ಬೆಂಗಳೂರು, ಏ.21 www.bengaluruwire.com : ಸಾರಿಗೆ ಅಧಿಕಾರಿಯೊಬ್ಬರ ಅಚಾತುರ್ಯದಿಂದ ರಾಜ್ಯ ಮಾಧ್ಯಮ ಪ್ರಮಾಣಿಕರಣ ಮತ್ತು ದೃಢೀಕರಣ ಸಮಿತಿ (MCMC) ಸದಸ್ಯ ಕಾರ್ಯದರ್ಶಿ ಹಾಗೂ ವಾರ್ತಾ ಇಲಾಖೆ ನಿರ್ದೇಶಕ ಮುರುಳೀಧರ್ ಅವರ ವಾಹನವನ್ನೇ ಜಪ್ತಿ ಮಾಡಿದ ಘಟನೆ ಶುಕ್ರವಾರ ನಗರದಲ್ಲಿ ನಡೆದಿದೆ.
ಕೆಲಸದ ನಿಮಿತ್ತ ಕಂದಾಯ ಭವನಕ್ಕೆ ಆಗಮಿಸಿದ್ದ ಮುರುಳೀಧರ್ ತಮ್ಮ ಚುನಾವಣಾ ಕೆಲಸದ ಅಧಿಕೃತ ವಾಹನವನ್ನು ವಾಹನ ನಿಲ್ದಾಣ ಸ್ಥಳದಲ್ಲಿ ನಿಲ್ಲಿಸಿದ್ದರು. ಆ ಸಂದರ್ಭದಲ್ಲಿ ಆ ವಾಹನದಲ್ಲಿ ಅವರ ವಾಹನ ಚಾಲಕರು ಇದ್ದರು.
ಚುನಾವಣಾ ಕೆಲಸಗಳಿಗೆ ಸರ್ಕಾರಿ ವಾಹನವನ್ನು ವಶಪಡಿಸಿಕೊಳ್ಳುವ ಭರದಲ್ಲಿ ಜಯನಗರ ಆರ್ ಟಿಒ ಕಚೇರಿಯ ಅಧಿಕಾರಿಗಳು ಬೆಂಗಳೂರು ಜಿಲ್ಲಾ ಚುನಾವಣಾ ಅಧಿಕಾರಿಗಳಿಂದ ಅಧಿಕೃತ ಅನುಮತಿ ಪಡೆದ KA 04 G 1516 ಈ ವಾಹನವನ್ನು ಸೀಜ್ ಮಾಡಿದರು.
ಕೆಲಸ ಮುಗಿಸಿ ತಮ್ಮ ಕಾರನ್ನು ತರುವಂತೆ ವಾಹನ ಚಾಲಕನಿಗೆ ರಾಜ್ಯದ ಎಂಸಿಎಂಸಿ ಸದಸ್ಯ ಕಾರ್ಯದರ್ಶಿ ಮುರುಳೀಧರ್ ಕರೆ ಮಾಡಿದಾಗ, ಆ ವಾಹನವನ್ನು ಸಾರಿಗೆ ಇಲಾಖೆ ಅಧಿಕಾರಿಗಳು ವಶಕ್ಕೆ ಪಡೆದು ಬೆಂಗಳೂರು ಜಿಲ್ಲಾಧಿಕಾರಿ ಕಚೇರಿಯ ಸುಪರ್ದಿಗೆ ನೀಡಿರುವುದಾಗಿ ಅವರ ವಾಹನ ಚಾಲಕ ತಿಳಿಸಿದರು.
ಇದರಿಂದ ಕ್ಷಣಕಾಲ ಕೆಂಡಾಮಂಡಲರಾದ ಮುರುಳೀಧರ್ ಅವರು, ಜಿಲ್ಲಾಧಿಕಾರಿ ಕಚೇರಿಗೆ ತೆರಳಿ ಅಧಿಕಾರಿಗಳಿಗೆ ತಮ್ಮ ವಾಹನ ಚುನಾವಣಾ ಕೆಲಸಕ್ಕೆ ಅಧಿಕೃತವಾಗಿರುವ ಕಾರೆಂದು ಸಾಬೀತುಪಡಿಸಿದರು. ಅಲ್ಲದೆ ಈ ಸಂಬಂಧ ಬೆಂಗಳೂರು ನಗರಜಿಲ್ಲೆ ಜಿಲ್ಲಾಧಿಕಾರಿ ಹಾಗೂ ಹೆಚ್ಚುವರಿ ಜಿಲ್ಲಾ ಚುನಾವಣಾಧಿಕಾರಿ ದಯಾನಂದ್ ಜೊತೆ ದೂರವಾಣಿ ಕರೆ ಮಾಡಿ ಪರಿಸ್ಥಿತಿ ವಿವರಿಸಿದರು. ಬಳಿಕ ವಶಕ್ಕೆ ಪಡೆದ ಸ್ಕಾರ್ಪಿಯೋ ವಾಹನವನ್ನು ಚುನಾವಣಾ ಅಧಿಕಾರಿಗಳು ಬಿಡುಗಡೆ ಮಾಡಿದರು.
