ಬೆಂಗಳೂರು, ಅ.14 www.bengaluruwire.com : ನಗರದಲ್ಲಿ ಭೂಮಿ ಬೆಲೆ ಅಡಿ ಅಡಿಗೂ ಸಾವಿರಾರು ರೂಪಾಯಿ ಮೌಲ್ಯವಿದೆ. ಭೂಮಾಫಿಯಾ, ನೆಲಗಳ್ಳರು ನಗರದಲ್ಲಿ ಜಾಗ ಲಪಟಾಯಿಸಲು ಇನ್ನಿಲ್ಲದಂತೆ ಪ್ರಯತ್ನ ಮಾಡ್ತಿರ್ತಾರೆ. ಇದೆಲ್ಲಾ ಗೊತ್ತಿದ್ದೂ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (BBMP) ಕೋಟ್ಯಾಂತರ ರೂಪಾಯಿ ಬೆಲೆ ಬಾಳುವ ತನ್ನ ಸ್ವತ್ತನ್ನು ಖಾಸಗಿ ವ್ಯಕ್ತಿ ಹಾಗೂ ಸಂಸ್ಥೆಗಳಿಗೆ ಬಾಡಿಗೆ ಅಥವಾ ಭೋಗ್ಯಕ್ಕೆ ನೀಡಿದ ಅವಧಿ ಮುಗಿದು 40-50 ವರ್ಷಗಳು ಕಳೆದರೂ ಬಾಕಿ ವಸೂಲಿ ಮಾಡಿ ಮರುವಶಕ್ಕೆ ಪಡೆಯುವ ಅಥವಾ ನವೀಕರಣ ಮಾಡುವ ಗೋಜಿಗೇ ಹೋಗಿಲ್ಲ.
ಪಾಲಿಕೆಯಲ್ಲಿ ಸದ್ಯ 225 ವಾರ್ಡ್ ಗಳಿದ್ದು, ಇದಕ್ಕೂ 198 ವಾರ್ಡ್ ಹಾಗೂ ಅದಕ್ಕಿಂತ ಮುಂದೆ 100 ವಾರ್ಡ್ ಗಳಿದ್ದವು. ಮೂಲ ಬೆಂಗಳೂರಿನಲ್ಲಿ ಹಿಂದಿನ ಬೆಂಗಳೂರು ನಗರ ಪಾಲಿಕೆಯಲ್ಲಿ ಬೆಂಗಳೂರು ದಕ್ಷಿಣ, ಬೆಂಗಳೂರು ಪೂರ್ವ ಮತ್ತು ಪಶ್ಚಿಮ ವಲಯಗಳಷ್ಟೇ ಇದ್ದವು. ಈ ಮೂರು ವಲಯಗಳಲ್ಲಿ ಒಟ್ಟು 157 ಆಸ್ತಿಗಳ ಗುತ್ತಿಗೆ ಅವಧಿ ಮುಗಿದಿರುವ ಹಾಗೂ ಗುತ್ತಿಗೆ ಅವಧಿ ನವೀಕರಣಗೊಳ್ಳದಿರುವ ಆಸ್ತಿಗಳಿವೆ. ಈ ಗುತ್ತಿಗೆ ನೀಡಿರುವ ಆಸ್ತಿಗಳ ಪೈಕಿ, 1905ನೇ ಇಸವಿಯಲ್ಲೇ ಗುತ್ತಿಗೆ ಮುಗಿದ ಆಸ್ತಿಗಳಿಂದ ಹಿಡಿದು 1957, 1958, 1971, 1972, 1981 ಹೀಗೆ ಪಾಲಿಕೆ ಸ್ವತ್ತುಗಳ ಗುತ್ತಿಗೆ ಅವಧಿ ಮುಗಿದು ಹಲವು ದಶಕಗಳೇ ಸಂದರೂ ಈತನಕ ಪಾಲಿಕೆ ಸಂಬಂಧಿಸಿದ ಅಧಿಕಾರಿಗಳನ್ನು ಬಿಬಿಎಂಪಿಯ ಆಸ್ತಿಗಳನ್ನು ವಶಪಡಿಸಿಕೊಳ್ಳುವ ಗೋಜಿಗೇ ಹೋಗಿಲ್ಲ. ಕೆಲವು ಪ್ರಕರಣಗಳಲ್ಲಿ ಸ್ವತ್ತಿನ ಗುತ್ತಿಗೆದಾರರಿಗೆ ನೋಟಿಸ್ ನೀಡಿ, ಕೆಲವು ಪ್ರಕರಣಗಳಲ್ಲಿ ಕೋರ್ಟ್ ನಲ್ಲಿ ಕೇವಿಯಟ್ ಆರ್ಜಿ ಸಲ್ಲಿಸಿ ಕೈತೊಳೆದುಕೊಂಡಿದ್ದಾರೆ.
