ಮೆಟ್ರೋ ಹಳದಿ ಮಾರ್ಗದ ಪ್ರಯಾಣಿಕರಿಗೆ ಆ.11ರಿಂದ ಬಿಎಂಟಿಸಿಯಿಂದ ಹೊಸ ಫೀಡರ್ ಬಸ್ ಸೇವೆ ಪ್ರಾರಂಭ

ಬೆಂಗಳೂರು, ಆ.09 www.bengaluruwire.com : ಮೆಟ್ರೋ ಪ್ರಯಾಣಿಕರಿಗೆ ಮತ್ತಷ್ಟು ಸುಲಭಗೊಳಿಸುವ ನಿಟ್ಟಿನಲ್ಲಿ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ (ಬಿಎಂಟಿಸಿ)ಯು ನಮ್ಮ ಮೆಟ್ರೋದ ಹಳದಿ ಮಾರ್ಗ (Yellow Line)ಕ್ಕೆ ಪೂರಕವಾಗಿ ಆ.11 ರಿಂದ ಹೊಸ ಮೆಟ್ರೋ ಫೀಡರ್ ಬಸ್ ಸೇವೆ ಕಾರ್ಯಾರಂಭ ಮಾಡಲಿವೆ.

ಈ ಹೊಸ ಮಾರ್ಗದ ಸೇವೆಗಳು ಮೆಟ್ರೋ ನಿಲ್ದಾಣಗಳಿಗೆ ಮತ್ತು ನಿಲ್ದಾಣಗಳಿಂದ ಪ್ರಯಾಣಿಸುವವರಿಗೆ ‘ಮೊದಲ ಮತ್ತು ಕೊನೆಯ ಮೈಲಿ ಸಂಪರ್ಕ’ವನ್ನು ಸುಗಮಗೊಳಿಸುತ್ತದೆ.

ಈ ಹೊಸ ಫೀಡರ್ ಬಸ್ ಸೇವೆಗಳು ವಿಶೇಷವಾಗಿ ಎಲೆಕ್ಟ್ರಾನಿಕ್ಸ್ ಸಿಟಿ, ಬೊಮ್ಮಸಂದ್ರ ಮತ್ತು ಕೊಡತಿ ಪ್ರದೇಶದ ಜನರಿಗೆ ಹೆಚ್ಚಿನ ಅನುಕೂಲ ಒದಗಿಸಲಿವೆ. ಬಿಎಂಟಿಸಿ ಯ ಪ್ರಕಾರ, ಈ ಹೊಸ ಸೇವೆಗಳು ಹಳದಿ ಮಾರ್ಗದ ಮೆಟ್ರೋ ನಿಲ್ದಾಣಗಳು ಮತ್ತು ಪ್ರಮುಖ ವಾಸಸ್ಥಾನ/ಐಟಿ ಪ್ರದೇಶಗಳ ನಡುವೆ ನೇರ ಸಂಪರ್ಕ ಕಲ್ಪಿಸುತ್ತವೆ.

ಅಲ್ಲದೆ, ಮೆಟ್ರೋ ಸಮಯಕ್ಕೆ ಅನುಗುಣವಾಗಿ ಹೆಚ್ಚು ಟ್ರಿಪ್‌ಗಳ ವ್ಯವಸ್ಥೆ ಇರಲಿದ್ದು, ಇದು ಕೈಗೆಟುಕುವ ಹಾಗೂ ಪರಿಸರ ಸ್ನೇಹಿ ಸಾರ್ವಜನಿಕ ಸಾರಿಗೆ ಆಯ್ಕೆಯಾಗಲಿದೆ.

