ಅಯೋಧ್ಯೆಯ ರಾಮ ಮಂದಿರದಲ್ಲಿ ಸೂರ್ಯವಂಶದ 'ಧರ್ಮಧ್ವಜ' ಯುಗಾರಂಭ

ಅಯೋಧ್ಯೆ, ನ.25 www.bengaluruwire.com : ಶ್ರೀ ಬಾಲರಾಮನ ಪ್ರಾಣಪ್ರತಿಷ್ಠೆ ಮಾಡಿದ 22 ತಿಂಗಳ ಬಳಿಕ, ಶ್ರೀ ರಾಮ ಜನ್ಮಭೂಮಿ ಮಂದಿರದ ಶಿಖರದ ಮೇಲೆ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಇಂದು ಐತಿಹಾಸಿಕ ‘ಧರ್ಮ ಧ್ವಜ’ವನ್ನು ಆರೋಹಣ ಮಾಡಿದರು.

ಪವಿತ್ರ ಕಾರ್ಯಗಳಿಗೆ ಅತ್ಯಂತ ಮಂಗಳಕರವೆಂದು ಅರ್ಚಕರು ಪರಿಗಣಿಸುವ ‘ಅಭಿಜೀತ್ ಮುಹೂರ್ತ’ದ ಸಂದರ್ಭದಲ್ಲಿ ಪ್ರಧಾನಿ ಮೋದಿ ಸಮಾರಂಭದ ನೇತೃತ್ವ ವಹಿಸಿದ್ದರು. ಸೂರ್ಯ, ಪವಿತ್ರ ಓಂ ಮತ್ತು ಕೋವಿದಾರ್ ಮರದ ಚಿನ್ನದ ಚಿತ್ರಣಗಳಿಂದ ಕಸೂತಿ ಮಾಡಲಾದ 22 ಅಡಿ ಅಗಲ ಹಾಗೂ 11 ಅಡಿ ಎತ್ತರದ ಧ್ವಜವನ್ನು ದೇವಾಲಯದ ಶಿಖರದಿಂದ 42 ಅಡಿ ಎತ್ತರದ ಕಂಬದ ಮೇಲೆ ಹಾರಿಸಲಾಯಿತು. ಅಭಿಜಿನ್ ಲಗ್ನದಲ್ಲಿ 108 ಋತ್ವಿಜರ ಮುಖೇನ ಪವಿತ್ರ ಕಾರ್ಯ ನೆರವೇರಿತು.

ಧ್ವಜಾರೋಹಣದ ಕಾರ್ಯಕ್ರಮದ ಅಂಗವಾಗಿ, ದೇವಾಲಯದ ಎಲ್ಲಾ 44 ಬಾಗಿಲುಗಳನ್ನು ಧಾರ್ಮಿಕ ವಿಧಿವಿಧಾನಗಳಿಗಾಗಿ ತೆರೆದ ಸಮಾರಂಭದಲ್ಲಿ ಆರ್‌ಎಸ್‌ಎಸ್ ಮುಖ್ಯಸ್ಥ ಮೋಹನ್ ಭಾಗವತ್, ಸಾಧುಗಳು, ಗಣ್ಯರು ಮತ್ತು ರಾಮ ಜನ್ಮಭೂಮಿ ಟ್ರಸ್ಟ್‌ನ ಸದಸ್ಯರು ಪ್ರಧಾನ ಮಂತ್ರಿಯವರೊಂದಿಗೆ ಇದ್ದರು. ಪ್ರಧಾನಿ ಮೋದಿ 8,000 ಕ್ಕೂ ಹೆಚ್ಚು ಆಹ್ವಾನಿತರನ್ನು ಉದ್ದೇಶಿಸಿ ಮಾತನಾಡಿದರು.

