ಬೆಂಗಳೂರು, ಆ.31 www.bengaluruwire.com : ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (BBMP) ರದ್ದಾದ ನಂತರ, ನೂತನವಾಗಿ ರಚನೆಯಾದ ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ಮತ್ತು ಐದು ನಗರ ಪಾಲಿಕೆಗಳಿಗೆ ಅಧಿಕೃತವಾಗಿ ಭಾರತೀಯ ಆಡಳಿತ ಸೇವೆ (IAS) ಮತ್ತು ಭಾರತೀಯ ಪೊಲೀಸ್ ಸೇವೆ (IPS) ಹುದ್ದೆಗಳನ್ನು ಮರುಹಂಚಿಕೆ ಮಾಡಿ, ರಾಜ್ಯ ಸರ್ಕಾರ ಆದೇಶ ಹೊರಡಿಸಿದೆ.
ಈ ಆದೇಶದ ಅನ್ವಯ, ಒಟ್ಟು 15 ಐಎಎಸ್ ಮತ್ತು 2 ಐಪಿಎಸ್ ಹುದ್ದೆಗಳನ್ನು ಜಿಬಿಎ ಮತ್ತು ಹೊಸದಾಗಿ ಸ್ಥಾಪಿಸಲಾದ ಐದು ನಗರ ಪಾಲಿಕೆಗಳಿಗೆ (ಬೆಂಗಳೂರು ಕೇಂದ್ರ, ಪೂರ್ವ, ಪಶ್ಚಿಮ, ಉತ್ತರ, ಮತ್ತು ದಕ್ಷಿಣ) ಹಂಚಿಕೆ ಮಾಡಲಾಗಿದೆ. ಈ ಹಿಂದೆ ಬಿಬಿಎಂಪಿ ಆಡಳಿತದಲ್ಲಿ 16 ಐಎಎಸ್ ಹಾಗೂ 2 ಐಪಿಎಸ್ ಹುದ್ದೆಗಳನ್ನು ಮಂಜೂರಾಗಿತ್ತು. ನೂತನ ಹುದ್ದೆಗಳು ಐದು ನಗರ ಪಾಲಿಕೆ ರಚನೆ ಕುರಿತಂತೆ ಅಂತಿಮ ಅಧಿಸೂಚನೆ ಹೊರಡಿಸುವ ದಿನಾಂಕದಿಂದ ಅನ್ವಯವಾಗಲಿದೆ. ಇದೇ ರೀತಿ ಬಿಬಿಎಂಪಿಯಲ್ಲಿ 19 ಕೆಎಎಸ್ ಹುದ್ದೆಗಳ ಪೈಕಿ ಗ್ರೇಟರ್ ಬೆಂಗಳೂರು ಪ್ರಾಧಿಕಾರದಲ್ಲಿ ಆಯ್ಕೆ ಶ್ರೇಣಿ, ಹಿರಿಯ ಶ್ರೇಣಿ ಹಾಗೂ ಕಿರಿಯ ಶ್ರೇಣಿ ಸೇರಿದಂತೆ 17 ಕೆಎಎಸ್ ಹಾಗೂ 1 ಕೆಎಸ್ ಪಿಎಸ್ ಹುದ್ದೆಯನ್ನು ಮರು ಹಂಚಿಕೆ ಮಾಡಲಾಗಿದೆ.
ಜಿಬಿಎನಲ್ಲಿ ಆಯ್ಕೆ ಶ್ರೇಣಿಯ ಉಪ ಆಯುಕ್ತರ ಒಂದು ಹುದ್ದೆ (ಆಡಳಿತ, ಚುನಾವಣೆ ಮತ್ತು ಐಟಿ) ಹಾಗೂ ಕಿರಿಯ ಶ್ರೇಣಿಯ ಸಹಾಯಕ ಆಯುಕ್ತರ (ಆಡಳಿತ, ಚುನಾವಣೆ ಮತ್ತು ಐಟಿ) ಒಂದು ಹುದ್ದೆಯನ್ನು ಮರುವಿನ್ಯಾಸ ಮಾಡಿ ಹಂಚಿಕೆ ಮಾಡಲಾಗಿದೆ. ಉಳಿದಂತೆ 5 ನಗರ ಪಾಲಿಕೆಗಳಿಗೆ ತಲಾ ಒಂದೊಂದರಂತೆ ಅಪರ ಆಯುಕ್ತರ (ಕಂದಾಯ) ಹುದ್ದೆ ಹಾಗೂ ಐದು ಮಹಾನಗರ ಪಾಲಿಕೆಗಳ ಪ್ರತಿ ಎರಡು ವಲಯಗಳಿಗೆ ತಲಾ ಎರಡು ಹಿರಿಯ ಶ್ರೇಣಿಯ ವಲಯ ಜಂಟಿ ಆಯುಕ್ತರ ಹುದ್ದೆಗಳನ್ನು ಮರು ಹಂಚಿಕೆ ಮಾಡಲಾಗಿದೆ.