ಹೊಸ ಮೆಟ್ರೋ ಫೀಡರ್ ಬಸ್ ಮಾರ್ಗಗಳ ವಿವರಗಳು:

* ಮಾರ್ಗ ಸಂಖ್ಯೆ MF-22: ಈ ಮಾರ್ಗವು ಎಲೆಕ್ಟ್ರಾನಿಕ್ಸ್ ಸಿಟಿ ವಿಪ್ರೋ ಗೇಟ್‌ನಿಂದ ಕೊಡತಿ ವಿಪ್ರೋ ಗೇಟ್‌ಗೆ ಸಂಚರಿಸುತ್ತದೆ. ಬಸ್ಸುಗಳು ಎಲೆಕ್ಟ್ರಾನಿಕ್ಸ್ ಸಿಟಿ, ಕೋನಪ್ಪನ ಅಗ್ರಹಾರ, ಹೊಸರೋಡ್, ಕಸವನಹಳ್ಳಿ, ಕೈಕೊಂಡ್ರಹಳ್ಳಿ ಮತ್ತು ದೊಡ್ಡಕನ್ನಲ್ಲಿ ಮೂಲಕ ಹಾದುಹೋಗುತ್ತವೆ. ಈ ಮಾರ್ಗದಲ್ಲಿ ಒಟ್ಟು 4 ಬಸ್ಸುಗಳು 32 ಸುತ್ತುಗಳಲ್ಲಿ ಸೇವೆ ಒದಗಿಸುತ್ತವೆ. ಎಲೆಕ್ಟ್ರಾನಿಕ್ಸ್ ಸಿಟಿ ವಿಪ್ರೋ ಗೇಟ್‌ನಿಂದ ಮೊದಲ ಬಸ್ ಬೆಳಿಗ್ಗೆ 8:20ಕ್ಕೆ ಹೊರಟು, ಕೊನೆಯ ಬಸ್ ಸಂಜೆ 4:55ಕ್ಕೆ ಲಭ್ಯವಿರುತ್ತದೆ. ಕೊಡತಿ ವಿಪ್ರೋ ಗೇಟ್‌ನಿಂದ ಮೊದಲ ಬಸ್ ಬೆಳಿಗ್ಗೆ 7:10ಕ್ಕೆ ಹೊರಟು, ಕೊನೆಯ ಬಸ್ ಸಂಜೆ 3:55ಕ್ಕೆ ಲಭ್ಯವಿರುತ್ತದೆ.

* ಮಾರ್ಗ ಸಂಖ್ಯೆ MF-22A: ಎಲೆಕ್ಟ್ರಾನಿಕ್ಸ್ ಸಿಟಿ ವಿಪ್ರೋ ಗೇಟ್‌ನಿಂದ ಹೊರಟು ಕೊಡತಿ ವಿಪ್ರೋ ತಲುಪುತ್ತದೆ. ಈ ಮಾರ್ಗವು ಕೋನಪ್ಪನ ಅಗ್ರಹಾರ, ಎಲೆಕ್ಟ್ರಾನಿಕ್ಸ್ ಸಿಟಿ, ಹುಸ್ಕೂರು ಗೇಟ್, ಚಿಂತಲ ಮಡಿವಾಳ, ಮುತ್ತಾನಲ್ಲೂರು ಕ್ರಾಸ್, ತಿಮ್ಮಸಂದ್ರ ಕ್ರಾಸ್ ಮತ್ತು ಚಂದಾಪುರ ಕ್ರಾಸ್ ಮೂಲಕ ಹಾದುಹೋಗುತ್ತದೆ. ಈ ಮಾರ್ಗದಲ್ಲಿ 4 ಬಸ್ಸುಗಳು ಒಟ್ಟು 24 ಸುತ್ತುಗಳಲ್ಲಿ ಸೇವೆ ನೀಡಲಿವೆ. ಎಲೆಕ್ಟ್ರಾನಿಕ್ಸ್ ಸಿಟಿ ವಿಪ್ರೋ ಗೇಟ್‌ನಿಂದ ಮೊದಲ ಬಸ್ ಬೆಳಿಗ್ಗೆ 8:40ಕ್ಕೆ ಮತ್ತು ಕೊನೆಯ ಬಸ್ ಸಂಜೆ 4:50ಕ್ಕೆ ಹೊರಡುತ್ತದೆ. ಕೊಡತಿ ವಿಪ್ರೋ ಗೇಟ್‌ನಿಂದ ಮೊದಲ ಬಸ್ ಬೆಳಿಗ್ಗೆ 8:05ಕ್ಕೆ ಮತ್ತು ಕೊನೆಯ ಬಸ್ ಸಂಜೆ 5:35ಕ್ಕೆ ಲಭ್ಯವಿದೆ.

