ಬಿಸಿಸಿಐನಿಂದ ಭಾರತ-ಪಾಕ್ ಪಂದ್ಯಕ್ಕೆ ‘ಅಗೋಚರ ಬಹಿಷ್ಕಾರ’; ದುಬೈ ಕದನದಿಂದ ಹಿರಿಯ ಅಧಿಕಾರಿಗಳು ದೂರ

ದುಬೈ, ಸೆ.14 www.bengaluruwire.com : ಕ್ರಿಕೆಟ್ ಲೋಕದ ಬಹುನಿರೀಕ್ಷಿತ ಪಂದ್ಯವಾದ ಭಾರತ-ಪಾಕಿಸ್ತಾನ ಏಷ್ಯಾ ಕಪ್ 2025 ಇಂದು ಸಂಜೆ ನಡೆಯಲಿದ್ದು, ಆ ಕದನಕ್ಕೆ ಕ್ಷಣಗಣನೆ ಆರಂಭವಾಗಿದೆ.

ಆದರೆ, ಭಾನುವಾರ ದುಬೈ ಇಂಟರ್ನ್ಯಾಷನಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆಯಲಿರುವ ಈ ಪಂದ್ಯಕ್ಕೆ ವಿವಾದದ ಕರಿನೆರಳು ಆವರಿಸಿದೆ. ಈ ವರ್ಷ ಏಷ್ಯಾ ಕಪ್‌ಗೆ ಭಾರತ ಆತಿಥ್ಯ ವಹಿಸಿದ್ದರೂ, ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಹಿರಿಯ ಅಧಿಕಾರಿಗಳು ಪಂದ್ಯದಿಂದ ದೂರ ಉಳಿದಿದ್ದು, ಇದು ‘ಅಗೋಚರ ಬಹಿಷ್ಕಾರ’ದಂತಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಹಿರಿಯ ಅಧಿಕಾರಿಗಳು ಗೈರು ಹಾಜರಿ :

ದೇಶದಲ್ಲಿ ಹೆಚ್ಚುತ್ತಿರುವ ರಾಜಕೀಯ ಉದ್ವಿಗ್ನತೆ ಮತ್ತು ಅಭಿಮಾನಿಗಳ ಆಕ್ರೋಶದ ಕಾರಣ, ಬಿಸಿಸಿಐ ಈ ನಿರ್ಧಾರಕ್ಕೆ ಬಂದಿದೆ ಎನ್ನಲಾಗಿದೆ. ದೈನಿಕ್ ಜಾಗರಣ್ ವರದಿಯ ಪ್ರಕಾರ, ಬಿಸಿಸಿಐಯ ಹಿರಿಯ ಪದಾಧಿಕಾರಿಗಳಾದ ಕಾರ್ಯದರ್ಶಿ ದೇವಜಿತ್ ಸೈಕಿಯಾ ಮತ್ತು ಐಸಿಸಿ ಅಧ್ಯಕ್ಷ ಜಯ್ ಶಾ ಇದುವರೆಗೆ ದುಬೈಗೆ ಪ್ರಯಾಣಿಸಿಲ್ಲ. ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ (ACC) ಪ್ರತಿನಿಧಿಯಾಗಿ ವೆಟರನ್ ಆಡಳಿತಗಾರ ರಾಜೀವ್ ಶುಕ್ಲಾ ಪಂದ್ಯಕ್ಕೆ ಹಾಜರಾಗುವ ಸಾಧ್ಯತೆ ಇದೆ, ಆದರೆ ಬಿಸಿಸಿಐನ ಪ್ರಮುಖರು ದೂರ ಉಳಿದಿರುವುದು ಈ ಪಂದ್ಯದ ರಾಜಕೀಯ ಸೂಕ್ಷ್ಮತೆಯನ್ನು ಎತ್ತಿ ತೋರಿಸುತ್ತದೆ.

ಅಭಿಮಾನಿಗಳ ಆಕ್ರೋಶಕ್ಕೆ ಮಣೆ :

ಇತ್ತೀಚಿನ ವಾರಗಳಲ್ಲಿ ಭಾರತದ ಹಲವು ಅಭಿಮಾನಿ ಗುಂಪುಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಪಂದ್ಯವನ್ನು ಬಹಿಷ್ಕರಿಸುವಂತೆ ವ್ಯಾಪಕ ಅಭಿಯಾನ ನಡೆಸಿದ್ದವು. ಈ ಪಂದ್ಯಕ್ಕೆ ಸಾಂಕೇತಿಕ (symbolic) ಬೆಂಬಲ ನೀಡಬಾರದೆಂದು ಅವರು ಬಿಸಿಸಿಐಯನ್ನು ಒತ್ತಾಯಿಸಿದ್ದರು. ಸಾರ್ವಜನಿಕ ಭಾವನೆಗಳಿಗೆ ಗೌರವ ನೀಡಿ, ಬಿಸಿಸಿಐ ಈ ವಿವಾದಾತ್ಮಕ ಪಂದ್ಯದಿಂದ ದೂರ ಉಳಿಯಲು ನಿರ್ಧರಿಸಿದೆ ಎಂದು ಹೇಳಲಾಗಿದೆ.

