ಬೆಂಗಳೂರು, ಜು.12 www.bengaluruwire.com : ಟೊಮೋಟೊ ಬೆಲೆ ಕೆಜಿಗೆ 100-120 ರೂಪಾಯಿಗಳಾಗಿದ್ದು, ಗ್ರಾಹಕರು, ರೆಸ್ಟೋರೆಂಟ್‌ಗಳು ಮತ್ತು ಆನ್‌ಲೈನ್ ದಿನಸಿ ಸಂಸ್ಥೆಗಳ ಕಣ್ಣು ಕೆಂಪಾಗಿಸುತ್ತಿವೆ.
ರೆಸ್ಟೋರೆಂಟ್‌ಗಳಲ್ಲಿ ಸಲಾಡ್ ಪ್ಲೇಟ್‌ಗಳು ಮತ್ತು ಬರ್ಗರ್‌ಗಳಿಂದ ಟೊಮೋಟೊಗಳು ಈಗ ಸ್ಪಷ್ಟವಾಗಿ ಕಾಣೆಯಾಗುತ್ತಿದೆ. ಉದಾಹರಣೆಗೆ, ವೆಜ್ ಸಲಾಡ್‌ಗಳಲ್ಲಿ, ನಗರದ ಹಲವಾರು ರೆಸ್ಟೋರೆಂಟ್‌ಗಳು ಈಗ ಟೊಮೆಟೊಗಳನ್ನು ನೀಡುವುದನ್ನು ನಿಲ್ಲಿಸಿವೆ. ಅದರ ಬದಲಿಗೆ ಹೆಚ್ಚಿನ ಸೌತೆಕಾಯಿ ಚೂರುಗಳು ಮತ್ತು ಈರುಳ್ಳಿಗಳನ್ನು ನೀಡುತ್ತಿವೆ. ಮಂಗಳವಾರ ಕೋಲಾರದ ಎಪಿಎಂಸಿ ಯಾರ್ಡ್‌ನಲ್ಲಿ 15 ಕೆಜಿ ಟೊಮ್ಯಾಟೊ 2,200 ರೂ.ಗೆ ಮಾರಾಟವಾಗಿದ್ದು, ಚಿಲ್ಲರೆ ಮಾರಾಟ ದರದಲ್ಲಿ ಮತ್ತಷ್ಟು ಏರಿಕೆಯಾಗಿದೆ.
ಟೊಮೋಟೊ ವಿಚಾರವು ಎಷ್ಟು ಗಂಭೀರವಾಗಿದೆಯೆಂದರೆ, ಟೊಮೋಟೊ ಕಳ್ಳತನದ ನಿದರ್ಶನಗಳು ವರದಿಯಾಗಿವೆ. ಜುಲೈ 8 ರಂದು ಬೆಂಗಳೂರಿನ ಚಿಕ್ಕಜಾಲದಲ್ಲಿ 2.5 ಟನ್ ಟೊಮೆಟೊ ಸಾಗಿಸುತ್ತಿದ್ದ ಟ್ರಕ್ ಅನ್ನು ಅಪಹರಿಸಲಾಗಿತ್ತು. ಜುಲೈ 4 ರಂದು ಹಾಸನ ಜಿಲ್ಲೆಯ ಬೇಲೂರಿನಲ್ಲಿ ಕೃಷಿ ಭೂಮಿಯಿಂದ 2.7 ಲಕ್ಷ ಮೌಲ್ಯದ ಟೊಮೆಟೊಗಳನ್ನು ಕಳವು ಮಾಡಲಾಗಿತ್ತು. ರೆಸ್ಟೋರೆಂಟ್‌ಗಳು ಪ್ಯಾಕ್ ಮಾಡಿದ ಟೊಮೆಟೊ ಪ್ಯೂರಿ ಮತ್ತು ಕೆಚಪ್‌ನಂತಹ ಪರ್ಯಾಯಗಳಿಗೆ ಬಳಸುತ್ತಿದ್ದಾರೆ. ಮನೆಗಳಲ್ಲಿ ಹೆಂಗಸರು ದುಬಾರಿ ತರಕಾರಿಯನ್ನು ಸಂಪೂರ್ಣವಾಗಿ ಬಿಟ್ಟುಬಿಡುತ್ತಿದ್ದಾರೆ ಎಚ್ಚರಿಕೆಯಿಂದ ಅವುಗಳನ್ನು ಬಳಸುವ ಪರಿಸ್ಥಿತಿ ಬಂದೊದಗಿದೆ.
