Health News | ನಾಯಿ, ಹಾವು ಕಡಿತಕ್ಕೆ ಮುಂಗಡ ಪಾವತಿ ಇಲ್ಲದೆ ಕಡ್ಡಾಯ ಚಿಕಿತ್ಸೆ: ಖಾಸಗಿ ಆಸ್ಪತ್ರೆಗಳಿಗೆ ಸರ್ಕಾರದ ಖಡಕ್ ಆದೇಶ

ಬೆಂಗಳೂರು, ನ.17 www.bengaluruwire.com : ರಾಜ್ಯದಲ್ಲಿ ನಾಯಿ, ಹಾವು ಮತ್ತು ಇತರೆ ಪ್ರಾಣಿಗಳ ದಾಳಿಗೆ ಒಳಗಾದವರಿಗೆ ಯಾವುದೇ ಮುಂಗಡ ಹಣಕ್ಕೆ (advance payment) ಒತ್ತಾಯಿಸದೆ ಕೂಡಲೇ ಪ್ರಥಮ ಚಿಕಿತ್ಸೆ ಮತ್ತು ಸೂಕ್ತ ತುರ್ತು ಚಿಕಿತ್ಸೆಯನ್ನು ನೀಡಬೇಕು ಎಂದು ಆರೋಗ್ಯ ಇಲಾಖೆಯು ರಾಜ್ಯದ ಎಲ್ಲ ಸರ್ಕಾರಿ ಮತ್ತು ಖಾಸಗಿ ಆಸ್ಪತ್ರೆಗಳಿಗೆ ಕಟ್ಟುನಿಟ್ಟಿನ ಆದೇಶ ನೀಡಿದೆ.

ಸುಪ್ರೀಂಕೋರ್ಟ್‌ನ ನಿರ್ದೇಶನ ಮತ್ತು ರಾಜ್ಯದಲ್ಲಿ ರೇಬೀಸ್ ಅನ್ನು ಸೂಚಿಸಬೇಕಾದ ರೋಗ (notifiable disease) ಎಂದು ಘೋಷಿಸಿರುವ ಹಿನ್ನೆಲೆಯಲ್ಲಿ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯು (ಸತ್ತೋಲೆ ಸಂಖ್ಯೆ : HFW 426 CGE 2025, ದಿನಾಂಕ : 15-11-2025) ಈ ಸಂಬಂಧ ಸುತ್ತೋಲೆಯನ್ನು (Circular) ಹೊರಡಿಸಿದೆ.

ಕಡ್ಡಾಯ ಚಿಕಿತ್ಸೆ, ಉಚಿತ ಪ್ರಥಮ ಚಿಕಿತ್ಸೆ :

ಸುತ್ತೋಲೆಯ ಪ್ರಕಾರ, “ವೈದ್ಯಕೀಯ ಸ್ಥಾಪನೆಯ (ಸರ್ಕಾರಿ ಮತ್ತು ಖಾಸಗಿ ಆಸ್ಪತ್ರೆಗಳು) ಪ್ರತಿಯೊಬ್ಬ ಮುಖ್ಯಸ್ಥರು ಆಂಟಿ-ರೇಬೀಸ್ ಲಸಿಕೆಗಳು (ARV), ಇಮ್ಯುನೋಗ್ಲೋಬ್ಯುಲಿನ್ (Immunoglobulin) ಮತ್ತು ಎಎಸ್‌ವಿ (Anti-Snake Venom) ಸ್ಟಾಕ್‌ ಅನ್ನು ಸದಾ ನಿರ್ವಹಿಸಬೇಕು” ಎಂದು ಸುತ್ತೋಲೆಯಲ್ಲಿ ತಿಳಿಸಿದೆ.

ಕರ್ನಾಟಕ ಖಾಸಗಿ ವೈದ್ಯಕೀಯ ಸ್ಥಾಪನೆ ಕಾಯಿದೆ, 2007ರ ಅಡಿಯಲ್ಲಿ, ಪ್ರತಿಯೊಂದು ಖಾಸಗಿ ವೈದ್ಯಕೀಯ ಸಂಸ್ಥೆಯು ಮುಂಗಡ ಹಣಕ್ಕೆ ಒತ್ತಾಯಿಸದೆ ನಾಯಿ/ಪ್ರಾಣಿ ಕಡಿತ/ಹಾವು ಕಡಿತದ ಸಂತ್ರಸ್ತರಿಗೆ ಅಗತ್ಯ ಪ್ರಥಮ ಚಿಕಿತ್ಸೆ (First Aid) ಮತ್ತು ಇತರೆ ಜೀವ ಉಳಿಸುವ ತುರ್ತು ಕ್ರಮಗಳನ್ನು ಕಡ್ಡಾಯವಾಗಿ ನಿರ್ವಹಿಸಬೇಕು.

ಕರ್ನಾಟಕ ಗುಡ್ ಸಮರಿಟನ್ ಮತ್ತು ವೈದ್ಯಕೀಯ ವೃತ್ತಿಪರ (ತುರ್ತು ಸಂದರ್ಭಗಳಲ್ಲಿ ರಕ್ಷಣೆ ಮತ್ತು ನಿಯಂತ್ರಣ) ಕಾಯಿದೆ, 2016ರ ಸೆಕ್ಷನ್ 6ರ ಅಡಿಯಲ್ಲಿ, ಪ್ರತಿ ಆಸ್ಪತ್ರೆಯು ತಕ್ಷಣದ ವೈದ್ಯಕೀಯ ಸ್ಕ್ರೀನಿಂಗ್ ಸೇವೆಗಳು ಮತ್ತು ಪ್ರಥಮ ಚಿಕಿತ್ಸೆಯನ್ನು ಉಚಿತವಾಗಿ ಒದಗಿಸಬೇಕು.

ಸೂಕ್ತ ಸೌಲಭ್ಯಗಳು ಅಥವಾ ಅರ್ಹ ಸಿಬ್ಬಂದಿ ಇಲ್ಲದ ಆಸ್ಪತ್ರೆಗಳು ಸಹ ಗಾಯಗೊಂಡ ವ್ಯಕ್ತಿಯ ಆರೋಗ್ಯಕ್ಕೆ ಅಪಾಯವನ್ನು ಕಡಿಮೆ ಮಾಡುವ ತಮ್ಮ ಸಾಮರ್ಥ್ಯದೊಳಗೆ ಅಂತಹ ಚಿಕಿತ್ಸೆಯನ್ನು ನೀಡಿ, ರೋಗಿಯ ಆರೋಗ್ಯ ಸ್ಥಿರಗೊಂಡ ನಂತರವಷ್ಟೇ ಹತ್ತಿರದ ಸೂಕ್ತ ಆಸ್ಪತ್ರೆಗೆ ರವಾನಿಸಬೇಕು.

ವೆಚ್ಚ ಮರುಪಾವತಿ ಮತ್ತು ಆಸ್ಪತ್ರೆಗಳಿಗೆ ದಂಡ :

ಖಾಸಗಿ ಆಸ್ಪತ್ರೆಗಳು ಚಿಕಿತ್ಸೆಯ ವೆಚ್ಚವನ್ನು ಮರುಪಡೆಯಲು ಸಾಧ್ಯವಾಗದಿದ್ದರೆ, ಜಿಲ್ಲಾ ನೋಂದಣಿ ಮತ್ತು ಕುಂದುಕೊರತೆ ಪ್ರಾಧಿಕಾರವು ಸುವರ್ಣ ಆರೋಗ್ಯ ಸುರಕ್ಷಾ ಟ್ರಸ್ಟ್ (SAST) ಯೋಜನೆಯಡಿ ಅನುಮತಿಸಲಾದ ದರಗಳಲ್ಲಿ ಆಸ್ಪತ್ರೆಗೆ ಚಿಕಿತ್ಸೆಯ ವೆಚ್ಚವನ್ನು ಮರುಪಾವತಿ ಮಾಡುತ್ತದೆ.

