ನವದೆಹಲಿ, ಅ.03 www.bengaluruwire.com : ಕೇಂದ್ರ ಪೆಟ್ರೋಲಿಯಮ್ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ (MOPNG)ವು ದೇಶೀಯ ಗೃಹ ಬಳಕೆಯ ಎಲ್ ಪಿಜಿ ಗ್ಯಾಸ್ ವಿತಕರ ಕಮಿಷನ್ ಮೊತ್ತವನ್ನು ಏರಿಕೆ ಮಾಡಿದೆ. ಕೇಂದ್ರ ಸರ್ಕಾರದ ಈ ಕ್ರಮವನ್ನು ಭಾರತೀಯ ಎಲ್ ಪಿಜಿ ವಿತರಕರ ಒಕ್ಕೂಟ ಹೃತ್ಪೂರ್ವಕವಾಗಿ ಸ್ವಾಗತಿಸಿದೆ.
ಈ ಬಗ್ಗೆ ಮಂಗಳವಾರ ದೇಶಾದ್ಯಂತ ಇರುವ ಎಲ್ ಪಿಜಿ ವಿತರಕರಿಗೆ ಪತ್ರ ಬರೆದಿರುವ ಒಕ್ಕೂಟ, ನಿಮ್ಮ ಕಮಿಷನ್ ದರಗಳಲ್ಲಿ ಗಮನಾರ್ಹವಾದ ಹೆಚ್ಚಳವಾಗಿದ್ದಕ್ಕೆ ಹೃತ್ಪೂರ್ವಕ ಅಭಿನಂದನೆಗಳನ್ನು ತಿಳಿಸಿದೆ. ಅಲ್ಲದೆ ವಿತರಕರ ಗಳಿಕೆಯಲ್ಲಿ ಗಣನೀಯವಾದ ಉತ್ತೇಜನ ನೀಡಿದಂತಾಗಿದೆ. ರಾಷ್ಟ್ರದಾದ್ಯಂತ ಮನೆಗಳಿಗೆ ಎಲ್‌ಪಿಜಿಯ ಸ್ಥಿರ ಪೂರೈಕೆಯನ್ನು ಖಾತ್ರಿಪಡಿಸುವಲ್ಲಿ ನಿಮ್ಮ ಪಾತ್ರದ ಪ್ರಾಮುಖ್ಯತೆಯನ್ನು ಪುನರುಚ್ಚರಿಸುತ್ತದೆ ಎಂದು ಪತ್ರದಲ್ಲಿ ಹೇಳಿದೆ.
14.2 ಕೆಜಿ ರೀಫಿಲ್‌ನ ಕಮಿಷನ್ ಅನ್ನು 64.84 ರೂ. ನಿಂದ 73.08 ರೂ.ಗೆ ಹೆಚ್ಚಿಸಲಾಗಿದೆ. ಅಂದರೆ ಒಟ್ಟಾರೆ 8.24 ರೂ. ಏರಿಕೆಯಾಗಿದೆ. ಇದಲ್ಲದೆ, 5 ಕೆಜಿ ಸಿಲಿಂಡರ್ ವೊಂದರ ಕಮಿಷನ್ ಪ್ರತಿ ರೀಫಿಲ್‌ಗೆ 32.42 ರೂ.ನಿಂದ 36.54 ರೂ.ಗೆ ಏರಿಕೆ ಮಾಡಲಾಗಿದೆ. ಇದರಿಂದ ಒಟ್ಟಾರೆ ಎಲ್ ಪಿಜಿ ಸಿಲಿಂಡರ್ ವಿತರಕರಿಗೆ ಕಮಿಷನ್ 4.12 ರೂ. ನಷ್ಟು ಪ್ರೋತ್ಸಾಹದಾಯಕ ಏರಿಕೆಯನ್ನು ಪ್ರತಿಬಿಂಬಿಸುತ್ತದೆ. ಗೃಹ ಬಳಕೆ ಸಿಲಿಂಡರ್ ವಿತರಕರಣ ಕಮಿಷನ್ ಏರಿಕೆಯಿಂದ ರಿಟೇಲ್ ಆಗಿ ವಿತರಿಸುವ ಎಲ್ ಪಿಜಿ ಸಿಲಿಂಡರ್ ದರದಲ್ಲಿ ಏರಿಕೆಯಾಗಿಲ್ಲ ಎಂದು ಪೆಟ್ರೋಲಿಯಂ ಸಚಿವಾಲಯ ಎಲ್ಲಾ ಪೆಟ್ರೋಲಿಯಮ್ ಕಂಪನಿಗಳಿಗೆ ಅ.3 ರಂದು ಬರೆದ ಪತ್ರದಲ್ಲಿ ತಿಳಿಸಿದೆ.
ಬೆಂಗಳೂರಿನಲ್ಲಿ ಪ್ರಸ್ತುತ 14.2 ಕೆಜಿ ಎಲ್ ಪಿಜಿ ಗೃಹ ಬಳಕೆ ಸಿಲಿಂಡರ್ ಬೆಲೆ 905.50 ರೂ.ನಷ್ಟಿದೆ. ಹಾಗೆಯೇ 5 ಕೆಜಿ ತೂಕದ ಎಲ್ ಪಿಜಿ ಗ್ಯಾಸ್ ಬೆಲೆ 336 ರೂ.ನಷ್ಟಿದೆ.