ಪಾಲಿಕೆಯ ಬಹುತೇಕ ಆಸ್ತಿಗಳು ನಗರದ ಕೇಂದ್ರ ಭಾಗದಲ್ಲಿದ್ದು, ಇವುಗಳನ್ನು ಸಾರ್ವಜನಿಕವಾಗಿ ಮರು ಹರಾಜು ಹಾಕಿ ಅಥವಾ ಗುತ್ತಿಗೆಯನ್ನು ಪ್ರಸ್ತುತ ಮಾರುಕಟ್ಟೆ ದರದ ಅನ್ವಯ ಲೆಕ್ಕ ಹಾಕಿ ನವೀಕರಣ ಮಾಡಿದರೆ ಪಾಲಿಕೆ ವರ್ಷಂಪ್ರತಿ ನೂರಾರು ಕೋಟಿ ರೂಪಾಯಿ ಆದಾಯ ಲಭ್ಯವಾಗುತ್ತದೆ. ಆದ್ರೆ ಪಾಲಿಕೆ ಆದಾಯ ಸಂಗ್ರಹ ವಿಚಾರದಲ್ಲಿ ಸಹಾಯಕ ಕಂದಾಯ ಅಧಿಕಾರಿಗಳು ನಿರ್ಲಕ್ಷ್ಯ ತೋರಿದ್ದಾರೆ. ಈ ಅಂಶವು ಬಿಬಿಎಂಪಿ ಆಸ್ತಿ ವಿಭಾಗದ ವಿಶೇಷ ಆಯುಕ್ತೆ ಪ್ರೀತಿ ಗೆಹ್ಲೋಟ್ ಈ ಮೂರು ವಲಯಗಳ ಜಂಟಿ ಆಯುಕ್ತರಿಗೆ 14.09.2023ರಂದು ಬರೆದ ಪತ್ರದಿಂದ ತಿಳಿದು ಬಂದಿದೆ.
ಈ ಮೂರು ಕೋರ್ ಜೋನ್ ಗಳಲ್ಲಿನ 157 ಆಸ್ತಿಗಳ ಗುತ್ತಿಗೆ ಅವಧಿ ಪೂರ್ಣಗೊಂಡಿದ್ದು, ಇವುಗಳಿಗೆ ಸಂಪೂರ್ಣವಾಗಿ ಗುತ್ತಿಗೆ ಮೊತ್ತ ಪಾವತಿಯಾಗಿದ್ಯಾ? ಅಥವಾ ಎಷ್ಟು ಆಸ್ತಿಗಳು ಬಾಕಿ ಮೊತ್ತ ಪಾವತಿಸಿಲ್ಲ? ಭೋಗ್ಯದ ಅವಧಿ ಮುಕ್ತಾಯಗೊಂಡಿರುವ ಆಸ್ತಿಗಳು ನವೀಕರಣವಾಗಿದೆಯಾ ಅಥವಾ ನವೀಕರಣಗೊಳ್ಳದಿದ್ದಲ್ಲಿ ಪಾಲಿಕೆ ವಶಕ್ಕೆ ಪಡೆಯಲು ಕೈಗೊಂಡಿರುವ ಕ್ರಮವೇನು? ಎಂಬ ಬಗ್ಗೆ ಆಸ್ತಿ ವಿಭಾಗಕ್ಕೆ ಅತಿ ಶೀಘ್ರವಾಗಿ ವರದಿ ನೀಡುವಂತೆ ಅವರು ಪತ್ರದಲ್ಲಿ ಸೂಚಿಸಿದ್ದಾರೆ.
