ಬಾಹ್ಯಾಕಾಶದ ಕೌತುಕ ಅರಿಯಲು ವಿದ್ಯಾರ್ಥಿಗಳಿಗೆ ಹೊಸ ದಾರಿ: ಬೆಂಗಳೂರಿನ ರಾಣಿ ಸರಳಾದೇವಿ ಶಾಲೆಯಲ್ಲಿ 'ಖಗೋಳ ವಿಜ್ಞಾನ ಪ್ರಯೋಗಾಲಯ' ಲೋಕಾರ್ಪಣೆ

ಬೆಂಗಳೂರು, ಫೆ.06 www.bengaluruwire.com: ಎಳೆಯ ವಯಸ್ಸಿನಲ್ಲೇ ಮಕ್ಕಳಲ್ಲಿ ವಿಜ್ಞಾನದ ಬಗ್ಗೆ ಆಸಕ್ತಿ ಮೂಡಿಸಿ, ಬ್ರಹ್ಮಾಂಡದ ವಿಸ್ಮಯಗಳನ್ನು ಪರಿಚಯಿಸುವ ಉದ್ದೇಶದಿಂದ ನಗರದ ಜಯನಗರದಲ್ಲಿರುವ ರಾಣಿ ಸರಳಾದೇವಿ ವಿದ್ಯಾ ಸಂಸ್ಥೆಯಲ್ಲಿ ನೂತನವಾಗಿ ಸ್ಥಾಪಿಸಲಾದ ‘ಖಗೋಳ ವಿಜ್ಞಾನ ಪ್ರಯೋಗಾಲಯ’ವನ್ನು (Astronomy Laboratory) ಇತ್ತೀಚೆಗೆ ಉದ್ಘಾಟಿಸಲಾಯಿತು.

ಜಾಗತಿಕ ಮಟ್ಟದ ಪ್ರಖ್ಯಾತ ಸಂಸ್ಥೆಯಾದ ‘ಬ್ರಿಲಿಯೋ’ (Brillio) ನೆರವಿನೊಂದಿಗೆ ನಿರ್ಮಿಸಲಾದ ಈ ಸುಸಜ್ಜಿತ ಪ್ರಯೋಗಾಲಯವನ್ನು ಬ್ರಿಲಿಯೋ ಸಂಸ್ಥೆಯ ಹಿರಿಯ ನಿರ್ದೇಶಕರಾದ ಅಭಿಷೇಕ್‌ ರಂಜನ್ ಅವರು ಉದ್ಘಾಟಿಸಿದರು.

ಪ್ರಯೋಗಾಲಯದ ವಿಶೇಷತೆಗಳೇನು?:

ಮಕ್ಕಳ ಕಲಿಕೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಇಲ್ಲಿ ಅತ್ಯಾಧುನಿಕ ಖಗೋಳ ಮಾದರಿಗಳನ್ನು ಅಳವಡಿಸಲಾಗಿದೆ.

* ಗ್ರಹಗಳ ಪರಿಚಯ: ಸೂರ್ಯ, ಚಂದ್ರ, ಮಂಗಳ ಸೇರಿದಂತೆ ವಿವಿಧ ಆಕಾಶಕಾಯಗಳ ಮಾದರಿಗಳು.

* ವೈಜ್ಞಾನಿಕ ಪ್ರಕ್ರಿಯೆಗಳು: ಗ್ರಹಗಳ ಚಲನೆ, ಗ್ರಹಣಗಳು ಸಂಭವಿಸುವ ಬಗೆ, ಹಗಲು-ರಾತ್ರಿಗಳ ಕಾಲಗಣನೆ.

* ತಂತ್ರಜ್ಞಾನದ ಅರಿವು: ರಾಕೆಟ್ ಉಡಾವಣೆ, ಕೃತಕ ಉಪಗ್ರಹಗಳ ಕಾರ್ಯವೈಖರಿ, ದೂರ ಸಂವೇದನೆ (Remote Sensing) ಮತ್ತು ತರಂಗಾಂತರಗಳ ಕುರಿತು ಮಾಹಿತಿ.

