ಬಿಡಿಎ 'ಬಿಬಿಸಿ' ಪರಿಹಾರ ಸೂತ್ರಕ್ಕೆ ಭೂಮಾಲೀಕರ ತೀವ್ರ ವಿರೋಧ: ರಾಜ್ಯಪಾಲರಿಗೆ ಪಿಆರ್‌ಆರ್ ಸಂಘದಿಂದ ಪತ್ರ

ಬೆಂಗಳೂರು, ಅ.27 www.bengaluruwire.com : ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (BDA) ಕೈಗೆತ್ತಿಕೊಂಡಿರುವ ಮಹತ್ವಾಕಾಂಕ್ಷೆಯ ಪೆರಿಫೆರಲ್ ರಿಂಗ್ ರಸ್ತೆ (PRR) ಯೋಜನೆಯನ್ನು ಬೆಂಗಳೂರು ಬ್ಯುಸಿನೆಸ್ ಕಾರಿಡಾರ್ (BBC) ಎಂದು ಮರುನಾಮಕರಣ ಮಾಡಿದರೂ, ಭೂಸ್ವಾಧೀನ ಪ್ರಕ್ರಿಯೆಗಳ ವಿರುದ್ಧದ ವಿವಾದಗಳು ಮುಂದುವರಿದಿವೆ.

ಬಿಬಿಸಿ ಯೋಜನೆಯ ವ್ಯಾಪ್ತಿಯ ಭೂಮಾಲೀಕರು ಮತ್ತು ರೈತರು ಬಿಡಿಎ ನೀಡಿರುವ ಪರಿಹಾರದ ಐದು ಆಯ್ಕೆಗಳನ್ನು ಸಾರಾಸಗಟಾಗಿ ತಳ್ಳಿಹಾಕಿದ್ದಾರೆ. ಈ ಸಂಬಂಧ, ಪಿ.ಆರ್.ಆರ್. ರೈತ ಹಾಗೂ ನಿವೇಶನದಾರರ ಸಂಘವು ಇಂದು (ಅ.27) ರಾಜ್ಯಪಾಲರಿಗೆ ಪತ್ರ ಬರೆದು, ಪರಿಹಾರ ಸೂತ್ರವನ್ನು ರದ್ದುಗೊಳಿಸಿ, ನ್ಯಾಯಯುತ ಪರಿಹಾರಕ್ಕಾಗಿ 2013ರ ಭೂಸ್ವಾಧೀನ ಕಾಯ್ದೆಯನ್ನು (RFCTLARR Act 2013) ಬಿಡಿಎಗೆ ಅಳವಡಿಸುವಂತೆ ನಿರ್ದೇಶನ ನೀಡಬೇಕೆಂದು ಆಗ್ರಹಿಸಿದೆ.

ಬಿಡಿಎಯ ಐದು ಪರಿಹಾರ ಆಯ್ಕೆಗಳ ನಿರಾಕರಣೆ ಏಕೆ? :

ಬಿಡಿಎ ಆಯುಕ್ತರಿಗೆ ಸರ್ಕಾರವು ಅಕ್ಟೋಬರ್ 17, 2025ರ ಆದೇಶದ (ಸಂಖ್ಯೆ: 168 MNX 2024 (E)) ಅನ್ವಯ, ಭೂಮಾಲೀಕರಿಗೆ ನಗದು ಪರಿಹಾರ, ಟಿಡಿಆರ್ (TDR), ಎಫ್‌ಎಆರ್ (FAR), ಅಭಿವೃದ್ಧಿಪಡಿಸಿದ ವಸತಿ ನಿವೇಶನದಲ್ಲಿ ಭೂಮಿ, ಮತ್ತು ವಾಣಿಜ್ಯ ಭೂಮಿ ಸೇರಿದಂತೆ ಐದು ಪರಿಹಾರ ಆಯ್ಕೆಗಳನ್ನು ಅಂತಿಮಗೊಳಿಸಲು ನಿರ್ದೇಶನ ನೀಡಿದೆ. ಆದರೆ, ಸಂಘವು ಈ ಆಯ್ಕೆಗಳನ್ನು “ಕಣ್ಣೊರೆಸುವ ತಂತ್ರ ಮತ್ತು ರೈತರು ಹಾಗೂ ಭೂಮಾಲೀಕರೊಂದಿಗೆ ನಡೆಸಿದ ವಂಚನೆ” ಎಂದು ಬಣ್ಣಿಸಿ ತಿರಸ್ಕರಿಸಿದೆ.

