ಬೆಂಗಳೂರು, ಸೆ.06 www.bengaluruwire.com : ಕರ್ನಾಟಕದಲ್ಲಿ ಈ ವರ್ಷ ಮಂಕಿಪಾಕ್ಸ್ನ ಎರಡನೇ ಪ್ರಕರಣ ದೃಢಪಟ್ಟಿದೆ. 43 ವರ್ಷದ ವ್ಯಕ್ತಿಯಲ್ಲಿ ಮಂಕಿಪಾಕ್ಸ್ ಕ್ಲಾಡ್-I ವೈರಸ್ ಸೋಂಕು ಪತ್ತೆಯಾಗಿದೆ ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ ಮತ್ತು ರಾಷ್ಟ್ರೀಯ ವೈರಾಲಜಿ ಸಂಸ್ಥೆ (ICMR & NIV) ಅಧಿಕೃತ ವರದಿಯಲ್ಲಿ ದೃಢಪಡಿಸಿದೆ. ಈ ವ್ಯಕ್ತಿಯು ಉಡುಪಿ ಜಿಲ್ಲೆಯವರಾಗಿದ್ದು, ದುಬೈನಿಂದ ಆಗಸ್ಟ್ನಲ್ಲಿ ಹಿಂದಿರುಗಿದ್ದರು.
ಸೋಂಕಿತ ವ್ಯಕ್ತಿಯು ಆಗಸ್ಟ್ 26 ರಂದು ಮಂಗಳೂರಿನ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದರು. ಅವರು ಜ್ವರ, ಮೈಮೇಲೆ ಗುಳ್ಳೆ ಮತ್ತು ಗಂಟಲು ನೋವಿನಂತಹ ಲಕ್ಷಣಗಳನ್ನು ಹೊಂದಿದ್ದರು. ರೋಗಿಯ ಗಂಟಲು ಮತ್ತು ಮೂಗಿನ ಸ್ವಾಬ್ ಮತ್ತು ಇತರ ಮಾದರಿಗಳನ್ನು ರಾಜ್ಯ ಮಟ್ಟದ ಬೆಂಗಳೂರಿನ ಬಿಎಂಸಿಆರ್ಐನ ವಿಆರ್ಡಿಎಲ್ ಗೆ ಕಳುಹಿಸಲಾಗಿತ್ತು.
ಅಲ್ಲಿಂದ, ಮಾದರಿಗಳನ್ನು ಪುಣೆಯಲ್ಲಿರುವ ಐಸಿಎಂಆರ್-ರಾಷ್ಟ್ರೀಯ ವೈರಾಲಜಿ ಸಂಸ್ಥೆಗೆ ಪರೀಕ್ಷೆಗೆ ರವಾನಿಸಲಾಗಿತ್ತು. ಸೆಪ್ಟೆಂಬರ್ 1 ರಂದು ಬಿಡುಗಡೆಯಾದ ಪರೀಕ್ಷಾ ವರದಿಯ ಪ್ರಕಾರ, ರೋಗಿಯ ನಾಶೋಫಾರಿಂಜಿಯಲ್/ಗಂಟಲು ಸ್ವಾಬ್ (NS/TS) ಮತ್ತು ಗಾಯದ ಸ್ವಾಬ್ ಮಾದರಿಗಳು ಮಂಕಿಪಾಕ್ಸ್ ವೈರಸ್ ಕ್ಲಾಡ್-I ಗೆ ಪಾಸಿಟಿವ್ ಆಗಿವೆ ಎಂದು ದೃಢಪಟ್ಟಿದೆ.
ಜನವರಿಯಲ್ಲಿ ಪತ್ತೆಯಾಗಿತ್ತು ಮೊದಲ ಪ್ರಕರಣ:
ಈ ವರ್ಷದ ಜನವರಿ 22 ರಂದು ಉಡುಪಿ ಮೂಲದ 40 ವರ್ಷದ ವ್ಯಕ್ತಿಯಲ್ಲಿ ಮಂಕಿಪಾಕ್ಸ್ ಸೋಂಕು ದೃಢಪಟ್ಟಿತ್ತು. ಆ ವ್ಯಕ್ತಿ ಕೂಡ ದುಬೈನಿಂದ ಬಂದವರಾಗಿದ್ದರು.