* ವೀಕ್ಷಣೆ ಮತ್ತು ಪ್ರಯೋಗ: ಆಕಾಶ ವೀಕ್ಷಣೆಗಾಗಿ ಟೆಲಿಸ್ಕೋಪ್‌ಗಳು ಹಾಗೂ ಮಕ್ಕಳೇ ಸ್ವತಃ ಪ್ರಯೋಗ ಮಾಡಿ ಕಲಿಯಲು ನೆರವಾಗುವ ವೈಜ್ಞಾನಿಕ ಕಿಟ್‌ಗಳು (Scientific Kits) ಇಲ್ಲಿ ಲಭ್ಯವಿವೆ.

ಭವಿಷ್ಯದ ವಿಜ್ಞಾನಿಗಳ ತಯಾರಿ:

ಸಮಾರಂಭದ ಅಧ್ಯಕ್ಷತೆ ವಹಿಸಿ ಮಾತನಾಡಿದ ವಿದ್ಯಾಸಂಸ್ಥೆಯ ಅಧ್ಯಕ್ಷ ಬಿ. ಕೋದಂಡರಾಮ್, “ಮಕ್ಕಳು ಕೇವಲ ಪುಸ್ತಕದ ಬದನೆಕಾಯಿಯಾಗದೆ, ಪ್ರಾಯೋಗಿಕವಾಗಿ ಕಲಿಯಬೇಕು. ಚಿಕ್ಕಂದಿನಲ್ಲೇ ಖಗೋಳ ವಿಜ್ಞಾನದತ್ತ ಆಕರ್ಷಿತರಾದರೆ, ಭವಿಷ್ಯದಲ್ಲಿ ಅವರು ಶ್ರೇಷ್ಠ ವಿಜ್ಞಾನಿಗಳಾಗಿ ದೇಶಕ್ಕೆ ಕೊಡುಗೆ ನೀಡಬಲ್ಲರು. ಈ ನಿಟ್ಟಿನಲ್ಲಿ ಬ್ರಿಲಿಯೋ ಸಂಸ್ಥೆಯ ಸಹಕಾರ ಶ್ಲಾಘನೀಯ,” ಎಂದು ತಿಳಿಸಿದರು.

ಬ್ರಿಲಿಯೋ ಸಂಸ್ಥೆಯ ಅಸೋಸಿಯೇಟ್ ವ್ಯವಸ್ಥಾಪಕ ಪ್ರಜ್ವಲ್ ಅವರು ಪ್ರಯೋಗಾಲಯದ ಉಪಕರಣಗಳ ಕಾರ್ಯವೈಖರಿಯನ್ನು ವಿದ್ಯಾರ್ಥಿಗಳಿಗೆ ಪ್ರಾತ್ಯಕ್ಷಿಕೆ ಮೂಲಕ ವಿವರಿಸಿದರು.

ಈ ಸಂದರ್ಭದಲ್ಲಿ ವಿದ್ಯಾ ಸಂಸ್ಥೆಯ ಉಪಾಧ್ಯಕ್ಷ ಕೆ. ಲಕ್ಷ್ಮೀಶ, ಕಾರ್ಯದರ್ಶಿ ವೈ.ಎನ್. ರಮೇಶ, ಸಹಕಾರ್ಯದರ್ಶಿ ಎನ್.ಎಸ್. ಪ್ರಕಾಶ, ಸದಸ್ಯ ಜಗನ್ನಾಥ್, ಶಾಲಾ ಶಿಕ್ಷಕರು ಹಾಗೂ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.

“ಬೆಂಗಳೂರು ವೈರ್” ಪ್ರತಿ ಸುದ್ದಿ ನಿತ್ಯ ನಿರಂತರವಾಗಿ, ಉಚಿತವಾಗಿ ನಿಮಗೆ ಲಭ್ಯವಾಗಲಿದೆ. ಇದಕ್ಕಾಗಿ ಇಂದೇ ನಿಮಿಷದೊಳಗಾಗಿ Subscribe ಆಗಿ. ಈ ಡಿಜಿಟಲ್ ವೆಬ್ ನ್ಯೂಸ್ ಪೋರ್ಟೆಲ್ಲಿನ ಸೋಶಿಯಲ್ ಮೀಡಿಯಾ ಪೇಜ್/ಚಾನಲ್ ಉಚಿತವಾಗಿ Subscribe ಆಗಲು Dailyhunt, Facebook, Instagram, Telegram, Twitter, Youtube, Whatsup Channel ಗೆ ಜಾಯಿನ್ ಆಗಲು ಇವುಗಳ ಲಿಂಕ್ ಮೇಲೆ ಕ್ಲಿಕ್ ಮಾಡಿ.