ಪ್ರಮುಖ ಆಕ್ಷೇಪಣೆಗಳು ಇಲ್ಲಿವೆ:

ನಗದು ಪರಿಹಾರ (Cash Compensation):

ಪ್ರಸ್ತುತ ನಗದು ಪರಿಹಾರವನ್ನು 2016ರಿಂದ ಪರಿಷ್ಕರಿಸದ ಮಾರ್ಗಸೂಚಿ ಮೌಲ್ಯಗಳ ಆಧಾರದ ಮೇಲೆ 2025ರಲ್ಲೂ ನಿಗದಿಪಡಿಸಲಾಗುತ್ತಿದೆ. ಬಿಡಿಎ ಆಯುಕ್ತರು 2016ರ ಮಾರ್ಚ್ 18ರಂದು (ಪತ್ರ ಸಂಖ್ಯೆ: BDA/Commissioner/684/2015-16) ಮುಖ್ಯ ಕಾರ್ಯದರ್ಶಿಗೆ ಪತ್ರ ಬರೆದು ಪಿಆರ್‌ಆರ್ ವ್ಯಾಪ್ತಿಯ ಭೂಮಿಯ ಮೌಲ್ಯ ಹೆಚ್ಚಿಸದಂತೆ ನಿರ್ದೇಶಿಸಿದ್ದರು. ಈ ಮೂಲಕ ಭೂಮಿಯ ಮೌಲ್ಯವನ್ನು ದಮನ ಮಾಡಲಾಗಿದೆ ಎಂದು ಸಂಘವು ಆರೋಪಿಸಿದೆ.

ಟಿಡಿಆರ್ (Transfer of Development Rights): ಟಿಡಿಆರ್‌ಗೆ ಬಲವಾದ ಕಾನೂನು ಆಧಾರವಿಲ್ಲ. ಪಾರದರ್ಶಕತೆ ಮತ್ತು ಸರಿಯಾದ ಮೌಲ್ಯಮಾಪನ ವ್ಯವಸ್ಥೆಗಳ ಕೊರತೆಯಿಂದಾಗಿ ಇದು ಕೇವಲ ಕಾಗದದ ತುಂಡಾಗುವ ಅಪಾಯ, ಊಹಾಪೋಹ, ಭ್ರಷ್ಟಾಚಾರ ಮತ್ತು ವಂಚನೆಗೆ ಕಾರಣವಾಗಬಹುದು ಎಂದು ಸಂಘ ಆತಂಕ ವ್ಯಕ್ತಪಡಿಸಿದೆ.

ಎಫ್‌ಎಆರ್ (Floor Area Ratio): ಕರ್ನಾಟಕ ಸರ್ಕಾರವು ಫೆಬ್ರವರಿ 2025ರಲ್ಲಿ ಹೊಸ ಎಫ್‌ಎಆರ್ ನೀತಿಯನ್ನು ಜಾರಿಗೊಳಿಸಿದೆ. ಇದರಲ್ಲಿ ಬಿಲ್ಡರ್‌ಗಳು ಪ್ರೀಮಿಯಂ ಪಾವತಿಸಿ ಹೆಚ್ಚಿನ ಸಾಂದ್ರತೆಯ ಕಟ್ಟಡಗಳನ್ನು ನಿರ್ಮಿಸಲು ಅವಕಾಶ ನೀಡಲಾಗಿದೆ. ಇದರಿಂದಾಗಿ ಎಫ್‌ಎಆರ್‌ ಮೌಲ್ಯವನ್ನು ಈಗ ಕಳೆದುಕೊಂಡಿದೆ.

ಅಭಿವೃದ್ಧಿಪಡಿಸಿದ ಭೂಮಿ (Developed Land):

77 ಕಿ.ಮೀ.ಗಳ ಈ ರಸ್ತೆ ಯೋಜನೆಯಲ್ಲಿ ಪ್ರತಿ ಗ್ರಾಮದಿಂದ ಗ್ರಾಮಕ್ಕೆ ಭೂಮಿಯ ಮೌಲ್ಯವು ತೀವ್ರವಾಗಿ ಬದಲಾಗುತ್ತದೆ. 40% ಅಭಿವೃದ್ಧಿಪಡಿಸಿದ ವಸತಿ ನಿವೇಶನದ ಆಯ್ಕೆಯನ್ನು ಸಹ ಕಡಿಮೆ ಮಾಡಿದ ಮಾರ್ಗಸೂಚಿ ಮೌಲ್ಯಗಳ ಮೇಲೆ ಆಧರಿಸಲಾಗಿದೆ.

