ಬೆಂಗಳೂರು, ಜ.22 www.bengaluruwire.com : ತೊಂಭತ್ತು ವರ್ಷಗಳನ್ನು ಪೂರೈಸಿರುವ ಆಚಾರ್ಯ ಪಾಠಶಾಲೆ ಸಮೂಹ ಶಿಕ್ಷಣ ಸಂಸ್ಥೆಯ ಹಳೇ ವಿದ್ಯಾರ್ಥಿಗಳ ಮೆಗಾ ಮಿಲನ ಕಾರ್ಯಕ್ರಮ 26ನೇ ತಾರೀಖು ಜರುಗಲಿದ್ದು ಇದಕ್ಕೆ ಕ್ಷಣಗಣನೆ ಆರಂಭವಾಗಿದೆ.
ಈ ಬಗ್ಗೆ ಬುಧವಾರ ಕರೆಯಲಾಗಿದ್ದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಎಪಿಎಸ್ ಸಮೂಹ ಶಿಕ್ಷಣ ಸಂಸ್ಥೆಗಳ ಅಧ್ಯಕ್ಷ ಡಾ.ವಿಷ್ಣುಭರತ್ ಅಲಮ್ ಪಲ್ಲಿ, ಅಲ್ಯುಮಿನಿ ಮೀಟ್ ಕಾರ್ಯಕ್ರಮದ ಉದ್ದೇಶ ಹಾಗೂ ವಿವರವನ್ನು ಮಾಧ್ಯಮಗಳ ಜೊತೆಗೆ ಹಂಚಿಕೊಂಡರು.
ಎನ್.ಆರ್.ಕಾಲೋನಿಯಲ್ಲಿರುವ ಎಪಿಎಸ್ ಕಾಲೇಜಿನ ಮೈದಾನದಲ್ಲಿ ಇದೇ ಜನವರಿ 26ರಂದು ಮೊದಲಿಗೆ ಕಾರ್ಯಕ್ರಮಕ್ಕೆ ನೋಂದಣಿ ಮಾಡಿಕೊಂಡ ಹಳೆಯ ವಿದ್ಯಾರ್ಥಿಗಳು ಆಗಮಿಸಿ ಸಂಜೆ 4 ಗಂಟೆಗೆ ಮೊದಲಿಗೆ ತಮ್ಮ ನಿಗಧಿತ ಸ್ಥಳದ ಬಗ್ಗೆ ಮಾಹಿತಿ ಪಡೆಯಬೇಕು. ಆನಂತರ ಶಾಲಾ ಕಾಲೇಜಿನ 15 ಸ್ಥಳಗಳಿಗೆ ಭೇಟಿ ನೀಡಿ ತಮ್ಮ ಹಳೆಯ ದಿನಗಳನ್ನು ಮೆಲಕು ಹಾಕಬಹುದು. ಸಂಜೆ 6 ರಿಂದ ರಾತ್ರಿ 9ರ ತನಕ ಎಪಿಎಸ್ ಹಳೆಯ ವಿದ್ಯಾರ್ಥಿಗಳಿಂದಲೇ ರಸಮಂಜರಿ ಕಾರ್ಯಕ್ರಮ ನಡೆಯಲಿದೆ ಎಂದು ಅವರು ವಿವರಿಸಿದರು.
