ಬೆಂಗಳೂರು, ಫೆ.28 www.bengaluruwire.com : ದಾಸರಹಳ್ಳಿ ವಲಯದ ಗೃಹೋಪಯೋಗಿ ವಸ್ತುಗಳನ್ನು ಮಾರಾಟ ಮಾಡುವ ಐಕಿಯಾ (IKEA)ದಲ್ಲಿ ಉದ್ದಿಮೆ ಪರವಾನಗಿ (Trade Licence)ಗೆ ಸಂಬಂಧಿಸಿದಂತೆ ದಂಡ ಸಮೇತ 65 ಲಕ್ಷ ರೂ. ಶುಲ್ಕವನ್ನು ಪಾವತಿಸಿ ನವೀಕರಣ ಮಾಡಿಕೊಂಡಿದ್ದಾರೆ ಎಂದು ವಲಯ ಆಯುಕ್ತರಾದ ಗಿರೀಶ್ ಅವರು ತಿಳಿಸಿದರು.
ದಾಸರಹಳ್ಳಿ ವಲಯದ ಐಕಿಯಾದಲ್ಲಿ ಉದ್ದಿಮೆ ಪರವಾನಗಿಗೆ ಸಂಬಂಧಿಸಿದಂತೆ ದಂಡ ಸಮೇತ 65 ಲಕ್ಷ ರೂ. ಶುಲ್ಕವನ್ನು ಪಾವತಿಸಿ ನವೀಕರಣ ಮಾಡಿಕೊಂಡಿರುತ್ತಾರೆ ಎಂದು ವಲಯ ಆಯುಕ್ತರಾದ ಗಿರೀಶ್ ಅವರು ಹೇಳಿದರು.
8ನೇ ಜನವರಿ 2025 ರಂದು ಆರೋಗ್ಯಾಧಿಕಾರಿಗಳು ಮತ್ತು ಆರೋಗ್ಯ ವೈದ್ಯಾಧಿಕಾರಿಗಳು ಅವರ ಜೊತೆ ಸ್ಥಳಕ್ಕೆ ಭೇಟಿ ನೀಡಿ ತಪಾಸಣೆ ನಡೆಸಲಾಯಿತು. ಈ ವೇಳೆ 4021 ಹೆಚ್.ಪಿ ಅಶ್ವಶಕ್ತಿ, ಏರಿಯೇಟೆಡ್ ವಾಟರ್ (Areated water), ಸಾಫ್ಟ್ ಡ್ರಿಂಕ್ಸ್ (Soft Drinks) ಹಾಗೂ ಬಾಟಲ್ ನೀರು (Bottled Water) ಉದ್ದಿಮೆಗಳಿಗೆ ಪರವಾನಗಿಯನ್ನು ಪಡೆಯದೇ ಇರುವುದು ಕಂಡುಬಂದಿರುತ್ತದೆ. ಈ ಸಂಬಂಧ 2022-23 ನೇ ಸಾಲಿನಿಂದ 2026-27 ನೇ ಸಾಲಿನವರೆಗೂ ಅಂದರೆ ಒಟ್ಟು 5 ವರ್ಷಗಳಿಗೆ 65,93,600 ರೂ.ಗಳನ್ನು ಪಾವತಿಸಲು ನೋಟಿಸ್‌ಗಳನ್ನು ಜಾರಿ ಮಾಡಲಾಗಿತ್ತು.
ಐಕಿಯಗೆ ಎರಡು ಬಾರಿ ನೋಟೀಸ್ ನೀಡಿದರೂ ಯಾವುದೇ ರೀತಿಯಲ್ಲಿ ಸ್ಪಂದಿಸಿಲ್ಲ. ಈ ಸಂಬಂಧ 20ನೇ ಫೆಬ್ರವರಿ 2025 ರಂದು ಉದ್ದಿಮೆದಾರರಿಗೆ ಮೂರನೇ ನೋಟಿಸ್ ಜಾರಿ ಮಾಡಲಾಯಿತು. ಅದರಂತೆ ಐಕಿಯ ವತಿಯಿಂದ 25ನೇ ಫೆಬ್ರವರಿ 2025 ರಂದು 3 ವರ್ಷಗಳ ದಂಡದ ಮೊತ್ತವನ್ನು ಸೇರಿ 5 ವರ್ಷಗಳಿಗೆ ಉದ್ದಿಮೆ ಪರವಾನಗಿಯನ್ನು ಪಡೆಯಲು 65,93,600 ರೂ.ಗಳಿಗೆ ಮುಖ್ಯ ಆಯುಕ್ತರು, ಬಿಬಿಎಂಪಿ ರವರ ಹೆಸರಿಗೆ ಡಿಡಿ ಸಲ್ಲಿಸಿದರು. ಪಾಲಿಕೆಗೆ ಬರಬೇಕಿದ್ದ ಸಂಪೂರ್ಣ ಹಣವು ಇಂದು ಖಾತೆಗೆ ಜಮೆಯಾಗಿರುತ್ತದೆ ಎಂದು ಅವರು ವಿವರಿಸಿದರು.
ಇದಲ್ಲದೇ ದಾಸರಹಳ್ಳಿ ವಲಯ ವ್ಯಾಪ್ತಿಯಲ್ಲಿ ಪರವಾನಗಿ ಪಡೆಯದೆ ಅನಧಿಕೃವಾಗಿ ನಡೆಸುತ್ತಿರುವ ಮಳಿಗೆ ಅಥವಾ ಉದ್ದಿಮೆಗಳು ಪರವಾನಗಿ ಪಡೆಯುವಂತೆ ವಲಯ ಆಯುಕ್ತ ಗಿರೀಶ್ ಕೋರಿದ್ದಾರೆ.
ಈ ಪ್ರಕರಣದ ಬಗ್ಗೆ ಬೆಂಗಳೂರು ವೈರ್ ಗೆ ಪ್ರತಿಕ್ರಿಯೆ ನೀಡಿರುವ ಐಕಿಯಾ ಸಂಸ್ಥೆ, “”ಐಕಿಯಾ ನೆಲದ ಕಾನೂನನ್ನು ಪಾಲಿಸುತ್ತದೆ. ಬಿಬಿಎಂಪಿ ಗಡುವನ್ನು ಪೂರೈಸಲು ನಾವು ತುರ್ತಾಗಿ ನಿಗಧಿತ ಶುಲ್ಕವನ್ನು ಪಾವತಿಸಿದ್ದೇವೆ. ಪರವಾನಗಿಯ ವಿವರಗಳಿಗೆ ಸಂಬಂಧಿಸಿದಂತೆ ಬಿಬಿಎಂಪಿಯೊಂದಿಗೆ ಈ ವಿಷಯದ ಬಗ್ಗೆ ಚರ್ಚೆ ನಡೆಸಿದ್ದೇವೆ. ನಮ್ಮ ಕಾರ್ಯಾಚರಣೆಗಳು ಶೇ. 100ರಷ್ಟು ಕಾನೂನುಬದ್ಧವಾಗಿವೆ ಮತ್ತು ನಾವು ಅಧಿಕಾರಿಗಳಿಂದ ಈ ಕುರಿತಾಗಿ ಸ್ಪಷ್ಟೀಕರಣವನ್ನು ಪಡೆಯುತ್ತೇವೆ ಮತ್ತು ಮುಂದಿನ ಕ್ರಮಗಳನ್ನು ತೆಗೆದುಕೊಳ್ಳುತ್ತೇವೆ” ಎಂದು ತಿಳಿಸಿದೆ.
Join our WhatsApp Channel
