ಬೆಂಗಳೂರು, ಆ.06 www.bengaluruwire.com : ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ) ಹಳೇ ಹೊರವರ್ತುಲ ರಸ್ತೆ (PRR-2) ಯ ಉದ್ದಕ್ಕೂ ಆರು ಹೊಸ ವಸತಿ ಬಡಾವಣೆಗಳನ್ನು ನಿರ್ಮಿಸಲು ಮುಂದಾಗಿದೆ. ಈ ಯೋಜನೆಗಾಗಿ ಒಟ್ಟು 6,217 ಎಕರೆ 3.88 ಗುಂಟೆ ಪ್ರದೇಶವನ್ನು ಭೂಸ್ವಾಧೀನಪಡಿಸಿಕೊಳ್ಳಲು ರಾಜ್ಯ ಸರ್ಕಾರ ಬಿಡಿಎಗೆ ಅನುಮತಿ ನೀಡಿದೆ.
ಅನಧಿಕೃತ ಬಡಾವಣೆಗಳನ್ನು ತಡೆಗಟ್ಟಲು ಮತ್ತು ಸಾರ್ವಜನಿಕರಿಗೆ ಕೈಗೆಟುಕುವ ದರದಲ್ಲಿ ನಿವೇಶನಗಳನ್ನು ಒದಗಿಸಲು ಈ ಯೋಜನೆಯನ್ನು ರೂಪಿಸಲಾಗಿದೆ ಎಂದು ಸರ್ಕಾರ ತಿಳಿಸಿದೆ. ಈ ನಿರ್ಧಾರವು ನಗರದ ವಸತಿ ಸಮಸ್ಯೆಗೆ ಪರಿಹಾರ ನೀಡುವ ನಿರೀಕ್ಷೆ ಮೂಡಿಸಿದ್ದು, ಇದೇ ವೇಳೆ ಹಿಂದಿನ ಯೋಜನೆಗಳ ಅನುಭವದ ಹಿನ್ನೆಲೆಯಲ್ಲಿ ಕೆಲವು ವಿಮರ್ಶೆಗಳಿಗೂ ಕಾರಣವಾಗಿದೆ.
ಯೋಜನೆಯ ವಿವರಗಳು ಮತ್ತು ಸ್ಥಳ :
ಬೆಂಗಳೂರು ಬ್ಯುಸಿನೆಸ್ ಕಾರಿಡಾರ್-2 ರಸ್ತೆಯು ಹೊಸೂರು ರಸ್ತೆಯಿಂದ ಬನ್ನೇರುಘಟ್ಟ ರಸ್ತೆ, ಕನಕಪುರ ರಸ್ತೆ ಮತ್ತು ಮೈಸೂರು ರಸ್ತೆಯ ಕಡೆಗೆ ಸಾಗುತ್ತದೆ. ಈ ರಸ್ತೆಗೆ ಹೊಂದಿಕೊಂಡಂತೆ ಬಿಡಿಎ ಒಟ್ಟು 6 ಬಡಾವಣೆಗಳನ್ನು ನಿರ್ಮಿಸಲಿದೆ. ಅವುಗಳ ವಿವರಗಳು ಹೀಗಿವೆ:
* ಲೇಔಟ್-1: ಮಾರಗೊಂಡನಹಳ್ಳಿ ಗ್ರಾಮದಲ್ಲಿ 84-23 ಎಕರೆ ವಿಸ್ತೀರ್ಣ.
* ಲೇಔಟ್-2: ಬೆಟ್ಟದಾಸನಪುರ, ಹುಲಿಮಂಗಲ ಮತ್ತು ಎಸ್. ಬಿಂಗಿಪುರ ಗ್ರಾಮಗಳಲ್ಲಿ 516-21.5 ಎಕರೆ ವಿಸ್ತೀರ್ಣ.
* ಲೇಔಟ್-3: ಹುಲ್ಲಹಳ್ಳಿ, ಹೊಮ್ಮದೇವನಹಳ್ಳಿ ಮತ್ತು ಬೇಗೂರು ಗ್ರಾಮಗಳಲ್ಲಿ 216-20 ಎಕರೆ ವಿಸ್ತೀರ್ಣ.
* ಲೇಔಟ್-4: ಮೈಲೂಸಂದ್ರ, ಕಮ್ಮನಹಳ್ಳಿ, ಎಲ್ಲೇನಹಳ್ಳಿ ಮತ್ತು ಹುಲ್ಲಳ್ಳಿ ಗ್ರಾಮಗಳಲ್ಲಿ 510-0.08 ಎಕರೆ ವಿಸ್ತೀರ್ಣ.
* ಲೇಔಟ್-5: ಬಿ.ಎಂ ಕಾವಲ್, ಕಗ್ಗಲಿಪುರ, ಯು.ಎಂ. ಕಾವಲ್, ಅಗರ, ಗುಳಕಮಲೈ, ಒ.ಬಿ ಚೂಡನಹಳ್ಳಿ ಮತ್ತು ಉತ್ತರಿ ಗ್ರಾಮಗಳಲ್ಲಿ 4206-29.3 ಎಕರೆ ವಿಸ್ತೀರ್ಣ.
