ಬೆಂಗಳೂರು, ಫೆ.17 www.bengaluruwire.com : ನಮ್ಮ ಮೆಟ್ರೋ ಬೆಲೆ ಏರಿಕೆಗೆ ಸಾರ್ವಜನಿಕ ತೀವ್ರ ವಿರೋಧದ ನಡುವೆ ಮಾಧ್ಯಮದವರ ಪ್ರಶ್ನೆಗಳ ಸುರಿಮಳೆ ತಪ್ಪಿಸಿಕೊಳ್ಳಲು ಹಾಗೂ ನಗರದ ಜನತೆಗೆ ಫೇಸ್-2 ಪಿಂಕ್ ಮಾರ್ಗದಲ್ಲಿನ ಸಿವಿಎಲ್ ಕಾಮಗಾರಿ ಮುಗಿದ ಸುರಂಗ ಮಾರ್ಗದ ಕಾಮಗಾರಿ ಸ್ಥಳಕ್ಕೆ ಬಿಎಂಆರ್ ಸಿಎಲ್ ಉನ್ನತ ಅಧಿಕಾರಿಗಳ ಅನುಪಸ್ಥಿತಿಯಲ್ಲಿ ಇಂದು ಮೆಟ್ರೋ ಎಂಜಿನಿಯರ್ ಗಳು ಮಾಧ್ಯಮದವರನ್ನು ಕರೆದೊಯ್ದರು.
ನಮ್ಮ ಮೆಟ್ರೋ ಅಧಿಕಾರಿಗಳ ಪ್ರಕಾರ ಫೇಸ್-2 ನಲ್ಲಿನ ಪಿಂಕ್ ಮಾರ್ಗ ಈ ವರ್ಷದ ಡಿಸಿಂಬರ್ ಅಥವಾ ಮುಂದಿನ ವರ್ಷದ ಆರಂಭದಲ್ಲಿ ಸಾರ್ವಜನಿಕ ಸೇವೆಗೆ ಲಭ್ಯವಾಗಲಿದೆ ಎಂದು ತಿಳಿಸಿದ್ದಾರೆ. ಫೇಸ್-1 ನಲ್ಲಿ ಮೆಜಿಸ್ಟಿಕ್ ನಲ್ಲಿ ಇಂಟರ್ ಚೇಂಜ್ ನಿಲ್ದಾಣವಾಗಿದ್ದರೆ, ಫೇಸ್-2 ನಲ್ಲಿ ಎಂ.ಜಿ.ರಸ್ತೆ ಮೆಟ್ರೋ ಸ್ಟೇಷನ್ ನಲ್ಲಿ ಎಲಿವೇಟೆಡ್ ನೇರಳೆ ಮಾರ್ಗ ಹಾಗೂ ಪಿಂಕ್ ಸುರಂಗ ಮಾರ್ಗದ ನಿಲ್ದಾಣಗಳ ಇಂಟರ್ ಚೇಂಜ್ ಸ್ಟೇಷನ್ ತಲೆ ಎತ್ತಿದೆ. ಈ 13.89 ಕಿ.ಮೀ ಉದ್ದದ ಸುರಂಗ ಮಾರ್ಗ ನಿರ್ಮಾಣಕ್ಕೆ ಅಡ್ಡಲಾಗಿದ್ದ ನೂರಾರು ಟನ್ ಗಟ್ಟಿಬಂಡೆಗಳನ್ನು ಒಡೆಯಲು 15,000ಕ್ಕೂ ಅಧಿಕ ಸ್ಪೋಟಕಗಳನ್ನು ಮಾಡಲಾಗಿತ್ತು ಎಂದು ನಮ್ಮ ಮೆಟ್ರೋ ಅಧಿಕಾರಿಗಳು ತಿಳಿಸಿದ್ದಾರೆ.
ಎಂ.ಜಿ.ರಸ್ತೆಯಲ್ಲಿ ಪಿಂಕ್ ಸುರಂಗ ಮಾರ್ಗದ ನಿಲ್ದಾಣದಲ್ಲಿ ಎಲಿವೇಟರ್, ರೈಲ್ವೇ ಹಳಿ ಜೋಡಣೆ ಕಾರ್ಯ, ವಿದ್ಯುತ್ ಸಂಪರ್ಕ, ಎಲಿವೇಟರ್, ಎಸಿ ಡಕ್ಟ್, ಅಗ್ನಿಶಾಮಕ ಸುರಕ್ಷತಾ ವ್ಯವಸ್ಥೆ ಸೇರಿದಂತೆ ಸಕಲ ಸೌಲಭ್ಯಗಳನ್ನು ಕಲ್ಪಿಸುವ ಕಾರ್ಯ ಭರದಿಂದ ಸಾಗಿದೆ.
