ನವದೆಹಲಿ, ಮೇ.02 www.bengaluruwire.com : ಪ್ರಸಕ್ತ ಆರ್ಥಿಕ ವರ್ಷದ ಮೊದಲ ತಿಂಗಳಾದ ಏಪ್ರಿಲ್‌ನಲ್ಲಿ ಸರಕು ಮತ್ತು ಸೇವಾ ತೆರಿಗೆ (GST- ಜಿಎಸ್‌ಟಿ) ಸಂಗ್ರಹ ದಾಖಲೆ ಪ್ರಮಾಣದಲ್ಲಿ ಶೇ 12.6ರಷ್ಟು ಏರಿಕೆಯಾಗಿದ್ದು, ₹2.37 ಲಕ್ಷ ಕೋಟಿಯಾಗಿದೆ. ಈ ವಿದ್ಯಮಾನವು ಹಣಕಾಸು ವರ್ಷದ ಆರಂಭದಲ್ಲಿಯೇ ದೇಶದ ಆರ್ಥಿಕತೆಗೆ ಹೊಸ ಹುರುಪು ನೀಡಿದೆ.
ಮೇ 1 ರಂದು ಸರ್ಕಾರ ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ, ಇದು ಈತನಕದ ಗರಿಷ್ಠ ಸರಕು ಮತ್ತು ಸೇವಾ ತೆರಿಗೆ ಸಂಗ್ರಹವಾಗಿದೆ. ಈ ಹಿಂದಿನ ವರ್ಷದ ಏಪ್ರಿಲ್‌ನಲ್ಲಿ 2.1 ಲಕ್ಷ ಕೋಟಿ ರೂ. ಸಂಗ್ರಹವಾಗಿದ್ದು ಅತ್ಯಧಿಕವಾಗಿತ್ತು. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ತೆರಿಗೆ ಸಂಗ್ರಹದಲ್ಲಿ ಹೆಚ್ಚಿನ ಏರಿಕೆ ಕಂಡುಬಂದಿದೆ.
ಇದೇ ಮಾರ್ಚ್‌ನಲ್ಲಿ ಜಿಎಸ್‌ಟಿ ಸಂಗ್ರಹ 1.96 ಲಕ್ಷ ಕೋಟಿ ರೂ.ಗಳಷ್ಟಿತ್ತು. ವಾರ್ಷಿಕ ಸಂಗ್ರಹದ ಬೆಳವಣಿಗೆಯ ವೇಗವು ಶೇ. 12.6 ರಷ್ಟಿದ್ದು, ಇದು ಕೂಡ ಕಳೆದ 17 ತಿಂಗಳಲ್ಲಿಯೇ ಗರಿಷ್ಠವಾಗಿದೆ ಎಂದು ಕೇಂದ್ರ ಹಣಕಾಸು ಇಲಾಖೆ ತಿಳಿಸಿದೆ.
ಮಾರ್ಚ್‌ಗೆ ಕೊನೆಗೊಂಡ 2025ನೇ ಆರ್ಥಿಕ ವರ್ಷದ ಕೊನೆಯ ತ್ರೈಮಾಸಿಕದಲ್ಲಿ 5.75 ಲಕ್ಷ ಕೋಟಿ ರೂ. ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಸಂಗ್ರಹವಾಗಿತ್ತು. ಹೀಗಾಗಿ ಆರ್ಥಿಕತೆಗೆ ಈ ಮಟ್ಟದ ತೆರಿಗೆ ಸಂಗ್ರಹದಿಂದ ಹೆಚ್ಚಿನ ಬಲ ನೀಡಿದಂತಾಗಿದೆ.
