ಬೆಂಗಳೂರು, ಮಾ.02 www.bengaluruwire.com : ಸಿಲಿಕಾನ್ ಸಿಟಿಯ ಕಸದ ವಿಲೇವಾರಿ ಸಮಸ್ಯೆಗೆ ಶಾಶ್ವತ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಬೆಂಗಳೂರು ಘನತ್ಯಾಜ್ಯ ನಿರ್ವಹಣಾ ಸಂಸ್ಥೆ (BSWML) ಮಹತ್ವದ ಹೆಜ್ಜೆ ಇಟ್ಟಿದೆ.
ನಗರದ ಹೊರವಲಯದ ಎರಡು ಕಡೆಗಳಲ್ಲಿ ಒಟ್ಟು 200 ಎಕರೆ ಜಮೀನು ಗುರುತಿಸುವ ಪ್ರಕ್ರಿಯೆ ಪೂರ್ಣಗೊಂಡಿದ್ದು, ಶೀಘ್ರದಲ್ಲೇ ವೈಜ್ಞಾನಿಕ ಕಸ ವಿಲೇವಾರಿ ಘಟಕಗಳು ತಲೆ ಎತ್ತಲಿವೆ ಎಂದು ಬಿಎಸ್ಡಬ್ಲ್ಯೂಎಂಎಲ್ ಮುಖ್ಯ ನಿರ್ವಾಹಕ ಅಧಿಕಾರಿ ಕರಿಗೌಡ ತಿಳಿಸಿದ್ದಾರೆ.
ಸೋಮವಾರ ಕೇಂದ್ರ ಕಚೇರಿಯಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಬೆಂಗಳೂರಿನ ಸ್ವಚ್ಛತೆ ಕಾಪಾಡುವ ನಿಟ್ಟಿನಲ್ಲಿ ಕೈಗೊಂಡಿರುವ ಕ್ರಮಗಳ ಬಗ್ಗೆ ಮಾಹಿತಿ ನೀಡಿದರು.
ಎಲ್ಲೆಲ್ಲಿ ಜಮೀನು ಗುರುತು?:
ನಗರದ ಕಸದ ಹೊರೆ ಹೆಚ್ಚುತ್ತಿರುವುದರಿಂದ ಹೊಸ ಭೂ ಭರ್ತಿ (Landfill) ಪ್ರದೇಶಗಳ ಅಗತ್ಯವಿದೆ. ಈ ನಿಟ್ಟಿನಲ್ಲಿ:
* ದೊಡ್ಡಬಳ್ಳಾಪುರದ ಗುಂಡಲಹಳ್ಳಿ: 100 ಎಕರೆ ಜಮೀನು.
* ಬೆಂಗಳೂರು ದಕ್ಷಿಣದ ಗೊಲ್ಲಹಳ್ಳಿ: 100 ಎಕರೆ ಸರ್ಕಾರಿ ಜಮೀನು.
ಈ ಜಮೀನುಗಳಿಗೆ ಪ್ರತಿ ಎಕರೆಗೆ 1 ಕೋಟಿ 57 ಲಕ್ಷ ರೂಪಾಯಿ ದರವನ್ನು ಸರ್ಕಾರ ನಿಗದಿಪಡಿಸಿದೆ. ಈಗಾಗಲೇ ಭೂಸ್ವಾಧೀನ ಪ್ರಕ್ರಿಯೆ ಆರಂಭವಾಗಿದ್ದು, ಮಿಟಗಾನಹಳ್ಳಿ ಸೇರಿದಂತೆ ಪ್ರಸ್ತುತ ಇರುವ ಘಟಕಗಳು ಭರ್ತಿಯಾಗಿರುವುದರಿಂದ ಈ ಹೊಸ ಯೋಜನೆಗೆ ಹೆಚ್ಚಿನ ವೇಗ ನೀಡಲಾಗುತ್ತಿದೆ.
ಸ್ವಚ್ಛತಾ ಜಾಗೃತಿಗಾಗಿ ಮೂವರು ರಾಯಭಾರಿಗಳ ನೇಮಕ:
ಕಸ ವಿಂಗಡಣೆ ಮತ್ತು ವಿಲೇವಾರಿ ಬಗ್ಗೆ ಸಾರ್ವಜನಿಕರಲ್ಲಿ ಅರಿವು ಮೂಡಿಸಲು ನಗರದ ಮೂವರು ಸಾಧಕರನ್ನು ಬೆಂಗಳೂರು ಶುಚಿತ್ವ ರಾಯಭಾರಿಗಳನ್ನಾಗಿ ನೇಮಕ ಮಾಡಲಾಗಿದೆ.