* ಲೇಔಟ್-6: ಬಿ.ಎಂ. ಕಾವಲ್, ದೇವಗೆರೆ, ಗಂಗಸಂದ್ರ ಮತ್ತು ಗುಡಿಮಾವು ಗ್ರಾಮಗಳಲ್ಲಿ 652-30 ಎಕರೆ ವಿಸ್ತೀರ್ಣ.
ಈ ಯೋಜನೆಗೆ ಒಟ್ಟು 6,217 ಎಕರೆ 3.88 ಗುಂಟೆ ಜಮೀನನ್ನು ಸ್ವಾಧೀನಪಡಿಸಿಕೊಳ್ಳಲು ಸರ್ಕಾರ ಅನುಮೋದನೆ ನೀಡಿದೆ.
ಸರ್ಕಾರದ ಷರತ್ತುಗಳು :
ಬಿಡಿಎ ಈ ಭೂಸ್ವಾಧೀನ ಪ್ರಕ್ರಿಯೆಯನ್ನು ಕೈಗೊಳ್ಳುವಾಗ ಸರ್ಕಾರ ಕೆಲವು ಪ್ರಮುಖ ಷರತ್ತುಗಳನ್ನು ವಿಧಿಸಿದೆ. ಈ ಬಡಾವಣೆಗಳನ್ನು ಸಾರ್ವಜನಿಕ ಸಹಭಾಗಿತ್ವದ ಮಾದರಿಯಲ್ಲಿ ನಿರ್ಮಿಸಲಾಗುವುದು.
ಜಮೀನು ಕಳೆದುಕೊಳ್ಳುವ ಭೂಮಾಲೀಕರಿಗೆ ಅಭಿವೃದ್ಧಿಪಡಿಸಿದ ನಿವೇಶನದ ವಿಸ್ತೀರ್ಣದ 40:60 ಅನುಪಾತದಲ್ಲಿ ಹಂಚಿಕೆ ಮಾಡಲಾಗುವುದು ಅಥವಾ ನಗದು ಪರಿಹಾರ ನೀಡಲಾಗುವುದು. ಈ ಭೂಸ್ವಾಧೀನ ಪ್ರಕ್ರಿಯೆಯು ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ ಕಾಯ್ದೆ 1976 ಮತ್ತು ಸಂಬಂಧಪಟ್ಟ ನಿಯಮಗಳಿಗನುಗುಣವಾಗಿ ಇರಬೇಕು ಎಂದೂ ಸರ್ಕಾರ ಸ್ಪಷ್ಟಪಡಿಸಿದೆ. ಇದನ್ನೂ ಓದಿ : BW SPECIAL | ಗ್ರೇಟರ್ ಬೆಂಗಳೂರಲ್ಲಿ ರಸ್ತೆ ಮೂಲಭೂತ ಸೌಕರ್ಯ ₹3605 ಕೋಟಿ ಕಾಮಗಾರಿಗೆ ಹಿಡಿದಿದೆ ಗ್ರಹಣ : ವಾಹನ ಸವಾರರಿಗೆ ನಿತ್ಯ ನರಕ ಯಾತನೆ
ಯೋಜನೆಯ ಸಾಧಕ-ಬಾಧಕಗಳ ವಿಶ್ಲೇಷಣೆ
ಸಾಧಕಗಳು:
* ಅನಧಿಕೃತ ಬಡಾವಣೆಗಳ ನಿಯಂತ್ರಣ: ಬೆಂಗಳೂರು ನಗರದ ಸುತ್ತಮುತ್ತ ಅನಧಿಕೃತ ಬಡಾವಣೆಗಳ ನಿರ್ಮಾಣವನ್ನು ತಡೆಯಲು ಈ ಯೋಜನೆಯು ಸಹಕಾರಿಯಾಗಲಿದೆ ಎಂದು ಸರ್ಕಾರ ಹೇಳಿದೆ. ಈ ಬಗ್ಗೆ ಈಗಾಗಲೇ ಉಚ್ಚ ಮತ್ತು ಸರ್ವೋಚ್ಚ ನ್ಯಾಯಾಲಯಗಳು ಅನಧಿಕೃತ ನಿರ್ಮಾಣಗಳನ್ನು ತಡೆಯಲು ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಳ್ಳುವಂತೆ ನಿರ್ದೇಶನ ನೀಡಿವೆ.
