ಬೆಂಗಳೂರು, ಜ.09 www.bengaluruwire.com : ಬಹುನಿರೀಕ್ಷಿತ ಗ್ರೇಟರ್ ಬೆಂಗಳೂರು ಆಡಳಿತ ಅಧಿನಿಯಮ, 2024ರ ಅಡಿಯಲ್ಲಿ ಹೊಸದಾಗಿ ರಚನೆಯಾಗಿರುವ ಐದು ನಗರ ಪಾಲಿಕೆಗಳ ವಾರ್ಡ್ವಾರು ಮೀಸಲಾತಿಯ ಕರಡು ಅಧಿಸೂಚನೆಯನ್ನು ರಾಜ್ಯ ನಗರಾಭಿವೃದ್ಧಿ ಇಲಾಖೆಯು ಶುಕ್ರವಾರ (ಜ.08) ಅಧಿಕೃತವಾಗಿ ಪ್ರಕಟಿಸಿದೆ .
ನಗರಾಭಿವೃದ್ಧಿ ಇಲಾಖೆಯ ಅಪರ ಮುಖ್ಯ ಕಾರ್ಯದರ್ಶಿಯವರ ಕಚೇರಿಯಿಂದ ಹೊರಡಿಸಲಾದ ಈ ಆದೇಶದನ್ವಯ, ಗ್ರೇಟರ್ ಬೆಂಗಳೂರು ವ್ಯಾಪ್ತಿಯಲ್ಲಿ ಬರುವ ಕೇಂದ್ರ (Central), ಪೂರ್ವ (East), ಪಶ್ಚಿಮ (West), ಉತ್ತರ (North) ಮತ್ತು ದಕ್ಷಿಣ (South) ವಲಯಗಳ ಒಟ್ಟು 369 ವಾರ್ಡ್ಗಳಿಗೆ ಮೀಸಲಾತಿಯನ್ನು ನಿಗದಿಪಡಿಸಲಾಗಿದೆ .
ಸಾರ್ವಜನಿಕರ ಆಕ್ಷೇಪಣೆಗೆ ಜ.23 ಅಂತಿಮ ಗಡುವು
ಈ ಕರಡು ಮೀಸಲಾತಿ ಪಟ್ಟಿಗೆ ಸಂಬಂಧಿಸಿದಂತೆ ಸಾರ್ವಜನಿಕರು ಅಥವಾ ಬಾಧಿತರಾಗಬಹುದಾದ ವ್ಯಕ್ತಿಗಳು ತಮ್ಮ ಸಲಹೆ ಅಥವಾ ಆಕ್ಷೇಪಣೆಗಳನ್ನು ಸಲ್ಲಿಸಲು ಸರ್ಕಾರ ಅವಕಾಶ ಕಲ್ಪಿಸಿದೆ. ಗೆಜೆಟ್ನಲ್ಲಿ ಪ್ರಕಟಗೊಂಡ ದಿನಾಂಕದಿಂದ 15 ದಿನಗಳ ಒಳಗಾಗಿ, ಅಂದರೆ 2026ರ ಜನವರಿ 23ರ ಸಂಜೆ 5:30ರ ಒಳಗೆ ಲಿಖಿತ ರೂಪದಲ್ಲಿ ಆಕ್ಷೇಪಣೆಗಳನ್ನು ಸಲ್ಲಿಸಬಹುದಾಗಿದೆ .