ಕಾಳೇನ ಅಗ್ರಹಾರ (ಹಿಂದಿನ ಹೆಸರು ಗೊಟ್ಟಗೆರೆ)ಯಿಂದ ನಾಗವಾರದ ತನಕದ ಪಿಂಕ್ ಎತ್ತರಿಸಿದ ರೈಲು ಮಾರ್ಗ, ಒಟ್ಟು 18 ಸ್ಟೇಷನ್, ಸುರಂಗ ಮಾರ್ಗ ಸೇರಿದಂತೆ ಒಟ್ಟಾರೆ 21.25 ಕಿ.ಮೀ ಮಾರ್ಗದ ನಿರ್ಮಾಣಕ್ಕೆ ಅಂದಾಜು 12 ಸಾವಿರ ಕೋಟಿ ವೆಚ್ಚವಾಗಲಿದೆ. ಆ ಪೈಕಿ ಡೈರಿ ವೃತ್ತದಿಂದ ನಾಗವಾರ ತನಕದ 13.89 ಕಿ.ಮೀ ರೈಲು ಸುರಂಗ ಮಾರ್ಗಕ್ಕೆ ಅಂದಾಜು ವೆಚ್ಚ ಒಟ್ಟು 5000 ಕೋಟಿ ರೂ.ಗಳಾಗಿದೆ. ಇಲ್ಲಿ ಶೇ.90 ಕ್ಕೂ ಹೆಚ್ಚು ಸಿವಿಎಲ್ ಕಾಮಗಾರಿ ಪೂರ್ಣಗೊಂಡಿದೆ.
ಪಿಂಕ್ ಲೈನ್ ನಲ್ಲಿ ಮೆಟ್ರೋ ರೈಲು ಹೋಗಿ ಬರುವ ಎರಡು ಸುರಂಗ ಮಾರ್ಗದ ಒಟ್ಟು ಉದ್ದ 21 ಕಿ.ಮೀ ಆಗಿದ್ದು ಆ ಪೈಕಿ ಎರಡು ಬದಿಗಳಲ್ಲಿ 13.89 ಕಿ.ಮೀ ರೈಲ್ವೇ ಹಳಿ ಮಾರ್ಗವನ್ನು ನಮ್ಮ ಮೆಟ್ರೋ ಅಳವಡಿಸುತ್ತಿದೆ. ಈ ಸುರಂಗ ಮಾರ್ಗದಲ್ಲಿ ಒಟ್ಟು 12 ನಿಲ್ದಾಣಗಳಿದ್ದು, 12 ನಿಲ್ದಾಣಗಳು ಭೂಮಟ್ಟದ ಸರಾಸರಿಯಾಗಿ 58-60 ಅಡಿ ಆಳದಲ್ಲಿ ಸ್ಥಾಪನೆಯಾಗಿದೆ.
“ಫೇಸ್-2ನಲ್ಲಿ 9 ಸುರಂಗ ಕೊರೆಯುವ ಯಂತ್ರ ಬಳಸಿ ಸುರಂಗ ಕೊರೆಯುವ ಕಾರ್ಯ 2020ರ ಇಸವಿಯಲ್ಲಿ ಆಗಸ್ಟ್ 22ರಂದು ಪ್ರಾರಂಭವಾಗಿ, 2024ರ ಅಕ್ಟೋಬರ್ 30ರಂದು ಪೂರ್ಣಗೊಂಡು ಆನಂತರ ಸಿವಿಎಲ್ ಕಾಮಗಾರಿ ನಡೆಯುತ್ತಿತ್ತು. ಇದೀಗ ಆ ಸಿವಿಎಲ್ ಕಾಮಗಾರಿಯೂ ಬಹುತೇಕ ಪೂರ್ಣಗೊಂಡಿದೆ” ಎಂದು ನಮ್ಮ ಮೆಟ್ರೋ ಫೇಸ್-2 ಸುರಂಗ ಮಾರ್ಗದ ಪ್ರಧಾನ ಎಂಜಿನಿಯರ್ ಸುಬ್ರಮಣ್ಯ ಗುಡಿಗೆ ಸುದ್ದಿಗಾರರಿಗೆ ಮಾತನಾಡುತ್ತಾ ಟನಲ್ ಕಾಮಗಾರಿ ಬಗ್ಗೆ ವಿವರಿಸಿದರು.
