ಬೆಂಗಳೂರು, ಜ.29 www.bengaluruwire.com : ಸಿಲಿಕಾನ್ ಸಿಟಿಯ ನಾಗರಿಕರಿಂದ ‘ಕಸದ ಸೆಸ್’ (SWM Cess) ಮತ್ತು ‘ಬಳಕೆದಾರರ ಶುಲ್ಕ’ (User Fees) ವಸೂಲಿ ಮಾಡುವುದರಲ್ಲಿ ತೋರುವ ಆಸಕ್ತಿಯನ್ನು, ಆ ಹಣವನ್ನು ಕಸ ನಿರ್ವಹಣೆ ಮಾಡುವ ಸಂಸ್ಥೆಗೆ ವರ್ಗಾಯಿಸುವುದರಲ್ಲಿ ನಗರದ 5 ಹೊಸ ಪಾಲಿಕೆಗಳು ತೋರುತ್ತಿಲ್ಲವೇ? ಹೀಗೊಂದು ಗಂಭೀರ ಪ್ರಶ್ನೆ ಈಗ ಎದ್ದಿದೆ.
ಬೆಂಗಳೂರು ಮಹಾನಗರದ ಕಸ ನಿರ್ವಹಣೆಗಾಗಿಯೇ ಪ್ರತ್ಯೇಕವಾಗಿ ರಚನೆಯಾಗಿರುವ ‘ಬೆಂಗಳೂರು ಘನತ್ಯಾಜ್ಯ ನಿರ್ವಹಣಾ ಸಂಸ್ಥೆ’ (BSWML) ಗೆ ಸೇರಬೇಕಾದ ₹627 ಕೋಟಿ ಅನುದಾನವನ್ನು ಬಿಡುಗಡೆ ಮಾಡಲು ಮೀನಾಮೇಷ ಎಣಿಸುತ್ತಿರುವ 5 ನಗರ ಪಾಲಿಕೆಗಳ ವಿರುದ್ಧ ನಗರಾಭಿವೃದ್ಧಿ ಇಲಾಖೆ ಚಾಟಿ ಬೀಸಿದೆ.
ಹಣವಿದ್ದರೂ ಕಸದ ಸಮಸ್ಯೆ ಏಕೆ?:
ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ವ್ಯಾಪ್ತಿಯಲ್ಲಿ ಬರುವ 5 ನಗರ ಪಾಲಿಕೆಗಳು (ಸೆಂಟ್ರಲ್, ಈಸ್ಟ್, ವೆಸ್ಟ್, ನಾರ್ತ್, ಸೌತ್) ಆಸ್ತಿ ತೆರಿಗೆಯೊಂದಿಗೆ ಕಸದ ಸೆಸ್ ಮತ್ತು ಬಳಕೆದಾರರ ಶುಲ್ಕವನ್ನು ಸಾರ್ವಜನಿಕರಿಂದ ಸಂಗ್ರಹಿಸುತ್ತಿವೆ. ಆದರೆ, ಸಂಗ್ರಹವಾದ ಈ ಹಣವನ್ನು ಕಸ ನಿರ್ವಹಣೆ ಮಾಡುವ ಬಿಎಸ್ ಡಬ್ಲ್ಯುಎಂಎಲ್ ಗೆ ಹಸ್ತಾಂತರಿಸದೆ ತಮ್ಮ ಬಳಿಯೇ ಇಟ್ಟುಕೊಂಡಿವೆ. ಇದರಿಂದಾಗಿ ಕಸ ವಿಲೇವಾರಿ ಗುತ್ತಿಗೆದಾರರಿಗೆ ಹಣ ಪಾವತಿಸಲಾಗದೆ, ನಗರದ ಮೂಲೆ ಮೂಲೆಗಳಲ್ಲಿ ಕಸದ ರಾಶಿ ಬೀಳುವಂತಾಗಿದೆ.