ಹಳೇ ವಿದ್ಯಾರ್ಥಿಗಳು ಸೆಲಿಬ್ರೆಟಿಗಳಾದ ದೊಡ್ಡ ಪಟ್ಟಿಯೇ ಇಲ್ಲಿದೆ :
ಇದೇ ಆಚಾರ್ಯ ಪಾಠಶಾಲೆಯಲ್ಲಿ 90 ವರ್ಷಗಳಲ್ಲಿ ಲಕ್ಷಾಂತರ ವಿದ್ಯಾರ್ಥಿಗಳು ಕಲಿತಿದ್ದಾರೆ. ಅದರಲ್ಲಿ ಸಾವಿರಾರು ಜನ ವಿವಿಧ ಕ್ಷೇತ್ರಗಳಲ್ಲಿ ಉನ್ನತ ಹುದ್ದಗೇರಿದ್ದಾರೆ. ಭಾರತ ರತ್ನ ಪ್ರೊ.ಸಿ.ಎನ್.ಆರ್.ರಾವ್, ಖ್ಯಾತ ನಟರಾದ ಸೂಪರ್ ಸ್ಟಾರ್ ರಜನಿಕಾಂತ್, ಉಪೇಂದ್ರ, ಪ್ರಣಯರಾಜ ಶ್ರೀನಾಥ್, ಹೆಸರಾಂತ ಲೆಕ್ಕಪರಿಶೋಧಕ ಎ.ಪಿ.ಆಚಾರ್ಯ, ಖ್ಯಾತ ಸಂಗೀತಗಾರರಾದ ದಿವಂಗತ ಸಿ.ಆರ್.ಅಶ್ವಥ್, ಲಕ್ಕಿ ಅಲಿ, ನ್ಯಾಯಾಧೀಶರಾದ ಜಸ್ಟೀಸ್ ರಾಮಕೃಷ್ಣ, ಜಸ್ಟೀಸ್ ಕೃಷ್ಣನನ್ ನಟರಾಜನ್, ಮಾಜಿ ಕ್ರಿಕೇಟಿಗ ಸುಧಾಕರ್ ರಾವ್, ಹಿರಿಯ ರಾಜಕೀಯ ಮುಖಂಡರಾದ ಮಾಜಿ ಮೇಯರ್ ಕಟ್ಟೆ ಸತ್ಯನಾರಾಯಣ, ಶಾಸಕರಾದ ರವಿಸುಬ್ರಮಣ್ಯ, ಎಸ್.ರಘು, ಖ್ಯಾತ ಉದ್ಯಮಿಗಳಾದ ದೇಶ್ ರಾಜ್, ಬಿ.ಎಸ್.ಸುರೇಶ್ ಕುಮಾರ್, ಹಿರಿಯ ಪತ್ರಕರ್ತರಾದ ಆರ್.ಶ್ರೀಧರ್ ಶರ್ಮ, ಶ್ಯಾಮ್.ಎಸ್, ಕೀರ್ತಿ ಪ್ರಸಾದ್ ಸೇರಿದಂತೆ ಹಲವಾರು ಮಂದಿ ಎಪಿಎಸ್ ಶಾಲಾ ಕಾಲೇಜಿನಲ್ಲಿ ಕಲಿತಿದ್ದಾರೆ ಎಂಬುದು ಹೆಮ್ಮೆಯ ವಿಷಯ ಎಂದರು.
ಜ.26ರಂದು ನಡೆಯುವ ಕಾರ್ಯಕ್ರಮಕ್ಕೆ ಡಿಸೆಂಬರ್ ನಲ್ಲಿ ರಿಜಿಸ್ಟರ್ ಮಾಡಿಕೊಂಡವರಿಗೆ ಮಾತ್ರ ಅಲ್ಯುಮ್ನಿ ಕಾರ್ಯಕ್ರಮಕ್ಕೆ ಬರಲು ಅವಕಾಶವಿದೆ. ಹಳೆಯ ವಿದ್ಯಾರ್ಥಿಗಳ ಮಿಲನ ಕಾರ್ಯಕ್ರಮಕ್ಕೆ 10 ಸಾವಿರಕ್ಕೂ ಅಧಿಕ ಹಳೆಯ ವಿದ್ಯಾರ್ಥಿಗಳು ಬರಲು ಬೇಡಿಕೆ ಇಟ್ಟಿದ್ದಾರೆ. ಇವರಿಗಾಗಿ ಸದ್ಯದಲ್ಲಿಯೇ ಎರಡನೇ ಹಳೆಯ ವಿದ್ಯಾರ್ಥಿಗಳ ಕಾರ್ಯಕ್ತಮವನ್ನು ಸೋಮನಹಳ್ಳಿ ಕ್ಯಾಂಪಸ್ ನಲ್ಲಿ ಸದ್ಯದಲ್ಲೇ ಆಯೋಜಿಸುತ್ತೇವೆ. ಆಗ ಆಯೋಜಿಸುವ ಕಾರ್ಯಕ್ರಮದಲ್ಲಿ ನಟರಾದ ರಜನಿಕಾಂತ್, ಉಪೇಂದ್ರ ಸೇರಿದಂತೆ ಹಲವು ಸೆಲಬ್ರೆಟಿಗಳು ಆಗಮಿಸುತ್ತಾರೆ ಎಂದು ಡಾ.ವಿಷ್ಣುಭರತ್ ಅಲಮ್ ಪಲ್ಲಿ ಹೇಳಿದರು.