ಆಕ್ಷೇಪಣೆ ಸಲ್ಲಿಸಬೇಕಾದ ವಿಳಾಸ:
ಸರ್ಕಾರದ ಅಪರ ಮುಖ್ಯ ಕಾರ್ಯದರ್ಶಿಗಳು, ನಗರಾಭಿವೃದ್ಧಿ ಇಲಾಖೆ, ಕೊಠಡಿ ಸಂಖ್ಯೆ 436, 4ನೇ ಮಹಡಿ, ವಿಕಾಸಸೌಧ, ಬೆಂಗಳೂರು. ಇಲ್ಲಿ ಆಕ್ಷೇಪಣೆಗಳನ್ನು ಸಲ್ಲಿಸುವಾಗ ಸಾರ್ವಜನಿಕರು ತಮ್ಮ ಪೂರ್ಣ ವಿಳಾಸ, ಸಹಿ ಮತ್ತು ಸೂಕ್ತ ಕಾರಣಗಳನ್ನು ಒದಗಿಸುವುದು ಕಡ್ಡಾಯವಾಗಿದೆ.
ಪಾಲಿಕೆವಾರು ಮೀಸಲಾತಿ ಹಂಚಿಕೆ ವಿವರ: (ಅಂಕಿ-ಅಂಶಗಳು)
ಗ್ರೇಟರ್ ಬೆಂಗಳೂರು ವ್ಯಾಪ್ತಿಯಲ್ಲಿ ಅತಿ ಹೆಚ್ಚು ವಾರ್ಡ್ಗಳನ್ನು ‘ಪಶ್ಚಿಮ’ ಪಾಲಿಕೆ (112) ಹೊಂದಿದ್ದರೆ, ಅತಿ ಕಡಿಮೆ ವಾರ್ಡ್ಗಳು ‘ಪೂರ್ವ’ ಪಾಲಿಕೆಯಲ್ಲಿ (50) ಹಂಚಿಕೆಯಾಗಿವೆ. ಒಟ್ಟು 369 ವಾರ್ಡ್ಗಳ ಮೀಸಲಾತಿ ಹಂಚಿಕೆ ಈ ಕೆಳಗಿನಂತಿದೆ :
* ಒಟ್ಟು ವಾರ್ಡ್ಗಳು: 369
* ಪರಿಶಿಷ್ಟ ಜಾತಿ (SC): 43 ಸ್ಥಾನಗಳು
* ಪರಿಶಿಷ್ಟ ಪಂಗಡ (ST): 07 ಸ್ಥಾನಗಳು
* ಹಿಂದುಳಿದ ವರ್ಗ ‘ಎ’ (BC-A): 97 ಸ್ಥಾನಗಳು
* ಹಿಂದುಳಿದ ವರ್ಗ ‘ಬಿ’ (BC-B): 24 ಸ್ಥಾನಗಳು
* ಸಾಮಾನ್ಯ ವರ್ಗ (General): 198 ಸ್ಥಾನಗಳು
ವಲಯವಾರು ವಾರ್ಡ್ಗಳ ಸಂಖ್ಯೆ:
* ಕೇಂದ್ರ (Central): 63 ವಾರ್ಡ್ಗಳು
* ಪೂರ್ವ (East): 50 ವಾರ್ಡ್ಗಳು
* ಪಶ್ಚಿಮ (West): 112 ವಾರ್ಡ್ಗಳು
* ಉತ್ತರ (North): 72 ವಾರ್ಡ್ಗಳು
* ದಕ್ಷಿಣ (South): 72 ವಾರ್ಡ್ಗಳು
ನಿಗದಿತ ಅವಧಿಯಲ್ಲಿ ಸ್ವೀಕೃತವಾಗುವ ಎಲ್ಲಾ ಆಕ್ಷೇಪಣೆಗಳನ್ನು ಪರಿಶೀಲಿಸಿದ ನಂತರವೇ ಅಂತಿಮ ಮೀಸಲಾತಿ ಪಟ್ಟಿಯನ್ನು ಪ್ರಕಟಿಸಲು ಕ್ರಮ ಕೈಗೊಳ್ಳಲಾಗುವುದು ಎಂದು ನಗರಾಭಿವೃದ್ಧಿ ಇಲಾಖೆಯ ಅಧೀನ ಕಾರ್ಯದರ್ಶಿಗಳು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ .
Join our WhatsApp Channel