ಪಾಲಿಕೆಯ 225 ವಾರ್ಡ್ ಗಳಲ್ಲಿ ವರ್ಷಂಪ್ರತಿ ಪಾಲಿಕೆಗೆ ಹೊಸ ಹೊಸ ಸ್ವತ್ತುಗಳು ಸೇರ್ಪಡೆಯಾದರೂ ಅವುಗಳ ಸಮರ್ಪಕವಾಗಿ ಮಾಹಿತಿಯನ್ನು ಆಸ್ತಿ ಶಾಖೆಯ ಆಸ್ತಿವಹಿಯಲ್ಲಿ ಸರಿಯಾಗಿ ದಾಖಲು ಮಾಡುವಲ್ಲಿ ಕಂದಾಯ ವಿಭಾಗದ ಸಿಬ್ಬಂದಿ ಸಂಪೂರ್ಣವಾಗಿ ವಿಫಲವಾಗಿರುವುದು ಬಿಬಿಎಂಪಿ ವಿಶೇಷ ಆಯುಕ್ತರಾದ ಪ್ರೀತಿ ಗೆಹ್ಲೋಟ್ ಬಿಬಿಎಂಪಿಯ 8 ವಲಯಗಳಿಗೆ ಆಗಸ್ಟ್ 29ರಂದು ಬರೆದ ಪತ್ರದಲ್ಲಿ ಬಹಿರಂಗವಾಗಿದೆ.
5.61 ಕೋಟಿ ರೂ. ಅಲ್ಲ ಬದಲಿಗೆ 35.21 ಕೋಟಿ ರೂ. ವಸೂಲಿಯಾಗಬೇಕು:
2018-19ನೇ ಸಾಲಿನಿಂದ 2021-222ನೇ ಸಾಲಿನ 4 ವರ್ಷಗಳ ಅವಧಿಗೆ 372 ಪಾಲಿಕೆ ಆಸ್ತಿಗಳನ್ನು ನಗರದ ವಿವಿಧೆಡೆಯಲ್ಲಿ ಗುತ್ತಿಗೆ ಅಥವಾ ಬಾಡಿಗೆಗೆ ನೀಡಲಾಗಿದ್ದು ಹಾಗೂ ಅವಧಿಯು ಮುಗಿದು ನವೀಕರಣಗೊಳ್ಳದೇ ಇರುವ ಆಸ್ತಿಗಳಿಂದ ವಸೂಲಿ ಮಾಡಬೇಕಾದ ಮೊತ್ತ ಕೇವಲ 5,61,46,235 (5.61 ಕೋಟಿ ರೂ.) ಎಂದು ಪಾಲಿಕೆಯ 64 ಸಹಾಯಕ ಕಂದಾಯ ಅಧಿಕಾರಿಗಳ ಕಚೇರಿ 17.07.2023ರ ವರೆಗೆ ಬಿಬಿಎಂಪಿ ಕೇಂದ್ರ ಕಚೇರಿ ಆಸ್ತಿ ವಿಭಾಗಕ್ಕೆ ಸಲ್ಲಿಸಿದ ಮಾಹಿತಿಯಲ್ಲಿ ತಿಳಿಸಲಾಗಿದೆ.
ಆದರೆ ಮುಖ್ಯ ಲೆಕ್ಕಪರಿಶೋಧಕರು (Chief Auditor) ಈ ಆಸ್ತಿಗಳಿಂದ 35,21,05,327 (35.21 ಕೋಟಿ ರೂ.) ಹಣ ಬಾಕಿ ವಸೂಲಿಯಾಗಬೇಕಿದೆ ಎಂದು ಪತ್ರದಲ್ಲಿ ತಿಳಿಸಿದ್ದಾರೆ. ಅಂದರೆ ಎಆರ್ ಒಗಳು ನೀಡಿದ ಮಾಹಿತಿಗೂ, ಮುಖ್ಯ ಲೆಕ್ಕಪರಿಶೋಧಕರು ನೀಡಿರುವ ಬಾಕಿ ವಸೂಲಿ ಮೊತ್ತವನ್ನು ಗಮನಿಸಿದಾಗ 29,59,59,092 (29.59 ಕೋಟಿ ರೂ.) ರೂ.ಗಳಷ್ಟು ಬಾಕಿ ವಸೂಲಿ ವ್ಯತ್ಯಾಸ ಕಂಡು ಬಂದಿದೆ. ಇದು ಎಆರ್ ಒಗಳು ಪಾಲಿಕೆ ಆಸ್ತಿ ಸಂರಕ್ಷಣೆ ವಿಚಾರ, ಬಾಡಿಗೆ ಅಥವಾ ಗುತ್ತಿಗೆ ಮೊತ್ತ ವಸೂಲಿಯಲ್ಲಿ ಎಷ್ಟು ನಿರ್ಲಕ್ಷ್ಯ ತೋರಿದ್ದಾರೆ ಎಂಬುದಕ್ಕೆ ಪ್ರಮುಖ ಸಾಕ್ಷಿಯಾಗಿದೆ.
