ಬೆಂಗಳೂರು, ಏ.26 www.bengaluruwire.com : ರಾಜ್ಯದಲ್ಲಿ ವಿಧಾನಸಭಾ ಚುನಾವಣೆಗೆ ದಿನಗಣನೆ ಆರಂಭವಾಗಿದೆ. ಇದರ ಬೆನ್ನಲ್ಲೇ ಚುನಾವಣಾ ಆಯೋಗ ಇಂದು ಅಂತಿಮ ಮತದಾರರ ಪಟ್ಟಿಯನ್ನು ಪ್ರಕಟಿಸಿದ್ದು, ರಾಜ್ಯದಲ್ಲಿ ಒಟ್ಟಾರೆ 5,30,85,566 ಮತದಾರರಿದ್ದಾರೆ ಎಂದು ಆಯೋಗ ತಿಳಿಸಿದೆ.
ನಗರದಲ್ಲಿ ಗುರುವಾರ ಮುಖ್ಯ ಚುನಾವಣಾಧಿಕಾರಿಗಳ ಕಚೇರಿಯಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ
ಮುಖ್ಯ ಚುನಾವಣಾಧಿಕಾರಿ ಮನೋಜ್ ಕುಮಾರ್ ಮೀನಾ, ಅಂತಿಮ ಮತದಾರರ ಪಟ್ಟಿ ಪ್ರಕಟವಾಗಿದ್ದು, ಒಟ್ಟು ಮತದಾರರ ಸಂಖ್ಯೆ 5,31,33,055 ಇದ್ದು, 2,66,82156 ಪುರುಷರ ಮತದಾರರು, 2,63,98484 ಮಹಿಳಾ ಮತದಾರರು, 4929 ಇತರೆ ಇದ್ದಾರೆ. ಅದಕ್ಕೆ ಅಂತಿಮವಾಗಿ ನೀಡಿದ ಸಮಯದಲ್ಲಿ 16,04,285 ಹೊಸ ಸೇರ್ಪಡೆ ಮಾಡಲಾಗಿದೆ. ಸೇವಾ ಮತದಾರರು 47,488 ಇದ್ದರೆ, 11,71,558 ಯುವ ಮತದಾರರ ಸಂಖ್ಯೆಯಿದೆ. ಒಟ್ಟಾರೆ ಜನ ಸಂಖ್ಯೆಯಲ್ಲಿ 70.15% ಮಂದಿ ಮತದಾನಕ್ಕೆ ಅರ್ಹವಾಗಿದ್ದಾರೆ ಎಂದು ಅವರು ಹೇಳಿದ್ದಾರೆ.
ರಾಜ್ಯದಲ್ಲಿ 58,545 ಮತದಾನ ಕೇಂದ್ರವಿರಲಿದೆ. ಅಲ್ಲದೆ ಹೆಚ್ಚುವರಿಯಾಗಿ 263 ಹೆಚ್ಚುವರಿ ಮತಕೇಂದ್ರಗಳ ನಿರ್ಮಾಣ ಮಾಡಲಾಗಿದೆ. ಮತದಾರರ ಅನುಕೂಲಕ್ಕೆ ಆ್ಯಪ್ ಸಿದ್ಧಪಡಿಸಲಾಗಿದೆ. ಪ್ರತಿ 15 ನಿಮಿಷಕ್ಕೊಮ್ಮೆ ಮಾಹಿತಿ ಅಪಡೇಟ್ ಆಗಲಿದೆ ಎಂದು ತಿಳಿಸಿದ್ದಾರೆ.
1,15,709 ಇವಿಎಮ್ ಹಾಗೂ 89,379 – ವಿವಿ ಪ್ಯಾಟ್ ಅನ್ನು ಚುನಾವಣೆಗೆ ಬಳಕೆ ಮಾಡಲಾಗುತ್ತದೆ. 80 ವರ್ಷ ಮೇಲ್ಪಟ್ಟ ಮತದಾರರು ಒಟ್ಟಾರೆ 12,15,920 ಮಂದಿಯಿದ್ದು ಅದರಲ್ಲಿ 80,250 ಮತದಾರರು ಮನೆಯಿಂದಲೇ ಮತದಾನ ಆಯ್ದುಕೊಂಡಿದ್ದಾರೆ ಹಾಗೂ ವಿಕಲಚೇತನರು 19,279 ಇದ್ದು, ಇವರು ಮನೆಯಿಂದಲೇ ಏಪ್ರಿಲ್ 29 ರಿಂದ ಮೇ 6ರ ವರೆಗೆ ಮನೆಯಿಂದಲೇ ಮತದಾನಕ್ಕೆ ಅವಕಾಶವಿರಲಿದೆ. ಒಟ್ಟು 3,048 ಎನ್ ಆರ್ ಐ (NRI) ಮತದಾರರಿದ್ದಾರೆ.
