೂಲದ ಕಂಟೆಂಟ್ ಕ್ರಿಯೇಟರ್ ಕಲೆಬ್ ಫ್ರೈಸನ್ ಅವರು ಬೆಂಗಳೂರಿನಲ್ಲಿ ಮನೆ ಹುಡುಕಲು ಹೋಗಿ ಅನುಭವಿಸಿದ ಕಹಿ ಘಟನೆ ಎಲ್ಲರ ಗಮನ ಸೆಳೆದಿದೆ.
ಫ್ರೈಸನ್ ಅವರು ನಾಲ್ಕು ಬೆಡ್ ರೂಂಗಳ ಮನೆಗೆ ಆನ್ಲೈನ್ ಮೂಲಕ ಹುಡುಕಾಟ ನಡೆಸುತ್ತಿದ್ದಾಗ, ಬೆನಗಾನಹಳ್ಳಿಯಲ್ಲಿನ ಒಂದು ಮನೆಗೆ ಮಾಸಿಕ 2.3 ಲಕ್ಷ ರೂಪಾಯಿ ಬಾಡಿಗೆ ಮತ್ತು ಬರೋಬ್ಬರಿ 23 ಲಕ್ಷ ರೂಪಾಯಿ ಮುಂಗಡ (ಸೆಕ್ಯೂರಿಟಿ ಡೆಪಾಸಿಟ್) ಕೇಳಿರುವುದು ಅವರನ್ನು ಬೆಚ್ಚಿಬೀಳಿಸಿದೆ. ಈ ದರಗಳನ್ನು ಕೇಳಿ ದಂಗಾದ ಅವರು, “ವಿಶ್ವದಲ್ಲೇ ಅತ್ಯಂತ ದುರಾಸೆಯ ಮಾಲೀಕರು ಇರುವುದು ಬೆಂಗಳೂರಿನಲ್ಲಿ” ಎಂದು ತಮ್ಮ ಎಕ್ಸ್ (ಹಿಂದಿನ ಟ್ವಿಟರ್) ಖಾತೆಯಲ್ಲಿ ಆಕ್ರೋಶ ಹೊರಹಾಕಿದ್ದಾರೆ.
ಬೆಂಗಳೂರಿನಲ್ಲಿ 10 ತಿಂಗಳ ಬಾಡಿಗೆ ಮೊತ್ತವನ್ನು ಡೆಪಾಸಿಟ್ ರೂಪದಲ್ಲಿ ಕೇಳುವುದು ಸಾಮಾನ್ಯವಾಗಿಬಿಟ್ಟಿದೆ ಎಂದು ಅವರು ತಿಳಿಸಿದ್ದಾರೆ.
ಇತರೆ ನಗರಗಳ ಬಾಡಿಗೆ ಡೆಪಾಸಿಟ್ ಹೋಲಿಕೆ:
ತಮ್ಮ ಪೋಸ್ಟ್ನಲ್ಲಿ, ಸೆಲೆಬ್ ಫ್ರೈಸನ್ ಅವರು ವಿಶ್ವದ ಪ್ರಮುಖ ನಗರಗಳಲ್ಲಿನ ಬಾಡಿಗೆ ಡೆಪಾಸಿಟ್ ಪ್ರಮಾಣವನ್ನು ಬೆಂಗಳೂರಿಗೆ ಹೋಲಿಸಿದ್ದಾರೆ:
* ನ್ಯೂಯಾರ್ಕ್, ಅಮೆರಿಕ: ಒಂದು ತಿಂಗಳ ಬಾಡಿಗೆ ಮೊತ್ತ ಡೆಪಾಸಿಟ್.
* ಟೊರೆಂಟೋ, ಕೆನಡಾ: ಒಂದು ತಿಂಗಳ ಬಾಡಿಗೆ ಮೊತ್ತ ಡೆಪಾಸಿಟ್.
* ಸ್ಯಾನ್ ಫ್ರಾನ್ಸಿಸ್ಕೋ, ಅಮೆರಿಕ: ಎರಡು ತಿಂಗಳ ಬಾಡಿಗೆ ಮೊತ್ತ ಡೆಪಾಸಿಟ್.
* ದುಬೈ, ಯುಎಇ: ವಾರ್ಷಿಕ ಬಾಡಿಗೆ ಮೊತ್ತದ ಶೇಕಡಾ 5 ರಿಂದ 10 ರಷ್ಟು ಡೆಪಾಸಿಟ್.
* ಲಂಡನ್, ಯುಕೆ: 5 ರಿಂದ 6 ವಾರಗಳ ಬಾಡಿಗೆ ಮೊತ್ತ ಡೆಪಾಸಿಟ್.
ಈ ಪೋಸ್ಟ್ ಬಗ್ಗೆ ತಗಾದೆ ತೆಗೆದ ಬಳಕೆದಾರರೊಬ್ಬರು “ಅದು ಅವನ ಆಸ್ತಿ, ಅವನು ಏನು ಬೇಕಾದರೂ ಮಾಡಬಹುದು! ನಿಮಗೆ ಅದನ್ನು ಪಡೆಯಲು ಸಾಧ್ಯವಾಗದಿದ್ದರೆ ಅಥವಾ ಅದರಿಂದ ಸಮಸ್ಯೆ ಇದ್ದರೆ ಮುಂದುವರಿಯಿರಿ. ಜನರು ಕೆಲಸಗಳನ್ನು ಹೇಗೆ ಮಾಡಬೇಕೆಂದು ವಿಭಿನ್ನ ದೃಷ್ಟಿಕೋನಗಳನ್ನು ಹೊಂದಿರುತ್ತಾರೆ. ವಿಶೇಷವಾಗಿ ಆಕ್ರೋಶವು ಬಹಳ ವ್ಯಕ್ತಿನಿಷ್ಠವಾಗಿದೆ. ಮುಂದುವರಿಯಿರಿ ದೂರು ನೀಡುವುದನ್ನು ನಿಲ್ಲಿಸಿ” ಎಂದು ಟೀಕಿಸಿದ್ದಾರೆ.
ಮನೆ ಮಾಲೀಕನ ದುಬಾರಿ ಬಾಡಿಗೆ ವಿಚಾರದ ಬಗ್ಗೆ ಕೆನಡಾ ಪ್ರಜೆಯ ಪೋಸ್ಟ್ ಸಾಮಾಜಿಕ ಜಾಲತಾಣದಲ್ಲಿ ವ್ಯಾಪಕ ಆಕ್ರೋಶ, ಪರ-ವಿರೋಧದ ಚರ್ಚೆಗೆ ಕಾರಣವಾಗಿದೆ. ಬೆಂಗಳೂರಿನಲ್ಲಿ ದಿನೇ ದಿನೇ ಜನಸಂದಣಿ ಹೆಚ್ಚಾಗುತ್ತಿದ್ದು, ಕೆಲಸ ಅರಸಿ ಬರುವ ವಲಸಿಗರ ಸಂಖ್ಯೆ ಗಣನೀಯವಾಗಿ ಏರಿಕೆಯಾಗುತ್ತಿದೆ. ಇದೇ ಕಾರಣಕ್ಕೆ ಬೆಂಗಳೂರಿನಲ್ಲಿ ಮನೆಗಳ ಬಾಡಿಗೆ ವರ್ಷದಿಂದ ವರ್ಷಕ್ಕೆ ಗಣನೀಯವಾಗಿ ಏರಿಕೆಯಾಗುತ್ತಿರುವುದು ಈ ರೀತಿಯ ಘಟನೆಗಳಿಗೆ ಕಾರಣವಾಗುತ್ತಿದೆ.
Join our WhatsApp Channel