ಮೂರ್ನಾಲ್ಕು ತಲೆಮಾರಿನವರು ಓದಿದ್ದು ಎಪಿಎಸ್ ನಲ್ಲಿ :
ತಾತ, ತಂದೆ, ಮಗ ಹಾಗೆಯೇ ಅಜ್ಜಿ, ಅಮ್ಮ, ಮಗಳು, ಮರಿಮೊಮ್ಮಗಳು ಹೀಗೆ ಮೂರ್ನಾಲ್ಕು ತಲೆಮಾರು ಎಪಿಎಸ್ ಶಾಲೆ, ಕಾಲೇಜಿನಲ್ಲಿ ಓದಿದ ಇಂತಹ ಸುಮಾರು 20ಕ್ಕೂ ಹೆಚ್ಚು ಪ್ರಕರಣಗಳಿವೆ. ಅವರೆಲ್ಲರೂ ಕೂಡ ಹಳೆಯ ವಿದ್ಯಾರ್ಥಿಗಳ ಸಮ್ಮಿಲನ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ ಎಂದು ಮಾಹಿತಿ ನೀಡಿದರು.
ಇಲ್ಲಿನ ಶಿಕ್ಷಣ ವೆಚ್ಚ ಒಂದು ಲೋಟ ಕಾಫಿ ದರಕ್ಕಿಂತ ಕಡಿಮೆಯಿತ್ತು :
ಎಪಿಎಸ್ ಶಿಕ್ಷಣ ಟ್ರಸ್ಟ್ ಪ್ರಧಾನ ಕಾರ್ಯದರ್ಶಿ ಪ್ರೊ.ಎ.ಪ್ರಕಾಶ್ ಮಾತನಾಡಿ, ನಾನು ಈ ಎಪಿಎಸ್ ಸಂಸ್ಥಾಪಕ ಅನಂತಾಚಾರ್ ಪುತ್ರನಾಗಿದ್ದು, ಇಲ್ಲಿನ ಶಾಲೆಯಲ್ಲಿ 1964ರಲ್ಲಿ ಒಂದನೇ ಕ್ಲಾಸಿಗೆ ಸೇರಿಕೊಂಡೆ. ಎಪಿಎಸ್ ಶಿಕ್ಷಣ ವೆಚ್ಚ ಮೊದಲಿಂದಲೂ ಕಡಿಮೆಯಿದೆ. ಆಗ ಒಂದು ಕಾಫಿ ದರಕ್ಕಿಂತ ಸ್ಕೂಲಿನ ಶುಲ್ಕವಿತ್ತು. ಶಿಕ್ಷಕರ ಮಕ್ಕಳೆಂದರೆ ಕೇವಲ 1 ರೂ. ಶುಲ್ಕವಿರುತ್ತಿತ್ತು, ಈಗ ಇತರ ಸಂಸ್ಥೆಗಳಿಗೆ ಹೋಲಿಸಿದರೆ ನಮ್ಮಲ್ಲಿ ಶೈಕ್ಷಣಿಕ ಶುಲ್ಕ ಕಡಿಮೆಯಿದೆ ಎಂದು ಹಳೆಯ ದಿನಗಳನ್ನು ಮೆಲಕು ಹಾಕಿದರು.
