ಬೆಂಗಳೂರು, ಜ.05 www.bengaluruwire.com : ಸಾರ್ವಜನಿಕ ಪ್ರಯಾಣಿಕರಿಗೆ ಗುಣಮಟ್ಟದ ಸೇವೆ ನೀಡುತ್ತಿರುವ ರಾಜ್ಯ ರಸ್ತೆ ಸಾರಿಗೆ ನಿಗಮವು (KSRTC), ತನ್ನ ಪ್ರಯಾಣಿಕರಿಗೆ ಹೊಸ ವರ್ಷದ ಆರಂಭದಲ್ಲೇ ಜೇಬು ಹಗುರವಾಗುವ ಸುದ್ದಿ ನೀಡಿದೆ.
ನಿಗಮದ ಪ್ರತಿಷ್ಠಿತ ಮತ್ತು ಐಷಾರಾಮಿ ಬಸ್ಗಳಲ್ಲಿ ಪ್ರಯಾಣಿಸುವವರಿಗೆ ಟಿಕೆಟ್ ದರದಲ್ಲಿ ಶೇಕಡಾ 5 ರಿಂದ 15 ರವರೆಗೆ ರಿಯಾಯಿತಿಯನ್ನು (Discount) ಘೋಷಿಸಿದೆ.
ಈ ರಿಯಾಯಿತಿ ದರಗಳು ಇಂದಿನಿಂದಲೇ ಅಂದರೆ, ಜನವರಿ 05 ರಿಂದ ಜಾರಿಗೆ ಬರಲಿವೆ ಎಂದು ನಿಗಮದ ಪ್ರಕಟಣೆ ತಿಳಿಸಿದೆ. ಪ್ರಯಾಣಿಕರ ಹಿತದೃಷ್ಟಿ ಹಾಗೂ ಉತ್ತಮ ಸಾರಿಗೆ ಸೌಲಭ್ಯವನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಯಾವ ಬಸ್ಗಳಿಗೆ ರಿಯಾಯಿತಿ ಅನ್ವಯ?:
ನಿಗಮವು ಕಾರ್ಯಾಚರಣೆಗೊಳಿಸುತ್ತಿರುವ ಪ್ರೀಮಿಯಂ ಮಾದರಿಯ ಬಸ್ಗಳಾದ ರಾಜಹಂಸ, ನಾನ್ ಎಸಿ ಸ್ಲೀಪರ್, ಐರಾವತ, ಐರಾವತ ಕ್ಲಬ್ ಕ್ಲಾಸ್ (Airavat Club Class), ಎಸಿ ಸ್ಲೀಪರ್ ಮತ್ತು ಮಲ್ಟಿ ಆಕ್ಸೆಲ್ ಎಸಿ ಸ್ಲೀಪರ್ (Multi Axle) ಸಾರಿಗೆಗಳ ಮೇಲೆ ಈ ರಿಯಾಯಿತಿ ಲಭ್ಯವಿರುತ್ತದೆ.
ಪ್ರಮುಖ ಮಾರ್ಗಗಳು:
ಬೆಂಗಳೂರಿನಿಂದ ಹೊರಡುವ ಅಂತರರಾಜ್ಯ ಮತ್ತು ರಾಜ್ಯದ ಪ್ರಮುಖ ಪ್ರವಾಸಿ ಹಾಗೂ ವಾಣಿಜ್ಯ ನಗರಗಳಿಗೆ ಸಂಪರ್ಕ ಕಲ್ಪಿಸುವ ಮಾರ್ಗಗಳಲ್ಲಿ ಈ ರಿಯಾಯಿತಿ ನೀಡಲಾಗಿದೆ. ಆಯ್ದ ಪ್ರಮುಖ ಮಾರ್ಗಗಳು ಈ ಕೆಳಗಿನಂತಿವೆ:
* ಕರಾವಳಿ ಮತ್ತು ಮಲೆನಾಡು: ಮಂಗಳೂರು, ಕುಂದಾಪುರ, ಉಡುಪಿ, ಧರ್ಮಸ್ಥಳ, ಕುಕ್ಕೆ ಸುಬ್ರಹ್ಮಣ್ಯ, ಪುತ್ತೂರು, ಮಡಿಕೇರಿ, ವಿರಾಜಪೇಟೆ, ಶಿವಮೊಗ್ಗ ಮತ್ತು ಸಾಗರ.
* ಉತ್ತರ ಕರ್ನಾಟಕ: ದಾವಣಗೆರೆ, ಮಂತ್ರಾಲಯ.
* ಅಂತರರಾಜ್ಯ ಮಾರ್ಗಗಳು: ಚೆನ್ನೈ, ಹೈದರಾಬಾದ್, ಸಿಕಂದರಾಬಾದ್, ತಿರುಪತಿ, ವಿಜಯವಾಡ, ಪೂನಾ, ಮುಂಬೈ, ಎರ್ನಾಕುಲಂ, ಮದುರೈ, ಕೋಯಿಮತ್ತೂರು, ತ್ರಿಶೂರ್ ಹಾಗೂ ಇತರೆ ಆಯ್ದ ಮಾರ್ಗಗಳು.
ಸಾರ್ವಜನಿಕರು ಮತ್ತು ಪ್ರವಾಸಿಗರು ಈ ಸೌಲಭ್ಯದ ಸದುಪಯೋಗ ಪಡೆದುಕೊಳ್ಳುವಂತೆ ಕೆಎಸ್ಆರ್ಟಿಸಿ ಮನವಿ ಮಾಡಿದೆ. ಹೆಚ್ಚಿನ ಮಾಹಿತಿ ಹಾಗೂ ಟಿಕೆಟ್ ಕಾಯ್ದಿರಿಸುವಿಕೆಗಾಗಿ ನಿಗಮದ ಅಧಿಕೃತ ವೆಬ್ಸೈಟ್ www.ksrtc.in ಗೆ ಭೇಟಿ ನೀಡಬಹುದಾಗಿದೆ.
Join our WhatsApp Channel