ನಗರದಲ್ಲಿದೆ ಪಾಲಿಕೆಯ 3,855 ಆಸ್ತಿಗಳು:
ಇನ್ನೊಂದು ಗಂಭೀರವಾದ ವಿಷಯ ಏನಪ್ಪಾ ಅಂದರೆ, ಪಾಲಿಕೆ ವ್ಯಾಪ್ತಿಯ ಸಹಾಯಕ ಕಂದಾಯ ಇಲಾಖೆ ಅಧಿಕಾರಿ (ARO)ಗಳ ಕಚೇರಿಯಿಂದ ನೀಡಿರುವ ದಾಖಲೆಗಳ ಅನ್ವಯ ಈ ವರ್ಷದ ಫೆ.15 ರಿಂದ ಒಂದು ವಾರಗಳ ಕಾಲ ಲೆಕ್ಕ ತನಿಖೆ ಕೈಗೊಂಡಾಗ ನಗರದಲ್ಲಿ ಒಟ್ಟು 3,855 ಪಾಲಿಕೆ ಆಸ್ತಿಗಳಿದ್ದು, ಅವುಗಳ ಪೈಕಿ 372 ಆಸ್ತಿಗಳನ್ನು ಬಿಬಿಎಂಪಿಯು ವಿವಿಧ ಸಂಘ ಸಂಸ್ಥೆ, ಸರ್ಕಾರಿ ಇಲಾಖೆ ಹಾಗೂ ವ್ಯಕ್ತಿಗಳಿಗೆ ಗುತ್ತಿಗೆ ಹಾಗೂ ಬಾಡಿಗೆಗೆ ನೀಡಿದೆ. ಆದರೆ ಸಹಾಯಕ ಕಂದಾಯ ಇಲಾಖೆ ಅಧಿಕಾರಿಗಳು ಹೀಗೆ ಗುತ್ತಿಗೆ ಹಾಗೂ ಬಾಡಿಗೆಗೆ ನೀಡಿರುವ ಆಸ್ತಿಗಳ ಪೈಕಿ ಕೇವಲ 145 ಆಸ್ತಿಗಳ ಕಡತಗಳನ್ನಷ್ಟೇ ಲೆಕ್ಕ ಪರಿಶೋಧನಾ ಇಲಾಖೆಗೆ ಹಾಜರುಪಡಿಸಿದೆ. ಆದರೆ ಉಳಿದ 227 ಕಡತಗಳನ್ನು ಆಡಿಟ್ ಮಾಡಲು ಫೈಲ್ ಗಳನ್ನು ಕೊಟ್ಟೇ ಇಲ್ಲ. ಹೀಗಾಗಿ ಸಂಪೂರ್ಣವಾಗಿ ಲೆಕ್ಕಪರಿಶೋಧನೆ ಮಾಡಲು ಸಾಧ್ಯವಾಗಿಲ್ಲ. ಹೀಗಾಗಿ 227 ಕಡತಗಳನ್ನು ಲೆಕ್ಕಪರಿಶೋಧನೆಗೆ ಸಲ್ಲಿಸಿ, ಬಾಡಿಗೆ, ಗುತ್ತಿಗೆ ಮೊತ್ತ ವಸೂಲಿಗೆ ಕ್ರಮ ಕೈಗೊಂಡು ವರದಿ ನೀಡುವಂತೆ ಎಂದು ವಿಶೇಷ ಆಯುಕ್ತರು ಎಲ್ಲಾ ವಲಯದ ಜಂಟಿ ಆಯುಕ್ತರಿಗೆ ಬರೆದ ಪತ್ರದಲ್ಲಿ ತಿಳಿಸಿದ್ದಾರೆ.
