ಬೆಂಗಳೂರು, ನ.14 www.bengaluruwire.com : ಪ್ರಯಾಣಿಕರ ಹೆಚ್ಚುತ್ತಿರುವ ಬೇಡಿಕೆಗಳನ್ನು ಸಮರ್ಥವಾಗಿ ನಿರ್ವಹಿಸಲು ಮತ್ತು ಹಬ್ಬದ ಋತುಗಳಲ್ಲಿ ಸುಗಮ ಸಂಚಾರ ಒದಗಿಸಲು ನೈಋತ್ಯ ರೈಲ್ವೆ (South Western Railway – SWR) ತೆಗೆದುಕೊಂಡ ಸಕ್ರಿಯ ಕ್ರಮಗಳು ಈಗ ಭರ್ಜರಿ ಫಲ ನೀಡಿದೆ.
ಪ್ರಸಕ್ತ ಹಣಕಾಸು ವರ್ಷದ (2025–26) ಏಪ್ರಿಲ್ನಿಂದ ಅಕ್ಟೋಬರ್ ಅವಧಿಯಲ್ಲಿ ವಿಶೇಷ ರೈಲುಗಳ ಕಾರ್ಯಾಚರಣೆಯಿಂದ ರೈಲ್ವೆ ಇಲಾಖೆಯು ಆದಾಯದಲ್ಲಿ ಶೇ. 23ರಷ್ಟು ಗಣನೀಯ ವೃದ್ಧಿ ಸಾಧಿಸಿದೆ.
ದಾಖಲೆ ಆದಾಯದ ವಿವರ :
ನೈಋತ್ಯ ರೈಲ್ವೆಯು ಏಪ್ರಿಲ್ನಿಂದ ಅಕ್ಟೋಬರ್ 2025ರ ಅವಧಿಯಲ್ಲಿ ಒಟ್ಟು 355 ವಿಶೇಷ ರೈಲುಗಳನ್ನು ಯಶಸ್ವಿಯಾಗಿ ಸಂಚಾರ ಮಾಡಿದೆ. ಈ ಕಾರ್ಯಾಚರಣೆಯಿಂದಾಗಿ ಒಟ್ಟು ₹ 171.47 ಕೋಟಿ ಆದಾಯ ಹರಿದುಬಂದಿದೆ.
ಕಳೆದ ವರ್ಷದ (2024–25) ಇದೇ ಅವಧಿಗೆ ಹೋಲಿಸಿದರೆ ಈ ಹೆಚ್ಚಳ ಗಮನಾರ್ಹವಾಗಿದೆ. ಕಳೆದ ಬಾರಿ 351 ವಿಶೇಷ ರೈಲುಗಳಿಂದ ₹ 138.83 ಕೋಟಿ ಆದಾಯ ಬಂದಿತ್ತು. ಇದಕ್ಕೆ ಪ್ರತಿಯಾಗಿ, ಈ ಬಾರಿ ₹ 32.64 ಕೋಟಿ ಹೆಚ್ಚುವರಿ ಆದಾಯ ಬಂದಿದ್ದು, ಇದು ಶೇ. 23ರಷ್ಟು ಪ್ರಗತಿಯನ್ನು ಸೂಚಿಸುತ್ತದೆ. ವಿಶೇಷ ರೈಲು ಸೇವೆಗಳ ಪರಿಣಾಮಕಾರಿ ನಿರ್ವಹಣೆಯನ್ನು ಇದು ಎತ್ತಿ ತೋರಿಸಿದೆ.