ಅಧಿಕೃತ ಅಂಕಿ-ಅಂಶಗಳ ಮಾಹಿತಿ (ದಾಖಲೆಗಳ ಪ್ರಕಾರ):
ಲಭ್ಯವಿರುವ ಸರ್ಕಾರದ ನಡವಳಿಗಳ (Proceedings) ಪ್ರಕಾರ, 2025-26ನೇ ಸಾಲಿಗೆ ಬಿಎಸ್ ಡಬ್ಲ್ಯುಎಂಎಲ್ ಗೆ ನೀಡಬೇಕಾದ ಅನುದಾನದ ವಿವರ ಹೀಗಿದೆ:
* ಒಟ್ಟು ಬಜೆಟ್ ಅನುದಾನ: ₹1500.00 ಕೋಟಿ
* ಈಗಾಗಲೇ ಬಿಡುಗಡೆಯಾದ ಮೊತ್ತ: ₹872.63 ಕೋಟಿ
* ಇನ್ನೂ ಬಾಕಿ ಇರುವ ಮೊತ್ತ: ₹627.37 ಕೋಟಿ
ವಿಶೇಷವೆಂದರೆ, ಡಿಸೆಂಬರ್ 2025 ರಿಂದ ಜನವರಿ 2026 ರವರೆಗೆ ಕೇವಲ ಆನ್ಲೈನ್ ಮತ್ತು ಆಫ್ಲೈನ್ ಮೂಲಕ ಸಂಗ್ರಹವಾಗಿರುವ ‘ಘನತ್ಯಾಜ್ಯ ಉಪಕರ ಮತ್ತು ಬಳಕೆದಾರರ ಶುಲ್ಕ’ವೇ ಬರೋಬ್ಬರಿ ₹144.64 ಕೋಟಿಗಳಷ್ಟಿದೆ (₹55.95 ಕೋಟಿ + ₹88.69 ಕೋಟಿ). ಈ ಹಣವನ್ನೂ ಪಾಲಿಕೆಗಳು ತಮ್ಮ ಖಾತೆಯಲ್ಲೇ ಉಳಿಸಿಕೊಂಡಿವೆ ಎಂದು ದಾಖಲೆಗಳು ಹೇಳುತ್ತವೆ.
ನಾಗರಿಕರು ಪಾವತಿಸುತ್ತಿರುವ ದರಗಳೆಷ್ಟು? (User Fees Details)
ಬೆಂಗಳೂರಿನ ನಿವಾಸಿಗಳು ಮತ್ತು ವಾಣಿಜ್ಯ ಮಳಿಗೆಗಳು ಪಾವತಿಸುತ್ತಿರುವ ಕಸದ ಶುಲ್ಕದ (SWM User Fees) ಅಂದಾಜು ವಿವರ ಹೀಗಿದೆ:
ವಸತಿ ಕಟ್ಟಡಗಳು (Residential) :
* 1000 ಚದರ ಅಡಿಗಿಂತ ಕಡಿಮೆ : ಮಾಸಿಕ ₹200 (ವಾರ್ಷಿಕ ₹2400)
* 1000 – 3000 ಚದರ ಅಡಿ : ಮಾಸಿಕ ₹400 – ₹600 |
* 3000 ಚದರ ಅಡಿಗಿಂತ ಹೆಚ್ಚು : ಮಾಸಿಕ ₹600 ಕ್ಕಿಂತ ಹೆಚ್ಚು
ವಾಣಿಜ್ಯ ಕಟ್ಟಡಗಳು (Commercial) :
ಸಣ್ಣ ಅಂಗಡಿ/ಕಚೇರಿಗಳು : ಮಾಸಿಕ ₹500 – ₹1000
ಬಲ್ಕ್ ಜನರೇಟರ್ಸ್ (Bulk Generators) : ಮಾಸಿಕ ಪ್ರತಿ ಕೆ.ಜಿ.ಗೆ ₹12 ಅಥವಾ ನಿಗದಿತ ದರ
(ಗಮನಿಸಿ: ಈ ಶುಲ್ಕವನ್ನು ಆಸ್ತಿ ತೆರಿಗೆಯೊಂದಿಗೆ ವಾರ್ಷಿಕವಾಗಿ ಅಥವಾ ಮಾಸಿಕವಾಗಿ ಸಂಗ್ರಹಿಸಲಾಗುತ್ತಿದೆ)
ಸರ್ಕಾರದ ಖಡಕ್ ಆದೇಶವೇನು?:
ಬಾಕಿ ಉಳಿಸಿಕೊಂಡಿರುವ ₹627.37 ಕೋಟಿ ಅನುದಾನವನ್ನು ಹಂತ ಹಂತವಾಗಿ ಮಾರ್ಚ್ 2026 ರೊಳಗೆ ಬಿಡುಗಡೆ ಮಾಡುವಂತೆ ನಗರಾಭಿವೃದ್ಧಿ ಇಲಾಖೆಯ ಅಪರ ಮುಖ್ಯ ಕಾರ್ಯದರ್ಶಿಗಳು ಆದೇಶಿಸಿದ್ದಾರೆ.
