ಭಾರತ ಜನಗಣತಿ 2027: ಮೊದಲ ಹಂತದ 33 ಪ್ರಶ್ನೆಗಳ ಪಟ್ಟಿ ಬಿಡುಗಡೆ; ಏಪ್ರಿಲ್ 1, 2026ರಿಂದ 'ಮನೆ ಪಟ್ಟಿ' ಕಾರ್ಯ ಆರಂಭ

ನವದೆಹಲಿ, ಜ.23 www.bengaluruwire.com : ಬಹುನಿರೀಕ್ಷಿತ ಭಾರತದ ಜನಗಣತಿ 2027ರ ಮೊದಲ ಹಂತದ ಕಾರ್ಯಚರಣೆಗೆ ಕೇಂದ್ರ ಗೃಹ ಸಚಿವಾಲಯ ಅಧಿಕೃತ ಮುದ್ರೆ ಒತ್ತಿದೆ.

2027ರ ಜನಗಣತಿಯ ಮೊದಲ ಹಂತವಾದ ‘ಮನೆ ಪಟ್ಟಿ’ (Houselisting) ಮತ್ತು ‘ವಸತಿ ಗಣತಿ’ಗಾಗಿ (Housing Census) ಒಟ್ಟು 33 ಪ್ರಶ್ನೆಗಳಿರುವ ಪ್ರಶ್ನಾವಳಿಯನ್ನು ರಿಜಿಸ್ಟ್ರಾರ್ ಜನರಲ್ ಆಫ್ ಇಂಡಿಯಾ ಅಧಿಸೂಚನೆಯ ಮೂಲಕ ಪ್ರಕಟಿಸಿದ್ದಾರೆ.

ಕೋವಿಡ್-19 ಸಾಂಕ್ರಾಮಿಕ ರೋಗದಿಂದಾಗಿ 2021ರಲ್ಲಿ ನಡೆಯಬೇಕಿದ್ದ ದಶವಾರ್ಷಿಕ ಜನಗಣತಿಯು ವಿಳಂಬವಾಗಿತ್ತು. ಈಗ ಹೊಸ ವೇಳಾಪಟ್ಟಿಯ ಪ್ರಕಾರ, 2026ರ ಏಪ್ರಿಲ್ 1 ರಿಂದ ಸೆಪ್ಟೆಂಬರ್ 30 ರವರೆಗೆ ವಿವಿಧ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಮನೆ ಪಟ್ಟಿ ಮತ್ತು ವಸತಿ ಗಣತಿ ಕಾರ್ಯ ನಡೆಯಲಿದೆ. ಇದು ಭಾರತದ ಇತಿಹಾಸದಲ್ಲೇ ಮೊದಲ ಸಂಪೂರ್ಣ ‘ಡಿಜಿಟಲ್ ಜನಗಣತಿ’ಯಾಗಲಿದ್ದು, ಗಣತಿದಾರರು ಮೊಬೈಲ್ ಆ್ಯಪ್‌ಗಳನ್ನು ಬಳಸಿ ಮಾಹಿತಿ ಸಂಗ್ರಹಿಸಲಿದ್ದಾರೆ.

ಏನಿವೆ ಆ 33 ಪ್ರಶ್ನೆಗಳು?:

ಮೊದಲ ಹಂತದ ಜನಗಣತಿಯಲ್ಲಿ ನಾಗರಿಕರ ಮೂಲಭೂತ ಸೌಕರ್ಯಗಳು ಮತ್ತು ಜೀವನಮಟ್ಟವನ್ನು ಅರಿಯಲು ಒತ್ತು ನೀಡಲಾಗಿದೆ. ಅಧಿಸೂಚನೆಯ ಪ್ರಕಾರ, ಗಣತಿದಾರರು ಈ ಕೆಳಗಿನ ಪ್ರಮುಖ ಮಾಹಿತಿಗಳನ್ನು ಕಲೆಹಾಕಲಿದ್ದಾರೆ:

* ಕಟ್ಟಡದ ಸಂಖ್ಯೆ ಮತ್ತು ಜನಗಣತಿ ಮನೆ ಸಂಖ್ಯೆ.

* ಮನೆಯ ನೆಲ, ಗೋಡೆ ಮತ್ತು ಛಾವಣಿಗೆ ಬಳಸಲಾದ ಪ್ರಧಾನ ವಸ್ತುಗಳು.

* ಮನೆಯ ಸ್ಥಿತಿಗತಿ ಮತ್ತು ಅದರ ಬಳಕೆ (ವಸತಿ ಅಥವಾ ವಾಣಿಜ್ಯ).