ಈ ಧ್ವಜಾರೋಹಣ ಕಾರ್ಯಕ್ರಮವು ಕೇವಲ ಒಂದು ಧಾರ್ಮಿಕ ಆಚರಣೆಯಾಗದೆ, ರಾಮಮಂದಿರದ ನಿರ್ಮಾಣದ ಪೂರ್ಣಗೊಳ್ಳುವಿಕೆ ಮತ್ತು ರಾಷ್ಟ್ರೀಯ ಏಕತೆಯ ಹೊಸ ಅಧ್ಯಾಯದ ಸಂಕೇತವಾಗಿದೆ. ಈ ಧರ್ಮ ಧ್ವಜವು ಭಾರತೀಯ ನಾಗರಿಕತೆಯ ಪುನರುಜ್ಜೀವನದ ಹೆಮ್ಮೆಯ ಧ್ವಜವಾಗಿದೆ ಎಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಸಮಾರಂಭದಲ್ಲಿ ರಾಷ್ಟ್ರಕ್ಕೆ ಖಡಕ್ ಸಂದೇಶ ರವಾನಿಸಿದರು.

ಕೇಸರಿ ಬಣ್ಣ, ಸೂರ್ಯವಂಶದ ಕೀರ್ತಿ, ಓಂ ಚಿಹ್ನೆ ಮತ್ತು ಕೆತ್ತಲಾದ ಕೋವಿದಾರ ಮರವನ್ನು ಹೊಂದಿರುವ ಈ ಧ್ವಜವು ರಾಮರಾಜ್ಯದ ಹಿರಿಮೆಯನ್ನು ಸಾರುತ್ತದೆ ಎಂದು ಅವರು ಬಣ್ಣಿಸಿದರು.

ಶತಮಾನಗಳ ಸಂಕಲ್ಪದ ಪೂರ್ಣಾಹುತಿ:

ಪ್ರಧಾನಿ ಮೋದಿ ಅವರು ಭಾಷಣದಲ್ಲಿ, ಇಂದಿನ ಅಯೋಧ್ಯೆಯು ಭಾರತದ ಸಾಂಸ್ಕೃತಿಕ ಪ್ರಜ್ಞೆಯ ಮತ್ತೊಂದು ಮಹತ್ವದ ಬಿಂದುವಿಗೆ ಸಾಕ್ಷಿಯಾಗಿದೆ ಎಂದು ಹೇಳಿದರು. ರಾಮಭಕ್ತರ ಹೃದಯದಲ್ಲಿ ಅಪಾರ ಸಂತೃಪ್ತಿ, ಕೃತಜ್ಞತೆ ಮತ್ತು ಪರಮೋಚ್ಚ ಆನಂದ ತುಂಬಿದೆ. ಶತಮಾನಗಳಿಂದ ಕಾಡುತ್ತಿದ್ದ ನೋವು ಇಂದು ಶಮನವಾಗಿದ್ದು, 500 ವರ್ಷಗಳ ಸಂಕಲ್ಪದ ಪೂರ್ಣಾಹುತಿ ಇಂದಾಗಿದೆ ಎಂದು ಅವರು ಭಾವುಕರಾಗಿ ನುಡಿದರು.

ಸಮಗ್ರ ಸಮಾಜದ ಶಕ್ತಿಯ ಸಂಕೇತ ರಾಮಮಂದಿರ:

ಅಯೋಧ್ಯೆಯು ಆದರ್ಶಗಳು ನಡತೆಯಾಗಿ ಪರಿವರ್ತನೆಗೊಳ್ಳುವ ಭೂಮಿ. ಶ್ರೀ ರಾಮ ಮಂದಿರದ ದಿವ್ಯ ಆವರಣವು ಭಾರತದ ಸಾಮೂಹಿಕ ಶಕ್ತಿಯ ಪ್ರಜ್ಞಾ ಕೇಂದ್ರವಾಗಿ ರೂಪುಗೊಳ್ಳುತ್ತಿದೆ ಎಂದು ಪ್ರಧಾನಿ ಮೋದಿ ಒತ್ತಿ ಹೇಳಿದರು. ಇಲ್ಲಿ ನಿರ್ಮಿಸಲಾದ ಮಾತಾ ಶಬರಿ, ನಿಷಾದರಾಜ ಸೇರಿದಂತೆ ಏಳು ದೇವಾಲಯಗಳು, ಬುಡಕಟ್ಟು ಮತ್ತು ಸೌಹಾರ್ದಯುತ ಸ್ನೇಹದ ಮೌಲ್ಯಗಳನ್ನು ಎತ್ತಿಹಿಡಿಯುತ್ತವೆ. ನಮ್ಮ ರಾಮನು ಭೇದಭಾವಗಳ ಮೂಲಕ ಅಲ್ಲ, ಆದರೆ ಭಾವನೆಗಳ ಮೂಲಕ ಜನರನ್ನು ಸಂಪರ್ಕಿಸುತ್ತಾನೆ. ರಾಮಭಕ್ತರ ಹೃದಯದಲ್ಲಿ ವಂಶಕ್ಕಿಂತ ಭಕ್ತಿಯೇ ಮುಖ್ಯ, ಶಕ್ತಿಗಿಂತ ಸಹಕಾರವೇ ಮುಖ್ಯ ಎಂದು ಪ್ರಧಾನಿ ಹೇಳಿದರು.

‘ವಿಕಸಿತ ಭಾರತ’ಕ್ಕೆ ರಾಮ ಮೌಲ್ಯವೇ ದಿಕ್ಸೂಚಿ:

ಪ್ರಧಾನಿಯವರು, ‘ರಾಮ ಎಂದರೆ ಕೇವಲ ವ್ಯಕ್ತಿಯಲ್ಲ, ರಾಮ ಎಂದರೆ ಮೌಲ್ಯ, ಶಿಸ್ತು ಮತ್ತು ದಿಕ್ಕು’ ಎಂದು ಬಣ್ಣಿಸಿದರು. 2047ರ ವೇಳೆಗೆ ಭಾರತವನ್ನು ಅಭಿವೃದ್ಧಿ ಹೊಂದಿದ ರಾಷ್ಟ್ರವನ್ನಾಗಿ ಮಾಡಲು, ಪ್ರತಿಯೊಬ್ಬ ಭಾರತೀಯನು ತನ್ನೊಳಗೆ ‘ರಾಮನ’ ಮೌಲ್ಯಗಳನ್ನು ಜಾಗೃತಗೊಳಿಸಬೇಕು. ರಾಮನ ಆದರ್ಶ, ಸಂಯಮ ಮತ್ತು ಶಿಸ್ತಿನ ಗುಣಗಳು ಶಕ್ತಿಯುತ, ದಾರ್ಶನಿಕ ಮತ್ತು ಶಾಶ್ವತ ಭಾರತವನ್ನು ನಿರ್ಮಿಸಲು ನಮಗೆ ಮಾರ್ಗದರ್ಶನ ನೀಡಬೇಕು ಎಂದು ಅವರು ಕರೆ ನೀಡಿದರು.

ಗುಲಾಮಗಿರಿ ಮನಸ್ಥಿತಿಯಿಂದ ಮುಕ್ತಿಗಾಗಿ ಕರೆ:

ದೇಶವು ಮುಂದಕ್ಕೆ ಸಾಗಲು, ಅದರ ಪರಂಪರೆಯ ಬಗ್ಗೆ ಹೆಮ್ಮೆ ಇರಬೇಕು. ಪರಂಪರೆಯ ಮೇಲಿನ ಹೆಮ್ಮೆಯ ಜೊತೆಗೆ, ಗುಲಾಮಗಿರಿ ಮನಸ್ಥಿತಿಯಿಂದ ಸಂಪೂರ್ಣ ಮುಕ್ತಿ ಅಷ್ಟೇ ಮುಖ್ಯ ಎಂದು ಮೋದಿ ನುಡಿದರು. ಮುಂದಿನ ಹತ್ತು ವರ್ಷಗಳನ್ನು (2035ರವರೆಗೆ) ಭಾರತವನ್ನು ಈ ‘ಗುಲಾಮಗಿರಿ ಮನಸ್ಥಿತಿ’ಯಿಂದ ಮುಕ್ತಗೊಳಿಸಲು ಸಮರ್ಪಿಸಬೇಕು. ಈ ಮನಸ್ಥಿತಿಯಿಂದಾಗಿ, ಭಾರತದ ಪ್ರಾಚೀನ ಪ್ರಜಾಪ್ರಭುತ್ವದ ಪರಂಪರೆಗಳಾದ ಉತ್ತಿರಮೇರೂರ್ ಮತ್ತು ಅನುಭವ ಮಂಟಪದ ಜ್ಞಾನದಿಂದ ಭಾರತೀಯರು ವಂಚಿತರಾಗಿದ್ದಾರೆ ಎಂದು ವಿಷಾದ ವ್ಯಕ್ತಪಡಿಸಿದರು.

ರಾಮಾಯಣ ಉಲ್ಲೇಖಿಸಿ ‘ವಿಕಸಿತ ಭಾರತ’ ರಥದ ವಿವರಣೆ :

ಪ್ರಧಾನಿಯವರು, ‘ವಿಕಸಿತ ಭಾರತ’ದ ಪ್ರಯಾಣವನ್ನು ತ್ವರಿತಗೊಳಿಸಲು, ಒಂದು ರಥದ ಅಗತ್ಯವಿದೆ ಎಂದು ಹೇಳಿದರು. ಈ ರಥದ ಚಕ್ರಗಳು ಶೌರ್ಯ ಮತ್ತು ತಾಳ್ಮೆ, ಧ್ವಜವು ಸತ್ಯ ಮತ್ತು ಶ್ರೇಷ್ಠ ನಡತೆ, ಕುದುರೆಗಳು ಶಕ್ತಿ, ವಿವೇಕ, ಸಂಯಮ ಮತ್ತು ಪರೋಪಕಾರ ಮತ್ತು ಕಡಿವಾಣವು ಕ್ಷಮೆ, ದಯೆ ಮತ್ತು ಸಮಚಿತ್ತತೆಯಾಗಿರಬೇಕು ಎಂದು ರಾಮಾಯಣದ ಉಲ್ಲೇಖದೊಂದಿಗೆ ಪ್ರಧಾನಿ ತಮ್ಮ ಭಾಷಣವನ್ನು ಮುಕ್ತಾಯಗೊಳಿಸಿದರು.

ಕಾರ್ಯಕ್ರಮದಲ್ಲಿ‌ಹಾಜರಿದ್ದ ಆರ್‌ಎಸ್‌ಎಸ್ ಮುಖ್ಯಸ್ಥ ಮೋಹನ್ ಭಾಗವತ್, ‘ಕೋಟ್ಯಂತರ ಭಕ್ತರ ನಂಬಿಕೆ ಇಂದು ಈಡೇರಿದೆ’ ಎಂದು ಹೇಳಿದರು.

ಈ ಧರ್ಮ ಧ್ವಜದ ವಿಶೇಷತೆಗಳೇನು?:

ಕೇಸರಿ ಧ್ವಜವು ಸಾಂಕೇತಿಕತೆಯಿಂದ ಕೂಡಿದೆ. ಸೂರ್ಯನು ಭಗವಾನ್ ರಾಮನ ಸೂರ್ಯವಂಶದ ವಂಶಾವಳಿಯನ್ನು ಹುಟ್ಟುಹಾಕುತ್ತಾನೆ ಮತ್ತು ಓಂ ದೇವಾಲಯದ ಆಧ್ಯಾತ್ಮಿಕ ಅನುರಣನವನ್ನು ಸೂಚಿಸುತ್ತದೆ. ವಾಲ್ಮೀಕಿ ರಾಮಾಯಣದಲ್ಲಿ ವಿವರಿಸಲಾದ ಮಂದರ್ ಮತ್ತು ಪಾರಿಜಾತದ ಮಿಶ್ರತಳಿಯಾದ ಕೋವಿದರ್ ಮರವು ಶುದ್ಧತೆ, ಸಮೃದ್ಧಿ ಮತ್ತು ರಾಮ ರಾಜ್ಯದ ಆದರ್ಶವನ್ನು ಸೂಚಿಸುತ್ತದೆ.