ಕೆಲವು ದೊಡ್ಡ ತಿನಿಸುಗಳು ತಮ್ಮ ಮೆನುವಿನಿಂದ ಟೊಮೆಟೊ ಆಧಾರಿತ ತಿಂಡಿಗಳನ್ನು ಸದ್ದಿಲ್ಲದೆ ತೆಗೆದುಹಾಕುತ್ತಿವೆ. ಕಲಾಸಿಪಾಳ್ಯದ ಸಗಟು ಮಾರುಕಟ್ಟೆಯಿಂದ ಹಾಗೂ ವಿಶೇಷವಾಗಿ ಕೋಲಾರದ ರೈತರಿಂದ ಟೊಮೋಟೊ ಪೂರೈಕೆಯಲ್ಲಿ ಮಾರಾಟಗಾರರು ಕೊರತೆ ಎದುರಿಸುತ್ತಿದ್ದಾರೆ ಎನ್ನುತ್ತಾರೆ ಚಿಲ್ಲರೆ ಮಾರಾಟಗಾರರು.
ಇನ್ನು ಒಂದು ತಿಂಗಳು ಬೆಲೆ ಕಡಿಮೆಯಾಗಲ್ಲ :
“ಬಹಳಷ್ಟು ರೆಸ್ಟೋರೆಂಟ್‌ಗಳು ಈಗ ಟೊಮೆಟೊ ಪ್ಯೂರಿ ಮತ್ತು ಟೊಮೆಟೊ ಆಧಾರಿತ ಆಹಾರ ಪದಾರ್ಥಗಳಿಗಾಗಿ ಪೇಸ್ಟ್‌ಗೆ ಬದಲಾಗಿವೆ. ಮೊದಲು ನಾವು ಇದನ್ನು ಶೇಕಡಾ 10 ರಷ್ಟು ಆಹಾರ ಪದಾರ್ಥಗಳಿಗೆ ಬಳಸುತ್ತಿದ್ದೆವು, ಈಗ ಶೇಕಡಾ 50-60 ರಷ್ಟು ಆಹಾರ ಪದಾರ್ಥಗಳನ್ನು ಟೊಮೆಟೊ ಪೇಸ್ಟ್, ಪ್ಯೂರಿ ಅಥವಾ ಕೆಚಪ್ ಬಳಸಿ ತಯಾರಿಸಲಾಗುತ್ತದೆ. ಅದೇ ದರದಲ್ಲಿ ಮಾರಾಟ ಮುಂದುವರಿಸಲು ಸಾಧ್ಯವಿಲ್ಲ ಎಂಬ ಕಾರಣಕ್ಕೆ ಕೆಲವರು ಟೊಮೇಟೊ ರೈಸ್ ಬಾತ್, ಟೊಮೇಟೊ ಆಮ್ಲೆಟ್ ಮುಂತಾದವುಗಳನ್ನು ಸ್ಥಗಿತಗೊಳಿಸಿದ್ದಾರೆ. ಟೊಮೋಟೊ ಬೆಲೆ ಇನ್ನು ಒಂದು ತಿಂಗಳು ಕಡಿಮೆಯಾಗುವುದಿಲ್ಲ ಎಂಬ ಮಾಹಿತಿಯಿದೆ. ಈಗ ಬರುತ್ತಿರುವ ಟೊಮೋಟೊ ಗುಣಮಟ್ಟವಿಲ್ಲ. ಆದರೆ ಅನಿವಾರ್ಯವಾಗಿದೆ” ಎಂದು ಬೃಹತ್ ಬೆಂಗಳೂರು ಹೋಟೆಲ್ ಅಸೋಸಿಯೇಷನ್ ಅಧ್ಯಕ್ಷ ಪಿ.ಸಿ.ರಾವ್ ಹೇಳಿದ್ದಾರೆ.