ಉಡುಪಿ ಜಿಲ್ಲೆಯ ಕಾರ್ಕಳದ ಮೂಲದ ಈ ವ್ಯಕ್ತಿ ಕಳೆದ 19 ವರ್ಷಗಳಿಂದ ದುಬೈನಲ್ಲಿ ವಾಸಿಸುತ್ತಿದ್ದ ನಂತರ ಜನವರಿ 17 ರಂದು ಮಂಗಳೂರಿಗೆ ಮರಳಿದ್ದರು. ಅವರು ಆಗಮಿಸಿದಾಗ, ಅವರ ಮೈಮೇಲೆ ದದ್ದುಗಳ ಲಕ್ಷಣಗಳು ಕಂಡುಬಂದಿದ್ದವು. ಎರಡು ದಿನಗಳ ಕಾಲ ಜ್ವರದ ಇತಿಹಾಸವಿತ್ತು. ಅವರನ್ನು ತಕ್ಷಣ ಖಾಸಗಿ ಆಸ್ಪತ್ರೆಯಲ್ಲಿ ಪ್ರತ್ಯೇಕವಾಗಿ ಇರಿಸಿ ಚಿಕಿತ್ಸೆ ನೀಡಲಾಗಿತ್ತು ಮತ್ತು ಅವರ ಎಂಪಾಕ್ಸ್ ಮಾದರಿಗಳನ್ನು ಬೆಂಗಳೂರು ವೈದ್ಯಕೀಯ ಕಾಲೇಜಿಗೆ (ಬಿಎಂಸಿ) ಮತ್ತು ನಂತರ ಪುಣೆಯ ಎನ್ಐವಿಗೆ ಕಳುಹಿಸಲಾಗಿತ್ತು.
ವಿಶ್ವ ಆರೋಗ್ಯ ಸಂಸ್ತೆ ಹೇಳುವುದೇನು?:
ವಿಶ್ವ ಆರೋಗ್ಯ ಸಂಸ್ಥೆ (WHO) ಪ್ರಕಾರ, ಮಂಕಿಪಾಕ್ಸ್ ಸೌಮ್ಯವಾದ ಮತ್ತು ಸ್ವಯಂ-ನಿರ್ಬಂಧಿತ ರೋಗವಾಗಿದೆ. ಕೆಲವು ರೋಗನಿರೋಧಕ ಶಕ್ತಿ ದುರ್ಬಲಗೊಂಡ ರೋಗಿಗಳು ಅಥವಾ ಸಹ-ಅಸ್ವಸ್ಥತೆ ಇರುವವರಿಗೆ ಹೆಚ್ಚು ಜಾಗರೂಕತೆಯಿಂದ ಚಿಕಿತ್ಸೆ ನೀಡಬೇಕಾಗುತ್ತದೆ.
ಸಾಮಾನ್ಯವಾಗಿ, ಚಿಕಿತ್ಸೆಯು ಜ್ವರ, ದೇಹದ ನೋವು ಮತ್ತು ದ್ವಿತೀಯಕ ಸೋಂಕುಗಳನ್ನು ನಿಯಂತ್ರಿಸುವಂತಹ ಲಕ್ಷಣಾತ್ಮಕ ನಿರ್ವಹಣೆಯನ್ನು ಒಳಗೊಂಡಿರುತ್ತದೆ. ಹೆಚ್ಚಾಗಿ, ಈ ಸೋಂಕು ಅತಿ ನಿಕಟ ಸಂಪರ್ಕದ ಮೂಲಕ ಮಾತ್ರ ಹರಡುತ್ತದೆ ಮತ್ತು ಕೋವಿಡ್-19 ನಷ್ಟು ತೀವ್ರವಾಗಿ ಸಾಂಕ್ರಾಮಿಕವಲ್ಲ ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.
Join our WhatsApp Channel
