ಬಾಗಲಕೋಟೆ, ಜ.16 www.bengaluruwire.com : ಮೊಟ್ಟಮೊದಲ ಬಾರಿಗೆ ಬಾಗಲಕೋಟೆ ಜಿಲ್ಲೆ ಬೀಳಗಿ ವಿಧಾನಸಭಾ ಕ್ಷೇತ್ರದಲ್ಲಿ ಅದ್ಧೂರಿ ವೀರರಾಣಿ ಕಿತ್ತೂರು ಚೆನ್ನಮ್ಮ ಬೃಹತ್ ನಾಟಕ ಪ್ರದರ್ಶನ ಹೊಸ ಪ್ರಯೋಗಕ್ಕೆ ಸಾಕ್ಷಿಯಾಯಿತು.
ಧಾರವಾಡದ ರಂಗಾಯಣದವರು ಈ ಐತಿಹಾಸಿಕ ನಾಟಕವನ್ನು ಬಹಳ ಸಮೃದ್ಧವಾಗಿ ಬೀಳಗಿ ಕ್ಷೇತ್ರದಲ್ಲಿ ಭಾನುವಾರ ರಾತ್ರಿ ಯಶಸ್ವಿಯಾಗಿ ನಡೆಸಿಕೊಟ್ಟರು. ನಿಜವಾದ ಕುದುರೆ, ಆನೆ, ಒಂಟೆಗಳನ್ನು ವೇದಿಕೆ ಮೇಲೆ ತಂದು ಹಿಂದಿನ ಐತಿಹಾಸಿಕ ದಿನಗಳನ್ನು ಕಣ್ಣೆದಿರು ತಂದು ಬಹಳ ಯಶಸ್ವಿಯಾಗಿ ಪ್ರದರ್ಶಿಸಿ ಬೀಳಗಿ ಕ್ಷೇತ್ರದ ಜನರಿಗೆ ಕಣ್ಣಿಗೆ ರಸದೌತಣ ಬಡಿಸಿದರು.
ರಂಗಾಯಣದ ಈ ಒಂದು ಯೋಜನೆ ಬೀಳಗಿ ಮತ ಕ್ಷೇತ್ರದ ಜನರ ಹೃದಯವನ್ನು ಸೆಳೆಯಿತು. ಅಲ್ಲದೇ ವೀರರಾಣಿ ಕಿತ್ತೂರು ಚೆನ್ನಮ್ಮ ಹಾಗೂ ಮಹಾಮಾತೆಯ ರಾಜ್ಯಭಾರವನ್ನು ಕಣ್ಣಾರೆ ಕಂಡಂತೆ ಜನರು ಸಂತೋಷ ಪಟ್ಟರು.
ಬೃಹತ್ ಹಾಗೂ ಮಧ್ಯಮ ಕೈಗಾರಿಕಾ ಸಚಿವರು ಹಾಗೂ ಬೀಳಗಿ ಮತ ಕ್ಷೇತ್ರದ ಶಾಸಕರಾದ ಡಾ.ಮುರುಗೇಶ್ ನಿರಾಣಿ ಅವರ ನೇತೃತ್ವದಲ್ಲಿ ಧಾರವಾಡ ರಂಗಾಯಣದಿಂದ ವೀರ ರಾಣಿ ಕಿತ್ತೂರು ಚೆನ್ನಮ್ಮಳನ್ನು ಬೀಳಗಿ ಮತ ಕ್ಷೇತ್ರದ ಜನ ಕಣ್ತುಂಬಿಕೊಂಡರು.
ರಂಗಾಯಣ ಧಾರವಾಡದ ಈ ಮಹತ್ತರ ಪ್ರಯತ್ನಕ್ಕೆ ಸಚಿವ ನಿರಾಣಿ ಅವರು ರಂಗಾಯಣದ ಈ ಕಾರ್ಯ ಮೆಚ್ಚುವಂತಹುದು. ಮಹಾಮಾತೆ ವೀರರಾಣಿ ಕಿತ್ತೂರು ಚೆನ್ನಮ್ಮಳ ಸಾಹಸ ಶೌರ್ಯ ಹಾಗೂ ಐತಿಹಾಸಿಕ ದಿನಗಳನ್ನು ಉಣಬಡಿಸಿದ ಎಲ್ಲ ಕಲಾವಿದರಿಗೂ ಸಚಿವರು ಅಭಿನಂದನೆ ಸಲ್ಲಿಸಿದರು.
ಬೀಳಗಿ ಮತ ಕ್ಷೇತ್ರದ ಶಾಸಕರಾದ ನಿರಾಣಿ ಅವರ ನಿವಾಸದ ಬಳಿ ಈ ಒಂದು ಐತಿಹಾಸಿಕ ಪ್ರದರ್ಶನ ನಿನ್ನೆಯಿಂದ ಆರಂಭವಾಗಿದ್ದು ಇಂದು ಕೂಡ ಸಂಜೆ 6 ಗಂಟೆಗೆ ಐತಿಹಾಸಿಕ ಪ್ರದರ್ಶನ ನಡೆಯಿತು.
Join our WhatsApp Channel