ಬೆಂಗಳೂರಿನಲ್ಲಿರುವ ಹಲವಾರು ರೆಸ್ಟೋರೆಂಟ್‌ಗಳು, ವಿಶೇಷವಾಗಿ ಸಣ್ಣ ಮಟ್ಟದ ಸರಣಿ ಹೋಟೆಲ್ ಗಳು ಈಗ ತಮ್ಮ ಮೆನು ಕಾರ್ಡ್‌ಗಳನ್ನು ಪರಿಷ್ಕರಿಸಲು ಚಿಂತನೆ ನಡೆಸುತ್ತಿವೆ.
“ಟೊಮೆಟೋ ಬೆಲೆ ಏರಿಕೆಯು ಹೆಚ್ಚು ಅಲ್ಪಾವಧಿಯದ್ದಾಗಿದೆ. ಅಕ್ಕಿ ಮತ್ತು ಹಾಲಿನಂತಹ ಇತರ ವಸ್ತುಗಳು ಸಹ ದುಬಾರಿಯಾಗಲಿವೆ, ವಿದ್ಯುತ್ ದರಗಳಂತಹ ಪರೋಕ್ಷ ವೆಚ್ಚಗಳು ಟೊಮ್ಯಾಟೊ ಬೆಲೆಯೊಂದಿಗೆ ಹೆಚ್ಚಿವೆ – ಕರ್ನಾಟಕ ಸರ್ಕಾರವು ಹಾಲಿನ ಬೆಲೆಯನ್ನು ಹೆಚ್ಚಿಸುವ ಸಾಧ್ಯತೆಯಿದೆ. ಆದ್ದರಿಂದ ನಾವು ತಿಂಡಿ ಬೆಲೆಯನ್ನು ಅದಕ್ಕೆ ತಕ್ಕಂತೆ ಹೆಚ್ಚಿಸದೆ ಬೇರೆ ದಾರಿಯಿಲ್ಲ” ಎಂದು ಪಿ.ಸಿ.ರಾವ್ ಹೇಳಿದ್ದಾರೆ.
ಇದನ್ನೂ ಓದಿ : BW SPECIAL | Chandrayaan-3 | ಚಂದ್ರಯಾನ-3 ಯೋಜನೆ ಉದ್ದೇಶ, ಗಗನ ನೌಕೆ ಮತ್ತು ರಾಕೆಟ್ ಕುರಿತ ಮಹತ್ವದ ವೈಜ್ಞಾನಿಕ ಮಾಹಿತಿ ಇಲ್ಲಿದೆ
ದರ್ಶಿನಿಗಳಿಗೆ ಹೊಡೆತ :
ಸಣ್ಣ ಮಟ್ಟದ ತಿಂಡಿ ತಿನಿಸುಗಳನ್ನು ಮಾರಾಟ ಮಾಡುವ ದರ್ಶಿನಿಗಳು (ಸಣ್ಣ ತಿನಿಸುಗಳು) ಟೊಮೋಟೋ ಬೆಲೆ ಏರಿಕೆಯಿಂದ ಸಂಕಟ ಅನುಭವಿಸುತ್ತಿವೆ. ಏಕೆಂದರೆ ಅವರ ಜನಪ್ರಿಯ ಆಹಾರ ಪದಾರ್ಥಗಳು – ಸಾಂಬಾರ್, ರಸಂ, ಟೊಮೆಟೊ ರೈಸ್, ಟೊಮೇಟೊ ಚಟ್ನಿ – ಎಲ್ಲವೂ ಟೊಮೊಟೊಗಳನ್ನು ಹೆಚ್ಚು ಅವಲಂಬಿಸಿವೆ. ಬಹುತೇಕ ಎಲ್ಲಾ ಗ್ರೇವಿಗಳಲ್ಲಿ ಟೊಮೆಟೊಗಳನ್ನು ಬಳಸುವುದರಿಂದ ಸಸ್ಯಾಹಾರಿ ರೆಸ್ಟೋರೆಂಟ್‌ಗಳು ಹೆಚ್ಚು ಹಿಟ್ ಆಗುತ್ತಿವೆ. ಇದೀಗ ಅವುಗಳಿಗೆ ಬೇರೆ ಆಯ್ಕೆ ಇಲ್ಲದಂತಾಗಿದೆ ”ಎಂದು ವಿಜಯನಗರದಲ್ಲಿ ದರ್ಶಿನಿ ನಡೆಸುವ ಮಾಲೀಕ ಸತೀಶ್ ಎಂಬುವರು ತಮ್ಮ ಸಮಸ್ಯೆಯನ್ನು ತೆರೆದಿಟ್ಟಿದ್ದಾರೆ.