ಜೆಡಿಎಸ್ ಅಭ್ಯರ್ಥಿಗೆ ವಿ.ಸೋಮಣ್ಣ ಆಮಿಷ ಒಡ್ಡಿದ ಆರೋಪ : ಆಯೋಗದಿಂದ ತನಿಖೆ
ಮಾಜಿ ಸಚಿವ ವಿ.ಸೋಮಣ್ಣ ಚಾಮರಾಜನಗರ ಕ್ಷೇತ್ರದ ಜೆಡಿಎಸ್ ಅಭ್ಯರ್ಥಿ ಮಲ್ಲಿಕಾರ್ಜುನ ಸ್ವಾಮಿ, ಚುನಾವಣೆ ಕಣದಿಂದ ಹಿಂದೆ ಸರಿಯಲು ಆಮಿಣ ಒಡ್ಡಿರುವ ವಿಚಾರದ ಬಗ್ಗೆ ಮಾಧ್ಯಮದವರ ಪ್ರಶ್ನೆಗೆ ಮನೋಜ್ ಕುಮಾರ್ ಮೀನಾ ಉತ್ತರಿಸುತ್ತಾ, ಬಿಜೆಪಿ ಅಭ್ಯರ್ಥಿ ವಿ.ಸೋಮಣ್ಣ, ಜೆಡಿಎಸ್ ಅಭ್ಯರ್ಥಿಗೆ ಚುನಾವಣಾ ಕಣದಿಂದ ಹಿಂದೆ ಸರಿಯಲು ಆಮಿಷ ಒಡ್ಡಿದ ಆರೋಪಕ್ಕೆ ಸಂಬಂಧಿಸಿದಂತೆ ತನಿಖೆ ನಡೆಸಿ ವರದಿ ನೀಡಲು ಸ್ಥಳೀಯ ಚುನಾವಣಾ ಅಧಿಕಾರಿಗಳಿಗೆ ಸೂಚನೆ ನೀಡಲಾಗಿದೆ. ಈ ಕುರಿತು ಚುನಾವಣಾ ಅಧಿಕಾರಿಗಳು ಪರಿಶೀಲನೆ ನಡೆಸುತ್ತಿದ್ದಾರೆ, ಅಧಿಕೃತ ಅಭ್ಯರ್ಥಿ ದೂರು ನೀಡಿಲ್ಲ, ಸೋಮಣ್ಣ ಮೊಬೈಲ್ ಆಡಿಯೋ ಅಸಲಿಯತ್ತಿನ ಬಗ್ಗೆ ಪರಿಶೀಲನೆ ಮಾಡಬೇಕಿದೆ. ಈ ಕುರಿತು ಇಬ್ಬರಿಗೂ ನೋಟಿಸ್ ನೀಡುತ್ತೇವೆ. ಅವರ ಹೇಳಿಕೆ ನೀಡಿದ ಬಳಿಕ ಪರಿಶೀಲನೆ ನಡೆಸುತ್ತೇವೆ. ಅಲ್ಲದೆ ಸ್ವಯಂಪ್ರೇರಿತ ದೂರು ದಾಖಲಿಸುವ ಕುರಿತು ಪರಿಶೀಲನೆ ನಡೆಸುತ್ತೇವೆ ಎಂದು ಸಿಇಒ ಮನೋಜ್ ಕುಮಾರ್ ಮೀನಾ ಹೇಳಿದ್ದಾರೆ.