ವಾಣಿಜ್ಯ ಭೂಮಿ (Commercial Land):

ಬಿಡಿಎ 100 ಮೀಟರ್ ಬದಲಿಗೆ 65 ಮೀಟರ್ ಭೂಮಿಯನ್ನು ಮಾತ್ರ ಸ್ವಾಧೀನಪಡಿಸಿಕೊಂಡು, ರೈತರಿಗೆ ಬಳಕೆಯಾಗದ 35 ಮೀಟರ್ ಭೂಮಿಯನ್ನು ಹಿಂದಿರುಗಿಸಬೇಕು ಮತ್ತು ಉಳಿದ 65 ಮೀಟರ್‌ಗೆ 2013ರ ಎಲ್‌ಎಆರ್‌ಆರ್ ಕಾಯ್ದೆಯಂತೆ ಪಾವತಿಸಬೇಕು. ಪರಿಹಾರವಾಗಿ ಅದೇ ಭೂಮಿಯನ್ನು ಹಿಂತಿರುಗಿಸುವುದು ಕಾನೂನಿನಲ್ಲಿ ದೋಷಪೂರಿತವಾಗಿದೆ ಎಂದು ಸಂಘ ಹೇಳಿದೆ.

ಬಿಡಿಎ ಕಾಯಿದೆಯ ಸೆಕ್ಷನ್ 27 ಉಲ್ಲಂಘನೆ ಮತ್ತು 2013ರ ಕಾಯ್ದೆ ಕಡೆಗಣನೆ :

ಬಿಡಿಎ ಕಾಯಿದೆಯ ಸೆಕ್ಷನ್ 27ರ ಪ್ರಕಾರ, ಅಧಿಸೂಚನೆ ಹೊರಡಿಸಿದ ಐದು ವರ್ಷಗಳೊಳಗೆ ಯಾವುದೇ ಪ್ರಶಸ್ತಿಯನ್ನು (Award) ನೀಡದಿದ್ದರೆ, ಸಂಪೂರ್ಣ ಸ್ವಾಧೀನ ಪ್ರಕ್ರಿಯೆಗಳು ರದ್ದಾಗುತ್ತವೆ. ಪಿಆರ್‌ಆರ್ ಯೋಜನೆಯು 2007ರ ಅಂತಿಮ ಅಧಿಸೂಚನೆಯೊಂದಿಗೆ (ದಿನಾಂಕ: 29ನೇ ಜೂನ್ 2007) 20 ವರ್ಷಗಳ ನಂತರವೂ ಯಾವುದೇ ಪ್ರಶಸ್ತಿ ನೀಡದೆ ಅಥವಾ ಭೂಮಿಯನ್ನು ವಶಪಡಿಸಿಕೊಳ್ಳದೆ ಇರುವುದರಿಂದ ಈ ಯೋಜನೆ ರದ್ದಾಗಿದೆ ಎಂದು ಸಂಘ ವಾದಿಸಿದೆ.

ಅಲ್ಲದೆ, ಬಿಡಿಎಯು ಇತರೆ ರಾಜ್ಯ ಸಂಸ್ಥೆಗಳಾದ ಬಿಎಂಆರ್‌ಸಿಎಲ್, ಕೆಆರ್‌ಡಿಸಿಎಲ್, ಎನ್‌ಹೆಚ್‌ಎಐ ಮುಂತಾದವುಗಳಂತೆ ನ್ಯಾಯಯುತ ಪರಿಹಾರವನ್ನು ಖಚಿತಪಡಿಸುವ 2013ರ ಭೂಸ್ವಾಧೀನ ಕಾಯ್ದೆಗೆ ತಿದ್ದುಪಡಿ ಮಾಡದೆ ಇನ್ನೂ ಹಳೆಯ ಮತ್ತು ಅಮಾನ್ಯವಾದ 1894ರ ಕಾಯ್ದೆಗೆ ಅಂಟಿಕೊಂಡಿದೆ. ಈ ಮೂಲಕ ಭೂಮಾಲೀಕರ ಮೇಲೆ ವಂಚನೆ ಮಾಡಲಾಗುತ್ತಿದೆ ಎಂದು ಆರೋಪಿಸಲಾಗಿದೆ.