ಪ್ರಯಾಣಿಕರ ದಾಖಲೆ ಬೇಡಿಕೆ :
ಈ ಏಳು ತಿಂಗಳ ಅವಧಿಯಲ್ಲಿ ಬರೋಬ್ಬರಿ 19.55 ಲಕ್ಷ ಪ್ರಯಾಣಿಕರು ವಿಶೇಷ ರೈಲುಗಳ ಸೇವೆಗಳನ್ನು ಬಳಸಿಕೊಂಡಿದ್ದಾರೆ. ಈ ಅಂಕಿ-ಅಂಶವು ಪ್ರಯಾಣಿಕರಿಂದ ಇರುವ ಬಲವಾದ ಬೇಡಿಕೆಯನ್ನು ಸ್ಪಷ್ಟಪಡಿಸಿದೆ. ನಿಗದಿತ ಬರ್ತ್ ಸಾಮರ್ಥ್ಯವಾದ 17.15 ಲಕ್ಷಕ್ಕೆ ಹೋಲಿಸಿದರೆ, ಶೇ. 114ರಷ್ಟು ಬುಕಿಂಗ್ ದರ ದಾಖಲಾಗಿರುವುದು ಕಾರ್ಯಾಚರಣೆಯ ದಕ್ಷತೆಯನ್ನು ಸೂಚಿಸುತ್ತದೆ. ₹161.26 ಕೋಟಿ ಗಳಿಕೆಯ ಸಾಮರ್ಥ್ಯಕ್ಕೆ ಎದುರಾಗಿ ಶೇ. 106.34ರಷ್ಟು ಗಳಿಕೆಯ ದಕ್ಷತೆಯೂ ಸಾಧನೆಯಾಗಿದೆ ಎಂದು ನೈಋತ್ಯ ರೈಲ್ವೆಯು ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದೆ.
ಹೆಚ್ಚುವರಿ ಬೋಗಿಗಳಿಂದ ಲಾಭ :
ವಿಶೇಷ ರೈಲುಗಳಷ್ಟೇ ಅಲ್ಲದೆ, ನೈಋತ್ಯ ರೈಲ್ವೆ ತನ್ನ ನಿಯಮಿತ ರೈಲು ಸೇವೆಗಳನ್ನೂ ಬಲಪಡಿಸಿದೆ.
– 521 ಹೆಚ್ಚುವರಿ ಬೋಗಿಗಳನ್ನು ಜೋಡಣೆ.
– 35,524 ಹೆಚ್ಚುವರಿ ಬರ್ತ್ಗಳ ವ್ಯವಸ್ಥೆ.
– 24,530 ಹೆಚ್ಚುವರಿ ಪ್ರಯಾಣಿಕರ ಓಡಾಟಕ್ಕೆ ಅನುಕೂಲ.
– ಇದರಿಂದ ₹ 2.09 ಕೋಟಿ ಹೆಚ್ಚುವರಿ ಆದಾಯ.
ಜೂನ್ ಮತ್ತು ಅಕ್ಟೋಬರ್ 2025ರ ಅವಧಿಯಲ್ಲಿ (ಪೀಕ್ ಟ್ರಾವೆಲ್ ಮತ್ತು ಹಬ್ಬದ ಋತು) ಅತ್ಯಧಿಕ ಹೆಚ್ಚುವರಿ ಆದಾಯ ಗಳಿಕೆಯಾಗಿದೆ ಎಂದು ರೈಲ್ವೆ ಇಲಾಖೆ ತಿಳಿಸಿದೆ.
ಸಕಾಲದಲ್ಲಿ ವಿಶೇಷ ರೈಲುಗಳ ಕಾರ್ಯಾಚರಣೆ ಮತ್ತು ಬೇಡಿಕೆಗೆ ಅನುಗುಣವಾಗಿ ನಿಯಮಿತ ಸೇವೆಗಳಿಗೆ ಬೋಗಿಗಳನ್ನು ಹೆಚ್ಚಿಸುವ ಮೂಲಕ, ನೈಋತ್ಯ ರೈಲ್ವೆಯು ಹಬ್ಬದ ಮತ್ತು ಹೆಚ್ಚು ಬೇಡಿಕೆಯಿರುವ ಋತುಗಳಲ್ಲಿ ಪ್ರಯಾಣಿಕರಿಗೆ ಅನುಕೂಲಕರ, ಸೌಕರ್ಯಭರಿತ ಮತ್ತು ಸುಗಮ ಪ್ರಯಾಣವನ್ನು ಖಚಿತಪಡಿಸಲು ತನ್ನ ಬದ್ಧತೆಯನ್ನು ಮುಂದುವರೆಸಿದೆ.
Join our WhatsApp Channel