“ನಮ್ಮ ಮೆಟ್ರೋ ಎರಡನೇ ಹಂತದ ಸುರಂಗ ಮಾರ್ಗದ ಕಾಮಗಾರಿಯನ್ನು ಡೈರಿ ವೃತ್ತದಿಂದ ವೆಲ್ಲಾರ ಜಂಕ್ಷನ್, ಅಲ್ಲಿಂದ ಶಿವಾಜಿನಗರ, ನಂತರ ಶಿವಾಜಿನಗರದಿಂದ ಪಾಟರಿಟೌನ್ ತನಕ ಆಮೇಲೆ ಟ್ಯಾನರಿ ರೋಡ್ ನಿಂದ ನಾಗವಾರ ತನಕ ಒಟ್ಟು 4 ಪ್ಯಾಕೇಜ್ ಗಳಲ್ಲಿ ಟೆಂಡರ್ ಗುತ್ತಿಗೆ ನೀಡಲಾಗಿತ್ತು. ಆ ಪೈಕಿ ಶೇ.90ಕ್ಕೂ ಹೆಚ್ಚು ಸಿವಿಎಲ್ ಕಾಮಗಾರಿ ಪೂರ್ಣಗೊಂಡಿದೆ” ಎಂದು ಸುಬ್ರಮಣ್ಯ ಗುಡಿಗೆ ಹೇಳಿದರು.
“ಎಂ.ಜಿ.ರಸ್ತೆ ಈ ಮೆಟ್ರೋ ರೈಲ್ವೇ ಸ್ಟೇಷನ್ ನಲ್ಲಿ ಒಟ್ಟು ನಾಲ್ಕು ಪ್ರವೇಶ ಹಾಗೂ ನಿರ್ಗಮ ದ್ವಾರಗಳಿವೆ. ಟನಲ್ ಮಾರ್ಗದಲ್ಲಿ ಅಕಸ್ಮಾತ್ ರೈಲು ಕೆಟ್ಟಾಗ, ಇನ್ನಿತರ ಅವಘಡಗಳಾದಾಗ ಸುರಕ್ಷತೆಯ ದೃಷ್ಟಿಯಿಂದ ವಾಯು ಪೂರೈಕೆಗಾಗಿ ಅಗತ್ಯ ಕ್ರಮ ಕೈಗೊಳ್ಳಲಾಗುತ್ತಿದೆ. ಫೇಸ್-1 ಟನಕಿಂಗ್ ಕಾಮಗಾರಿ ಸಾಕಷ್ಟು ಸವಾಲಿನಿಂದ ಕೂಡಿತ್ತು, ಮಣ್ಣಿಗಿಂತ ಗಟ್ಟಿ ಕಲ್ಲುಬಂಡೆಗಳೇ ಈ ಮಾರ್ಗದಲ್ಲಿ ಹೆಚ್ಚಾಗಿತ್ತು”.
“ಸರಿ ಸುಮಾರು 15,000 ಕ್ಕೂ ನಿಯಂತ್ರಿತ ಸ್ಪೋಟಕಗಳನ್ನು ನಡೆಸಿ 9 ಟಿಬಿಎಂಗಳ ಮೂಲಕ ದಿನಕ್ಕೆ ಸರಾಸರಿಯಾಗಿ 1200 ಕಾರ್ಮಿಕರನ್ನು ಬಳಸಿ ಈ ಪಿಂಕ್ ಸುರಂಗ ಮಾರ್ಗ ನಿರ್ಮಾಣ ಕಾರ್ಯ ಮಾಡಲಾಗಿದೆ. ಈ ರೀತಿ ಅತಿಹೆಚ್ಚು ಗಟ್ಟಿ ಬಂಡೆಗಳು ಎದುರಾಗಿದ್ದರೂ ಧೃತಿಗೆಡದೆ ಸುರಕ್ಷಿತ ರೀತಿಯಲ್ಲಿ ಕಾಮಗಾರಿನ್ನು ಮಾಡಿ ಮುಗಿಸಿದ್ದೇವೆ. ಈ ಬಗ್ಗೆ ಹೆಮ್ಮೆಯಿದೆ. ಈ ವರ್ಷಾಂತ್ಯಕ್ಕೆ ಅಥವಾ ಮುಂದಿನ ವರ್ಷದ ಆರಂಭದಲ್ಲಿ ಪಿಂಕ್ ಮಾರ್ಗ ಸಾರ್ವಜನಿಕ ಸೇವೆಗೆ ಲಭ್ಯವಾಗಬಹುದು”ಎಂದು ಅವರು ತಿಳಿಸಿದರು.
ಇದೇ ಸಂದರ್ಭದಲ್ಲಿ ನಮ್ಮ ಮೆಟ್ರೋ ಫೇಸ್-2 ಸುರಂಗ ಮಾರ್ಗದ ಉಪ ಪ್ರಧಾನ ಎಂಜಿನಿಯರ್ ರಾಘವೇಂದ್ರ ಶಾನ್ ಭಾಗ್, ಸಾರ್ವಜನಿಕ ಸಂಪರ್ಕಾಧಿಕಾರಿ ಶ್ರೀನಿವಾಸ್ ರಾಜಗೋಪಾಲನ್ ಸೇರಿದಂತೆ ಇನ್ನಿತರ ಮೆಟ್ರೋ ಅಧಿಕಾರಿಗಳು ಉಪಸ್ಥಿತರಿದ್ದರು.