ಚುನಾವಣಾ ನಿಯಮ ಉಲ್ಲಂಘನೆ ದೂರುಗಳ ವಿವರ :
ಚುನಾವಣಾ ನಿಯಮ ಉಲ್ಲಂಘಿಸಿದ ಪ್ರಕರಣದಲ್ಲಿ ಒಟ್ಟು ಒಟ್ಟು 673 ಕೇಸ್ ಗಳು ದಾಖಲಿಸಲಾಗಿದೆ. ರ್ಯಾಲಿ,ಸಾರ್ವಜನಿಕ ಸಭೆ,ಅನಧಿಕೃತ ಪ್ರಚಾರ ಮಾಡಿರುವ 53 ಪ್ರಕರಣ ದಾಖಲು. ಗುಂಪು ಘರ್ಷಣೆ 15 ಕೇಸ್, ಧಾರ್ಮಿಕ ಸಂಸ್ಥೆಗಳ ದುರುಪಯೋಗ 15 ಕೇಸ್, ಅನಧಿಕೃತ ಧ್ವನಿವರ್ಧಕ ಬಳಕೆ,ವಾಹನ ಬಳಕೆ 34 ಕೇಸ್ ದಾಖಲು, ದ್ವೇಷ ಬಿತ್ತುವ ಭಾಷಣ ಮಾಡಿರುವವರ ವಿರುದ್ಧ ಐದು ಕೇಸ್ ದಾಖಲು, ಕರ್ನಾಟಕ ಓಪನ್ ಪ್ಲೇಸ್ ನಿಯಮ ಉಲ್ಲಂಘನೆ 75 ಕೇಸ್ ದಾಖಲು,
ಮತದಾರರಿಗೆ ಹಣ ಹಂಚಿಕೆ 309 ಕೇಸ್ ದಾಖಲು, ಸಾಮಾಜಿಕ ಜಾಲತಾಣ ಉಲ್ಲಂಘನೆ ಕುರಿತು 34 ಕೇಸ್ ದಾಖಲು ಹಾಗೂ ಉಳಿದಂತೆ ಬೇರೆ ಚುನಾವಣಾ ನಿಯಮಗಳ ಉಲ್ಲಂಘನೆ ಬಗ್ಗೆ 50 ಕೇಸ್ ದಾಖಲಾಗಿದೆ.
ಕಣದಲ್ಲಿರುವ ಅಭ್ಯರ್ಥಿಗಳೆಷ್ಟು? :
ರಾಜ್ಯದಲ್ಲಿ ಒಟ್ಟು 2,613 ಅಭ್ಯರ್ಥಿಗಳು ಚುನಾವಣಾ ಕಣದಲ್ಲಿದ್ದಾರೆ, ಪುರುಷರು – 2,427, ಮಹಿಳೆಯರು – 185, ಇತರರು – 1 ಇದ್ದಾರೆ. ರಾಜ್ಯದಲ್ಲಿ ಅತಿ ಕಡಿಮೆ ಅಭ್ಯರ್ಥಿಗಳಿರುವ ಕ್ಷೇತ್ರಗಳು – 5 ಜನ ಅಭ್ಯರ್ಥಿಗಳಿರುವ ಕ್ಷೇತ್ರಗಳೆಂದರೆ, ಯಮಕನಮರಡಿ (st), ದೇವದುರ್ಗ (st), ತೀರ್ಥಹಳ್ಳಿ, ಕುಂದಾಪುರ, ಕಾಪು, ಮಂಗಳೂರು, ಬಂಟ್ವಾಳ ಆಗಿದೆ. ಇನ್ನು ಅತಿಹೆಚ್ಚು ಅಂದರೆ 24 ಜನ ಅಭ್ಯರ್ಥಿಗಳಿರುವ ವಿಧಾನಸಭಾ ಕ್ಷೇತ್ರವೆಂದರೆ ಬಳ್ಳಾರಿ ನಗರವಾಗಿದೆ. ಈ ಬಾರಿ 11,71,558 ಯುವ ಮತದಾರರಿದ್ದಾರೆ. ಒಂದು ವಿವಿ ಪ್ಯಾಟ್ ನಲ್ಲಿ NOTA ಸೇರಿದಂತೆ 16 ಆಯ್ಕೆಗಳು ಇರಲಿದೆ. 15ಕ್ಕಿಂತ ಹೆಚ್ಚಿನ ಅಭ್ಯರ್ಥಿಗಳು ಕಣದಲ್ಲಿದ್ದರೆ ಹೆಚ್ಚುವರಿ ಪ್ಯಾಟ್ ಬಳಕೆ ಮಾಡಲಿದ್ದಾರೆ. ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ 10,808 ಅತಿ ಹೆಚ್ಚು 80 ವರ್ಷ ಮೇಲ್ಪಟ್ಟ ಮತದಾರರಿದ್ದಾರೆ.
ಚುನಾವಣಾ ಆಯೋಗ ಮೇ.10ರ ಬುಧವಾರ ಮತದಾನ ಸಮಯವನ್ನು ಬೆಳಗ್ಗೆ 7ರಿಂದ ಸಂಜೆ 6:30ರ ತನಕ ನಿಗದಿಪಡಿಸಿದೆ.
