17th BIFFes | ‘4 ಬೈ 4’ - ನಾಲ್ಕು ಕಥೆ, ನೂರಾರು ಭಾವನೆ: ಸ್ತ್ರೀ ಶಕ್ತಿಯ ಅನಾವರಣ

ಬೆಂಗಳೂರು, ಫೆ.03 www.bengaluruwire.com : ರಾಷ್ಟ್ರಕವಿ ಜಿ.ಎಸ್. ಶಿವರುದ್ರಪ್ಪ ಅವರ ‘ಸ್ತ್ರೀ ಎಂದರೆ ಅಷ್ಟೇ ಸಾಕೆ?’ ಎಂಬ ಅರ್ಥಪೂರ್ಣ ಸಾಲಿನ ಆಶಯದೊಂದಿಗೆ ನಡೆಯುತ್ತಿರುವ 17ನೇ ಬೆಂಗಳೂರು ಅಂತಾರಾಷ್ಟ್ರೀಯ ಚಿತ್ರೋತ್ಸವದಲ್ಲಿ (BIFFes), ಮಹಿಳಾ ಪಾರಮ್ಯವಿರುವ ವಿಶಿಷ್ಟ ಪ್ರಯೋಗವೊಂದು ಎಲ್ಲರ ಗಮನ ಸೆಳೆದಿದೆ.

ನಾಲ್ವರು ಮಹಿಳಾ ನಿರ್ದೇಶಕಿಯರು ನಿರ್ದೇಶಿಸಿರುವ, ಮಹಿಳೆಯರೇ ನಿರ್ಮಿಸಿರುವ ಹಾಗೂ ಬಹುತೇಕ ಮಹಿಳಾ ಕಲಾವಿದರೇ ನಟಿಸಿರುವ ‘4 ಬೈ 4’ (4 By 4) ಚಿತ್ರವು ಪ್ರದರ್ಶನಗೊಂಡು ಸಿನಿಪ್ರಿಯರ ಮೆಚ್ಚುಗೆಗೆ ಪಾತ್ರವಾಗಿದೆ.

ನಾಲ್ಕು ಕಥೆ, ನೂರಾರು ಭಾವನೆ:

‘4 ಬೈ 4’ ಒಂದು ಆಂಥಾಲಾಜಿ (Anthology) ಮಾದರಿಯ ಚಿತ್ರವಾಗಿದ್ದು, ಇದರಲ್ಲಿ ಪ್ರತ್ಯೇಕ ನಾಲ್ಕು ಕಥೆಗಳಿವೆ. ಪ್ರೀತಿ, ವಿರಹ, ಕನಸು, ಧೈರ್ಯ ಹಾಗೂ ಆತ್ಮ ಪರಿವರ್ತನೆಯ ಎಳೆಗಳನ್ನು ಹೊಂದಿರುವ ಈ ಚಿತ್ರವು, ಮಹಿಳೆಯರ ಆಂತರಿಕ ತುಮುಲ ಮತ್ತು ಸಂಭ್ರಮಗಳನ್ನು ತೆರೆಯ ಮೇಲೆ ತಂದಿದೆ. ತ್ಯಾಗದಿಂದ ಸ್ವ-ಅನ್ವೇಷಣೆಯವರೆಗೆ ಮತ್ತು ದೃಢ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಮಹಿಳೆಯರ ದಿಟ್ಟತನವನ್ನು ಈ ಚಿತ್ರ ಪರಿಣಾಮಕಾರಿಯಾಗಿ ಕಟ್ಟಿಕೊಟ್ಟಿದೆ.

ಈ ವಿಭಿನ್ನ ಪ್ರಯೋಗದ ನಾಲ್ಕು ಕಥೆಗಳಿಗೆ ತೃಪ್ತಿ ಕುಲಕರ್ಣಿ, ಮೇಘನಾ ಜಗನ್ನಾಥ್, ಚಿತ್ರಾ ಪರಮೇಶ್ವರನ್ ಹಾಗೂ ಪೂಜಿತಾ ಪ್ರಸಾದ್ ಆಕ್ಷನ್ ಕಟ್ ಹೇಳಿದ್ದಾರೆ.