* ಕುಟುಂಬದ ಮುಖ್ಯಸ್ಥರ ಹೆಸರು, ಲಿಂಗ ಮತ್ತು ಅವರು ಪರಿಶಿಷ್ಟ ಜಾತಿ (SC) ಅಥವಾ ಪರಿಶಿಷ್ಟ ಪಂಗಡಕ್ಕೆ (ST) ಸೇರಿದವರೇ ಎಂಬ ಮಾಹಿತಿ.

* ಕುಡಿಯುವ ನೀರಿನ ಪ್ರಮುಖ ಮೂಲ, ಶೌಚಾಲಯದ ಲಭ್ಯತೆ ಮತ್ತು ವಿಧ.

* ಅಡುಗೆಗೆ ಬಳಸುವ ಇಂಧನ (LPG/PNG), ಸ್ನಾನದ ಕೋಣೆ ಮತ್ತು ತ್ಯಾಜ್ಯ ನೀರು ಹರಿದು ಹೋಗುವ ವ್ಯವಸ್ಥೆ.

ಡಿಜಿಟಲ್ ಆಸ್ತಿಗಳ ಮಾಹಿತಿ ಸಂಗ್ರಹ:

ಬದಲಾದ ಕಾಲಘಟ್ಟಕ್ಕೆ ಅನುಗುಣವಾಗಿ, ಈ ಬಾರಿ ಕುಟುಂಬಗಳು ಹೊಂದಿರುವ ಆಧುನಿಕ ಸೌಕರ್ಯಗಳ ಮಾಹಿತಿಯನ್ನೂ ಕೇಳಲಾಗಿದೆ. ಇಂಟರ್ನೆಟ್ ಬಳಕೆ, ಲ್ಯಾಪ್‌ಟಾಪ್/ಕಂಪ್ಯೂಟರ್, ಮೊಬೈಲ್ ಫೋನ್/ಸ್ಮಾರ್ಟ್‌ಫೋನ್, ರೇಡಿಯೋ, ಟಿವಿ ಮತ್ತು ವಾಹನಗಳ ಒಡೆತನದ ಬಗ್ಗೆಯೂ ಪ್ರಶ್ನೆಗಳಿರಲಿವೆ. ಜನಗಣತಿ ಸಂವಹನಕ್ಕಾಗಿ ಕುಟುಂಬದ ಮುಖ್ಯಸ್ಥರ ಮೊಬೈಲ್ ಸಂಖ್ಯೆಯನ್ನೂ ಪಡೆಯಲಾಗುತ್ತದೆ.

ಎರಡನೇ ಹಂತದ ಜನಗಣತಿ ಯಾವಾಗ?:

ಮೊದಲ ಹಂತದ ಮನೆ ಪಟ್ಟಿ ಕಾರ್ಯ ಮುಗಿದ ನಂತರ, ಎರಡನೇ ಹಂತದ ‘ಜನಸಂಖ್ಯೆ ಎಣಿಕೆ’ (Population Enumeration) ಕಾರ್ಯವು 2027ರ ಫೆಬ್ರವರಿ 9 ರಿಂದ ಫೆಬ್ರವರಿ 28 ರವರೆಗೆ ನಡೆಯಲಿದೆ. ಇದಕ್ಕೆ ಮಾರ್ಚ್ 1, 2027 ಅನ್ನು ಉಲ್ಲೇಖ ದಿನಾಂಕವನ್ನಾಗಿ (Reference Date) ನಿಗದಿಪಡಿಸಲಾಗಿದೆ. ಹಿಮಪಾತವಿರುವ ಜಮ್ಮು ಮತ್ತು ಕಾಶ್ಮೀರ, ಹಿಮಾಚಲ ಪ್ರದೇಶ ಮತ್ತು ಉತ್ತರಾಖಂಡದ ಕೆಲವು ಭಾಗಗಳಲ್ಲಿ 2026ರ ಅಕ್ಟೋಬರ್‌ನಲ್ಲೇ ಎಣಿಕೆ ಕಾರ್ಯ ನಡೆಯಲಿದೆ ಎಂದು ಅಧಿಸೂಚನೆ ತಿಳಿಸಿದೆ.

ಈ ಬಾರಿಯ ಜನಗಣತಿಯು ಸ್ವಯಂ-ಎಣಿಕೆಗೂ (Self-enumeration) ಅವಕಾಶ ಕಲ್ಪಿಸಿದ್ದು, ಜನರು ಆನ್‌ಲೈನ್ ಮೂಲಕ ತಮ್ಮ ಮಾಹಿತಿಯನ್ನು ತಾವೇ ನವೀಕರಿಸಲು 15 ದಿನಗಳ ಕಾಲಾವಕಾಶ ನೀಡಲಾಗುತ್ತದೆ ಎಂದು ಮೂಲಗಳು ತಿಳಿಸಿವೆ.