ಅಹಮದಾಬಾದ್‌ನ ಪ್ಯಾರಾಚೂಟ್ ಉತ್ಪಾದನಾ ಸಂಸ್ಥೆಯು 25 ದಿನಗಳಲ್ಲಿ ರಚಿಸಲಾದ ಈ ಧ್ವಜವು ಸೂರ್ಯ, ಮಳೆ ಮತ್ತು ಬಲವಾದ ಗಾಳಿ‌ ಸೇರಿದಂತೆ ಎಲ್ಲಾ ಹವಾಮಾನ ಪರಿಸ್ಥಿತಿಯನ್ನು ತಡೆದುಕೊಳ್ಳುವಂತೆ ವಿನ್ಯಾಸಗೊಳಿಸಲಾದ ಪ್ಯಾರಾಚೂಟ್-ದರ್ಜೆಯ ಬಟ್ಟೆಯನ್ನು, ಪ್ರೀಮಿಯಂ ರೇಷ್ಮೆ ದಾರಗಳನ್ನು ಬಳಸಲಾಗಿದೆ. 11 ಕೆಜಿ ತೂಕದ ಈ ಕೇಸರಿ ಧ್ವಜದ ವಿಶೇಷತೆಗಳ ಬಗ್ಗೆ ಹಿರಿಯ ಸೇನಾ ಅಧಿಕಾರಿಗಳೊಂದಿಗೆ ಸಮಾಲೋಚಿಸಿ ಅಂತಿಮಗೊಳಿಸಲಾಗಿತ್ತು.

ಧ್ವಜಾರೋಹಣ ಸಮಾರಂಭವು ಭಗವಾನ್ ರಾಮ ಮತ್ತು ಸೀತೆಯರ ಸ್ವರ್ಗೀಯ ವಿವಾಹ ದಿನವೆಂದು ಆಚರಿಸಲಾಗುವ “ವಿವಾಹ ಪಂಚಮಿ”ಯ ವಿಶೇಷ ದಿನವಾಗಿದೆ. ಸಮಾರಂಭದ ಮೊದಲು, ಪ್ರಧಾನಿ ಮೋದಿ ಸಂಕೀರ್ಣದ ಒಳಗೆ ಹೊಸದಾಗಿ ನಿರ್ಮಿಸಲಾದ ಸಪ್ತ ಮಂದಿರದಲ್ಲಿ ಪ್ರಾರ್ಥನೆ ಸಲ್ಲಿಸಿದರು.

ಇದಕ್ಕೂ‌ ಮುನ್ನ, ಪ್ರಧಾನಿ ಅಯೋಧ್ಯೆಯಲ್ಲಿ ಅದ್ದೂರಿ ಸ್ವಾಗತಕ್ಕೆ ಬಂದರು. ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಮತ್ತು ರಾಜ್ಯಪಾಲ ಆನಂದಿಬೆನ್ ಪಟೇಲ್ ಪ್ರಧಾನಿ ಅವರನ್ನು ವಿಮಾನ ನಿಲ್ದಾಣದಲ್ಲಿ ಸ್ವಾಗತಿಸಿದರು, ನಂತರ ಅವರು ದೇವಾಲಯ ನಗರದ ಮೂಲಕ ರೋಡ್ ಶೋ ನಡೆಸಿದರು. ಅವರು ಹಾದುಹೋಗುತ್ತಿದ್ದಂತೆ ಮಾರ್ಗದುದ್ದಕ್ಕೂ ಜನಸಮೂಹ ಸಾಲುಗಟ್ಟಿ ನಿಂತು, ಹೂದಳಗಳ ಸುರಿಮಳೆಗೈದಿತು.