ಸಣ್ಣ ರೆಸ್ಟೋರೆಂಟ್‌ಗಳು ತಕ್ಷಣವೇ ಬೆಲೆಗಳನ್ನು ಹೆಚ್ಚಿಸುವುದು ತುಂಬಾ ಅನುಕೂಲಕರವಲ್ಲ ಏಕೆಂದರೆ ಅವರ ಬಿಲ್ಲಿಂಗ್ ಯಂತ್ರಗಳನ್ನು ಮರು ಹೊಂದಾಣಿಕೆ ಮಾಡಬೇಕು ಮತ್ತು ಅನಗತ್ಯ ವೆಚ್ಚಗಳನ್ನು ಒಳಗೊಂಡಿರುವ ಮೆನು ಕಾರ್ಡ್‌ಗಳನ್ನು ಬದಲಾಯಿಸಬೇಕು. ಇಷ್ಟೆಲ್ಲಾ ತಾಪತ್ರೆಯ ಇಟ್ಟುಕೊಂಡು ಟೊಮೊಟೊ ಬೆಲೆ ಏರಿದಂತೆಲ್ಲಾ ಬೆಲೆ ಏರಿಕೆ ಮಾಡುವುದು ಅಷ್ಟು ಸುಲಭವಲ್ಲ ಎಂದು ಹೋಟೆಲ್ ಕ್ಷೇತ್ರ ಮತ್ತೊಬ್ಬರು ಹೀಗೆ ಪರಿಸ್ಥಿತಿಯನ್ನು ವಿವರಿಸಿದ್ದಾರೆ.
ಟೊಮೆಟೊ ಪೂರೈಕೆ ಕೊರತೆಯಿಂದ ಬೆಲೆ ಏರಿಕೆ- ಬೇಡಿಕೆ ಕುಸಿತ :
ಏತನ್ಮಧ್ಯೆ, ಬೆಂಗಳೂರಿನ ತಳ್ಳುವ ಗಾಡಿ ಮಾಲೀಕರು ಒಂದು ಕಿಲೋಗ್ರಾಂ ಟೊಮೆಟೊವನ್ನು ಸುಮಾರು 95-105 ರೂ.ಗಳಿಗೆ ಮಾರಾಟ ಮಾಡುತ್ತಿದ್ದಾರೆ. ಆದರೆ ಹೀಗೆ ಟೊಮೋಟೋಗಳನ್ನು ತಳ್ಳುವ ಗಾಡಿಯಿರಲಿ, ಸ್ಥಳೀಯ ಬೀದಿ ಬದಿ ವ್ಯಾಪಾರಸ್ಥರು ದುಬಾರಿ ಬೆಲೆ ಕೊಟ್ಟು ತಂದು ಮಾರಾಟ ಮಾಡುವುದನ್ನು ಕಡಿಮೆ ಮಾಡಿದ್ದಾರೆ. ಪೂರೈಕೆ ಹಾಗೂ ಕೈ ಸುಡುವ ಟೊಮೋಟೊ ಬೆಲೆ ಏರಿಕೆಯಿಂದ ಇದರ ಬೇಡಿಕೆಯೂ ಸ್ವಲ್ಪ ಮಟ್ಟಿಗೆ ಕುಸಿತವಾಗಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಕೆಜಿಗೆ 120 ರೂ. ನಂತೆ ಮಾರಾಟ ಮಾಡಲಾಗುತ್ತಿದೆ.
