ರಾಜ್ಯದಲ್ಲಿ ಸಾರ್ವತ್ರಿಕ ನವಜಾತ ಶಿಶು ತಪಾಸಣಾ ಯೋಜನೆಗೆ ಚಾಲನೆ : 57,350 ಶಿಶುಗಳಿಗೆ ಪ್ರಾಯೋಗಿಕವಾಗಿ ತಪಾಸಣೆ ನಡೆಸಲು ಅನುಮತಿ

ಬೆಂಗಳೂರು, ಆ. 12 www.bengaluruwire.com : ರಾಜ್ಯ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯು ನವಜಾತ ಶಿಶುಗಳಲ್ಲಿ ಕಾಣಿಸಿಕೊಳ್ಳುವ ಐದು ರೀತಿಯ ಜನ್ಮಜಾತ ಹಾಗೂ ಚಯಾಪಚಯ ಅಸ್ವಸ್ಥತೆಗಳನ್ನು ಪತ್ತೆಹಚ್ಚುವ “ಸಾರ್ವತ್ರಿಕ ನವಜಾತ ಶಿಶು ತಪಾಸಣಾ ಯೋಜನೆ” (Universal Newborn Screening Scheme – UNBS) ಗೆ ಅನುಮೋದನೆ ನೀಡಿದೆ.

ಈ ಯೋಜನೆಯಡಿ, ಬೆಂಗಳೂರು ನಗರ ಮತ್ತು ಬೆಂಗಳೂರು ಗ್ರಾಮಾಂತರ ಜಿಲ್ಲೆಗಳಲ್ಲಿ ಪ್ರಾಯೋಗಿಕವಾಗಿ ಒಟ್ಟು 57,350 ನವಜಾತ ಶಿಶುಗಳ ತಪಾಸಣೆಗೆ ಅನುಮೋದನೆ ನೀಡಲಾಗಿದೆ. ಈ ಯೋಜನೆಗೆ ರಾಷ್ಟ್ರೀಯ ಆರೋಗ್ಯ ಅಭಿಯಾನ (NHM)ದಿಂದ 2.58 ಕೋಟಿ ರೂ. ಅನುದಾನ ಬಳಸಲಾಗುತ್ತದೆ.

ಆಡ್ರಿನಲ್ ಹೈಪರ್ಪ್ಲಾಸಿಯಾ (CA), ಗ್ಯಾಲಾಕ್ಟೋಸೀಮಿಯಾ, ಗ್ಲೋಕೋಸ್ 6 ಪಾಸ್ಪೇಟ್ ಡಿಹೈಡ್ರೊಜಿನೇಸ್ (G6PD) ಸೇರಿದಂತೆ ಐದು ರೀತಿಯ ಜನ್ಮಜಾತ ಹಾಗೂ ಚಯಾಪಚಯ ಅಸ್ವಸ್ಥತೆಗಳನ್ನು ಯೋಜನೆಯಡಿ ಪತ್ತೆಹಚ್ಚಲಾಗುತ್ತದೆ.

ಗಣಿಗಾರಿಕೆ ಪೀಡಿತ ಪ್ರದೇಶಗಳಲ್ಲೂ ತಪಾಸಣೆ:

ಬೆಂಗಳೂರು ನಗರ ಹಾಗೂ ಗ್ರಾಮಾಂತರ ಜಿಲ್ಲೆಗಳಲ್ಲದೆ, ಗಣಿಗಾರಿಕೆಯಿಂದ ಬಾಧಿತವಾದ ತುಮಕೂರು, ಬಳ್ಳಾರಿ, ಚಿತ್ರದುರ್ಗ ಮತ್ತು ವಿಜಯನಗರ ಜಿಲ್ಲೆಗಳ ಕೆಲವು ತಾಲೂಕುಗಳಲ್ಲೂ ಇದೇ ಮಾದರಿಯ ತಪಾಸಣೆ ನಡೆಸಲು ಅನುಮೋದನೆ ನೀಡಲಾಗಿದೆ. ಈ ತಪಾಸಣೆಗಳಿಗೆ ಕರ್ನಾಟಕ ಮೈನಿಂಗ್ ಎನ್ವಿರಾನ್ಮೆಂಟ್ ರಿಸ್ಟೋರೇಶನ್ ಕಾರ್ಪೊರೇಷನ್ (KMERC) ಸಂಸ್ಥೆಯು ನೀಡಿರುವ ಆರ್ಥಿಕ ನೆರವಿನಲ್ಲಿ 2.79 ಕೋಟಿ ರೂ. ಅನುದಾನದಡಿ ವೆಚ್ಚವನ್ನು ಭರಿಸಲು ಆರೋಗ್ಯ ಇಲಾಖೆ ಒಪ್ಪಿಗೆ ನೀಡಿದೆ.