ಐಜಿಎಸ್‌ಟಿ ಆದಾಯವು ಶೇ. 20.8 ರಷ್ಟು ಹೆಚ್ಚಾಗಿದ್ದು 46,913 ಕೋಟಿ ರೂ.ಗೆ ತಲುಪಿದ್ದರೆ, ದೇಶೀಯ ಆದಾಯವು ಶೇ. 10.7 ರಷ್ಟು ಏರಿಕೆ ಕಂಡಿದ್ದು 1.9 ಲಕ್ಷ ಕೋಟಿ ರೂ.ಗೆ ಮುಟ್ಟಿದೆ. ಆದರೆ, ಮರುಪಾವತಿಗಳು ಶೇ. 48.3 ರಷ್ಟು ಹೆಚ್ಚಾಗಿದ್ದು 27,341 ಕೋಟಿ ರೂ.ಗೆ ತಲುಪಿದೆ. ಇದರಿಂದ ನಿವ್ವಳ ತೆರಿಗೆ ಸಂಗ್ರಹದಲ್ಲಿ ಶೇ. 9.1ರಷ್ಟು ಬೆಳವಣಿಗೆ ಮಾತ್ರ ದಾಖಲಾಗಿದೆ. ಒಟ್ಟಾರೆ 2.09 ಲಕ್ಷ ಕೋಟಿ ರೂ. ನಿವ್ವಳ ಸರಕು ಮತ್ತು ಸೇವಾ ತೆರಿಗೆ ಸಂಗ್ರಹವಾಗಿದೆ.
ತ್ರೈಮಾಸಿಕ ಸಂಗ್ರಹದ ಬೆಳವಣಿಗೆಯು ಶೇ. 10.4 ರಷ್ಟಿದ್ದು, ಇದು ಒಂದು ವರ್ಷದಲ್ಲಿಯೇ ಅತಿ ಹೆಚ್ಚಿನದಾಗಿದೆ. 2025ನೇ ಆರ್ಥಿಕ ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ಇದು ಶೇ. 8.3 ರಷ್ಟಿತ್ತು.
ಏಪ್ರಿಲ್ ತಿಂಗಳಲ್ಲಿ 2.37 ಲಕ್ಷ ಕೋಟಿ ರೂ. ಜಿಎಸ್‌ಟಿ ಸಂಗ್ರಹವಾಗುವುದರೊಂದಿಗೆ ಸತತ ನಾಲ್ಕನೇ ತಿಂಗಳು 1.8 ಲಕ್ಷ ಕೋಟಿ ರೂ.ಗಿಂತ ಹೆಚ್ಚಿನ ಸರಕು ಮತ್ತು ಸೇವಾ ತೆರಿಗೆ ಸಂಗ್ರಹವಾದಂತಾಗಿದೆ. ಇದು ಕೂಡ ಗಮನಿಸಬೇಕಾದ ಅಂಶವಾಗಿದೆ.
ಬಜೆಟ್‌ನಲ್ಲಿ ಕೇಂದ್ರ ಸರ್ಕಾರವು ಹಾಲಿ 2026 ವರ್ಷದಲ್ಲಿ ಜಿಎಸ್‌ಟಿ ಆದಾಯದಲ್ಲಿ ಶೇ. 11ರಷ್ಟು ಹೆಚ್ಚಳವನ್ನು ನಿರೀಕ್ಷಿಸಿದೆ. ಕೇಂದ್ರ ಜಿಎಸ್‌ಟಿ ಮತ್ತು ಪರಿಹಾರ ಸೆಸ್ ಸೇರಿದಂತೆ 11.78 ಲಕ್ಷ ಕೋಟಿ ರೂ. ಸಂಗ್ರಹವಾಗಲಿದೆ ಎಂದು ಅಂದಾಜಿಸಲಾಗಿದೆ.
2024ರ ಏಪ್ರಿಲ್‌ನಲ್ಲಿ ₹2.10 ಲಕ್ಷ ಕೋಟಿ ಸಂಗ್ರಹವಾಗಿತ್ತು. ಪರೋಕ್ಷ ತೆರಿಗೆ ಪದ್ಧತಿ (2017ರ ಜುಲೈ 1) ಜಾರಿಗೆ ಬಂದ ಬಳಿಕ ದಾಖಲಾದ ಎರಡನೇ ಅತಿ ಹೆಚ್ಚು ಸಂಗ್ರಹ ಇದಾಗಿದೆ ಎಂದು ಕೇಂದ್ರ ಸರ್ಕಾರ ಗುರುವಾರ ಹೇಳಿದೆ.