ಅಧಿವೇಶನಕ್ಕೂ ಪಾಲಿಕೆ ಆಸ್ತಿಗಳ ಕುರಿತಂತೆ ಅಪೂರ್ಣ ಮಾಹಿತಿ!!! :
ಸರ್ಕಾರದ ಅಧಿವೇಶನ ಸಂದರ್ಭದಲ್ಲಿ ಚುಕ್ಕೆ ಗುರುತಿನ ಹಾಗೂ ಚುಕ್ಕೆ ಗುರುತಿಲ್ಲದ ಪ್ರಶ್ನೆಗೆ ನಿಗಧಿತ ಅವಧಿಯಲ್ಲಿ ಅಪೂರ್ಣ ಮಾಹಿತಿಯನ್ನು ನೀಡಲಾಗುತ್ತಿದೆ. ಅದೇ ರೀತಿ ಸಂಬಂಧಪಟ್ಟ ಉಪ ವಿಭಾಗಗಳಿಂದ ಪಾಲಿಕೆ ಆಸ್ತಿ ಕುರಿತ ಮಾಹಿತಿಯನ್ನು ಕ್ರೋಢೀಕರಿಸಿ ಸಲ್ಲಿಸದೇ ಯಥಾವತ್ತಾಗಿ ಸಲ್ಲಿಸುತ್ತಿರುವುದು ಕಂಡುಬರುತ್ತಿದೆ. ಈ ಬಗ್ಗೆ ಅನೇಕ ಬಾರಿ ದೂರವಾಣಿ, ವಿಡಿಯೋ ಕಾನ್ಫರೆನ್ಸ್ ನಲ್ಲಿ ತಿಳಿಸಲಾಗಿದ್ದರೂ ವಿಳಂಬವಾಗಿ ಮಾಹಿತಿ ಸಲ್ಲಿಸುತ್ತಿರುವುದಲ್ಲದೆ, ಅಪೂರ್ಣ ಮಾಹಿತಿ ನೀಡಲಾಗುತ್ತಿದೆ ಎಂದು ಪಾಲಿಕ ಆಸ್ತಿ ವಿಭಾಗದ ವಿಶೇಷ ಆಯುಕ್ತರಾದ ಪ್ರೀತಿ ಗೆಹ್ಲೋಟ್ ವಲಯ ಜಂಟಿ ಆಯುಕ್ತರಿಗೆ ಬರೆದ ಪತ್ರದಲ್ಲಿ ಗಂಭೀರ ಆರೋಪ ಮಾಡಿದ್ದಾರೆ.
ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಪಾಲಿಕೆ ಆಸ್ತಿಗಳ ಬಗ್ಗೆ ಎ ಮತ್ತು ಎಂ ನಮೂನೆಯಂತೆ ಭೂಮಿ ತಂತ್ರಾಂಶವನ್ನು ಅಭಿವೃದ್ಧಿಪಡಿಸಲಾಗಿದೆ. ಇದರಲ್ಲಿ ಆಸ್ತಿಗಳ ಮಾಹಿತಿಗಳನ್ನು ತಂತ್ರಾಂಶದಲ್ಲಿ ತ್ವರಿತಗತಿಯಲ್ಲಿ ದಾಖಲಿಸುವ ಮೂಲಕ ಪಾಲಿಕೆ ಆಸ್ತಿಗಳ ಸಂರಕ್ಷಣೆಯಲ್ಲಿ ಪ್ರಗತಿ ಸಾಧಿಸುವಂತೆಯೂ ಅವರು ಜಂಟಿ ಆಯುಕ್ತರಿಗೆ ಬರೆದ ಪತ್ರದಲ್ಲಿ ಸೂಚಿಸಿದ್ದಾರೆ. ಅದೇ ರೀತಿ ಈ ಮಾಹಿತಿಗಳನ್ನು ರಾಜ್ಯ ಸರ್ಕಾರದ ಕೆಜಿಐಎಸ್ ಪೋರ್ಟಲ್ (KGIS PORTAL) ಅಳವಡಿಸುವ ಮೂಲಕ ಸಾರ್ವಜನಿಕರಿಗೆ ಮಾಹಿತಿ ಪಾಲಿಕೆ ಸ್ವತ್ತುಗಳ ಮಾಹಿತಿ ದೊರಕುವಂತೆ ಮಾಡಬೇಕೆಂದು ಹೇಳಿದ್ದಾರೆ.