* ಪದ್ಮಶ್ರೀ ಪುರಸ್ಕೃತೆ ಮಂಜಮ್ಮ ಜೋಗತಿ
* ಖ್ಯಾತ ನಟ ಅನಿರುದ್ಧ್ ಜತ್ಕರ್
* ಸಾಮಾಜಿಕ ಕಾರ್ಯಕರ್ತ ಅರುಣ್ ಪೈ
ವಿಶೇಷವೆಂದರೆ, ಈ ಮೂವರೂ ಯಾವುದೇ ಸಂಭಾವನೆ ಪಡೆಯದೆ ಉಚಿತವಾಗಿ ನಗರದ ಸ್ವಚ್ಛತಾ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿ ಜನರಲ್ಲಿ ಜಾಗೃತಿ ಮೂಡಿಸಲಿದ್ದಾರೆ. ಮಾರ್ಚ್ 9 ರಂದು ಟೌನ್ ಹಾಲ್ನಲ್ಲಿ ನಡೆಯುವ ವಿಶೇಷ ಕಾರ್ಯಕ್ರಮದಲ್ಲಿ ಇವರು ಅಧಿಕೃತವಾಗಿ ಅಭಿಯಾನಕ್ಕೆ ಚಾಲನೆ ನೀಡಲಿದ್ದಾರೆ ಎಂದು ಕರಿಗೌಡ ಅವರು ಪ್ರಕಟಿಸಿದರು.
ಪ್ಲಾಸ್ಟಿಕ್ ತ್ಯಾಜ್ಯ ಈಗ ಲಾಭದಾಯಕ!
ನಗರದಲ್ಲಿ ಪ್ರತಿದಿನ ಉತ್ಪತ್ತಿಯಾಗುವ 6,000 ಮೆಟ್ರಿಕ್ ಟನ್ ತ್ಯಾಜ್ಯದಲ್ಲಿ ಸುಮಾರು 520 ಮೆಟ್ರಿಕ್ ಟನ್ ಕಡಿಮೆ ಮೌಲ್ಯಯುತ ಪ್ಲಾಸ್ಟಿಕ್ (RDF) ಸಂಗ್ರಹವಾಗುತ್ತಿದೆ.
- ಆದಾಯದ ಮೂಲ: ಈ ಪ್ಲಾಸ್ಟಿಕ್ ಅನ್ನು ಸಿಮೆಂಟ್ ಘಟಕಗಳಿಗೆ ರವಾನಿಸಲಾಗುತ್ತಿದ್ದು, ಇದರಿಂದ ಲಭಿಸುವ ಇಪಿಆರ್ (EPR) ಕ್ರೆಡಿಟ್ಗಳ ಮೂಲಕ ಸಂಸ್ಥೆಗೆ 54 ಲಕ್ಷದಿಂದ 1.80 ಕೋಟಿ ರೂ. ವರೆಗೆ ಆದಾಯ ಬರುವ ನಿರೀಕ್ಷೆಯಿದೆ.
- ದಾಲ್ಮಿಯಾ ಸಿಮೆಂಟ್ಸ್ಗೆ ರವಾನೆ: ಈಗಾಗಲೇ 18,625 ಮೆಟ್ರಿಕ್ ಟನ್ ಆರ್.ಡಿ.ಎಫ್ ತ್ಯಾಜ್ಯವನ್ನು ಯಶಸ್ವಿಯಾಗಿ ವಿಲೇವಾರಿ ಮಾಡಲಾಗಿದೆ.
ಕಸದ ಸಮಸ್ಯೆ ಇದ್ದರೆ ಇಲ್ಲಿ ದೂರು ನೀಡಿ:
ಸಾರ್ವಜನಿಕರು ಸಹಾಯ 2.0 ಆಪ್, ಸಹಾಯವಾಣಿ 1533 ಅಥವಾ ವಾಟ್ಸಪ್ ಸಂಖ್ಯೆ 94481 97197 ಮೂಲಕ ದೂರು ದಾಖಲಿಸಬಹುದು.
Join our WhatsApp Channel