ಸಿನಿಮಾದಲ್ಲಿ ತಾರೆಯರ ದಂಡು:

ಚಿತ್ರದಲ್ಲಿ ಸ್ಯಾಂಡಲ್ ವುಡ್ ನ ಹಿರಿಯ ನಟಿ ಸುಧಾರಾಣಿ, ಕಿರುತೆರೆ ಹಾಗೂ ಹಿರಿತೆರೆಯ ಜನಪ್ರಿಯ ನಟಿ ರಂಜನಿ ರಾಘವನ್, ಬಹುಭಾಷಾ ತಾರೆ ಲಕ್ಷ್ಮೀ ಗೋಪಾಲಸ್ವಾಮಿ, ಇತಿ ಆಚಾರ್ಯ, ರಾಜೇಶ್ ನಟರಂಗ ಹಾಗೂ ಗ್ರೀಷ್ಮಾ ಶ್ರೀಧರ್ ಸೇರಿದಂತೆ ಅನೇಕ ಪ್ರತಿಭಾವಂತ ಕಲಾವಿದರು ಬಣ್ಣ ಹಚ್ಚಿದ್ದಾರೆ. ಮನೋಹರ್ ಜೋಶಿ ಅವರ ಛಾಯಾಗ್ರಹಣ ಕಥೆಗಳಿಗೆ ಜೀವ ತುಂಬಿದ್ದರೆ, ವಿದುಷಿ ದೀಪ್ತಿ ನವರತ್ನ ಅವರ ಸಂಗೀತ ನಿರ್ದೇಶನ ಚಿತ್ರದ ತೂಕ ಹೆಚ್ಚಿಸಿದೆ.

ಸುಧಾರಾಣಿ ಸಂತಸ:

ಚಿತ್ರದ ಪ್ರದರ್ಶನದ ಬಳಿಕ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ನಟಿ ಸುಧಾರಾಣಿ, “ನನಗೆ ತಿಳಿದಿರುವಂತೆ ಕನ್ನಡ ಚಿತ್ರರಂಗದಲ್ಲಿ ನಾಲ್ವರು ಮಹಿಳಾ ನಿರ್ದೇಶಕಿಯರು ಒಗ್ಗೂಡಿ ಸಿನಿಮಾ ಮಾಡಿರುವುದು ಇದೇ ಮೊದಲು. ಈ ಐತಿಹಾಸಿಕ ಪ್ರಯೋಗದ ಭಾಗವಾಗಿರುವುದಕ್ಕೆ ನನಗೆ ಹೆಮ್ಮೆಯಿದೆ. ನಾನು ‘ವಿಭಾ’ ಎಂಬ ಕಥೆಯಲ್ಲಿ ನಟಿಸಿದ್ದು, ನಿರ್ದೇಶನದಿಂದ ನಿರ್ಮಾಣದವರೆಗೆ ಸ್ತ್ರೀ ಶಕ್ತಿಯೇ ಈ ಚಿತ್ರದ ಬೆನ್ನೆಲುಬು,” ಎಂದು ಹರ್ಷ ವ್ಯಕ್ತಪಡಿಸಿದರು.

ಪತ್ರಿಕಾಗೋಷ್ಠಿಯಲ್ಲಿ ನಿರ್ಮಾಪಕಿ ದೀಪ್ತಿ ಮೂರ್ತಿ ಅಯ್ಯರ್, ಕಲಾವಿದೆಯರಾದ ರಂಜನಿ ರಾಘವನ್, ಗ್ರೀಷ್ಮಾ ಶ್ರೀಧರ್, ನಮಿತಾ ದೇಸಾಯಿ, ದಿವ್ಯಶ್ರೀ, ಅಂಕಿತಾ ಜಯರಾಮ್, ಸಂಗೀತ ನಿರ್ದೇಶಕಿ ದೀಪ್ತಿ ನವರತ್ನ ಹಾಗೂ ಕಾರ್ಯಕಾರಿ ನಿರ್ಮಾಪಕಿಯರಾದ ಮಾಲತಿ ಮೂರ್ತಿ, ಸುಮನಾ ವಿಶ್ವನಾಥ್ ಮತ್ತು ಪ್ರೀತಿ ಶೆಟ್ಟಿ ಉಪಸ್ಥಿತರಿದ್ದರು.

ಒಟ್ಟಿನಲ್ಲಿ, ಬೆಂಗಳೂರು ಚಿತ್ರೋತ್ಸವದಲ್ಲಿ ‘4 ಬೈ 4’ ಚಿತ್ರವು ಗುಣಮಟ್ಟದ ಕಂಟೆಂಟ್ ಮೂಲಕ ಸಿನಿಪ್ರಿಯರ ಮನ ಗೆಲ್ಲುವಲ್ಲಿ ಯಶಸ್ವಿಯಾಗಿದೆ.