ಜಿಬಿಎಗೆ ಹಂಚಿಕೆಯಾದ ಐಎಎಸ್ ಹುದ್ದೆಗಳು ಹೀಗಿವೆ :
ಗ್ರೇಟರ್ ಬೆಂಗಳೂರು ಪ್ರಾಧಿಕಾರಕ್ಕೆ ಒಟ್ಟು 5 ಐಎಎಸ್ ಹುದ್ದೆಗಳನ್ನು ಮಂಜೂರು ಮಾಡಲಾಗಿದೆ. ಅವುಗಳ ವಿವರ ಹೀಗಿದೆ:
* ಮುಖ್ಯ ಆಯುಕ್ತರು, ಗ್ರೇಟರ್ ಬೆಂಗಳೂರು ಪ್ರಾಧಿಕಾರ: ಈ ಹುದ್ದೆಯನ್ನು ಪ್ರಧಾನ ಕಾರ್ಯದರ್ಶಿ ಅಥವಾ ಅದಕ್ಕಿಂತ ಉನ್ನತ ಶ್ರೇಣಿಯ ಅಧಿಕಾರಿಯೊಬ್ಬರು ನಿರ್ವಹಿಸಲಿದ್ದಾರೆ.
* ವಿಶೇಷ ಆಯುಕ್ತರು (ಆಡಳಿತ, ಕಂದಾಯ ಮತ್ತು ಮಾಹಿತಿ ತಂತ್ರಜ್ಞಾನ), ಗ್ರೇಟರ್ ಬೆಂಗಳೂರು ಪ್ರಾಧಿಕಾರ: ಈ ಹುದ್ದೆಗೆ ಒಬ್ಬರು ವಿಶೇಷ ಆಯುಕ್ತರನ್ನು ನೇಮಿಸಲಾಗುವುದು.
* ವಿಶೇಷ ಆಯುಕ್ತರು (ಆರೋಗ್ಯ ಮತ್ತು ಶಿಕ್ಷಣ), ಗ್ರೇಟರ್ ಬೆಂಗಳೂರು ಪ್ರಾಧಿಕಾರ: ಆರೋಗ್ಯ ಮತ್ತು ಶಿಕ್ಷಣ ವಿಭಾಗದ ಮೇಲ್ವಿಚಾರಣೆಗೆ ಒಬ್ಬರು ವಿಶೇಷ ಆಯುಕ್ತರು ಇರುತ್ತಾರೆ.
* ವಿಶೇಷ ಆಯುಕ್ತರು (ಎಫ್ಇ.ಸಿಸಿ, ಚುನಾವಣೆ, ವಿಪತ್ತು ನಿರ್ವಹಣೆ, ಸಾರ್ವಜನಿಕ ಸಂಪರ್ಕ ಮತ್ತು ಸಮನ್ವಯ), ಗ್ರೇಟರ್ ಬೆಂಗಳೂರು ಪ್ರಾಧಿಕಾರ: ಈ ಹುದ್ದೆಯೂ ಒಬ್ಬರು ವಿಶೇಷ ಆಯುಕ್ತರಿಗೆ ಮೀಸಲಾಗಿದೆ.
* ವಿಶೇಷ ಆಯುಕ್ತರು (ಹಣಕಾಸು) ಹಾಗೂ ಮುಖ್ಯ ಹಣಕಾಸು ಅಧಿಕಾರಿ, ಗ್ರೇಟರ್ ಬೆಂಗಳೂರು ಪ್ರಾಧಿಕಾರ: ಈ ಹುದ್ದೆಯನ್ನು ವಿಶೇಷ ಆಯುಕ್ತರು ನಿರ್ವಹಿಸಲಿದ್ದು, ಇವರು ಮುಖ್ಯ ಹಣಕಾಸು ಅಧಿಕಾರಿಯಾಗಿಯೂ ಕಾರ್ಯನಿರ್ವಹಿಸಲಿದ್ದಾರೆ.
