Energy News | ದೇಶದ ವಿದ್ಯುತ್ ವಲಯದ ಹೊಸ ಸಾಧನೆ : ಮೇ.30 ರಂದು ದಾಖಲೆಯ 250 ಗಿಗಾವ್ಯಾಟ್ ಬೇಡಿಕೆ ಪೂರೈಸಿದ ಇಂಧನ ಕ್ಷೇತ್ರ

ನವದೆಹಲಿ, ಮೇ.31 www.bengaluruwire.com : ಆರ್ಥಿಕ ಅಭಿವೃದ್ಧಿ, ಔದ್ಯೋಗಿಕ, ತಾಂತ್ರಿಕ ಮತ್ತಿತರ ಕ್ಷೇತ್ರಗಳಲ್ಲಿ ಉನ್ನತ ಪ್ರಗತಿ ಸಾಧಿಸುತ್ತಿರುವ ದೇಶದಲ್ಲಿ ಮೇ.30 ಮತ್ತೊಂದು ದಾಖಲೆಯನ್ನು ಸಾಧಿಸಿದೆ. ಭಾರತದಲ್ಲಿ 250 ಗಿಗಾವ್ಯಾಟ್ ದಾಖಲೆಯ ಗರಿಷ್ಠ ವಿದ್ಯುತ್ ಬೇಡಿಕೆ (Maximum Power Demand)ಯನ್ನು ಪೂರೈಸಿದೆ. ಆ ಮೂಲಕ ಇಂಧನ ಕ್ಷೇತ್ರದಲ್ಲಿನ ತನ್ನ ಸಾಮರ್ಥ್ಯವೇನೆಂದು ಜಗತ್ತಿಗೇ ತೋರಿಸಿದೆ.

ಅಖಿಲ ಭಾರತ ಸೌರೇತರ ಬೇಡಿಕೆಯು (Non Solar Demand) ಮೇ 29 ರಂದು ಸಾರ್ವಕಾಲಿಕ ಗರಿಷ್ಠ 234.3 ಗಿಗಾವ್ಯಾಟ್ ಗೆ ಮುಟ್ಟಿದೆ. ಉತ್ತರ ಭಾರತದ ಹಲವು ರಾಜ್ಯಗಳಲ್ಲಿ ಉಷ್ಣಾಂಶ ಅತಿ ಹೆಚ್ಚಾಗಿದ್ದು, ಹವಾಮಾನ ಸಂಬಂಧಿತ ಹೊರೆಗಳ ಸಂಯೋಜಿತ ಪರಿಣಾಮವನ್ನು ಈ ವಿದ್ಯುತ್ ಬೇಡಿಕೆ ಪ್ರತಿಬಿಂಬಿಸುತ್ತದೆ. ಮತ್ತು ಈ ಪ್ರದೇಶಗಳಲ್ಲಿ ಬೆಳೆಯುತ್ತಿರುವ ಕೈಗಾರಿಕಾ ಮತ್ತು ವಸತಿ ವಿದ್ಯುತ್ ಬಳಕೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ಮೇ 30 ರಂದು, ಉತ್ತರ ಪ್ರದೇಶದಲ್ಲಿ ಮೇ.30ರಂದು ವಿದ್ಯುತ್ ಬೇಡಿಕೆ ಸಾರ್ವಕಾಲಿಕ ಗರಿಷ್ಠ 86.7 ಗಿಗಾವ್ಯಾಟ್ ಅನ್ನು ತಲುಪಿ, ದಾಖಲೆಯ ಬೇಡಿಕೆಯನ್ನು ಸಾಧಿಸಿತು. ಆದರೆ ದೇಶದ ಪಶ್ಚಿಮ ಪ್ರದೇಶಗಳಲ್ಲಿ ತನ್ನ ಗರಿಷ್ಠ ಬೇಡಿಕೆಯಾದ 74.8 ಗಿಗಾವ್ಯಾಟ್ ಅನ್ನು ಮುಟ್ಟಿತು. (ಒಂದು ಗಿಗಾವ್ಯಾಟ್ ಎಂಬುದು ಒಂದು ಸಾವಿರ ಮೆಗಾವ್ಯಾಟ್ ಗೆ ಸಮವಾಗಿದೆ.)

