ಬೆಂಗಳೂರು, ಡಿ.04 www.bengaluruwire.com : ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (ಜಿಬಿಎ) ವ್ಯಾಪ್ತಿಯ ಆಸ್ತಿಗಳಿಗೆ ನಗರ ಆಸ್ತಿ ಮಾಲೀಕತ್ವದ ದಾಖಲೆ ಯುಪಿಒಆರ್ (UPOR) ನಕ್ಷೆ ಮತ್ತು ಡ್ರೋನ್ ಚಿತ್ರಗಳನ್ನು ಒಳಗೊಂಡ ಅತ್ಯಾಧುನಿಕ ‘ಇಂಟಿಗ್ರೇಟೆಡ್ ಇ-ಖಾತಾ’ (Integrated E-Khata) ವ್ಯವಸ್ಥೆಯನ್ನು ಜಾರಿಗೊಳಿಸಲಾಗಿದೆ.
ಈ ಕುರಿತು ಮಾಹಿತಿ ನೀಡಿರುವ ಕಂದಾಯ ಹಾಗೂ ಐಟಿ ವಿಭಾಗದ ವಿಶೇಷ ಆಯುಕ್ತ ಮುನೀಶ್ ಮೌದ್ಗಿಲ್, ನಗರ ಸಮೀಕ್ಷೆಯ ‘ನಗರ ಆಸ್ತಿ ಮಾಲೀಕತ್ವ ದಾಖಲೆಗಳು’ (UPOR) ಹಾಗೂ ಡ್ರೋನ್ ಮೂಲಕ ಸೆರೆಹಿಡಿಯಲಾದ ಓವರ್-ವ್ಯೂ ಚಿತ್ರಗಳನ್ನು ಈಗ ಇ-ಖಾತಾ ವ್ಯವಸ್ಥೆಯೊಂದಿಗೆ ಯಶಸ್ವಿಯಾಗಿ ಸಂಯೋಜಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಏನಿದು ಇಂಟಿಗ್ರೇಟೆಡ್ ಇ-ಖಾತಾ? :
ಕಳೆದ ಎರಡು ವರ್ಷಗಳಿಂದ ಕಂದಾಯ ಇಲಾಖೆಯು ಯುಪಿಒಆರ್ ಯೋಜನೆಯಡಿ ನಡೆಸಿದ ಆಸ್ತಿ ಸಮೀಕ್ಷೆಯ ಫಲಿತಾಂಶವನ್ನು ಈಗ ಜಿಬಿಎ ಇ-ಖಾತಾಗೆ ಜೋಡಿಸಲಾಗಿದೆ. ಇದರಿಂದ ಆಸ್ತಿಯ ನಿಖರವಾದ ಜಿಪಿಎಸ್ (GPS) ಮಾಹಿತಿ ಮತ್ತು ನಕ್ಷೆಗಳು ಒಂದೇ ಕಡೆ ಲಭ್ಯವಾಗಲಿವೆ. ಇದು ಅತ್ಯಂತ ಕ್ಲಿಷ್ಟಕರವಾದ ಮತ್ತು ಹೆಚ್ಚಿನ ಪರಿಶ್ರಮದ ಕೆಲಸವಾಗಿದ್ದು, ಕಂದಾಯ ಇಲಾಖೆಯ ಸಹಕಾರದಿಂದ ಯಶಸ್ವಿಯಾಗಿದೆ ಎಂದು ಮೌದ್ಗಿಲ್ ಹರ್ಷ ವ್ಯಕ್ತಪಡಿಸಿದ್ದಾರೆ.
ಇ-ಖಾತಾದಲ್ಲಿ ಲಭ್ಯವಿರುವ 9 ಪ್ರಮುಖ ಮಾಹಿತಿಗಳು:
ಸಾರ್ವಜನಿಕರು ಪಡೆಯುವ ನೂತನ ಇ-ಖಾತಾದಲ್ಲಿ ಈ ಕೆಳಗಿನ ವಿವರಗಳು ಲಭ್ಯವಿರುತ್ತವೆ:
* ಮಾಲೀಕರ ಸಂಪೂರ್ಣ ವಿವರಗಳು.
* ಆಸ್ತಿಯ ಸಮಗ್ರ ವಿವರ.
* ಆಸ್ತಿಯ ಫೋಟೋ ಮತ್ತು ಮಾಲೀಕರ ಫೋಟೋ.
* ಆಸ್ತಿಯ ನಿಖರ GPS ಅಂಕಿಗಳು.
* ಡಿಜಿಟಲ್ ಮ್ಯಾಪ್ ಹಾಗೂ ಸ್ಥಳದ ಚಿತ್ರ.
* ಆಸ್ತಿ ತೆರಿಗೆ ಮತ್ತು ಬಳಕೆಯ ವಿವರಗಳು.
* ಬೆಸ್ಕಾಂ (BESCOM) ಮೀಟರ್ ಸಂಖ್ಯೆ.
* ಆಸ್ತಿ ನೋಂದಣಿ (ರಿಜಿಸ್ಟ್ರೇಷನ್) ದಾಖಲೆ ಸಂಖ್ಯೆ.
1 ಲಕ್ಷ ಇಂಟಿಗ್ರೇಟೆಡ್ ಇ-ಖಾತಾ ವಿತರಣೆ :
ಈಗಾಗಲೇ ಸುಮಾರು 1 ಲಕ್ಷ ಆಸ್ತಿಗಳಿಗೆ ಈ ನೂತನ ‘ಸಂಯೋಜಿತ ಇ-ಖಾತಾ’ಗಳನ್ನು ನೀಡಲಾಗಿದೆ. ಜಿಬಿಎ ವ್ಯಾಪ್ತಿಯಲ್ಲಿ ಒಟ್ಟು 9 ಲಕ್ಷ ಅಂತಿಮ ಇ-ಖಾತಾಗಳನ್ನು ವಿತರಿಸಲಾಗಿದ್ದು, ಪ್ರತಿದಿನ ಸರಾಸರಿ 2,500 ಇ-ಖಾತಾಗಳನ್ನು ನೀಡಲಾಗುತ್ತಿದೆ. ಅರ್ಜಿ ಸಲ್ಲಿಸಿದ ಕೇವಲ 2 ದಿನಗಳಲ್ಲಿ ಖಾತಾ ಸಾರ್ವಜನಿಕರ ಕೈಸೇರುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಮುಂಬರುವ ದಿನಗಳಲ್ಲಿ ವಿತರಣೆ ಪ್ರಮಾಣವನ್ನು ಮತ್ತಷ್ಟು ಹೆಚ್ಚಿಸಲು ಪ್ರಾಧಿಕಾರ ಕ್ರಮ ಕೈಗೊಂಡಿದೆ.
Join our WhatsApp Channel