* ಸಾರ್ವಜನಿಕರಿಗೆ ವಸತಿ ಸೌಲಭ್ಯ: ಯೋಜನಾಬದ್ಧವಾಗಿ ಬಡಾವಣೆಗಳನ್ನು ರಚಿಸಿ, ಸಾರ್ವಜನಿಕರಿಗೆ ನ್ಯಾಯೋಚಿತ ದರದಲ್ಲಿ ನಿವೇಶನಗಳನ್ನು ಹಂಚಿಕೆ ಮಾಡುವ ಉದ್ದೇಶ ಇದರ ಹಿಂದಿದೆ.
* ಸಂಚಾರ ದಟ್ಟಣೆ ಇಳಿಕೆ: ಪಿ.ಆರ್.ಆರ್.ರಸ್ತೆ ನಿರ್ಮಾಣದ ಜೊತೆಗೆ ಈ ಬಡಾವಣೆಗಳು ನಗರದ ಸುಗಮ ಸಂಚಾರ ಮತ್ತು ಸಂಚಾರ ದಟ್ಟಣೆ ಕಡಿಮೆ ಮಾಡಲು ನೆರವಾಗುವ ನಿರೀಕ್ಷೆಯಿದೆ.
ಬಾಧಕಗಳು ಮತ್ತು ಸವಾಲುಗಳು:
- ಪರಿಹಾರ ವಿತರಣೆಯಲ್ಲಿನ ವಿಳಂಬ: ಬಿಡಿಎನ ಹಿಂದಿನ ಯೋಜನೆಗಳಾದ ನಾದಪ್ರಭು ಕೆಂಪೇಗೌಡ ಬಡಾವಣೆ, ಅರ್ಕಾವತಿ, ಮತ್ತು ಇನ್ನಿತರ ಯೋಜನೆಗಳಲ್ಲಿ ಭೂಸ್ವಾಧೀನ ಪ್ರಕ್ರಿಯೆ ಮತ್ತು ಪರಿಹಾರ ವಿತರಣೆಯಲ್ಲಿನ ವಿಳಂಬವು ದೊಡ್ಡ ಸಮಸ್ಯೆಯಾಗಿತ್ತು. ಈ ಹೊಸ ಯೋಜನೆಯಲ್ಲೂ ಇಂತಹ ಸಮಸ್ಯೆಗಳು ಮರುಕಳಿಸಬಹುದೆಂಬ ಆತಂಕವಿದೆ.
- ನ್ಯಾಯಾಲಯದ ವ್ಯಾಜ್ಯಗಳು: ಹಿಂದಿನ ಭೂಸ್ವಾಧೀನ ಪ್ರಕರಣಗಳಲ್ಲಿ ರೈತರು ಮತ್ತು ಭೂಮಾಲೀಕರಿಂದ ಹಲವು ನ್ಯಾಯಾಲಯ ವ್ಯಾಜ್ಯಗಳು ಎದುರಾಗಿದ್ದವು. ಇದೇ ಮಾದರಿಯಲ್ಲಿ ಈ ಯೋಜನೆಯೂ ವಿವಾದಗಳಿಗೆ ಸಿಲುಕಿ ವಿಳಂಬವಾಗಬಹುದೇ ಎಂಬ ಪ್ರಶ್ನೆ ಇದೆ.
- ಹಣಕಾಸಿನ ಸವಾಲು: ಬೃಹತ್ ವಿಸ್ತೀರ್ಣದ ಭೂಸ್ವಾಧೀನ ಮತ್ತು ಬಡಾವಣೆ ಅಭಿವೃದ್ಧಿಗೆ ಅಗತ್ಯವಿರುವ ಹಣಕಾಸು ಸಂಪನ್ಮೂಲವನ್ನು ಬಿಡಿಎ ಹೇಗೆ ನಿರ್ವಹಿಸುತ್ತದೆ ಎಂಬುದು ಒಂದು ಸವಾಲಾಗಿದೆ.
ಹಿಂದೆ ಮೇಜರ್ ಆರ್ಟಿರಿಯಲ್ ರಸ್ತೆ (MAR) ಪ್ರಕರಣದಲ್ಲಿ ಭೂಮಾಲೀಕರಿಗೆ ಯಶಸ್ವಿಯಾಗಿ ಪರಿಹಾರ ವಿತರಿಸಿದ ಮಾದರಿಯನ್ನೇ ಈ ಯೋಜನೆಗೂ ಅಳವಡಿಸಿಕೊಳ್ಳುವ ಉದ್ದೇಶವನ್ನು ಬಿಡಿಎ ಹೊಂದಿದೆ ಎಂದು ತಿಳಿದುಬಂದಿದೆ. ಈ ಮಾದರಿ ಯಶಸ್ವಿಯಾದರೆ, ಭೂಮಾಲೀಕರಿಗೆ ಸಕಾಲದಲ್ಲಿ ಪರಿಹಾರ ಸಿಗುವುದರ ಜೊತೆಗೆ, ಯೋಜನೆಯು ತ್ವರಿತವಾಗಿ ಪೂರ್ಣಗೊಳ್ಳುವ ಸಾಧ್ಯತೆ ಇದೆ.
Join our WhatsApp Channel