ಈ ಬಾಕಿ ಹಣವನ್ನು ತಕ್ಷಣವೇ ಕೆನರಾ ಬ್ಯಾಂಕ್ ಖಾತೆಯಲ್ಲಿರುವ ₹100 ಕೋಟಿಗಳನ್ನು ಬಿಎಸ್ ಡಬ್ಲ್ಯುಎಂಎಲ್ ಗೆ ವರ್ಗಾಯಿಸಬೇಕು. ಸಂಗ್ರಹವಾಗಿರುವ ಸೆಸ್ ಮತ್ತು ಬಳಕೆದಾರರ ಶುಲ್ಕದ ಮೊತ್ತವನ್ನು (ಸುಮಾರು ₹144 ಕೋಟಿ) ಕೂಡಲೇ ಪಾವತಿಸಬೇಕು. ಮುಂದಿನ ದಿನಗಳಲ್ಲಿ ಪ್ರತಿ ವಾರ ಅಥವಾ 15 ದಿನಗಳಿಗೊಮ್ಮೆ ಸಂಗ್ರಹವಾಗುವ ಹಣವನ್ನು ಸ್ವಯಂಚಾಲಿತವಾಗಿ ಬಿಎಸ್ ಡಬ್ಲ್ಯುಎಂಎಲ್ ಗೆ ವರ್ಗಾಯಿಸಬೇಕು ಎಂದು ಸೂಚಿಸಿದೆ.
ಹಣ ಬಿಡುಗಡೆಯಾಗದಿದ್ದರೆ ಕಸದ ಲಾರಿಗಳು ನಿಲ್ಲುತ್ತವೆ, ಸಂಸ್ಕರಣಾ ಘಟಕಗಳು ಮುಚ್ಚುತ್ತವೆ. ಅಂತಿಮವಾಗಿ ಬೆಂಗಳೂರು ಮತ್ತೊಮ್ಮೆ ‘ಗಾರ್ಬೇಜ್ ಸಿಟಿ’ಯಾಗುವುದರಲ್ಲಿ ಸಂಶಯವಿಲ್ಲ.
ಹಣವಿದ್ದರೂ ನಿರ್ವಹಣೆ ಏಕಿಲ್ಲ?
ದಾಖಲೆಗಳ ಪ್ರಕಾರ, 2025-26ನೇ ಸಾಲಿನಲ್ಲಿ ಬಿಎಸ್ ಡಬ್ಲ್ಯುಎಂಎಲ್ ಗೆ ಒಟ್ಟು ರೂ. 1500 ಕೋಟಿ ಬಜೆಟ್ ಅನುದಾನ ನಿಗದಿಪಡಿಸಲಾಗಿತ್ತು. ಆದರೆ, ಇದುವರೆಗೂ ಬಿಡುಗಡೆಯಾಗಿರುವುದು ಕೇವಲ ಭಾಗಶಃ ಹಣ. ಕಸ ಸಂಗ್ರಹಣೆ ಮಾಡುವ ಗುತ್ತಿಗೆದಾರರಿಗೆ, ಟಿಪ್ಪರ್ ಲಾರಿಗಳಿಗೆ ಮತ್ತು ಸಂಸ್ಕರಣಾ ಘಟಕಗಳಿಗೆ ಹಣ ಪಾವತಿಸಲು ಬಿಎಸ್ ಡಬ್ಲ್ಯುಎಂಎಲ್ ಪರದಾಡುತ್ತಿದೆ. “ಜನರಿಂದ ಹಣ ವಸೂಲಿ ಮಾಡಿ ತಮ್ಮ ಖಜಾನೆಯಲ್ಲಿ ಇಟ್ಟುಕೊಂಡರೆ ನಗರ ಸ್ವಚ್ಛವಾಗುವುದು ಹೇಗೆ?” ಎಂಬುದು ಪ್ರಜ್ಞಾವಂತ ನಾಗರಿಕರ ಪ್ರಶ್ನೆಯಾಗಿದೆ.
“ಬೆಂಗಳೂರು ವೈರ್” ಪ್ರತಿ ಸುದ್ದಿ ನಿತ್ಯ ನಿರಂತರವಾಗಿ, ಉಚಿತವಾಗಿ ನಿಮಗೆ ಲಭ್ಯವಾಗಲಿದೆ. ಇದಕ್ಕಾಗಿ ಇಂದೇ ನಿಮಿಷದೊಳಗಾಗಿ Subscribe ಆಗಿ. ಈ ಡಿಜಿಟಲ್ ವೆಬ್ ನ್ಯೂಸ್ ಪೋರ್ಟೆಲ್ಲಿನ ಸೋಶಿಯಲ್ ಮೀಡಿಯಾ ಪೇಜ್/ಚಾನಲ್ ಉಚಿತವಾಗಿ Subscribe ಆಗಲು Dailyhunt, Facebook, Instagram, Telegram, Twitter, Youtube, Whatsup Channel ಗೆ ಜಾಯಿನ್ ಆಗಲು ಇವುಗಳ ಲಿಂಕ್ ಮೇಲೆ ಕ್ಲಿಕ್ ಮಾಡಿ.
Join our WhatsApp Channel