ಸಂಘದ ಪ್ರಮುಖ ಬೇಡಿಕೆಗಳು :

ಪಿಆರ್‌ಆರ್ ರೈತ ಹಾಗೂ ನಿವೇಶನದಾರರ ಸಂಘವು ರಾಜ್ಯಪಾಲರಲ್ಲಿ ಈ ಕೆಳಗಿನ ಪ್ರಮುಖ ಬೇಡಿಕೆಗಳನ್ನು ಸಲ್ಲಿಸಿದೆ:

* ಬಿಡಿಎ ಕಾಯಿದೆ ಸೆಕ್ಷನ್ 27ರ ಅನ್ವಯ ಐದು ವರ್ಷಗಳ ಗಡುವು ಮೀರಿದ್ದರಿಂದ ಪಿಆರ್‌ಆರ್ ಭಾಗ-1 (ಈಗಿನ ಬಿಬಿಸಿ) ಯೋಜನೆಯನ್ನು ರದ್ದುಗೊಳಿಸುವುದು.

* ಬಿಡಿಎಗೆ 2013ರ RFCTLARR ಕಾಯಿದೆಯನ್ನು ಅಳವಡಿಸಿಕೊಳ್ಳಲು ನಿರ್ದೇಶನ ನೀಡುವುದು.

* ಸಾಂವಿಧಾನಿಕ ವಿಧಿಗಳ ಉಲ್ಲಂಘನೆಯನ್ನು (ವಿಧಿ 300A ಸೇರಿದಂತೆ) ಸರಿಪಡಿಸುವುದು.

ಈ ಸುಧಾರಣೆಗಳನ್ನು ತರಲು ವಿಫಲವಾದರೆ, ಸುಮಾರು 20,000 ಕುಟುಂಬಗಳು ಬಾಧಿತರಾಗಿರುವುದರಿಂದ, ರಾಜ್ಯ ಸರ್ಕಾರ ಮತ್ತು ಬಿಡಿಎಯು ಯೋಜನೆಯಿಂದ ಬಿಡುಗಡೆ ಪ್ರಮಾಣಪತ್ರ (NOC) ನೀಡಲು ನಿರ್ದೇಶಿಸಬೇಕೆಂದು ಸಂಘವು ಮನವಿ ಮಾಡಿದೆ.

ಬಿಡಿಎ ಮುಂದಿನ ನಡೆಯೇನು?:

ಬಿಬಿಸಿ ಯೋಜನೆಯಲ್ಲಿ ಎರಡು ಬದಿ ಸರ್ವೀಸ್ ರಸ್ತೆ 9 ಮೀಟರ್, ತಲಾ ನಾಲ್ಕು ಲೇನ್ ಎರಡು ಬದಿ, ಮಧ್ಯದಲ್ಲಿ 5 ಮೀಟರ್ ಮೆಟ್ರೋ ಲೈನ್ ಸೇರಿ ಒಟ್ಟಾರೆ 65 ಮೀಟರ್ ಅಗಲದ ರಸ್ತೆ, 35 ಮೀಟರ್ ವಾಣಿಜ್ಯ ಬಳಕೆಗೆ ಮೀಸಲಿಡಲು ಬಿಡಿಎ ನಿರ್ಧರಿಸಿತ್ತು. ಈಗಾಗಲೇ ತಡವಾಗಿರುವ ಈ ಯೋಜನೆ ರೈತರು, ಭೂಮಾಲೀಕರ ಅಸಹಕಾರದಿಂದ ಮತ್ತಷ್ಟು ತಡವಾಗುವುದನ್ನು ತಡೆಯಲು ಬಿಡಿಎ ಅಧಿಕಾರಿಗಳು ಮುಂದೆ, ಹೈಕೋರ್ಟ್ ನಲ್ಲಿ ಭೂಪರಿಹಾರದ ಹಣವನ್ನಿಟ್ಟು, ಭೂಮಾಲೀಕರಿಗೆ ಭೂಪರಿಹಾರದ ನೋಟಿಸ್ ನೀಡಿ ಭೂಸ್ವಾಧೀನಕ್ಕೆ ಮುಂದಾಗಲಿದೆ ಎಂದು ಬಿಡಿಎ ಹಿರಿಯ ಅಧಿಕಾರಿಗಳು ಬೆಂಗಳೂರು ವೈರ್ ಗೆ ತಿಳಿಸಿದ್ದಾರೆ.