ಬೆಲೆಗಳು ಇನ್ನೂ ಹೆಚ್ಚಾದರೆ, ನಾವು ನಮ್ಮ ಮೆನುವಿನಿಂದ ಸಲಾಡ್ ಮತ್ತು ಟೊಮೆಟೊ ಕೆಚಪ್ ಅನ್ನು ಪಟ್ಟಿ ಮಾಡಲಿದ್ದೇವೆ. ತಾತ್ಕಾಲಿಕವಾಗಿ ಬೆಲೆಗಳನ್ನು ಹೆಚ್ಚಿಸುವುದರಲ್ಲಿ ಅರ್ಥವಿಲ್ಲ. ಅದರ ಬದಲು ಟೊಮೋಟೊ ಬಳಕೆಯನ್ನು ಆದಷ್ಟು ಮಟ್ಟಿಗೆ ಕಡಿಮೆ ಮಾಡಿ ನಷ್ಟವನ್ನು ತೂಗಿಸಲು ಹೋಟೆಲ್, ರೆಸ್ಟೋರೆಂಟ್ ನಡೆಸುವವರು ಹರಸಾಹಸ ಪಡುತ್ತಿದ್ದಾರೆ.
ಟೊಮೋಟೊ ಬೆಲೆ ಏರಿಕೆ ನಮ್ಮ ಲಾಭ ತಿಂದು ಹಾಕುತ್ತಿದೆ :
“ಟೊಮೋಟೊ ಬೆಲೆ ಏರಿಕೆ ನಮ್ಮ ಲಾಭವನ್ನೆಲ್ಲಾ ತಿಂದು ಹಾಕುತ್ತಿದೆ. ಈಗ ತಿಂಗಳಿಗೆ ನಮಗೆ ಸುಮಾರು 5 ಲಕ್ಷ ರೂಪಾಯಿ ನಷ್ಟವಾಗಿದೆ ನಮ್ಮ ಗ್ರೂಪಿಗೆ. ಹಾಗೆಂದು ನಮ್ಮ ಸರಣಿ ರೆಸ್ಟೋರೆಂಟ್ ಗಳಲ್ಲಿ ಇಡ್ಲಿ ಸಾಂಬಾರ್, ಊಟದ ಸಾಂಬಾರ್, ಟೊಮೋಟೊ ಸೂಪ್, ಉಪ್ಪಿಟ್ಟಿಗೆ, ಚಾಟ್ಸ್ ಸೇರಿದಂತೆ ಇನ್ನಿತರ ಆಹಾರಗಳಿಗೆ ಟೊಮೋಟೊ ಬದಲಿಗೆ ಬೇರೆ ಪರ್ಯಾಯವನ್ನು ಬಳಸುತ್ತಿಲ್ಲ. ಎಷ್ಟು ಬೆಲೆ ಏರಿಕೆಯಾದರೂ ಗುಣಮಟ್ಟಕ್ಕೆ ರಾಜಿಯಾಗುವ ಪ್ರಶ್ನೆಯಿಲ್ಲ. ನಮ್ಮ 25 ಬ್ರಾಂಚ್ ರೆಸ್ಟೋರೆಂಟ್ ಗಳಿಗೆ ಒಟ್ಟಾರೆ ಪ್ರತಿದಿನ 1,200 ಕೆ.ಜೆ ಟೊಮೋಟೊ ಅವಶ್ಯಕತೆಯಿದೆ. ಬೆಲೆ ಏರಿಕೆ ಕಾರಣಕ್ಕೆ 200 ಕೆ.ಜಿ ಕಡಿಮೆ ಖರೀದಿ ಮಾಡುವಂತಾಗಿದೆ. ನಾವು ಸಾಮಾನ್ಯವಾಗಿ ಸಗಟು ಮಾರುಕಟ್ಟೆಯಿಂದ 84 ರಿಂದ 100 ರೂಪಾಯಿ ತನಕ ಹಣ ಕೊಟ್ಟು ಖರೀದಿ ಮಾಡುತ್ತಿದ್ದೇವೆ. ಆದರೂ ಬೆಲೆ ಏರಿಕೆಯಿಂದ ಕಷ್ಟವಾಗಿದೆ ಎನ್ನುತ್ತಾರೆ ಪಾಕಶಾಲೆ ಗ್ರೂಪ್ ಆಫ್ ರೆಸ್ಟೋರೆಂಟ್ ವ್ಯವಸ್ಥಾಪಕ ನಿರ್ದೇಶಕ ಕೆ.ಎನ್.ವಾಸುದೇವ ಅಡಿಗ ಅವರು ಬೆಂಗಳೂರು ವೈರ್ ಗೆ ತಿಳಿಸಿದ್ದಾರೆ.
