ಹೈದರಾಬಾದ್, ಮೇ.31 www.bengaluruwire.com : ಸೌಂದರ್ಯ ಮತ್ತು ಬುದ್ಧಿವಂತಿಕೆಯ ಸಂಗಮಕ್ಕೆ ಸಾಕ್ಷಿಯಾದ 2025ರ ವಿಶ್ವ ಸುಂದರಿ ಸ್ಪರ್ಧೆಯಲ್ಲಿ ಥಾಯ್ಲೆಂಡ್‌ನ ಮನಮೋಹಕ ಸುಂದರಿ ಓಪಲ್ ಸುಚಾತಾ ಚುಂಗ್ ಸಿರಿ ಅವರು ವಿಶ್ವ ಸುಂದರಿ ಕಿರೀಟವನ್ನು ಮುಡಿಗೇರಿಸಿಕೊಂಡಿದ್ದಾರೆ.
ಶನಿವಾರ ತೆಲಂಗಾಣದ ಹೈದರಾಬಾದ್‌ನಲ್ಲಿರುವ ಹೈಟೆಕ್ಸ್ ಪ್ರದರ್ಶನ ಕೇಂದ್ರದಲ್ಲಿ ನಡೆದ 72 ನೇ ಆವೃತ್ತಿಯ ವಿಶ್ವ ಸುಂದರಿ ಸ್ಪರ್ಧೆಯಲ್ಲಿ ಮಿಸ್ ಥೈಲ್ಯಾಂಡಿನ ಸುಚಾತಾ ಚುಂಗ್ ಸಿರಿ ಅವರು 2025 ರ ವಿಶ್ವ ಸುಂದರಿ ಕಿರೀಟವನ್ನು ಅಲಂಕರಿಸಿದರು. ವಿಜೇತರಿಗೆ 2024 ರ ವಿಶ್ವ ಸುಂದರಿ ಕ್ರಿಸ್ಟಿನಾ ಪಿಸ್ಜ್ಕೋವಾ ಅವರು ಕಿರೀಟವನ್ನು ತೊಡಿಸಿದರು. ಇದು ವಾರಗಳ ಕಾಲ ನಡೆದ ಸಾಂಸ್ಕೃತಿಕ ವಿನಿಮಯ, ಸ್ಪರ್ಧೆ ಮತ್ತು ಆಚರಣೆಯ ಅಂತಿಮ ಹಾಗೂ ನಿರ್ಣಾಯಕ ಹಂತವಾಗಿದೆ.
ವಿಶ್ವದ ನೂರಾರು ದೇಶಗಳ ಪ್ರತಿನಿಧಿಗಳನ್ನು ಹಿಂದಿಕ್ಕಿ, ಸುಚತಾ ಈ ಪ್ರತಿಷ್ಠಿತ ಪಟ್ಟವನ್ನು ಗಳಿಸುವಲ್ಲಿ ಯಶಸ್ವಿಯಾಗಿದ್ದು, ಥಾಯ್ಲೆಂಡ್‌ಗೆ ಇದು ಹೆಮ್ಮೆಯ ಕ್ಷಣವಾಗಿದೆ. ಶನಿವಾರ ತಡರಾತ್ರಿ ನಡೆದ ಅಂತಿಮ ಸುತ್ತಿನಲ್ಲಿ, ತಮ್ಮ ಅಪ್ರತಿಮ ಸೌಂದರ್ಯ, ಆತ್ಮವಿಶ್ವಾಸ ಮತ್ತು ಬುದ್ಧಿವಂತಿಕೆಯಿಂದ ತೀರ್ಪುಗಾರರು ಹಾಗೂ ಪ್ರೇಕ್ಷಕರ ಮನ ಗೆದ್ದ ಸುಚತಾ, ವಿಶ್ವದ ಗಮನ ಸೆಳೆದರು. ಈ ಬಾರಿಯ ವಿಶ್ವ ಸುಂದರಿ ಸ್ಪರ್ಧೆಯಲ್ಲಿ ವಿವಿಧ ದೇಶಗಳಿಂದ ಒಟ್ಟು 108 ಸ್ಪರ್ಧಿಗಳು ಭಾಗವಹಿಸಿದ್ದರು. ಕಳೆದ ಒಂದು ತಿಂಗಳಿನಿಂದ ವಿವಿಧ ಸುತ್ತುಗಳಲ್ಲಿ ಈ ಸ್ಪರ್ಧಿಗಳು ಪಾಲ್ಗೊಂಡಿದ್ದರು.