ಹೆಚ್ಚುವರಿಯಾಗಿ, ಅಖಿಲ-ಭಾರತದ ಉಷ್ಣ ವಿದ್ಯುತ್ ಸ್ಥಾವರದ ಉತ್ಪಾದನೆಯು, ವಿಶೇಷವಾಗಿ ಸೌರವಿದ್ಯುತ್ ಪೂರೈಸಲಾಗದ ಸಮಯದಲ್ಲಿ, 176 GW (ಎಕ್ಸ್-ಬಸ್) ಗರಿಷ್ಠ ಸಾರ್ವಕಾಲಿಕ ಗರಿಷ್ಠ ಮಟ್ಟವನ್ನು ತಲುಪಿ ಆ ವಿಷಯದಲ್ಲೂ ಮೈಲುಗಲ್ಲು ಸಾಧಿಸಿದೆ. ಸೆಕ್ಷನ್-11 ರ ಕಾರ್ಯತಂತ್ರದ ಅನುಷ್ಠಾನದ ಪ್ರಕಾರ ಆಮದು ಮಾಡಿದ ಕಲ್ಲಿದ್ದಲು ಆಧಾರಿತ ಸ್ಥಾವರಗಳಿಂದ ಮತ್ತು ಅನಿಲ ಆಧಾರಿತ ಸ್ಥಾವರಗಳಿಂದ ವಿದ್ಯುತ್ ಉತ್ಪಾದನೆಯನ್ನು ಗರಿಷ್ಠಗೊಳಿಸಲು ಸಾಧ್ಯವಾಗಿದೆ ಎಂದು ಕೇಂದ್ರ ಇಂಧನ ಸಚಿವಾಲಯ ತಿಳಿಸಿದೆ.

ಈ ವಿದ್ಯುತ್ ಬೇಡಿಕೆಯು ಭಾರತದ ಉಷ್ಣ ವಿದ್ಯುತ್ ಸ್ಥಾವರಗಳ ಗಮನಾರ್ಹ ಸಾಮರ್ಥ್ಯ ಮತ್ತು ಕಾರ್ಯಾಚರಣೆಯ ದಕ್ಷತೆಯನ್ನು ಮತ್ತಷ್ಟು ಒತ್ತಿಹೇಳುತ್ತದೆ. ಅಲ್ಲದೆ ಉಷ್ಣ ವಿದ್ಯುತ್ ಸ್ಥಾವರಗಳು ರಾಷ್ಟ್ರದ ಇಂಧನ ಮೂಲದ ಬೆನ್ನೆಲುಬಾಗಿರುವುದಕ್ಕೆ ಸಾಕ್ಷಿಯಾಗಿದೆ. ನವೀಕರಿಸಬಹುದಾದ ಇಂಧನ ಮೂಲಗಳಿಂದ ವಿಶೇಷವಾಗಿ ಸೌರ ಸಮಯದಲ್ಲಿ ಸೌರಶಕ್ತಿ ಮತ್ತು ಸೌರವಲ್ಲದ ಸಮಯದಲ್ಲಿ ಪವನಶಕ್ತಿಯು ವಿದ್ಯುತ್ ಬೇಡಿಕೆಯನ್ನು ಪೂರೈಸುವಲ್ಲಿ ಬಹಳ ಮಹತ್ವದ್ದಾಗಿದೆ.

ಈ ಸಾಧನೆಗಳು ಸರ್ಕಾರಿ ಏಜೆನ್ಸಿಗಳು, ವಿದ್ಯುತ್ ಉತ್ಪಾದನಾ ಕಂಪನಿಗಳು ಮತ್ತು ಗ್ರಿಡ್ ಆಪರೇಟರ್‌ಗಳು ಸೇರಿದಂತೆ ವಿದ್ಯುತ್ ವಲಯದಲ್ಲಿನ ವಿವಿಧ ಪಾಲುದಾರರ ಸಂಘಟಿತ ಪ್ರಯತ್ನಗಳಿಗೆ ಸಾಕ್ಷಿಯಾಗಿದೆ. ಉತ್ಪಾದನಾ ಸಾಮರ್ಥ್ಯವನ್ನು ಹೆಚ್ಚಿಸುವ, ಸಂಪನ್ಮೂಲ ಹಂಚಿಕೆಯನ್ನು ಉತ್ತಮಗೊಳಿಸುವ ಮತ್ತು ನೀತಿಗಳನ್ನು ಅನುಷ್ಠಾನಗೊಳಿಸುವ ಅವುಗಳ ಬದ್ಧತೆಯು ದೇಶದ ಇಂಧನ ಅಗತ್ಯಗಳನ್ನು ಪೂರೈಸುವಲ್ಲಿ ಪ್ರಮುಖವಾಗಿದೆ.