ರಾಜ್ಯದ ಪ್ರತಿ ತಾಲೂಕುಗಳಲ್ಲಿ ಹಣ್ಣು ತರಕಾರಿ ಕೋಲ್ಟ್ ಸ್ಟೋರೇಜ್ ಸ್ಥಾಪನೆ ಅಗತ್ಯ:
“ಅಕ್ಕಿ ದಾಸ್ತಾನು ಮಾಡಿದಂತೆಯೇ ಟೊಮೋಟೊ, ಹಣ್ಣು ಮತ್ತು ತರಕಾರಿಗಳಿಗೆ ರಾಜ್ಯ ಪ್ರತಿ ತಾಲೂಕುಗಳಲ್ಲಿ ವೈಜ್ಞಾನಿಕ ಶೀತಲೀಕರಣ ವ್ಯವಸ್ಥೆ ಕಲ್ಪಿಸಬೇಕು. ಹಣ್ಣು ಮತ್ತು ತರಕಾರಿಗಳನ್ನು ಗುಣಮಟ್ಟದ ಪ್ಯಾಕಿಂಗ್ ಮಾಡಿ, ಉತ್ತಮ ಗುಣಮಟ್ಟದ ಶೀತಲೀಕರಣ ವ್ಯವಸ್ಥೆ ಹೊಂದಿದ ಕೋಲ್ಡ್ ಸ್ಟೋರೇಜ್ ಗಳಲ್ಲಿಟ್ಟರೆ ಆರು ತಿಂಗಳುಗಳ ಕಾಲ ಆ ಹಣ್ಣು- ತರಕಾರಿಗಳು ಹಾಳಾಗುವುದಿಲ್ಲ. ಆಯಾ ತರಕಾರಿಗಳ ಕೊರತೆ ಕಂಡು ಬಂದಾಗ ಮಾರುಕಟ್ಟೆಗೆ ಅವುಗಳನ್ನು ನಿಯಮಿತವಾಗಿ ಪೂರೈಸುವ ವ್ಯವಸ್ಥೆ ಜಾರಿಯಾದಲ್ಲಿ ಹಣ್ಣು ತರಕಾರಿಗಳ ಪೂರೈಕೆ ಕೊರತೆ ಎದುರಾಗಲ್ಲ. ಬೆಲೆ ಏರಿಕೆಯ ಬಿಸಿ ಸಾಮಾನ್ಯ ನಾಗರೀಕರ ಮೇಲಾಗುವುದಿಲ್ಲ. ಈ ಕೋಲ್ಟ್ ಸ್ಟೋರೇಜ್ ಗಳನ್ನು ಸರ್ಕಾರವೇ ನಿರ್ವಹಣೆ ಮಾಡಬೇಕಿದೆ” ಎಂದು ವಾಸುದೇವ ಅಡಿಗ ಅವರು ಸರ್ಕಾರಕ್ಕೆ ಸಲಹೆ ನೀಡಿದ್ದಾರೆ.