ಐದು ನಗರ ಪಾಲಿಕೆಗಳಿಗೆ ಐಎಎಸ್ ಹುದ್ದೆಗಳ ಹಂಚಿಕೆ:
ಹೊಸದಾಗಿ ರಚನೆಯಾದ ಬೆಂಗಳೂರಿನ ಐದು ನಗರ ಪಾಲಿಕೆಗಳಾದ ಬೆಂಗಳೂರು ಕೇಂದ್ರ, ಪೂರ್ವ, ಪಶ್ಚಿಮ, ಉತ್ತರ ಮತ್ತು ದಕ್ಷಿಣ ಪಾಲಿಕೆಗಳಿಗೆ ಒಟ್ಟು 10 ಐಎಎಸ್ ಹುದ್ದೆಗಳನ್ನು ಹಂಚಿಕೆ ಮಾಡಲಾಗಿದೆ.
* ಪಾಲಿಕೆಗಳ ಆಯುಕ್ತರು: ಪ್ರತಿಯೊಂದು ಪಾಲಿಕೆಗೂ ಒಬ್ಬರಂತೆ, ಒಟ್ಟು ಐದು ಆಯುಕ್ತರ ಹುದ್ದೆಗಳನ್ನು ಮಂಜೂರು ಮಾಡಲಾಗಿದೆ. ಈ ಹುದ್ದೆಗಳು ಕಾರ್ಯದರ್ಶಿ ಶ್ರೇಣಿ ಅಥವಾ ಅಗತ್ಯಾನುಸಾರ ಇತರೆ ಶ್ರೇಣಿಯ ಐಎಎಸ್ ಅಧಿಕಾರಿಗಳಿಗೆ ಮೀಸಲಾಗಿದೆ.
* ಅಪರ ಆಯುಕ್ತರು (ಅಭಿವೃದ್ಧಿ): ಪ್ರತಿ ಪಾಲಿಕೆಗೂ ಒಬ್ಬರಂತೆ, ಒಟ್ಟು ಐದು ಅಪರ ಆಯುಕ್ತರ ಹುದ್ದೆಗಳನ್ನು ಸೃಷ್ಟಿಸಲಾಗಿದೆ. ಈ ಹುದ್ದೆಗಳನ್ನು ಹಿರಿಯ ಅಥವಾ ಜೆಎಜಿ ಶ್ರೇಣಿಯ ಅಧಿಕಾರಿಗಳು ನಿರ್ವಹಿಸಲಿದ್ದಾರೆ.
ಜಿಬಿಎಗೆ ಹಂಚಿಕೆಯಾದ ಐಪಿಎಸ್ ಹುದ್ದೆಗಳು:
ಬೆಂಗಳೂರು ಮಹಾನಗರ ಕಾರ್ಯಪಡೆ (BMTF) ಯನ್ನು ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ ಅಡಿಯಲ್ಲಿ ತರಲಾಗಿದ್ದು, ಇಲ್ಲಿನ ಎರಡು ಐಪಿಎಸ್ ಹುದ್ದೆಗಳನ್ನು ಜಿಬಿಎಗೆ ಮರು ಹಂಚಿಕೆ ಮಾಡಲಾಗಿದೆ.
* ಎಡಿಜಿಪಿ, ಬಿಎಂಟಿಎಫ್, ಗ್ರೇಟರ್ ಬೆಂಗಳೂರು ಪ್ರಾಧಿಕಾರ: ಈ ಹುದ್ದೆಯು ಎಡಿಜಿಪಿ ಶ್ರೇಣಿಯ ಅಧಿಕಾರಿಗೆ ಮೀಸಲಾಗಿದೆ.
* ಎಸ್.ಪಿ, ಬಿಎಂಟಿಎಫ್, ಗ್ರೇಟರ್ ಬೆಂಗಳೂರು ಪ್ರಾಧಿಕಾರ: ಈ ಹುದ್ದೆಯು ಎಸ್.ಪಿ ಶ್ರೇಣಿಯ ಅಧಿಕಾರಿಗೆ ಮೀಸಲಾಗಿದೆ.
ಒಟ್ಟಾರೆಯಾಗಿ, ಬಿಬಿಎಂಪಿ ವಿಸರ್ಜನೆಯ ಬಳಿಕ ಹೊಸ ಆಡಳಿತ ವ್ಯವಸ್ಥೆಯನ್ನು ಸುಗಮಗೊಳಿಸಲು ಈ ಹುದ್ದೆಗಳ ಮರುಹಂಚಿಕೆ ಅನಿವಾರ್ಯವಾಗಿತ್ತು. ಈ ಆದೇಶವು ಜಿಬಿಎ ಮತ್ತು ನೂತನ ಪಾಲಿಕೆಗಳ ಆಡಳಿತಾತ್ಮಕ ಕಾರ್ಯಗಳಿಗೆ ಚಾಲನೆ ನೀಡಲಿದೆ ಎಂದು ತಿಳಿಯಬಹುದು.
Join our WhatsApp Channel