ಕಳೆದ ಚಾಂಪಿಯನ್ಸ್ ಟ್ರೋಫಿ ಪಂದ್ಯದಲ್ಲಿ ಇದೇ ಸ್ಥಳದಲ್ಲಿ ನಡೆದ ಭಾರತ-ಪಾಕಿಸ್ತಾನ ಪಂದ್ಯಕ್ಕೆ ದೊಡ್ಡ ಸಂಖ್ಯೆಯಲ್ಲಿ ಬಿಸಿಸಿಐ ಹಿರಿಯ ಅಧಿಕಾರಿಗಳು, ಗಣ್ಯರು ಮತ್ತು ರಾಜ್ಯ ಕ್ರಿಕೆಟ್ ಸಂಸ್ಥೆಗಳ ಮುಖ್ಯಸ್ಥರು ಹಾಜರಾಗಿದ್ದರು. ಅವರ ಈ ಬಾರಿಯ ಗೈರು ಹಾಜರಿ, ಪ್ರಸ್ತುತ ರಾಜಕೀಯ ವಾತಾವರಣದ ಗಂಭೀರತೆಯನ್ನು ಸ್ಪಷ್ಟವಾಗಿ ಬಿಂಬಿಸುತ್ತದೆ.

ಪಂದ್ಯದ ಮೆರುಗು ಮರೆಯಾದಂತೆ :

ಭಾರತ-ಪಾಕಿಸ್ತಾನ ಪಂದ್ಯವು ಕೇವಲ ಕ್ರಿಕೆಟ್ ಅಲ್ಲ, ಇದು ಉಭಯ ದೇಶಗಳ ರಾಜತಾಂತ್ರಿಕ ಸಂಬಂಧಗಳ ಪ್ರತಿಬಿಂಬವಾಗಿದೆ. ಆದರೆ, ಈ ಬಾರಿಯ ‘ಕ್ರಿಕೆಟ್ ಲೋಕದ ಅತಿದೊಡ್ಡ ಪ್ರದರ್ಶನ’ ಎಂದೇ ಬಿಂಬಿತವಾಗಿರುವ ಈ ಪಂದ್ಯದ ಮೆರುಗು ಮಾಯವಾದಂತೆ ಕಾಣುತ್ತಿದೆ. ಟಿಕೆಟ್ ಮಾರಾಟ ನಿಧಾನಗೊಂಡಿದ್ದು, ಆನ್‌ಲೈನ್ ಸಂಭಾಷಣೆಗಳು ಕುತೂಹಲಕ್ಕಿಂತ ಹೆಚ್ಚಾಗಿ ಕೋಪ ಮತ್ತು ನಿರಾಶೆಯನ್ನು ವ್ಯಕ್ತಪಡಿಸುತ್ತಿವೆ. ಹಲವರು ಪಂದ್ಯದ ಪ್ರಸಾರವನ್ನೂ ಸಂಪೂರ್ಣವಾಗಿ ಬಹಿಷ್ಕರಿಸಲು ಕರೆ ನೀಡಿದ್ದಾರೆ.

ಮೈದಾನದಲ್ಲಿ ಭಾರತವೇ ಮೇಲುಗೈ

ಈ ಎಲ್ಲಾ ವಿವಾದಗಳ ನಡುವೆಯೂ, ಮೈದಾನದಲ್ಲಿ ಭಾರತೀಯ ತಂಡವೇ ಗೆಲುವಿನ ಸ್ಪಷ್ಟ ನೆಚ್ಚಿನ ತಂಡವಾಗಿ ಕಣಕ್ಕಿಳಿಯಲಿದೆ. ಬಹುಮುಖ ಪ್ರತಿಭೆಗಳಿರುವ ಭಾರತೀಯ ತಂಡ ಪಾಕಿಸ್ತಾನದ ವಿರುದ್ಧ ಮೇಲುಗೈ ಸಾಧಿಸುವ ಎಲ್ಲಾ ಸಾಧ್ಯತೆಗಳನ್ನು ಹೊಂದಿದೆ. ಪಾಕಿಸ್ತಾನದ ಬೌಲರ್‌ಗಳು ತಮ್ಮ ಬದ್ಧ ವೈರಿಗಳ ಆಟವನ್ನು ತಡೆಯಲು ಹೆಚ್ಚಿ ಶ್ರಮಪಡಬೇಕಿದೆ.

ಟಾಸ್: ಭಾರತ-ಪಾಕಿಸ್ತಾನ ಪಂದ್ಯದ ಟಾಸ್ ಭಾರತೀಯ ಕಾಲಮಾನ ಇಂದು ಸಂಜೆ 7:30 ಕ್ಕೆ ನಡೆಯಲಿದೆ. ಪಂದ್ಯ ರಾತ್ರಿ 8:00 ಗಂಟೆಗೆ ಆರಂಭವಾಗಲಿದೆ.

ಹವಾಮಾನ ಮತ್ತು ಪಿಚ್ ವರದಿ: ಪಂದ್ಯದ ಸಮಯದಲ್ಲಿ ಹವಾಮಾನವು ಸ್ಪಷ್ಟವಾಗಿರುತ್ತದೆ. ತೇವಾಂಶದಿಂದ ಕೂಡಿರಬಹುದು. ಪಿಚ್ ಒಣಗುವ ನಿರೀಕ್ಷೆಯಿದೆ ಮತ್ತು ಟಾಸ್ ಗೆದ್ದ ನಾಯಕ ಮೊದಲು ಬೌಲಿಂಗ್ ಮಾಡಲು ಆಯ್ಕೆ ಮಾಡಿಕೊಳ್ಳಬಹುದು. ಪಂದ್ಯದಲ್ಲಿ ಸ್ಪಿನ್ನರ್‌ಗಳು ನಿರ್ಣಾಯಕ ಪಾತ್ರ ವಹಿಸಬೇಕಾಗುತ್ತದೆ.