ಯೋಜನೆಯ ಮೇಲ್ವಿಚಾರಣೆ ಮತ್ತು ಅನುಷ್ಠಾನ:

ಯೋಜನೆಯ ಯಶಸ್ವಿ ಅನುಷ್ಠಾನ ಮತ್ತು ಮೇಲ್ವಿಚಾರಣೆಗಾಗಿ ರಾಜ್ಯ ನವಜಾತ ಶಿಶು ತಪಾಸಣಾ ಕೋಶ (State Newborn Screening Cell – SNSC)ವನ್ನು ಸ್ಥಾಪನೆಯಾಗಲಿದೆ. ಈ ಕೋಶವು ಯೋಜನೆಯ ಸಮರ್ಪಕ ಅನುಷ್ಠಾನಕ್ಕೆ ಮಾರ್ಗದರ್ಶನ ನೀಡಲಿದೆ. ಇದರ ಜೊತೆಗೆ, ಇಂದಿರಾ ಗಾಂಧಿ ಮಕ್ಕಳ ಆರೋಗ್ಯ ಸಂಸ್ಥೆ (IGICH) ಮತ್ತು ತಾಂತ್ರಿಕ ಸಲಹಾ ಸಮಿತಿ (Technical Advisory Committee – TAC) ಯೋಜನೆಗೆ ತಾಂತ್ರಿಕ ಬೆಂಬಲ ನೀಡಲಿವೆ. ತಪಾಸಣಾ ವಿಧಾನ, ಚಿಕಿತ್ಸೆ ಮತ್ತು ಇತರ ವಿವರಗಳನ್ನು ಇಂದಿರಾ ಗಾಂಧಿ ಮಕ್ಕಳ ಆರೋಗ್ಯ ಸಂಸ್ಥೆ (IGICH) ನಿರ್ದೇಶಕರು ಮತ್ತು ವೈದ್ಯಕೀಯ ಶಿಕ್ಷಣ ಇಲಾಖೆಯ ನಿರ್ದೇಶಕರ ಸಮಿತಿಯು ನಿರ್ಧರಿಸಲಿದೆ.

ಅನುದಾನ ಮತ್ತು ಇತರ ವೆಚ್ಚಗಳು:

ಪ್ರಾಯೋಗಿಕ ಯೋಜನೆಗೆ ಒಟ್ಟು 5.37 ಕೋಟಿ ರೂ. (ರಾಷ್ಟ್ರೀಯ ಆರೋಗ್ಯ ಅಭಿಯಾನದಡಿಯ ಅನುದಾನ 2.58 ಕೋಟಿ ರೂ. ಮತ್ತು ಕೆಎಂಇಆರ್ ಸಿನಿಂದ 2.79 ಕೋಟಿ ರೂ.) ಅನುದಾನ ನೀಡಲಾಗಿದೆ. ಈ ಅನುದಾನವನ್ನು ಶಿಶುಗಳ ತಪಾಸಣೆ, ಚಿಕಿತ್ಸೆ ಮತ್ತು ಇತರ ವೈದ್ಯಕೀಯ ಸೌಲಭ್ಯಗಳಿಗಾಗಿ ಬಳಸಲಾಗುವುದು ಎಂದು ಇಲಾಖೆಯು ತಿಳಿಸಿದೆ.