ಎಪಿಎಸ್ ಯೂನಿವರ್ಸಿಟಿ ಸ್ಥಾಪಿಸುವ ಗುರಿಯಿದೆ :
“2035ನೇ ಇಸವಿಗೆ ಎಪಿಎಸ್ ಸಮೂಹ ಶಿಕ್ಷಣ ಸಂಸ್ಥೆಯು 100 ವರ್ಷಗಳನ್ನು ಆಚರಿಸಲಿದೆ. ಈ ಹಿನ್ನಲೆಯಲ್ಲಿ ನಮ್ಮ ಸಮೂಹ ಶಿಕ್ಷಣ ಸಂಸ್ಥೆಯಲ್ಲಿನ ಶಾಲಾ-ಕಾಲೇಜಿನಲ್ಲಿ ಸ್ಮಾರ್ಟ್ ಕ್ಲಾಸ್ ರೂಮ್, ಅನಾಥ ವಿದ್ಯಾರ್ಥಿಗಳನ್ನು ದತ್ತು ತೆಗೆದುಕೊಂಡು ಓದಿಸುವುದು, ವಿದ್ಯಾರ್ಥಿಗಳಿಗೆ ಹಾಸ್ಟೆಲ್ ಸೌಲಭ್ಯ ಸೇರಿದಂತೆ ಒಟ್ಟು 17 ವಿವಿಧ ಕಾರ್ಯಕ್ರಮಗಳಿಗೆ ಹಳೆಯ ವಿದ್ಯಾರ್ಥಿಗಳು ಧನ ಸಹಾಯ ನೀಡುವ ಮೂಲಕ ಆಚಾರ್ಯ ಶಿಕ್ಷಣ ಸಂಸ್ಥೆಯು ಕಡಿಮೆ ವೆಚ್ಚದಲ್ಲಿ ಸಮಾಜದ ಎಲ್ಲಾ ವರ್ಗಗಳ ವಿದ್ಯಾರ್ಥಿಗಳಿಗೆ ಗುಣಮಟ್ಟದ ಶಿಕ್ಷಣ ಒದಗಿಸುವ ಗುರಿಯಿದೆ. ಮುಂದೆ ಬಿಕಾಂ ಹಾಗೂ ಎಂಜಿನಿಯರಿಂಗ್ ಕಾಲೇಜುಗಳ ಬಗ್ಗೆ ದೊಡ್ಡ ಮಟ್ಟದ ಬ್ರಾಂಡಿಂಗ್ ಮಾಡಿ, ಸಂಸ್ಥೆಯನ್ನು ಮತ್ತಷ್ಟು ಬೆಳೆಸುವ ಉದ್ದೇಶವಿದೆ. ಸಾಧ್ಯವಾದರೆ ಭವಿಷ್ಯದಲ್ಲಿ ಎಪಿಎಸ್ ವಿಶ್ವವಿದ್ಯಾಲಯ (APS University) ಸ್ಥಾಪಿಸುವ ಗುರಿಯಿದೆ” ಎಂದು ಪ್ರೊ.ಎ.ಪ್ರಕಾಶ್ ಅವರು ಸಂಸ್ಥೆಯ ಭವಿಷ್ಯದ ಆಲೋಚನೆಗಳನ್ನು ಹಂಚಿಕೊಂಡರು.
ವಿದ್ಯಾರ್ಥಿಗಳಿಂದ ಹಳೆಯ ವಿದ್ಯಾರ್ಥಿಗಳ ಮೆಗಾ ಅಲ್ಯುಮ್ನಿ ಮೀಟ್ ಅಪ್ (Mega Alumini Meet UP) ಕಾರ್ಯಕ್ರಮವನ್ನು ಎಪಿಎಸ್ ಶಿಕ್ಷಣ ಟ್ರಸ್ಟ್ ಅಧ್ಯಕ್ಷರಾದ ಡಾ.ವಿಷ್ಣುಭರತ್ ಅಲಮ್ ಪಲ್ಲಿ ನೇತೃತ್ವದಲ್ಲಿ ಆಯೋಜಿಸಲಾಗಿದೆ. ಹಳೇ ವಿದ್ಯಾರ್ಥಿಗಳ ಅಪೂರ್ವ ಸಮಾಗಮ ಕಾರ್ಯಕ್ರಮ ಇದಾಗಿದ್ದು, ಈಗಾಗಲೇ ಸಾವಿರಾರು ವಿದ್ಯಾರ್ಥಿಗಳು ಈ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲು ನೋಂದಾಯಿಸಿಕೊಂಡಿದ್ದಾರೆ. ಇದಕ್ಕಾಗಿ ಎಪಿಎಸ್ ಸಂಸ್ಥೆಯು ಭರದಿಂದ ಸಿದ್ಧತೆ ಮಾಡಿಕೊಳ್ಳುತ್ತಿದೆ.