ಮಾರ್ಚ್ 20, 2003 ರಂದು ಥೈಲ್ಯಾಂಡ್‌ನ ರೋಮಾಂಚಕ ಕರಾವಳಿ ನಗರವಾದ ಫುಕೆಟ್‌ನಲ್ಲಿ ಜನಿಸಿದ ಸುಚಾತಾ, ಹೋಟೆಲ್ ಉದ್ಯಮಿಗಳ ಮಗಳಾಗಿ ಆತಿಥ್ಯದ ಜಗತ್ತಿನಲ್ಲಿ ಬೆಳೆದರು. ನಿಜವಾದ ಜಾಗತಿಕ ನಾಗರಿಕೆಯಾಗಿರುವ ಅವರು ತ್ರಿಭಾಷಾ ಬಲ್ಲವರಾಗಿದ್ದಾರೆ, ಥಾಯ್, ಇಂಗ್ಲಿಷ್ ಮತ್ತು ಚೈನೀಸ್ ಭಾಷೆಗಳನ್ನು ಮಾತನಾಡುತ್ತಾರೆ.
ವಿವಿಧ ಹಂತಗಳ ಕಠಿಣ ಸ್ಪರ್ಧೆಗಳನ್ನು ದಾಟಿ, ಅಂತಿಮ ಐವರಲ್ಲಿ ಸ್ಥಾನ ಪಡೆದ ಸುಚಾತಾ, ಅಂತಿಮ ಪ್ರಶ್ನೋತ್ತರ ಸುತ್ತಿನಲ್ಲಿ ತಮ್ಮ ತೀಕ್ಷ್ಣ ಮತ್ತು ಪ್ರಬುದ್ಧ ಉತ್ತರಗಳಿಂದ ತೀರ್ಪುಗಾರರ ಮೆಚ್ಚುಗೆ ಗಳಿಸಿ ಕಿರೀಟಕ್ಕೆ ಭಾಜನರಾದರು.
ಈ ಬಾರಿಯ ಸ್ಪರ್ಧೆಯಲ್ಲಿ ಭಾರತದಿಂದ ಪ್ರತಿನಿಧಿಸಿದ್ದ ಸುಂದರಿಗೆ ನಿರಾಸೆಯಾಗಿದ್ದು, ಅಂತಿಮ ಹತ್ತು ಸ್ಪರ್ಧಿಗಳಲ್ಲಿ ಸ್ಥಾನ ಪಡೆಯಲು ಅವರು ವಿಫಲರಾಗಿದ್ದಾರೆ.
ಹೈದರಾಬಾದ್‌ನಲ್ಲಿ ನಡೆದ ಮಿಸ್ ವರ್ಲ್ಡ್ 2025 ಸ್ಪರ್ಧೆಯಲ್ಲಿ ಭಾರತದ ನಂದಿನಿ ಗುಪ್ತಾ ಅವರು ಅಪೇಕ್ಷಣೀಯ ಟಾಪ್ 8 ರಲ್ಲಿ ಸ್ಥಾನ ಪಡೆಯುವಲ್ಲಿ ವಿಫಲರಾದರು. ಅವರ ಅದ್ಭುತ ಪ್ರದರ್ಶನದ ಹೊರತಾಗಿಯೂ, 21 ವರ್ಷದ ಗುಪ್ತಾ ಸ್ಪರ್ಧೆಯ ಅಂತಿಮ ಸುತ್ತಿಗೆ ಪ್ರವೇಶಿಸಲಿಲ್ಲ. ಇದನ್ನು ಇತ್ತೀಚೆಗೆ ಅಧಿಕೃತ ಮಿಸ್ ವರ್ಲ್ಡ್ ಇನ್‌ಸ್ಟಾಗ್ರಾಮ್ ಪುಟದ ಮೂಲಕ ಘೋಷಿಸಲಾಯಿತು.