ಬಿಡಿಎ ನಿಂದ ಒಮ್ಮೆಗೆ ಆಸ್ತಿ ಹಸ್ತಾಂತರಕ್ಕೆ ಸೂಚನೆ :
ಬಿಡಿಎನಿಂದ ಪಾಲಿಕೆಗೆ ಹಲವಾರು ಬಡಾವಣೆಗಳು ಹಸ್ತಾಂತರಿಸಲಾಗಿದ್ದು, ಕೆಲವೊಂದು ಪ್ರಕರಣಗಳಲ್ಲಿ ಸಿಎ ನಿವೇಶನ, ಉದ್ಯಾನವನ, ರಸ್ತೆ ಹಾಗೂ ಇನ್ನಿತರೆ ಸ್ವತ್ತುಗಳನ್ನು ಬೇರೆ ಬೇರೆಯಾಗಿ ವಿವಿಧ ದಿನಾಂಕಗಳಂದು ಹಸ್ತಾಂತರಿಸಿರುವುದು ಕಂಡು ಬಂದಿದೆ. ಈ ಬಗ್ಗೆ ಸಂಬಂಧಿಸಿದ ಇಲಾಖೆ ಮೇಲಾಧಿಕಾರಿಗಳೊಂದಿಗೆ ಸಮನ್ವಯ ಮಾಡಿಕೊಂಡು ಈ ಆಸ್ತಿಗಳನ್ನು ಒಮ್ಮೆಗೆ ಹಸ್ತಾಂತರ ಮಾಡಿಕೊಳ್ಳಲು ಕ್ರಮವಹಿಸಿ, ಅವುಗಳ ಮಾಹಿತಿಯನ್ನು ಆಸ್ತಿ ಶಾಖೆಯ ಆಸ್ತಿ ರಿಜಿಸ್ಟರ್ ನಲ್ಲಿ ದಾಖಲಿಸಲು ಪ್ರಸ್ತಾವನೆ ಸಲ್ಲಿಸುವಂತೆಯೂ ಪ್ರೀತಿ ಗೆಹ್ಲೋಟ್ ತಿಳಿಸಿದ್ದಾರೆ.
ಪಾಲಿಕೆ ಗುತ್ತಿಗೆ ಆಸ್ತಿಗಳ ವಿವರ ಸಂಗ್ರಹಕ್ಕೆ ಸಿಬ್ಬಂದಿ ನಿಯೋಜನೆ :
ಇನ್ ಟೈಮ್ ನಲ್ಲಿ ಪಾಲಿಕೆ ಸಹಾಯಕ ಕಂದಾಯ ಅಧಿಕಾರಿಗಳು ಪಾಲಿಕೆ ಸ್ವತ್ತುಗಳ ಗುತ್ತಿಗೆ ಅಥವಾ ಬಾಡಿಗೆಗಳ ಮೊತ್ತ, ಬಾಕಿ ಮೊತ್ತ, ಖಾಸಗಿ ಅಥವಾ ಸಂಘ ಸಂಸ್ಥೆಗಳಿಗೆ ವಾಣಿಜ್ಯ ಉಪಯೋಗಕ್ಕಾಗಿ ಗುತ್ತಿಗೆ ಅವಧಿ ಮುಕ್ತಾಗೊಂಡಿರುವ ಸ್ವತ್ತುಗಳು, ನವೀಕರಣಕ್ಕಾಗಿ ಪ್ರಸ್ತಾವನೆ ಸಲ್ಲಿಕೆಯಾಗಿರುವ ಹಾಗೂ ಪಾಲಿಕೆ ವಶಕ್ಕೆ ಹಿಂಪಡೆಯಬೇಕಾಗಿರುವ ಸ್ವತ್ತುಗಳ ವಿವರಗಳನ್ನು ಸಂಗ್ರಹಿಸಿ ಸರಿಯಾಗಿ ಆಸ್ತಿ ವಿಭಾಗಕ್ಕೆ ನೀಡುತ್ತಿಲ್ಲ. ಹೀಗಾಗಿ ಆಸ್ತಿ ವಿಭಾಗದ ಸಹಾಯಕ ಆಯುಕ್ತೆ, ವ್ಯವಸ್ಥಾಪಕರು ಹಾಗೂ ಪ್ರಥಮ ದರ್ಜೆ ಸಹಾಯಕ ಸಿಬ್ಬಂದಿಯನ್ನು ಅ.10 ರಿಂದ 13ರ ವರೆಗೆ ಈ ಮಾಹಿತಿಗಳನ್ನು 8 ವಲಯಗಳಿಂದ ಸಂಗ್ರಹಿಸಲು ಅಧಿಕೃತವಾಗಿ ನಿಯೋಜಿಸಲಾಗಿತ್ತು. ಇಲ್ಲಿಯವರೆಗೆ ಪಾಲಿಕೆಯ ಬಳಿಯಿರುವ 3,855 ಆಸ್ತಿಗಳಿದ್ದರೂ, ಕೇವಲ 1,300 ಸ್ವತ್ತುಗಳಿಗೆ ಮಾತ್ರ ಪಿಐಡಿ (Property Identification Number) ನಂಬರ್ ಗಳನ್ನಷ್ಟೇ ನೀಡಲಾಗಿದೆ. ಹಾಗೆಂದ ಮೇಲೆ ಪಾಲಿಕೆ ಸ್ವತ್ತುಗಳಿಗೆ ಬೇಲಿ ಹಾಕಿ ಸಂರಕ್ಷಿಸಿ, ಸೂಕ್ತ ಖಾತೆ, ಸ್ವತ್ತಿನ ಅಳತೆ, ವಿಸ್ತೀರ್ಣ, ಚೆಕ್ ಬಂದಿ ಮತ್ತಿತರ ಮಾಹಿತಿಗಳ ಬಗ್ಗೆ ಆಸ್ತಿ ರಿಜಿಸ್ಟರ್ ನಲ್ಲಿ ಎಷ್ಟರ ಮಟ್ಟಿಗೆ ದಾಖಲಿಸಿ ಇಟ್ಟಿರಬಹುದು ಎಂಬುದು ಗೊತ್ತಾಗುತ್ತಿದೆ.
ಬಿಬಿಎಂಪಿಯ ಆಸ್ತಿ ವಿಭಾಗದ ವಿಶೇಷ ಆಯುಕ್ತೆ ಪ್ರೀತಿ ಗೆಹ್ಲೋಟ್ ಪಾಲಿಕೆ ಸ್ವತ್ತುಗಳ ಸಂರಕ್ಷಣೆ ಬಗ್ಗೆ ಇನ್ನಿಲ್ಲದಂತೆ ಪ್ರಯತ್ನಿಸುತ್ತಿದ್ದರೂ, ಪಾಲಿಕೆ ವ್ಯಾಪ್ತಿಯಲ್ಲಿ ಸಹಾಯಕ ಕಂದಾಯ ಅಧಿಕಾರಿಗಳ ಕಚೇರಿಯ ಸಿಬ್ಬಂದಿಯ ಸಮರ್ಪಕ ಸಹಕಾರದ ಕೊರತೆಯಿಂದ ಪಾಲಿಕೆ ಸ್ವತ್ತುಗಳು ಭೂಗಳ್ಳರ ಪಾಲಾಗುವ ದಿನ ದೂರವಿಲ್ಲ. ಈಗಾಗಲೇ ಬಿಬಿಎಂಪಿಯ ಸ್ವತ್ತುಗಳ ನಿಖರ ಮಾಹಿತಿ, ದಾಖಲೆಗಳಿಲ್ಲದೆ ಕೋಟ್ಯಾಂತ ರೂಪಾಯಿ ಮೌಲ್ಯದ ಆಸ್ತಿಗಳು ಪಾಲಿಕೆಯ ಕೈತಪ್ಪುತ್ತಿದೆ. ಈ ಬಗ್ಗೆ ಮುಖ್ಯ ಆಯುಕ್ತರು, ಆಡಳಿತಾಧಿಕಾರಿಗಳು ಕಠಿಣ ಕ್ರಮ ಕೈಗೊಳ್ಳುವ ಅಗತ್ಯವಿದೆ ಎಂದು ಪ್ರಜ್ಞ ನಾಗರೀಕರು ಒತ್ತಾಯಿಸುತ್ತಿದ್ದಾರೆ.