* ಮಾರ್ಗ ಸಂಖ್ಯೆ MF-22B: ಇದು ಬೊಮ್ಮಸಂದ್ರದಿಂದ ಒಂದು ಚಕ್ರ ಮಾರ್ಗದಲ್ಲಿ ಸಂಚರಿಸುತ್ತದೆ. ಈ ಬಸ್ಸುಗಳು ತಿರುಪಾಳ್ಯ ಕ್ರಾಸ್, ಎಸ್-ಮಾಂಡೋ-3, ಎಲೆಕ್ಟ್ರಾನಿಕ್ಸ್ ಸಿಟಿ ವಿಪ್ರೋ ಗೇಟ್, ಕೋನಪ್ಪನ ಅಗ್ರಹಾರ, ಎಲೆಕ್ಟ್ರಾನಿಕ್ಸ್ ಸಿಟಿ, ಹೆಬ್ಬಗೋಡಿ ಮೂಲಕ ಬೊಮ್ಮಸಂದ್ರಕ್ಕೆ ವಾಪಸ್ ಬರುತ್ತವೆ. ಈ ಮಾರ್ಗದಲ್ಲಿ 2 ಬಸ್ಸುಗಳು 20 ಸುತ್ತುಗಳಲ್ಲಿ ಸೇವೆ ಸಲ್ಲಿಸುತ್ತವೆ. ಬೊಮ್ಮಸಂದ್ರದಿಂದ ಮೊದಲ ಬಸ್ ಬೆಳಿಗ್ಗೆ 8:30ಕ್ಕೆ ಮತ್ತು ಕೊನೆಯ ಬಸ್ ಸಂಜೆ 6:05ಕ್ಕೆ ಹೊರಡುತ್ತದೆ.

* ಮಾರ್ಗ ಸಂಖ್ಯೆ MF-22C: ಈ ಮಾರ್ಗವು ಕೋನಪ್ಪನ ಅಗ್ರಹಾರದಿಂದ ಒಂದು ಚಕ್ರ ಮಾರ್ಗದಲ್ಲಿ ಸಂಚರಿಸುತ್ತದೆ. ಇದು ಎಲೆಕ್ಟ್ರಾನಿಕ್ಸ್ ಸಿಟಿ ವಿಪ್ರೋ ಗೇಟ್, ಎಸ್-ಮಾಂಡೋ-3, ತಿರುಪಾಳ್ಯ ಕ್ರಾಸ್, ಬೊಮ್ಮಸಂದ್ರ, ಹೆಬ್ಬಗೋಡಿ, ಎಲೆಕ್ಟ್ರಾನಿಕ್ಸ್ ಸಿಟಿ ಮೂಲಕ ಮತ್ತೆ ಕೋನಪ್ಪನ ಅಗ್ರಹಾರಕ್ಕೆ ಮರಳುತ್ತದೆ. ಈ ಮಾರ್ಗದಲ್ಲೂ 2 ಬಸ್ಸುಗಳು 20 ಸುತ್ತುಗಳಲ್ಲಿ ಸೇವೆ ನೀಡಲಿವೆ. ಕೋನಪ್ಪನ ಅಗ್ರಹಾರದಿಂದ ಮೊದಲ ಬಸ್ ಬೆಳಿಗ್ಗೆ 8:25ಕ್ಕೆ ಮತ್ತು ಕೊನೆಯ ಬಸ್ ಸಂಜೆ 6:05ಕ್ಕೆ ಹೊರಡುತ್ತದೆ.

ಈ ಹೊಸ ಸೇವೆಗಳು ಮೆಟ್ರೋ ಹಳದಿ ಮಾರ್ಗದ ಕಾರ್ಯಾರಂಭದೊಂದಿಗೆ, ಪ್ರಯಾಣಿಕರಿಗೆ ದೈನಂದಿನ ಸಂಚಾರವನ್ನು ಹೆಚ್ಚು ಸುಲಭ ಮತ್ತು ಅನುಕೂಲಕರವಾಗಿಸುವ ಉದ್ದೇಶವನ್ನು ಹೊಂದಿವೆ.