ಕಲಾಸಿಪಾಳ್ಯ ಮಾರ್ಕೇಟ್ ನಲ್ಲಿ ಟೊಮೋಟೊ ಪೂರೈಕೆಯಲ್ಲಿ ಇಳಿಕೆ :
ಬೆಂಗಳೂರಿನ ಕಲಾಸಿಪಾಳ್ಯ ಹಾಗೂ ಸಗಟು ಮಾರುಕಟ್ಟೆಗಳಲ್ಲಿ ಪ್ರತಿ ಕೆಜೆ ಟೊಮೋಟೊ ಬೆಲೆ 80 ರೂ.ಗಳಾಗಿದೆ. ಕಲಾಸಿಪಾಳ್ಯ ಸಗಟು ವ್ಯಾಪಾರಿಯೊಬ್ಬರು, “ನಗರಕ್ಕೆ ಈ ಹಿಂದೆ ಸುಮಾರು 100 ಟ್ರಕ್‌ಗಳಲ್ಲಿ ಪ್ರತಿದಿನ ಟೊಮೆಟೊ ಬರುತ್ತಿತ್ತು. ಆದರೆ ಈಗ ಅವುಗಳ ಸಂಖ್ಯೆ ಗಮನಾರ್ಹವಾಗಿ ಕಡಿಮೆಯಾಗಿ ಕೇವಲ 15 ಟ್ರಕ್‌ಗಳಿಗೆ ಬಂದು ನಿಂತಿದೆ. “ಬೆಂಗಳೂರಿಗೆ ಟೊಮೋಟೊ ಪ್ರಮುಖವಾಗಿ ಕೋಲಾರ, ಚಿಂತಾಮಣಿ ಮತ್ತು ಇತರ ಹತ್ತಿರದ ಸ್ಥಳಗಳಿಂದ ಬರುತ್ತಿದೆ. ಟೊಮೆಟೊ ಸಮರ್ಪಕವಾಗಿ ಪೂರೈಕೆಯಾಗದ ಹೊರತು ಬೆಲೆ ಕಡಿಮೆಯಾಗುವ ಸಾಧ್ಯತೆಯಿಲ್ಲ” ಎಂದು ಹೇಳಿದ್ದಾರೆ.
ಟೊಮೋಟೊ ಬದಲಿಗೆ ಪರ್ಯಾಯ ತರಕಾರಿ ಬಳಕೆ :
ಹೆಚ್ಚಿನ ಟೊಮೋಟೊ ಬೆಲೆಗಳನ್ನು ನಿಭಾಯಿಸಲು, ಕೆಲವು ಗೃಹಿಣಿಯರು ತಮ್ಮ ದಿನನಿತ್ಯದ ತಿಂಡಿ- ಅಡುಗೆಗಳಲ್ಲಿ ಟೊಮೋಟೊಗೆ ಬದಲಿಯಾಗಿ ಬೇರೆ ತರಕಾರಿಗಳು ಹಾಗೂ ಟೊಮೊಟೊ ಪ್ಯೂರಿ, ಟೊಮೋಟೊ ಪೇಸ್ಟ್ ಪ್ಯಾಕ್ ಗಳನ್ನು ಬಳಸಲು ಪ್ರಾರಂಭಿಸಿದ್ದಾರೆ. ಇದಲ್ಲದೆ ನಿಂಬೆ, ಹುಣಸೆಹಣ್ಣು, ಮಾವಿನಕಾಯಿ ಪುಡಿ, ಬೀಟ್‌ರೂಟ್, ಈರುಳ್ಳಿ ಮತ್ತು ಸಿಹಿ ಕುಂಬಳಕಾಯಿ ಮತ್ತಿತರ ತರಕಾರಿಗಳನ್ನು ಬಳಸುತ್ತಿದ್ದಾರೆ.
ನಗರದ ಜ್ಞಾನಭಾರತಿಯ ಗೃಹಿಣಿ ನಾಗರತ್ನ ಎಂಬುವರು ಹೇಳುವಂತೆ “ ಕೆಲವು ತಿಂಗಳ ಹಿಂದೆ ಟೊಮೆಟೊವನ್ನು ಕೆಜಿಗೆ 20-30 ರೂ.ಗೆ ಖರೀದಿಸುತ್ತಿದ್ದೆ. ಆದರೆ ಈಗ, ಬೆಲೆಗಳು ಕೆಜಿಗೆ 100 ರೂಪಾಯಿಗಳನ್ನು ಮೀರಿದೆ. ಆದ್ದರಿಂದ ಬೆಲೆ ಸ್ಥಿರವಾಗುವವರೆಗೆ ನಾನು ಸದ್ಯಕ್ಕೆ ಟೊಮೋಟೊ ಬಳಕೆಯನ್ನು ನಿಲ್ಲಿಸಲು ನಿರ್ಧರಿಸಿದ್ದೇನೆ” ಎಂದು ಅವರು ಹೇಳಿದ್ದಾರೆ.