ಇಥಿಯೋಪಿಯಾದ ಸುಂದರಿ ಮೊದಲ ರನ್ನರ್ ಅಪ್, ಪೊಲ್ಯಾಂಡ್‌ನ ಸುಂದರಿ 2ನೇ ರನ್ನರ್ ಅಪ್ ಹಾಗೂ ಕೆರೆಬಿಯನ್ ದ್ವೀಪದ ಸುಂದರಿ 3ನೇ ರನ್ನರ್ ಅಪ್ ಪ್ರಶಸ್ತಿ ಪಡೆದುಕೊಂಡರು. ಸುಚತಾ ಚುವಾಂಗ್‌ಶ್ರೀ ಅವರ ಗೆಲುವು ಥಾಯ್ಲೆಂಡ್‌ಗೆ ಎರಡನೇ ವಿಶ್ವ ಸುಂದರಿ ಕಿರೀಟವಾಗಿದೆ. ಈ ಹಿಂದೆ 1965ರಲ್ಲಿ ಥಾಯ್ಲೆಂಡ್‌ನ ಅಪಸಾರಾ ಹಾಂಗ್‌ಸಕುಲಾ ಅವರು ವಿಶ್ವ ಸುಂದರಿ ಕಿರೀಟವನ್ನು ಗೆದ್ದುಕೊಂಡಿದ್ದರು. ಸುಚತಾ ಅವರ ಗೆಲುವನ್ನು ಥಾಯ್ಲೆಂಡ್‌ನಲ್ಲಿ ವ್ಯಾಪಕವಾಗಿ ಸಂಭ್ರಮಿಸಲಾಗುತ್ತಿದ್ದು, ದೇಶದಾದ್ಯಂತ ಅಭಿನಂದನೆಗಳ ಮಹಾಪೂರವೇ ಹರಿದುಬರುತ್ತಿದೆ.
ಸುಚಾತಾ ಅವರು ತಮ್ಮ ಸೌಂದರ್ಯದ ಜೊತೆಗೆ ಸಮಾಜ ಸೇವೆ ಮತ್ತು ಶಿಕ್ಷಣ ಕ್ಷೇತ್ರದಲ್ಲೂ ಆಸಕ್ತಿ ಹೊಂದಿದ್ದಾರೆ. ಮಾನವ ಹಕ್ಕುಗಳ ರಕ್ಷಣೆ ಮತ್ತು ಮಕ್ಕಳ ಶಿಕ್ಷಣಕ್ಕಾಗಿ ಕೆಲಸ ಮಾಡುವ ಗುರಿ ಹೊಂದಿದ್ದಾರೆ ಎಂದು ಅವರು ತಿಳಿಸಿದ್ದಾರೆ. ವಿಶ್ವ ಸುಂದರಿ ಪಟ್ಟದ ಮೂಲಕ ತಮ್ಮ ಧ್ವನಿಯನ್ನು ಇನ್ನಷ್ಟು ಪರಿಣಾಮಕಾರಿಯಾಗಿ ಬಳಸಿಕೊಂಡು ಸಮಾಜಕ್ಕೆ ಕೊಡುಗೆ ನೀಡುವ ಇಂಗಿತವನ್ನು ಅವರು ವ್ಯಕ್ತಪಡಿಸಿದ್ದಾರೆ.