1934ರಲ್ಲಿ ಪ್ರಾರಂಭವಾದ ಎಪಿಎಸ್ ಶಿಕ್ಷಣ ಟ್ರಸ್ಟ್ (Acharya Pathasala Educational Trust) 90 ವರ್ಷಗಳಲ್ಲಿ ಸಾವಿರಾರು ವಿದ್ಯಾರ್ಥಿಗಳಿಗೆ ವಿದ್ಯಾದಾನ ಮಾಡಿದೆ. ಎನ್.ಆರ್.ಕಾಲೋನಿ, ಸೋಮನಹಳ್ಳಿ ಈ ಎರಡೂ ಕ್ಯಾಂಪಸ್ ಗಳಲ್ಲಿ ಪ್ರಾಥಮಿಕ ಶಾಲೆಯಿಂದ ಹಿಡಿದು ಕಾಲೇಜಿನ ತನಕ ಒಟ್ಟು 14 ಶಿಕ್ಷಣ ಸಂಸ್ಥೆಗಳನ್ನು ಹೊಂದಿದ್ದು ಒಟ್ಟಾರೆ ಆರು ಸಾವಿರ ವಿದ್ಯಾರ್ಥಿಗಳು ಪ್ರಸ್ತುತ ಶಿಕ್ಷಣ ಪಡೆಯುತ್ತಿದ್ದಾರೆ.
ಎಪಿಎಸ್ ಶಿಕ್ಷಣ ಸಂಸ್ಥೆಯ ಸಾಧನೆಗಳಿವು :
* APS ಪಬ್ಲಿಕ್ ಸ್ಕೂಲ್ ಪ್ರಾರಂಭದಿಂದಲು ಶೇ.100ರಷ್ಟು ಫಲಿತಾಂಶಗಳನ್ನು ನೀಡುತ್ತಿದೆ.
* APS ವಾಣಿಜ್ಯ ಕಾಲೇಜು : ಕಾನೂನು, ಹಣಕಾಸು ಮತ್ತು ಲೆಕ್ಕಶಾಸ್ತ್ರದಂತಹ ಕ್ಷೇತ್ರಗಳಲ್ಲಿ ಉನ್ನತ ವೃತ್ತಿಪರರನ್ನು ಸಮಾಜಕ್ಕೆ ನೀಡಿದೆ.
* APS ಕಾಲೇಜ್ ಆಫ್ ಇಂಜಿನಿಯರಿಂಗ್ : ಅತ್ಯುತ್ತಮ ಉದ್ಯೋಗ ಅವಕಾಶಗಳನ್ನು ಮತ್ತು ಉನ್ನತ- ಶ್ರೇಣಿಯ ಶೈಕ್ಷಣಿಕ ಫಲಿತಾಂಶಗಳನ್ನು ನೀಡುತ್ತಿದೆ.
* APS ಕಲೆ ಮತ್ತು ವಿಜ್ಞಾನ ಕಾಲೇಜು : ಜಿಲ್ಲಾ ಮಟ್ಟದ ಕುಸ್ತಿಯಲ್ಲಿ ಚಿನ್ನದ ಪದಕ ಪಡೆದಿದೆ.
* APS ಸಂಜೆ ಕಲೆ ಮತ್ತು ವಾಣಿಜ್ಯ ಕಾಲೇಜು : ಕರ್ನಾಟಕದಲ್ಲಿ ಮೊದಲ ಸಂಜೆ ಕಾಲೇಜು ಆಗಿದೆ.