ಕಾಯಿದೆಯ ಅಡಿಯಲ್ಲಿ ಅಪರಾಧವು ಹಾವು ಕಡಿತ/ಪ್ರಾಣಿ ಕಡಿತದ ಬಲಿಪಶುವಿನ ಸಾವಿಗೆ ಕಾರಣವಾದರೆ, ಅದನ್ನು ವೈದ್ಯಕೀಯ ನಿರ್ಲಕ್ಷ್ಯ (medical negligence) ಎಂದು ಪರಿಗಣಿಸಲಾಗುವುದು ಮತ್ತು ಆಸ್ಪತ್ರೆಯ ವಿರುದ್ಧ ಕ್ರಿಮಿನಲ್ ಮೊಕದ್ದಮೆಗಳನ್ನು ಪ್ರಾರಂಭಿಸಬಹುದು.

ಇದು ಭಾರತಿಯ ನ್ಯಾಯ ಸಂಹಿತೆ, 2023ರ ಸೆಕ್ಷನ್ 106 ಅನ್ನು ಆಕರ್ಷಿಸಬಹುದು, ಇದು ಎರಡು ವರ್ಷಗಳವರೆಗೆ ಜೈಲು ಶಿಕ್ಷೆಗೆ ಕಾರಣವಾಗುತ್ತದೆ. ಗಂಭೀರ ಅಥವಾ ಪುನರಾವರ್ತಿತ ನಿರ್ಲಕ್ಷ್ಯದ ಸಂದರ್ಭದಲ್ಲಿ, ಜಿಲ್ಲಾ ನೋಂದಣಿ ಮತ್ತು ಕುಂದುಕೊರತೆ ಪ್ರಾಧಿಕಾರವು ವೈದ್ಯಕೀಯ ಸಂಸ್ಥೆಯ ಪರವಾನಗಿಯನ್ನು (license) ರದ್ದುಗೊಳಿಸಬಹುದು.

ಹೆಚ್ಚುತ್ತಿರುವ ಪ್ರಕರಣಗಳು :

ರಾಜ್ಯದಲ್ಲಿ 2030ರ ವೇಳೆಗೆ “ನಾಯಿ-ಮಧ್ಯಸ್ಥ ರೇಬೀಸ್‌ನಿಂದ ಮಾನವ ಸಾವನ್ನು ಶೂನ್ಯಕ್ಕೆ” ತರುವ ರಾಷ್ಟ್ರೀಯ ಮತ್ತು ಜಾಗತಿಕ ಗುರಿಯನ್ನು ಸಾಧಿಸುವ ನಿಟ್ಟಿನಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ. ಪ್ರಾಣಿ ಕಡಿತ ಪ್ರಕರಣಗಳು ಹೆಚ್ಚುತ್ತಿರುವುದು ಈ ನಿರ್ಧಾರಕ್ಕೆ ಮತ್ತೊಂದು ಕಾರಣವಾಗಿದೆ. ನವೆಂಬರ್ ಎರಡನೇ ವಾರದ ಅಂತ್ಯಕ್ಕೆ ನಾಯಿ ಕಡಿತ ಪ್ರಕರಣಗಳು 4.19 ಲಕ್ಷಕ್ಕೆ ಏರಿಕೆಯಾಗಿದ್ದು, 35 ಮಂದಿ ಮೃತಪಟ್ಟಿದ್ದಾರೆ. ಕಳೆದ ವರ್ಷ ವರದಿಯಾದ ಪ್ರಕರಣಗಳ ಸಂಖ್ಯೆ 3.61 ಲಕ್ಷ ಆಗಿತ್ತು ಮತ್ತು 42 ಮಂದಿ ರೇಬೀಸ್ ಕಾರಣದಿಂದ ಸಾವಿಗೀಡಾಗಿದ್ದರು. ಹಾವು ಕಡಿತದಿಂದಾಗುವ ಸಾವುಗಳು ಮತ್ತು ತೊಂದರೆಗಳ ಸಂಖ್ಯೆಯೂ ಗಣನೀಯವಾಗಿ ಹೆಚ್ಚಿರುವುದರಿಂದ ಹಾವು ಕಡಿತದ ಸಂತ್ರಸ್ತರಿಗೂ ಈ ಆದೇಶ ಅನ್ವಯವಾಗುತ್ತದೆ.