ಎಪಿಎಸ್ ನಾವೀನ್ಯತೆ ಮತ್ತು ಒಳಗೊಳ್ಳುವಿಕೆಗೆ ಬದ್ಧತೆ :
ಆಚಾರ್ಯ ಪಾಠಶಾಲೆ ಹೊಸ ಆವಿಷ್ಕಾರದ ಶಿಕ್ಷಣಕ್ಕೆ ಬದ್ಧವಾಗಿದೆ. ವಿದ್ಯಾರ್ಥಿಗಳಿಗೆ ಕೃತಕ ಬುದ್ಧಿಮತ್ತೆ, 30 ಪ್ರಿಂಟಿಂಗ್, ರೊಬೊಟಿಕ್ಸ್, ವಿಎಲ್ಎಸ್ ಐ (VLSI) ಮತ್ತು ಗಣಿತ ಲ್ಯಾಬ್‌ಗಳಂತಹ ಅತ್ಯಾಧುನಿಕ ಕ್ಷೇತ್ರಗಳಲ್ಲಿ ತರಬೇತಿಯನ್ನು ನೀಡುತ್ತಿದೆ. ಇದು ಎಪಿಎಸ್ ವಿದ್ಯಾರ್ಥಿಗಳು ಭವಿಷ್ಯದ ಸವಾಲುಗಳನ್ನು ಎದುರಿಸಲು ಸಜ್ಜಾಗಿದ್ದಾರೆ ಎಂಬುದನ್ನು ಖಚಿತಪಡಿಸುತ್ತದೆ.
ಎಪಿಎಸ್ ಆವಿಷ್ಕಾರ ಯೋಜನೆಗಳು :
ಡಿಆರ್‌ಡಿಒ ಸಹಯೋಗದೊಂದಿಗೆ ಎಪಿಎಸ್ ತಂತ್ರಜ್ಞಾನ ಕ್ಷೇತ್ರದಲ್ಲಿಯೂ ಮುನ್ನಡೆಯುತ್ತಿದೆ. ಎಪಿಎಸ್ ಗೆ “ಅಡ್ವಾನ್ಸ್ ಹುಮನಾಯ್ಡ್ ರೋಬೋಟ್ ಫಾರ್ ಸರ್ವೈಲೆನ್ಸ್ & ಸಿಚುಯೇಶನ್ ಅವೇರ್ನೆಸ್” (Advanced Humanoid Robot for Suveveillance & Situation Awareness) ಅಭಿವೃದ್ಧಿಗಾಗಿ ಒಂದು ಯೋಜನೆಯನ್ನು ನೀಡಲಾಗಿದೆ. ಆ ಯೋಜನೆ ಪ್ರಸ್ತುತ ಪ್ರಗತಿಯಲ್ಲಿದೆ.
ಸುದ್ದಿಗೋಷ್ಠಿಯಲ್ಲಿ ಖ್ಯಾತ ಮನಃಶಾಸ್ತ್ರಜ್ಞರು ಹಾಗೂ ಎಪಿಎಸ್ ಟ್ರಸ್ಟಿಗಳಾದ ಡಾ.ಶ್ರೀಧರ್, ನಾಗರಾಜ್, ಕೃಷ್ಣಸ್ವಾಮಿ, ಎ.ಆರ್.ಆಚಾರ್ಯ, ಎ.ಪಿ.ಆಚಾರ್ಯ, ರಾಮ್ ಪ್ರಸಾದ್, ಅಲ್ಯುಮ್ನಿ ಕಾರ್ಯಕ್ರಮದ ಸಂಯೋಜಕ ಕಿರಣ್ ಕುಮಾರ್.ಪಿ.ಎಲ್ ಸೇರಿದಂತೆ ಮತ್ತಿತರರು ಉಪಸ್ಥಿತರಿದ್ದರು.
“ಬೆಂಗಳೂರು ವೈರ್” ಪ್ರತಿ ಸುದ್ದಿ ನಿತ್ಯ ನಿರಂತರವಾಗಿ, ಉಚಿತವಾಗಿ ನಿಮಗೆ ಲಭ್ಯವಾಗಲಿದೆ. ಇದಕ್ಕಾಗಿ ಇಂದೇ ನಿಮಿಷದೊಳಗಾಗಿ Subscribe ಆಗಿ. ಈ ಡಿಜಿಟಲ್ ವೆಬ್ ನ್ಯೂಸ್ ಪೋರ್ಟೆಲ್ಲಿನ ಸೋಶಿಯಲ್ ಮೀಡಿಯಾ ಪೇಜ್ ಹಾಗೂ Google News ಗಳಿಗೆ ಉಚಿತವಾಗಿ Subscribe ಆಗಲು Facebook, Telegram, Twitter, Youtube, Whatsup Channel ಗೆ ಜಾಯಿನ್ ಆಗಲು ಇವುಗಳ ಲಿಂಕ್ ಮೇಲೆ ಕ್ಲಿಕ್ ಮಾಡಿ.
